Di Wan dɛn We Gɛt Fri-An Go Gɛt Gladi-At

 1. Wetin sho se Jiova gɛt fri-an?

TƐM bin de we na Jiova in wangren bin de. Dɔn i disayd fɔ gi layf to enjɛl dɛn na ɛvin ɛn mɔtalman dɛn na di wɔl. Jiova, “di Gɔd we gladi ɔltɛm,” lɛk fɔ gi gud tin dɛn. (Fɔs Lɛta to Timoti 1:​11, NW; Jems 1:​17) Ɛn bikɔs Jiova want mek wi gɛt gladi-at, i dɔn sho wi aw fɔ gɛt fri-an.—Lɛta Fɔ Rom 1:​20.

2, 3. (a) Wetin mek wi go gɛt gladi-at we wi fri-an? (b) Wetin wi go lan insay dis atikul?

² Gɔd mek mɔtalman lɛk aw i tan. (Jɛnɛsis 1:​27) Dis min se Jiova mek wi wit di kwaliti dɛn we i gɛt. Fɔ mek wi gɛt Jiova in blɛsin ɛn tru tru gladi-at, wi nid fɔ falamakata am. Wi nid fɔ sho se wi bisin bɔt ɔda pipul dɛn ɛn gi dɛn wetin wi gɛt wit ɔl wi at. (Lɛta Fɔ Filipay 2:​3, 4; Jems 1:​5) Wetin mek? Na bikɔs na da we de Jiova mek wi. Pan ɔl we wi nɔ pafɛkt, wi kin ebul fɔ falamakata Jiova ɛn gɛt fri-an.

³ Wi de kam tɔk naw bɔt di lɛsin dɛn we de insay di Baybul we go ɛp wi fɔ gɛt fri-an. Wi go lan wetin mek Jiova kin gladi we wi de sho se wi gɛt fri-an. Wi go lan bak aw fri-an go ɛp wi fɔ du di wok we Jiova dɔn gi wi fɔ du ɛn wetin mek wi go gɛt gladi-at we wi fri-an. Wi go tɔk bak wetin mek wi fɔ kɔntinyu fɔ sho se wi gɛt fri-an.

4, 5. Aw Jiova ɛn Jizɔs dɔn sho fri-an? Wetin mek wi fɔ falamakata dɛn?

⁴ Jiova want mek wi falamakata am, so i kin gladi we wi gɛt fri-an. (Lɛta Fɔ Ɛfisɔs 5:​1) Jiova want wi fɔ gɛt gladi-at. Wi no dis bay di wɔndaful we aw i mek wi, di fayn we aw i mek di wɔl, ɛn ɔltin we de insay de fɔ mek wi go ɛnjɔy. (Sam 104:​24; 139:​13-16) We wi tray fɔ mek ɔda pipul dɛn gladi dat de sho se wi de ɔnɔ Jiova.

⁵ Dɔn bak, wi de falamakata Jizɔs we bin sɛt di bɛst ɛgzampul bɔt aw pɔsin go gɛt fri-an. I bin tɔk se: “Una fɔ tan lɛkɛ Mɔtalman Pikin, we nɔ kam fɔ mek mɔtalman bi in savant, bɔt kam fɔ bi dɛn savant ɛn fɔ gi in layf fɔ sev plɛnti plɛnti pipul.” (Matyu 20:​28) Di apɔsul Pɔl bin ɛnkɔrej Kristian dɛn se: “Una kɔntinyu fɔ tink lɛk aw Krays Jizɔs bin de tink . . . I bin put insɛf dɔŋ ɛn mek insɛf lɛk slev ɛn kam fɔ bi mɔtalman.” (Lɛta fɔ Filipay 2:​5, 7, NW) So wi fɔ aks wisɛf dis kwɛstyɔn, ‘A ebul fɔ falamakata Jizɔs in ɛgzampul fayn fayn wan?’—Rid Pita In Fɔs Lɛta 2:​21.

 6. Us lɛsin wi lan frɔm di stori we Jizɔs bin pul bɔt di Samɛritan? (Luk di pikchɔ nia dis atikul in taytul.)

⁶ Jiova kin gladi we i de si we wi de falamakata di fayn ɛgzampul we in ɛn Jizɔs dɔn sɛt fɔ wi. Wi kin du dis bay we wi de sho se wi bisin bɔt ɔda pipul dɛn ɛn bay we wi de fɛn we fɔ ɛp dɛn. Jizɔs bin sho aw dis impɔtant we i bin tɔk bɔt di stori bɔt di Samɛritan. (Rid Lyuk 10:​29-37.) I bin tich in disaypul dɛn se dɛn fɔ ɛp ɔda pipul dɛn ilɛk udat dɛn bi ɔ usay dɛn kɔmɔt. Yu mɛmba wetin mek Jizɔs bin pul dis stori? Na bikɔs wan man we na Ju bin aks am se: “Udat na mi neba?” Di ansa we Jizɔs bin gi tich wi se jɔs lɛk di Samɛritan, wi fɔ gɛt fri-an if wi want fɔ mek Jiova gladi.

 7. Aw wi go sho se wi biliv se di we aw Jiova de du tin na di bɛst? Ɛksplen.

⁷ Wan ɔda rizin we mek wi fɔ gɛt fri-an gɛt sɔntin fɔ du wit wetin bin apin na di gadin we bin de na Idɛn. Setan bin tɔk se Adam ɛn Iv go gladi pas aw dɛn de if dɛn nɔ obe Jiova, ɛn if dɛn jɔs tink bɔt dɛnsɛf nɔmɔ. Iv bin de tink bɔt insɛf nɔmɔ ɛn i bin want fɔ tan lɛk Gɔd. Ɛn Adam bin de tink bɔt insɛf nɔmɔ ɛn i bin want fɔ du wetin Iv want pas fɔ du wetin go mek Gɔd gladi. (Jɛnɛsis 3:​4-6) Dis bin briŋ big big prɔblɛm. Dis sho klia wan se nɔbɔdi nɔ go gladi if i jɔs bisin bɔt insɛf nɔmɔ. Bɔt we wi bisin bɔt ɔda pipul dɛn ɛn gɛt fri-an, wi de sho se na di bɛst we Jiova de du tin.

 8. Wetin mek Adam ɛn Iv bin fɔ dɔn tink bɔt ɔda pipul dɛn?

⁸ Pan ɔl we na Adam ɛn Iv nɔmɔ bin de na di gadin we bin de na Idɛn, dɛn fɔ dɔn stil tink bɔt ɔda pipul dɛn. Wetin mek? Na bikɔs Jiova bin dɔn gi dɛn wok fɔ du. I bin tɛl dɛn fɔ fulɔp di wɔl wit dɛn pikin dɛn ɛn dɛn fɔ mek di wan ol wɔl bi Paradays. (Jɛnɛsis 1:​28) I go bi se Adam ɛn Iv bin want dɛn pikin dɛn we dɛn go bɔn fɔ gɛt gladi-at, jɔs lɛk aw Jiova bin want dɛn ɔl fɔ gɛt gladi-at. Dɛn ɔl fɔ wok togɛda fɔ mek di ol wɔl bi Paradays. Dat fɔ dɔn bi big big wok fɔ dɛn!

 9. Wetin mek mɔtalman bin fɔ dɔn gladi if dɛn bin ɛp fɔ mek di wɔl bi Paradays?

⁹ Pafɛkt mɔtalman dɛn go nid bak fɔ wok wit Jiova fɔ mek di ol wɔl bi Paradays ɛn fɔ mek wetin Jiova want bi. Dat fɔ dɔn mek wi ɛp fɔ mek wetin Jiova want bi. (Di Ibru Pipul Dɛn 4:​11, NW) Imajin aw wi fɔ bin dɔn satisfay ɛn ɛnjɔy fɔ du dis wok! Jiova bin fɔ dɔn rili blɛs dɛn fɔ we dɛn bisin bɔt ɔda pipul dɛn ɛn nɔ jɔs de tink bɔt dɛnsɛf nɔmɔ.

10, 11. Wetin go ɛp wi fɔ prich ɛn mek disaypul dɛn?

¹⁰ Tide, Jiova dɔn gi wi wan spɛshal wok fɔ du. I want wi fɔ prich ɛn mek disaypul dɛn. Fɔ du dis wok, wi fɔ rili bisin bɔt ɔda pipul dɛn. Infakt, wi go kɔntinyu fɔ du dis wok if nɔmɔ wi de du am fɔ di rayt rizin. Dat na bikɔs wi lɛk Jiova ɛn wi lɛk pipul dɛn.

¹¹ Pɔl bin tɔk se in ɛn ɔda fɔstɛm Kristian dɛn bin ‘wok togɛda wit Gɔd’ bikɔs dɛn bin de prich ɛn tich pipul dɛn di trut. (Fɔs Lɛta fɔ Kɔrint 3:​6, 9, NW) Tide, wisɛf go ‘wok togɛda wit Gɔd’ bay we wi de gi wi tɛm, trɛnk, ɛn wetin wi gɛt fɔ du di prichin wok we Gɔd dɔn gi wi. Dis na big big ɔnɔ!

12, 13. Wetin yu go se na di blɛsin dɛn we pɔsin go gɛt we i de mek disaypul dɛn?

¹² We wi gɛt fri-an, dat de mek wi yuz wi tɛm ɛn trɛnk fɔ prich ɛn tich ɔda pipul dɛn ɛn dis kin mek wi gɛt gladi-at. Dat na wetin bɔku brɔda ɛn sista dɛn we gɛt di chans fɔ kɔndɔkt Baybul stɔdi dɛn kin tɔk. Wi kin rili gladi fɔ si di pipul dɛn we wi de stɔdi di Baybul wit de gladi we dɛn de ɔndastand wetin di Baybul de tich wi, fɔ gɛt mɔ fet, chenj di we aw dɛn bin de liv dɛn layf, ɛn bigin fɔ tɛl ɔda pipul dɛn bɔt wetin dɛn de lan. Jizɔs insɛf bin gladi we di 70 pipul dɛn we i bin sɛn fɔ prich bin ‘kam bak wit gladi-at’ bikɔs dɛn bin gɛt fayn fayn tin dɛn we bin apin to dɛn.—Lyuk 10:​17-21.

¹³ Wi brɔda ɛn sista dɛn ɔlsay na di wɔl kin gladi we dɛn de si aw di Baybul in mɛsej de ɛp pipul dɛn fɔ liv bɛtɛ layf. Fɔ ɛgzampul, wan yɔŋ sista we nem Ana bin want fɔ du mɔ fɔ Jiova.a (Luk di futnot.) So i bin muf go na wan eria na di Ist pat na Yurop usay dɛn nid mɔ pipul dɛn fɔ prich. Dis sista bin rayt se: “Bɔku chans de fɔ kɔndɔkt Baybul stɔdi dɛn na ya, ɛn a rili lɛk dat. Mi prichin wok de mek a rili gɛt gladi-at. We a kin go na os, a nɔ kin ivin tink bɔt misɛf. A kin tink bɔt di wan dɛn we a de stɔdi wit, lɛk dɛn prɔblɛm dɛn ɛn tin dɛn we de wɔri dɛn. A kin fɛn we fɔ ɛnkɔrej dɛn ɛn ɛp dɛn fɔ du wetin dɛn de lan. Ɛn a dɔn biliv tranga wan se ‘di pɔsin we de gi gɛt blɛsin [gladi-at] pas di pɔsin we de gɛt.’”—Di Apɔsul Dɛn Wok [Akt] 20:​35.

14. Aw yu go ɛnjɔy yu prichin wok pan ɔl we pipul dɛn nɔ want fɔ lisin?

¹⁴ Wi go stil gɛt gladi-at we wi de prich ilɛksɛf pipul dɛn nɔ de lisinbikɔs wi dɔngi dɛn di chans fɔ yɛri di gud nyuz. Jiova want wi fɔ du di sem tin we i bin tɛl Izikɛl fɔ du we i se: “Yu go tɛl dɛm wetin a se, wɛda dɛn gri fɔ lisin ɔ nɔt.” (Izikɛl 2:​7; Ayzaya 43:​10) Fɔ prich Gɔd in mɛsej de mek wi gladi, ilɛk wetin pipul dɛn tɔk ɔ du. Wi no se Jiova valyu wi fɔ we wi de du ɔl wetin wi ebul fɔ prich in mɛsej. (Rid Di Ibru Pipul Dɛn 6:​10.) Wan brɔda bin tɔk bɔt in prichin wok se: “Wi dɔn plant, wi dɔn wata, ɛn wi pre se Jiova go mek di intrɛst we di pipul dɛn gɛt gro.”—Fɔs Lɛta Fɔ Kɔrint 3:​6.

15. Yu tink se wi fɔ sho fri-an nɔmɔ if pipul dɛn tɛl wi tɛnki? Ɛksplen.

¹⁵ Jizɔs want fɔ mek wi gɛt fri-an bikɔs dat de mek wi gɛt gladi-at. We wi gɛt fri-an, dat go mek bɔku pipul dɛnsɛf gɛt fri-an. So i ɛnkɔrej wi se: “Una gi ɛn Gɔd insɛf go gi una, ɛn dɛn tin we i gi una, go so plɛnti, i go jɛs tan lɛkɛ wɛn dɛn ful kitul wit sɔntin, dɛn prɛs am, dɛn shek am ɛn i rɔnoba. If una gi plɛnti, Gɔd go gi una plɛnti; if una nɔ gi plɛnti, Gɔd nɔ go gi una plɛnti.” (Lyuk 6:​38) Na tru se nɔto ɔlman go tɛl yu tɛnki fɔ we yu sho fri-an. Bɔt pan ɔl we dɛn nɔ gɛt tɛnki, kɔntinyu fɔ de gi. Yu nɔ go ɛva no di kayn gud we yu du we yu jɔs du wan gud tin nɔmɔ.

16. Udat wi fɔ sho fri-an to? Wetin mek?

¹⁶ Fɔ tru, pipul dɛn we gɛt fri-an nɔ de gi bikɔs dɛn want fɔ gɛt sɔntin bak. Jizɔs bin tɔk se: “Wɛn yu de kɔl pipul fɔ kam it, kɔl dɛn pipul we nɔ gɛt natin, dɛn wan we nɔ gɛt sɔm pat pan dɛn bɔdi, dɛn wan we nɔ ebul waka, ɛn dɛn wan we blɛn. If yu du so, yu go gɛt blɛsin bikɔs dɛn kayn pipul de nɔ go ebul fɔ tɔn di gud we yu du fɔ dɛn gi yu bak.” (Lyuk 14:​13, 14) Di Baybul tɔk bak se: “Udat gɛt frian ɛn de fid poman de gɛt blɛsin,” ɛn “Pɔsin we de sɔri fɔ udat nɔ ebul insɛf go gɛt blɛsin.” (Prɔvabs 22:​9; Sam 41:​1) Wi fɔ gɛt fri-an bikɔs wi rili want fɔ ɛp ɔda pipul dɛn.

17. Wetin na sɔm we dɛn we wi kin gi we kin mek wi gɛt gladi-at?

¹⁷ We Pɔl bin yuz di wɔd dɛn we Jizɔs bin tɔk fɔ se “di pɔsin we de gi gɛt blɛsin pas di pɔsin we de gɛt,” i nɔ bin jɔs de tɔk bɔt fɔ gi mɔni ɔ prɔpati to ɔda pipul dɛn nɔmɔ. I bin min bak se wi fɔ ɛnkɔrej pipul dɛn, yuz di Baybul fɔ advays dɛn, ɛn du ɔda tin dɛn fɔ ɛp dɛn. (Di Apɔsul Dɛn Wok [Akt] 20:​31-35) Di tin dɛn we Pɔl bin tɔk ɛn du bin tich wi se i impɔtant fɔ mek wi yuz wi tɛm ɛn trɛnk, fɔ ɛp ɔda pipul dɛn ɛn fɔ sho se wi lɛk dɛn.

18. Wetin bɔku masta sabi bukman dɛn tɔk bɔt fri-an?

¹⁸ Masta sabi bukman dɛn we de stɔdi di we aw mɔtalman de biev dɔn kam fɔ no se we pɔsin de gi dat kin mek i gɛt gladi-at. Insay wan atikul, pipul dɛn bin tɔk se dɛn kin gladi pasmak we dɛn du fayn tin fɔ ɛp ɔda pipul dɛn. Masta sabi bukman dɛn tɔk se we wi ɛp ɔda pipul dɛn, dat de mek wi rili gladi ɛn satisfay. Sɔm ɔda wan dɛn tɔk bak se sɔm pipul dɛn kin ɛp fɔ wok fɔ ɔda pipul dɛn bikɔs dat de mek dɛn gɛt gladi-at ɛn wɛlbɔdi. Fɔ tru, wetin dɛn dɔn notis nɔ sɔprayz wi bikɔs di Wan we mek ɔltin we na Jiova dɔn tɔk se we wi gi wi go gɛt gladi-at.—Sɛkɛn Lɛta To Timoti 3:​16, 17.

19, 20. Wetin mek yu want fɔ gɛt fri-an?

¹⁹ I nɔ kin izi fɔ lɛ wi kɔntinyu fɔ gɛt fri-an if di pipul dɛn we de arawnd wi jɔs bisin bɔt dɛnsɛf nɔmɔ. Bɔt Jizɔs bin mɛmba wi se di tu lɔ dɛn we pas ɔl na fɔ lɛk Jiova wit ɔl wi at, wit ɔl wi layf, wit ɔl wi maynd, ɛn wit ɔl wi trɛnk, dɔn wi fɔ lɛk wi neba dɛn lɛk aw wi lɛk wisɛf. (Mak 12:​28-31, NW) Insay dis atikul, wi dɔn lan se di wan dɛn we lɛk Jiova de falamakata am. Jiova ɛn Jizɔs gɛt fri-an. Dɛn de ɛnkɔrej wi fɔ falamakata dɛn ɛgzampul bikɔs dɛn no se dat go mek wi gɛt tru tru gladi-at. If wi gɛt fri-an bay wetin wi de du fɔ Gɔd ɛn fɔ wi neba dɛn, dat go mek wi ɔnɔ Jiova ɛn dat go bɛnifit wi ɛn ɔda pipul dɛn.

²⁰ Fɔ tru, yu dɔn de du yu bɛst fɔ gɛt fri-an ɛn fɔ ɛp ɔda pipul dɛn mɔ to yu Kristian brɔda ɛn sista dɛn. (Lɛta Fɔ Galeshya 6:​10) If yu kɔntinyu fɔ gɛt fri-an, pipul dɛn go gladi fɔ yu ɛn lɛk yu, ɛn yusɛf go gɛt gladi-at. Di Baybul tɔk se: “Pɔsin we gɛt fri-an go go bifo, ɛn di wan we de mek ɔda pipul dɛn fil fayn insɛf go fil fayn.” (Prɔvabs 11:​25, NW) Bɔku we dɛn de we wi go sho se wi bisin bɔt ɔda pipul dɛn bay we wi de du gud ɛn gɛt fri-an pan ɛnitin we wi de du ɛn we wi de du wi prichin wok. Insay di nɛks atikul wi go bɔt sɔm pan dɛn we dɛn ya.