‘If Una Jɔs De Mɛmba Wetin Gɔd in spirit Want Nɔmɔ, Una Go Gɛt di Tru Layf ɛn Kol At’

1, 2. Wetin mek anɔyntɛd Kristian dɛn want fɔ no bɔt wetin de na Lɛta Fɔ Rom chapta 8?

YU GO dɔn rid Lɛta Fɔ Rom 8:​15-17 we wi de du di Mɛmorial fɔ mɛmba Jizɔs in day. Dɛn vas ya de ɛksplen aw anɔyntɛd Kristian dɛn no se dɛn gɛt di op fɔ de na ɛvin sote go. Lɛta Fɔ Rom 8:​1 se di anɔyntɛd dɛn gɛt “wanwɔd wit Jizɔs Krays.” Fɔ se Lɛta Fɔ Rom chapta 8 na fɔ anɔyntɛd dɛn nɔmɔ? Ɔ i go ɛp di wan dɛn bak we gɛt di op fɔ de na dis wɔl sote go?

² Na fɔ di anɔyntɛd dɛn mɔ dɛn rayt Lɛta Fɔ Rom chapta 8. Dɛn gɛt “Gɔd in spirit” ɛn dɛn ‘de wet fɔ di tɛm we Gɔd go mek dɛn bi in pikin dɛn ɛn fri dɛn bɔdi, wɛn i gi dɛn nyu bɔdi.’ (Lɛta Fɔ Rom 8:​23) Tumara bambay, dɛn go bi Gɔd in pikin dɛn na ɛvin. Fɔseka di day we Jizɔs day fɔ mɔtalman Jiova dɔn fɔgiv dɛn sin. Jiova de si dɛn naw as pipul dɛn we de du wetin rayt so dat dɛn go bi in pikin dɛn.—Lɛta Fɔ Rom 3:​23-26; 4:​25; 8:​30.

 3. Wetin mek di wan dɛn we gɛt di op fɔ de na di wɔl fɔ stɔdi Lɛta Fɔ Rom chapta 8?

³ Bɔt insay di Baybul buk we nem Lɛta Fɔ Rom, Pɔl bin rayt bɔt wan man we nɔto bin anɔyntɛd bɔt stil Jiova bin si am as pɔsin we de du wetin rayt na in yay. Dis man ya na Ebraam. Dis fetful man bin dɔn liv lɔng lɔngtɛm bifo Jizɔs day fɔ sev mɔtalman. (Rid Lɛta Fɔ Rom 4:​20-22.) Tide sɛf, Jiova kin si di fetful Kristian dɛn we gɛt di op fɔ de na di wɔl sote go as pipul dɛn we de du wetin rayt. Dɛnsɛf kin bɛnifit frɔm di advays we de na Lɛta Fɔ Rom chapta 8.

 4. We wi rid Lɛta Fɔ Rom 8:​21, us kwɛstyɔn wi fɔ aks wisɛf?

⁴ Na Lɛta Fɔ Rom 8:​21, Jiova mek wi no klia wan se in nyu wɔl go kam ɛn mɔtalman go kɔmɔt pan sin ɛn day. Dis vas se “dɛn go fri, lɛkɛ aw Gɔd in pikin dɛn dɔn fri.” Yu de si yusɛf na di nyu wɔl? Lɛ wi tɔk bɔt wetin wi fɔ du fɔ de de.

 5. Udat dɛn Pɔl tɔk bɔt na Lɛta Fɔ Rom 8:​4-13?

⁵ Rid Lɛta Fɔ Rom 8:​4-13. Na Lɛta Fɔ Rom chapta 8, Pɔl tɔk bɔt tu kayn pipul dɛn, dɛn “pipul we de fala wetin dɛn at tɛl dɛn” ɛn dɛn wan “we de du wetin Gɔd in spirit tɛl dɛn fɔ du.” Sɔm pipul dɛn tink se Pɔl bin de tɔk bɔt di wan dɛn we nɔto Kristian ɛn di wan dɛn we na Kristian. Bɔt ya Pɔl bin de rayt to Kristian dɛn, di wan dɛn we Gɔd dɔn “kɔl fɔ bi in yon pipul.” (Lɛta Fɔ Rom 1:​7) So dɛn “pipul we de fala wetin dɛn at tɛl dɛn” ɛn dɛn wan “we de du wetin Gɔd in spirit tɛl dɛn fɔ du” na bin Kristian dɛn. Aw dɛn bin difrɛn?

6, 7. Insay Lɛta Fɔ Rom 8:​4-13 wetin Pɔl bin min we i tɔk bɔt di wan dɛn we de “fala wetin dɛn at tɛl dɛn”?

⁶ Di original Grik wɔd we dɛn yuz na dis vas, dɛn translet am na ɔda vas dɛn as “fala wetin dɛn at tɛl dɛn.” Sɔntɛnde, i kin min wi bɔdi. (Lɛta Fɔ Rom 2:​28; Fɔs Lɛta Fɔ Kɔrint 15:​39, 50) Dis wɔd kin min bak famili layn. Fɔ ɛgzampul, di Baybul se we Jizɔs “na bin mɔtalman na bin wan pan Devid in grampikin pikin dɛm.”—Lɛta Fɔ Rom 1:​3; 9:​3.

⁷ So wetin Pɔl bin min we i tɔk bɔt di wan dɛn we de “fala wetin dɛn at tɛl dɛn,” na Lɛta Fɔ Rom 8:​4-13? Fɔ no di ansa, lɛ wi luk na Lɛta Fɔ Rom 7:​5. Pɔl bin rayt de se: “Di tɛm we wi bin jɛs de du ɛnitin we wi at gi wi fɔ du, wi bin de fala wi at fɔ du plɛnti bad tin, bikɔs nɔmɔ di lɔ bin se wi nɔ fɔ du dɛn.” Insay dis vas Pɔl bin ɛksplen se pipul dɛn we de “fala wetin dɛn at tɛl dɛn” na pipul dɛn we de du ɛnitin we dɛn want.

 8. Wetin mek Pɔl bin nid fɔ wɔn anɔyntɛd Kristian dɛn fɔ mek dɛn nɔ “fala wetin dɛn at tɛl dɛn”?

⁸ Wetin mek Pɔl bin wɔn anɔyntɛd kristian dɛn fɔ mek dɛn nɔ “fala wetin dɛn at tɛl dɛn”? Ɛn wetin mek ɔlman we na kristian nid dis sem wɔnin tide? Bikɔs ɛni wan pan Gɔd in fetful savant dɛn go bigin fɔ mek di tin dɛn we i want fɔ bi di men tin na in layf. Fɔ ɛgzampul, Pɔl bin rayt se sɔm pan di brɔda dɛn na Rom bin “de wok fɔ satisfay dɛnsɛf nɔmɔ.” We Pɔl tɔk dis i go mɔs dɔn min se na mami ɛn dadi biznɛs, it, ɔ ɛnjɔymɛnt bin impɔtant pas ɔl ɔda tin na dɛn layf. (Lɛta Fɔ Rom 16:​17, 18; Lɛta Fɔ Filipay 3:​18, 19; Jud In Lɛta 4, 8, 12) Ɛn fɔ sɔm tɛm, sɔntin bin de apin na di kɔngrigeshɔn na Kɔrint. Wan brɔda bin de du mami ɛn dadi biznɛs wit in “stɛpmama.” (Fɔs Lɛta Fɔ Kɔrint 5:​1) Fɔ tru, dɛn Kristian dɛn we bin de trade bin nid fɔ lisin to Pɔl in wɔnin ɛn nɔ “fala wetin dɛn at tɛl dɛn.”—Lɛta Fɔ Rom 8:​5, 6.

 9. Wetin Lɛta Fɔ Rom 8:​6 nɔ min?

⁹ Dis wɔnin gɛt sɔntin fɔ du wit wisɛf tide. Ivin pɔsin we dɔn sav Jiova fɔ lɔng tɛm kin bigin fɔ “fala wetin [in] at tɛl” am. Bɔt fɔ se Pɔl bin de tɔk se wi nɔ fɔ ɛva tink bɔt tin dɛn lɛk it, wok, ɛnjɔymɛnt, ɔ lɔv? Nɔ, nɔto dat. Dɛn tin ya na nɔmal tin dɛn na layf. Jizɔs insɛf bin de ɛnjɔy fɔ it ɛn i bin de fid ɔda pipul dɛn. I bin no bak se i nid fɔ blo. Ɛn Pɔl bin rayt se mami ɛn dadi biznɛs na impɔtant tin insay mared.

10. Wetin Pɔl bin min we i se “if una jɛs de memba”?

¹⁰ Wetin Pɔl bin min we i se “if una jɛs de memba”? Di Grik wɔd we Pɔl bin yuz kin min fɔ put ɔl yu at ɛn maynd pan sɔntin. Wan masta sabi bukman bin ɛksplen se di wan dɛn we dis wɔd de tɔk bɔt, “na pipul dɛn we de put ɔl dɛn atɛnshɔn pan sɔntin, de tɔk ɔltɛm bɔt da tin de,” ɛn dɛn jɔs put ɔl dɛn atɛnshɔn pan di tin dɛn we dɛn want fɔ dɛnsɛf. Dɛn de alaw dɛn tin dɛn ya fɔ kɔntrol di we aw dɛn de liv dɛn layf.

11. If wi nɔ tek tɛm, wetin na sɔm tin dɛn we go impɔtant to wi pas ɛni ɔda tin?

¹¹ Di Kristian dɛn na Rom bin nid fɔ rili chɛk dɛnsɛf fɔ no wetin dɛn jɔs de mɛmba ɔltɛm. Fɔ se na “wetin [dɛn] at want nɔmɔ” dɛn bin de tink bɔt? Tide, wisɛf nid fɔ tink bɔt wetin impɔtant to wi pas ɛni ɔda tin na wi layf. Wetin wi kin lɛk fɔ tɔk bɔt? Wetin wi kin rili lɛk fɔ du? Sɔm pipul dɛn kin kam fɔ no se ɔltɛm dɛn de tink bɔt aw fɔ tes difrɛn kayn wayn dɛn, aw fɔ dɛkɔret dɛn os, bay nyu klos dɛn, du biznɛs, ɔ plan fɔ go ɔlide. Dɛn tin ya nɔ bad. Fɔ ɛgzampul, ivin Jizɔs bin tɔn wata to wayn pan wan mared, ɛn Pɔl bin advays Timoti fɔ “tek lili wayn” fɔ in wɛlbɔdi wan. (Fɔs Lɛta To Timoti 5:​23; Jɔn 2:​3-11) Bɔt wayn nɔto bin di tin we impɔtant pas ɔl na dɛn layf. We wi? Wetin na di men tin na wi layf?

12, 13. Wetin mek wi fɔ tek tɛm bɔt wetin wi de put wi at pan?

¹² Pɔl bin wɔn se if una: “jɛs de mɛmba wetin una at want nɔmɔ, dat go mek una day.” (Lɛta Fɔ Rom 8:​6) Wetin i bin min bay dis? If wi “de fala wetin [wi] at tɛl” wi, wi go pwɛl wi padi biznɛs wit Jiova naw, ɛn tumara bambay wi go lɔs wi layf. Bɔt dis nɔ nid fɔ apin. Pɔsin kin chenj. Yu mɛmba di man we bin de na Kɔrint we dɛn bin disfɛloship bikɔs i bin de du mami ɛn dadi biznɛs wit in stɛp-mama? I bin chenj ɛn lɛf fɔ de fala di tin dɛn we de na in at ɛn i bigin fɔ sav Jiova bak di rayt we.—Sɛkɛn Lɛta Fɔ Kɔrint 2:​6-8.

¹³ Da man de na bin big ɛgzampul bɔt pɔsin we de “fala wetin [in] at tɛl” am, bɔt stil i bin ebul fɔ chenj. So tide bak, if ɛni Kristian dɔn bigin fɔ fala di bad tin we de na in at pas wetin Jiova want, insɛf kin chenj. We wi de mɛmba Pɔl in wɔnin, dat go ɛp wi fɔ mek ɛni chenj we wi nid fɔ mek.

14, 15. (a) Wetin Pɔl bin tɛl wi fɔ de mɛmba? (b) We Pɔl bin se wi fɔ “jɛs de mɛmba wetin Gɔd in Sprit want nɔmɔ,” wetin dat nɔ min?

¹⁴ Afta Pɔl dɔn tɔk bɔt di bad tin dɛn we kin apin we pɔsin “jɛs de mɛmba wetin [in] at want nɔmɔ,” i bin ɛksplen se if di pɔsin “jɛs de mɛmba wetin Gɔd in Spirit want nɔmɔ, [i] go gɛt di tru layf ɛn kol at.” Dat na wɔndaful blɛsin we wi go gɛt.

¹⁵ Bɔt fɔ “jɛs de mɛmba wetin Gɔd in Sprit want nɔmɔ” nɔ min se pɔsin nɔ de ɛnjɔy in layf. I nɔ min se na Jiova ɔ di Baybul nɔmɔ di pɔsin fɔ de tink ɛn tɔk bɔt. Fɔ ɛgzampul, Gɔd in savant dɛn we bin de insay di apɔsul dɛn tɛm bin de liv nɔmal layf. Dɛn bin de ɛnjɔy fɔ it ɛn drink, mared, gɛt famili, ɛn dɛn bin gɛt wok dɛn we dɛn bin de du.—Mak 6:​3; Fɔs Lɛta Fɔ Tɛsalonayka 2:​9.

16. Wetin bin impɔtant pas ɛni ɔda tin na Pɔl in layf?

¹⁶ Bɔt Pɔl ɛn di ɔda fɔstɛm Kristian dɛn nɔ bin alaw di nɔmal tin dɛn we dɛn bin de du fɔ bi di tin we impɔtant pas ɛni ɔda tin na dɛn layf. Fɔ ɛgzampul, wi no se Pɔl bin de mek tɛnt fɔ gɛt an-to-mɔt. Bɔt nɔto di wok we i bin de du bin impɔtant to am pas ɔltin na in layf. Di tin we bin impɔtant to Pɔl pas ɛni ɔda tin na fɔ sav Gɔd. Pɔl bin put ɔl in atɛnshɔn fɔ de prich ɛn tich pipul dɛn. (Rid Di Apɔsul Dɛn Wok [Akt] 18:​2-4; 20:​20, 21, 34, 35.) Di brɔda ɛn sista dɛn na Rom bin nid fɔ falamakata Pɔl. Wisɛf nid fɔ falamakata am.—Lɛta Fɔ Rom 15:​15, 16.

17. Us bɛnifit wi go gɛt if wi de “mɛmba wetin Gɔd in Sprit want”?

¹⁷ Aw wi layf go tan lɛk if wi put ɔl wi atɛnshɔn fɔ sav Jiova? Lɛta Fɔ Rom 8:​6 se if wi “jɛs de mɛmba wetin Gɔd in Spirit want nɔmɔ, [wi] go gɛt di tru layf ɛn kol at.” Fɔ du dat min se wi fɔ alaw Jiova in spirit fɔ kɔntrol di we aw wi de tink ɛn lan fɔ tink di we aw in de tink. Jiova dɔn prɔmis wi se wi go satisfay ɛn gɛt gladi at insay dis wi yon tɛm ɛn tumara bambay, wi go gɛt layf we go de sote go.

18. Aw wi go gɛt kolat we wi de “mɛmba wetin Gɔd in Spirit want”?

¹⁸ Wetin Pɔl bin min we i se if wi “jɛs de mɛmba wetin Gɔd in Spirit want nɔmɔ” wi go gɛt kol at? Ɔlman want kolat, bɔt di wan dɛn we de gɛt am nɔ bɔku. Wi tɛl Jiova tɛnki bikɔs i pɔsibul fɔ mek wi gɛt kolat. I pɔsibul bak fɔ mek wi gɛt pis na wi famili ɛn wit wi brɔda ɛn sista dɛn na di kɔngrigeshɔn. Bikɔs wi nɔ pafɛkt, sɔntɛnde wi go gɛt prɔblɛm wit wi brɔda ɛn sista dɛn. We dat apin, wi fɔ fala Jizɔs in advays we i bin se fɔ go to wi brɔda ɛn: “tɔk di plaba fayn fayn” wan. (Matyu 5:​24) Mɛmba se yu brɔda ɔ sista sɛf de sav Jiova, “we de gi kol at.”—Lɛta Fɔ Rom 15:​33; 16:​20.

19. Us spɛshal kolat wi go ɛnjɔy?

¹⁹ If wi “mɛmba wetin Gɔd in Spirit want,” wi go gɛt wanwɔd bak wit Gɔd we go mek wi gɛt kolat. Di prɔfɛt Ayzaya bin rayt se: “Yu [Jiova] de mek pɔsin we in maynd de to yu de wit kol at, bikɔs i biliv pan yu.”—Ayzaya 26:​3; rid Lɛta Fɔ Rom 5:​1.

20. Wetin mek yu gladi fɔ di advays we de na Lɛta Fɔ Rom chapta 8?

²⁰ Ilɛksɛf wi gɛt di op fɔ liv na ɛvin ɔ fɔ de na dis wɔl, wi ɔl go bɛnifit frɔm di fayn advays dɛn we de na Lɛta Fɔ Rom chapta 8. Wi gladi we di Baybul de ɛnkɔrej wi fɔ put ɔl wi atɛnshɔn fɔ sav Jiova ɛn nɔ jɔs put wi atɛnshɔn pan di tin dɛn we wi at de tɛl wi fɔ du. Wi no se we wi de “mɛmba wetin Gɔd in Spirit want,” wi go gɛt wɔndaful blɛsin. Pɔl bin rayt se: “Di gift we Gɔd de gi na layf we go de sote go, ɛn na Krays Jizɔs we na wi Masta go mek dat bi.”—Lɛta Fɔ Rom 6:​23, NW.