Yɔŋ Sista dɛn, Una Tray fɔ Bi Machɔ Kristian Dɛn

 1. Wetin wi go du fɔ bi machɔ Kristian?

WI KIN kɔle we wi kin si pikin de gro kwik kwik wan ɛn bi big pɔsin. I tan lɛk se pikin dɛn nɔ de du ɛnitin fɔ mek dɛn gro. Bɔt, if wi want fɔ bi machɔ Kristian, wi nid fɔ du sɔntin.b (1 Kɔr. 13:11; Ibru. 6:1) Fɔ bi machɔ Kristian, wi nid fɔ gɛt tayt padi biznɛs wit Jiova. Wi nid in oli spirit bak as wi de tray fɔ gɛt kwaliti dɛn we go mek Gɔd gladi, sabi aw fɔ du tin dɛn, ɛn rɛdi fɔ di wok dɛn we wi go gɛt tumara bambay.​—Prɔv. 1:5.

 2. Wetin wi lan frɔm Jɛnɛsis 1:27? Wetin wi go tɔk bɔt insay dis atikul?

² Jiova bin mek mɔtalman fɔ bi man ɔ uman. (Rid Jɛnɛsis 1:27.) I izi fɔ si se di we aw Gɔd mek man difrɛn frɔm di we aw i mek uman, bɔt dɛn difrɛn ɔda we dɛn bak. Fɔ ɛgzampul, Jiova mek man ɛn uman fɔ du patikyula wok dɛn, so dɛn nid fɔ gɛt kwaliti dɛn ɛn sabi du tin dɛn we go ɛp dɛn fɔ du dɛn wok dɛn de. (Jɛn. 2:18) Insay dis atikul, wi go tɔk bɔt wetin yɔŋ sista go du fɔ bi machɔ Kristian. Ɛn insay di nɛks atikul, wi go tɔk bɔt wetin yɔŋ brɔda dɛn go du.

3-4. Usay yɔŋ sista dɛn go fɛn gud ɛgzampul dɛn fɔ falamakata? (Luk bak di pikchɔ.)

³ Di Baybul tɔk bɔt bɔku uman dɛn we bin lɛk Jiova ɛn sav am. (Luk di atikul na jw.org we gɛt di taytul “Women in the Bible—What Can We Learn From Them?”) Dɛn bin gɛt di kwaliti dɛn we wi tim skripchɔ tɔk bɔt, dat na we dɛn nɔ bin de “du tin pasmak” ɛn we dɛn bin “fetful pan ɔltin.” Pantap dat, sista dɛn go ebul fɛn machɔ Kristian uman dɛn insay dɛn yon kɔngrigeshɔn we dɛn kin falamakata.

⁴ Yɔŋ sista dɛn, una sabi sista dɛn we na gud ɛgzampul we una kin falamakata? Tek tɛm wach di fayn kwaliti dɛn we dɛn gɛt, dɔn tink bɔt aw yusɛf go sho dɛn sem kwaliti dɛn de. Insay di paregraf dɛn we de dɔŋ, wi go tɔk bɔt tri impɔtant kwaliti dɛn we machɔ sista dɛn fɔ gɛt.

 5. Wetin mek i impɔtant fɔ put yusɛf dɔŋ if yu want fɔ bi machɔ Kristian uman?

⁵ Fɔ falamakata Jizɔs in ɛgzampul, wi nid fɔ put wisɛf dɔŋ. If uman de put insɛf dɔŋ, i go gɛt tayt padi biznɛs wit Jiova ɛn ɔda pipul dɛn. (Jems 4:6) Fɔ ɛgzampul, uman we lɛk Jiova go put insɛf dɔŋ ɛn fala di advays we de na 1 Kɔrintians 11:​3, usay Jiova tɔk bɔt udat I dɔn gi di wok fɔ de oba di kɔngrigeshɔn ɛn di famili.c

 6. Wetin yɔŋ sista dɛn go ebul lan bɔt aw fɔ put dɛnsɛf dɔŋ frɔm Ribɛka in ɛgzampul?

⁶ Lɛ wi tɔk bɔt Ribɛka in ɛgzampul. Na uman we bin gɛt sɛns ɛn i bin gɛt maynd fɔ disayd fɔ du di rayt tin, ɛn i bin no ustɛm ɛn aw fɔ du tin. (Jɛn. 24:58; 27:​5-17) Bɔt stil, na pɔsin we bin gɛt rɛspɛkt ɛn we bin de put insɛf dɔŋ. (Jɛn. 24:​17, 18, 65) If yu put yusɛf dɔŋ fɔ sɔpɔt Jiova in arenjmɛnt jɔs lɛk Ribɛka, yu go bi gud ɛgzampul fɔ ɔlman na yu famili ɛn yu kɔngrigeshɔn.

 7. Aw yɔŋ sista dɛn go ebul falamakata Ɛsta in ɛgzampul fɔ sho se nɔto ɔltin dɛn ebul fɔ du?

⁷ Fɔ bi pɔsin we no se nɔto ɔltin i ebul fɔ du na ɔda kwaliti we ɔl Kristian dɛn nid fɔ gɛt. Di Baybul tɔk se “di wan dɛn we [no se nɔto ɔltin dɛn ebul fɔ du] gɛt sɛns.” (Prɔv. 11:​2, NWT) Ɛsta na uman we bin no se nɔto ɔltin i ebul fɔ du, ɛn i bin fetful to Gɔd. Bikɔs i bin no se nɔto ɔltin i ebul fɔ du, dat mek i nɔ bin du tin we i nɔ gɛt rayt fɔ du. I bin lisin to di advays we Mɔdikay we na in kɔzin we bin big pas am gi am, ɛn i bin fala di advays. (Ɛsta 2:​10, 20, 22) Yusɛf go ebul sho se yu na pɔsin we no se nɔto ɔltin yu ebul fɔ du bay we yu aks ɔda pipul dɛn fɔ gud advays ɛn fala di advays.​—Tay. 2:​3-5.

 8. Akɔdin to 1 Timoti 2:​9, 10, we sista nɔ de du tin pasmak, aw dat go ɛp am we i kam to di we aw i de drɛs?

⁸ Ɔda we de bak we Ɛsta bin sho se in na pɔsin we no se nɔto ɔltin i ebul fɔ du. I bin “fayn ɛn gɛt fayn figɔ”; bɔt, i nɔ bin de tray fɔ mek ɔlman notis am. (Ɛsta 2:​7, 15) Aw sista dɛn go bɛnifit frɔm Ɛsta in ɛgzampul? Wan we aw dɛn go bɛnifit de na 1 Timoti 2:​9, 10. (Rid.) Apɔsul Pɔl bin tɛl Kristian uman dɛn fɔ drɛs di kayn we we de sho se dɛn nɔ de du tin pasmak ɛn dɛn de du tin wit sɛns. Di Grik wɔd dɛn we dɛn yuz na dis skripchɔ sho se Kristian uman fɔ drɛs di kayn we we de sho se i gɛt rɛspɛkt ɛn i de tink bɔt aw ɔda pipul dɛn de tink ɛn fil. Wi de rili kɔle wi machɔ Kristian sista dɛn we de drɛs di kayn we we de sho se dɛn nɔ de du tin pasmak!

 9. Wetin wi lan frɔm Abigɛl in ɛgzampul? (Luk bak di pikchɔ.)

⁹ Fɔ bi pɔsin we de ɔndastand na ɔda kwalilti we ɔl machɔ Kristian sista dɛn nid fɔ gɛt. Wetin i min fɔ bi pɔsin we de ɔndastand? I min fɔ ebul no wetin rayt frɔm wetin rɔng ɛn fɔ ebul disayd fɔ du di rayt tin. Lɛ wi tɔk bɔt Abigɛl in ɛgzampul. In man bin disayd fɔ du tin we nɔ rayt ɛn dat bin fɔ dɔn mek bad tin apin to ɔlman we de na in os. Abigɛl nɔ bin westɛm fɔ du sɔntin. Bikɔs i bin ɔndastand wetin na di rayt tin fɔ du, i bin sev ɔl di wan dɛn we de na dɛn os. (1 Sam. 25:​14-23, 32-35) Fɔ bi pɔsin we de ɔndastand go ɛp wi bak fɔ no ustɛm fɔ tɔk ɛn ustɛm fɔ sɛt mɔt. Ɛn i de ɛp wi fɔ sho se wi bisin bɔt ɔda pipul dɛn di kayn we we go mek dɛn nɔ shem.​—1 Tɛs. 4:11.

10-11. We yu sabi rid ɛn rayt, aw dat go bɛnifit yu ɛn ɔda pipul dɛn?

¹⁰ Uman we na Kristian nid fɔ lan fɔ du tin dɛn we go ɛp am ɛvride. Sɔm pan di tin dɛn de we galpikin kin lan we i smɔl go kɔntinyu fɔ ɛp am we i dɔn big. Lɛ wi tɔk bɔt sɔm ɛgzampul dɛn.

¹¹ Lan fɔ rid ɛn rayt. Na sɔm kɔlchɔ dɛn, pipul dɛn tink se i nɔ impɔtant fɔ mek uman sabi fɔ rid ɛn rayt. Bɔt i impɔtant fɔ mek ɔl Kristian sabi du dɛn tin dɛn ya.d (1 Tim. 4:13) So nɔ alaw ɛnitin ɔ ɛnibɔdi fɔ mek yu nɔ lan fɔ rid ɛn rayt fayn. Aw yu go bɛnifit? We yu sabi rid ɛn rayt, dat go ɛp yu fɔ fɛn wok ɛn kɔntinyu fɔ wok. I go izi fɔ yu fɔ stɔdi di Baybul ɛn tich ɔda pipul dɛn bɔt am. Bɔt di wan we pas ɔl na dat, yu go kam nia Jiova mɔ ɛn mɔ as yu de rid in Wɔd ɛn tink gud wan bɔt wetin yu de rid.​—Jɔs. 1:8; 1 Tim. 4:15.

12. Aw Prɔvabs 31:26 go ɛp yu fɔ bi pɔsin we de tek tɛm lisin ɛn tɔk fayn wan?

¹² Lan aw fɔ lisin ɛn tɔk fayn wan. I impɔtant fɔ mek Kristian dɛn du dat. Di disaypul Jems bin gi wi dis fayn advays, we i se: “Ɔlman fɔ kwik fɔ lisin, slo fɔ tɔk.” (Jems 1:19) We yu tek tɛm lisin we ɔda pipul dɛn de tɔk, yu go ebul fɔ sho “sɔri-at” to dɛn. (1 Pit. 3:8) If yu nɔ shɔ se yu ɔndastand wetin pɔsin de tɔk ɔ aw i de fil, tek tɛm aks kwɛstyɔn dɛn. Dɔn tink gud wan bifo yu tɔk. (Prɔv. 15:​28, futnot) Aks yusɛf: ‘Wetin a want fɔ tɔk na tru ɛn i de ɛnkɔrej ɔda pipul dɛn? I de sho se a gɛt rɛspɛkt ɛn mi na gud pɔsin?’ Lan frɔm machɔ sista dɛn we de tek tɛm lisin ɛn tɔk fayn wan. (Rid Prɔvabs 31:26.) Pe atɛnshɔn to di we aw dɛn de tɔk. We yu sabi du dɛn tin dɛn ya fayn fayn wan, i go izi fɔ bi padi to ɔda pipul dɛn ɛn gɛt pis wit dɛn.

13. Aw yu go lan fɔ du os wok dɛn? (Luk bak di pikchɔ.)

¹³ Lan aw fɔ du os wok dɛn. Insay bɔku kɔntri dɛn, na uman dɛn de du bɔku pan di os wok dɛn. Sɔntɛm yu mama ɔ ɔda gud sista go ebul ɛp yu fɔ lan di tin dɛn we yu nid fɔ sabi du. Wan sista we nem Sindi tɔk se: “Wan pan di bɛst tin dɛn we a lan frɔm mi mama na dat, we a wok tranga wan, a go gɛt gladi-at. We a lan fɔ du tin dɛn lɛk, fɔ kuk, fɔ klin, fɔ so, ɛn fɔ bay bay, dat dɔn mek layf izi fɔ mi ɛn i dɔn mek a ebul fɔ du mɔ na Jiova in savis. Mi mama bin tich mi bak aw fɔ du gud, ɛn dis dɔn mek a sabi brɔda ɛn sista dɛn we de sɛt fayn ɛgzampul dɛn we a kin falamakata.” (Prɔv. 31:​15, 21, 22) Uman we de wok tranga wan, du gud, ɛn we dɔn lan fɔ kia fɔ in os na blɛsin to in famili ɛn in kɔngrigeshɔn.​—Prɔv. 31:​13, 17, 27; Akt 16:15.

14. Wetin yu lan frɔm Kristal in ɛkspiriɛns? Wetin yu fɔ pe atɛnshɔn pan?

¹⁴ Lan fɔ du tin fɔ sɔpɔt yusɛf. I impɔtant fɔ lɛ ɔl machɔ Kristian dɛn lan fɔ du tin fɔ sɔpɔt dɛnsɛf ɛn gɛt satisfay maynd. (Fil. 4:11) Wan sista we nem Kristal tɔk se: “Mi mama ɛn papa bin ɛnkɔrej mi fɔ lan tin dɛn na skul we a go ebul fɔ yuz leta na layf. Mi papa bin ɛnkɔrej mi fɔ du akawntin, ɛn dat bin rili impɔtant.” I nɔ jɔs du fɔ sabi aw fɔ fɛn mɔni, bɔt yu fɔ tray fɔ sabi bak aw fɔ yuz di mɔni we yu de fɛn wit sɛns so dat yu nɔ go spɛn pas aw yu fɔ spɛn. (Prɔv. 31:​16, 18) Pe atɛnshɔn to spirichwal gol dɛn bay we yu de avɔyd fɔ tek dɛt we yu nɔ nid ɛn satisfay wit di simpul layf we yu de liv.​—1 Tim. 6:8.

15-16. Aw sista dɛn we nɔ mared de bɛnifit ɔda pipul dɛn? (Mak 10:​29, 30)

¹⁵ We yu tray fɔ gɛt kwaliti dɛn we de mek Jiova gladi ɛn lan fɔ du tin dɛn we go ɛp yu ɛvride, dat go ɛp yu fɔ disayd wetin ɛn wetin yu go du leta na layf. Lɛ wi tɔk bɔt sɔm ɛgzampul dɛn bɔt wetin yu go ebul du.

¹⁶ Yu kin disayd nɔ fɔ mared fɔ sɔm tɛm. Jɔs lɛk aw Jizɔs bin tɔk, sɔm uman dɛn kin disayd nɔ fɔ mared ilɛksɛf dɛn de tɔk bad bɔt di wan dɛn we nɔ mared na di say we dɛn de. (Mat. 19:​10-12) Ɔda wan dɛn kin disayd nɔ fɔ mared bikɔs ɔf difrɛn rizin dɛn. Bɔt no se yu stil valyu to Jiova ɛn Jizɔs pan ɔl we yu nɔ mared. Sista dɛn we nɔ mared na gud ɛgzampul dɛn na di kɔngrigeshɔn dɛn ɔlsay na di wɔl. Di lɛk we dɛn lɛk ɛn bisin bɔt ɔda pipul dɛn dɔn mek dɛn Kristian uman dɛn ya bi spirichwal sista ɛn mama dɛn to bɔku pipul dɛn.​—Rid Mak 10:​29, 30; 1 Tim. 5:2.

17. Aw yɔŋ sista go rɛdi naw fɔ yuz ɔl in tɛm fɔ sav Jiova?

¹⁷ Yu kin disayd fɔ yuz ɔl yu tɛm fɔ sav Jiova. Na Kristian uman dɛn mɔ de du di prichin wok ɔlsay na di wɔl. (Sam 68:11) Yu de plan fɔ bigin yuz ɔl yu tɛm fɔ prich? Yu kin payɔnia, bi kɔnstrɔkshɔn vɔlɔntia, ɔ Bɛtɛlayt. Pre bɔt yu gol. Tɔk to ɔda pipul dɛn we dɔn rich da gol de ɛn tray fɔ no wetin yu nid fɔ du fɔ kwalifay. Dɔn mek plan we go ɛp yu fɔ rich da gol de. If yu disayd fɔ yuz ɔl yu tɛm fɔ sav Jiova, i go pɔsibul fɔ mek yu du bɔku ɔda wok dɛn fɔ am.

18. Wetin mek sista fɔ tek tɛm pik di man we i de mared? (Luk bak di pikchɔ.)

¹⁸ Sɔntɛm yu go disayd fɔ mared. Di kwalilti dɛn ɛn di tin dɛn we yu fɔ lan fɔ du we wi dɔn tɔk bɔt go ɛp yu fɔ bi gud wɛf. Fɔ tru, if yu de tink bɔt fɔ mared, yu fɔ tek tɛm tink bɔt udat yu go mared to. Na wan pan di tin dɛn we impɔtant pas ɔl we yu go ɛva disayd fɔ du. Mɛmba se yu go de ɔnda di man we yu disayd fɔ mared to. (Rom. 7:2; Ɛfi. 5:​23, 33) So aks yusɛf dɛn kwɛstyɔn dɛn ya: ‘Fɔ se in na machɔ Kristian? Na in padi biznɛs wit Jiova de fɔs na in layf? I de disayd fɔ du di rayt tin dɛn? I kin gri se i dɔn mek mistek ɛn se sɔri? I de rɛspɛkt uman dɛn? I go ebul ɛp mi fɔ kɔntinyu fɔ gɛt tayt padi biznɛs wit Jiova, gi mi di tin dɛn we a nid, ɛn bi mi tayt padi? I de du in wok dɛn fayn? Fɔ ɛgzampul, us wok dɛn i de du na di kɔngrigeshɔn ɛn aw i de du dɛn?’ (Lyuk 16:10; 1 Tim. 5:8) As wi no, if yu want fɔ fɛn gud man, yusɛf nid fɔ rɛdi fɔ bi gud wɛf.

19. Wetin mek wɛf fɔ gladi we dɛn se in na pɔsin we de “ɛp” in man?

¹⁹ Di Baybul se gud wɛf na uman we go ebul “ɛp” in man. (Jɛn. 2:18) Fɔ se dis min se wɛf dɛn nɔ gɛt bɛtɛ valyu? Nɔ! Na ɔnɔ fɔ am. Infakt, bɔku tɛm di Baybul kin tɔk se Jiova na pɔsin we de “ɛp.” (Sam 54:4; Ibru. 13:6) Wɛf go rili ebul fɔ ɛp in man bay we i de sɔpɔt am. Fɔ ɛgzampul, we di man de disayd tin dɛn fɔ di famili, di wɛf de sɔpɔt am fɔ mek wetin i disayd kɔmɔt fayn. Ɛn bikɔs di wɛf rili lɛk Jiova, i go du wetin i ebul fɔ ɛp ɔda pipul dɛn fɔ si di gud kwalilti dɛn we in man gɛt. (Prɔv. 31:​11, 12; 1 Tim. 3:11) Yu kin ebul rɛdi naw fɔ bi gud wɛf bay we yu tray tranga wan fɔ gɛt tayt padi biznɛs wit Jiova ɛn ɛp ɔda pipul dɛn na yu os ɛn di kɔngrigeshɔn.

20. Us gud tin mama go du fɔ in famili?

²⁰ Yu kin disayd fɔ bi mama. Afta yu mared, sɔntɛm yu ɛn yu man go bɔn pikin dɛn. (Sam 127:3) So, i fayn fɔ tink bɔt wetin yu go nid fɔ du fɔ bi gud mama. Di kwaliti dɛn ɛn tin dɛn we yu fɔ lan fɔ du we wi dɔn tɔk bɔt insay dis atikul go ɛp yu fɔ mek yu bi gud wɛf ɛn mama. We yu na pɔsin we lɛk ɔda pipul dɛn, de du gud, ɛn de peshɛnt, yu go ɛp yu famili fɔ gɛt gladi-at ɛn yu pikin dɛn go fil sef.​—Prɔv. 24:3.

21. Aw wi de fil bɔt wi sista dɛn? Wetin mek? (Luk di pikchɔ na di frɔnt pej.)

²¹ Wi lɛk una wi sista dɛn bikɔs ɔf ɔl di tin dɛn we una de du fɔ Jiova ɛn in pipul dɛn. (Ibru. 6:10) Una de wok tranga wan fɔ gɛt spirichwal kwaliti dɛn, fɔ sabi du tin dɛn we go ɛp una ɛn di wan dɛn we de arawnd una, ɛn fɔ rɛdi unasɛf gud gud wan fɔ tumara bambay. Una rili valyu na Jiova in ɔganayzeshɔn!