Sho se Yu Gɛt Fet pan di Tin dɛn we Jiova Dɔn Prɔmis

 1. Aw wi fɔ fil bɔt di fet we wi gɛt?

FET nɔto sɔntin we ɔlman gɛt. (Sɛkɛn Lɛta Fɔ Tɛsalonayka 3:​2) Bɔt Jiova de gi fet to ɔl di wan dɛn we de wɔship am. (Lɛta Fɔ Rom 12:​3; Lɛta Fɔ Galeshya 5:​22) Wi fɔ tɛl Jiova tɛnki fɔ di fet we i de gi wi!

2, 3. (a) Aw wi go bɛnifit we wi gɛt fet? (b) Us kwɛstyɔn dɛn wi de kam tɔk bɔt?

² Jiova dɔn gi in Pikin we i lɛk so dat i go fɔgiv ɛnibɔdi we put fet pan am. Dis dɔn mek am pɔsibul fɔ lɛ pipul dɛn bi Jiova in padi ɛn gɛt layf we go de sote go. (Jɔn 6:​44, 65; Lɛta Fɔ Rom 6:​23) Jiova rili gud to wi! Pan ɔl we wi gɛt sin ɛn wi fit fɔ day, Jiova si se wi ebul fɔ du gud tin dɛn. (Sam 103:​10) I dɔn ɛp wi fɔ lan di gud nyus bɔt Jizɔs ɛn di day we i day fɔ wi. We wi bigin fɔ put fet pan Jizɔs ɛn fala am, wi go bigin fɔ op fɔ di tɛm we wi go gɛt layf we go de sote go!—Rid Jɔn In Fɔs Lɛta 4:​9, 10.

³ Wetin bak wi go lan bɔt fet? If wi jɔs no bɔt wetin Gɔd dɔn du fɔ wi ɛn wetin i gɛt fɔ du tumara bambay, i min se wi gɛt fet? Lɛ wi si wetin bak wi fɔ du.

 4. We wi gɛt fet, aw dat de afɛkt wi?

⁴ We wi gɛt fet pan Jiova ɛn Jizɔs, wi nɔ jɔs no bɔt wetin dɛn dɔn du ɛn wetin dɛn gɛt fɔ du fɔ wi. Wi rili want fɔ liv wi layf bak di we aw dɛn dɔn tich wi. Ɛn wi rili want fɔ ɛp ɔda pipul dɛn fɔ no bɔt dɛn. Di apɔsul Pɔl bin tɔk se: “If yu de yuz yu mɔt fɔ mek pipul dɛn no se Jizɔs na Masta, ɛn sho se yu biliv na yu at se Gɔd dɔn gi am layf bak, yu go sev. Na wit di at pɔsin kin sho se i biliv gud gud wan fɔ du wetin rayt, bɔt na di mɔt pɔsin go yuz fɔ ɛp pipul dɛn fɔ sev.”—Lɛta Fɔ Rom 10:​9, 10, NW; Sɛkɛn Lɛta Fɔ Kɔrint 4:​13.

 5. Wetin mek fet rili impɔtant? Wetin wi nid fɔ du fɔ gɛt mɔ fet? Gi wan ɛgzampul.

⁵ Fɔ tru, fɔ lɛ wi go ɛnjɔy layf we go de sote go na Gɔd in nyu wɔl, wi fɔ gɛt fet ɛn wi fɔ kɔntinyu fɔ gɛt mɔ fet. Fet tan lɛk plant. Wi nid fɔ de wata di plant so dat i go kɔntinyu fɔ gro fayn. Bɔt i go wida ɛn day if wi nɔ de gi am bɛtɛ wata. Semweso, wi nid fɔ mek shɔ se di fet we wi gɛt kɔntinyu fɔ “strɔng” ɛn wi fɔ kɔntinyu fɔ gɛt “fet mɔ ɛn mɔ.”—Taytɔs 2:​2, NW; Sɛkɛn Lɛta Fɔ Tɛsalonayka 1:​3, NW; Lyuk 22:​32; Di Ibru Pipul Dɛn 3:​12.

 6. Us tu we dɛn we Di Ibru Pipul Dɛn 11:​1 tɔk bɔt fet?

⁶ Insay Di Ibru Pipul Dɛn 11:​1, di Baybul tɛl wi wetin na fet. (Rid.) (1) Fet na we pɔsin “shɔ se i go gɛt wetin i op fɔ.” Di tin dɛn we wi “op fɔ” na di tin dɛn we Gɔd dɔn prɔmis fɔ du tumara bambay. Fɔ ɛgzampul, wi biliv se tɛm go kam we bad bad tin dɛn nɔ go apin igen ɛn di wɔl go bi nyu ples. (2) Fet na we pɔsin “gɛt pruf fɔ sho se i go gɛt wetin i op fɔ, pan ɔl we i nɔ si am yet.” Pan ɔl we wi nɔ de si Jiova Gɔd, Jizɔs Krays, di enjɛl dɛn, ɛn di Kiŋdɔm we de na ɛvin, wi stil no se dɛn de. (Di Ibru Pipul Dɛn 11:​3) Aw wi go sho se wi rili gɛt fet pan di tin dɛn we Gɔd dɔn prɔmis ɛn di tin dɛn we wi nɔ de si? Wi go du dat bay di we aw wi de liv wi layf ɛn di tin dɛn we wi de se ɛn du.

 7. Aw Noa in ɛgzampul ɛp wi fɔ ɔndastand wetin i min fɔ gɛt fet? (Luk di pikchɔ nia dis atikul in taytul.)

⁷ Wetin Noa in ɛgzampul tich wi bɔt fet? Di apɔsul Pɔl bin se, Noa bin “lisin di tɛm we Gɔd wɔn am bɔt dɛn tin we go bi. Pan ɔl we i nɔ bin si di tin dɛn yet, Noa du wetin Gɔd tɛl am fɔ du. I mek wan big bot we in, in wɛf ɛn in pikin dɛn go insay, so di wata we bin kɔba di wɔl nɔ bin du dɛn natin.” (Di Ibru Pipul Dɛn 11:​7) Bikɔs Noa bin gɛt fet pan wetin Jiova bin dɔn tɛl am, dat bin mek i bil da big big bot. Sɔntɛm in neba dɛn bin de aks am wetin mek i de bil di bot. Wi shɔ se Noa nɔ bin sɛt mɔt. Di Baybul se Noa “bin de tɛl pipul fɔ du wetin rayt.”(Pita In Sɛkɛn Lɛta 2:​5) I wɔn di pipul dɛn se Gɔd gɛt fɔ briŋ Ebi Ebi ren fɔ kil ɔl di bad pipul dɛn. I go mɔs bi se i tɛl dɛn ɔl wetin Jiova tɛl am we i bin tɔk se: “A dɔn mekɔp fɔ dɔnawe wit ɔlman na dis wɔl as na soso fɛt fɛt ɛn bad bad tin de apin ɛn na dat mek di wɔl bad so.” “A de sɛn flɔd na di wɔl fɔ pwɛl ɔltin we gɛt layf. Ɔltin na di wɔl go day.” Dɔn Noa go dɔn tɛl dɛn wetin dɛn fɔ du fɔ mek dɛn sev. Jiova bin dɔn tɛl Noa se: “Yu go go insay di ak.”—Jɛnɛsis 6:​13, 17, 18.

 8. Wetin Jems se bɔt fet?

⁸ Jems in bak bin rayt bɔt fet. Sɔntɛm i bin du am jɔs afta di apɔsul Pɔl bin dɔn rayt to di Ibru pipul dɛn. Jems bin rayt se: “Aw pɔsin go sho se in biliv Gɔd if a nɔ si di tin dɛn we i de du fɔ sho se i biliv Gɔd? Wetin a de du go sho una se a biliv Gɔd.” (Jems 2:​18) Jems bin ɛksplen se fɔ gɛt fet, wi nɔ fɔ jɔs biliv nɔmɔ. Di dɛbul dɛn biliv se Gɔd de, bɔt dɛn nɔ gɛt fet pan Jiova. Bifo dat, dɛn de agens am. (Jems 2:​19, 20) Apat frɔm dat, we pɔsin gɛt fet, i de mek Gɔd gladi bay we i de du gud wok dɛn ɔ gud tin dɛn. Na dat Ebraam bin du. Jems bin rayt se: “Una mɛmba Ebraam we na wan pan wi grampapa papa dɛn; wetin mek ɔltin bin rayt bitwin in ɛn Gɔd? Na bikɔs i bin tek in pikin Ayzak fɔ go sakrifays am. Una nɔ si se wetin Ebraam du sho se i bin biliv Gɔd? Una nɔ si se Ebraam bin biliv Gɔd bikɔs i du wetin Gɔd tɛl am fɔ du?” Jems bin mek wi no klia wan se wi fet nɔ go min natin if wi nɔ de du tin dɛn we de sho se wi gɛt fet. I bin tɔk se: “Lɛkɛ aw pɔsin kin day wɛn in spirit nɔ de insay am igen, semweso, pɔsin we se in biliv Gɔd ɛn i nɔ de du dɛn tin we sho se i biliv am, nɔ biliv Gɔd at ɔl.”—Jems 2:​21-23, 26.

9, 10. Wetin i min fɔ sho fet pan di Pikin?

⁹ Leta, afta 30 ia dɔn pas, Jɔn rayt di Baybul buk we nem Jɔn ɛn ɔda tri lɛta dɛn. Jɔs lɛk ɔda pipul dɛn we bin dɔn rayt di Baybul, Jɔn insɛf bin ɔndastand wetin i min fɔ gɛt fet. Bɔku tɛm, we Jɔn bin de rayt, i kin yuz wan Grik vab. We dɛn translet am insay Inglish, i min “sho se [yu] gɛt fet.”

¹⁰ Fɔ ɛgzampul, Jɔn bin ɛksplen se: “Di wan we sho se i gɛt fet pan di Pikin go gɛt layf we go de sote go; di wan we nɔ du wetin di Pikin se nɔ go gɛt layf, bɔt Gɔd go vɛks bad bad wan pan am te go.” (Jɔn 3:​36, NW) Fɔ sho se wi gɛt fet pan di Pikin, wi fɔ obe Jizɔs. Infakt, frɔm di tin dɛn we Jɔn bin rayt, wi si se plɛnti tɛm Jizɔs bin de tɔk se, fɔ mek wi gɛt layf we go de sote go, wi fɔ sho se wi gɛt fet pan in ɛn in Papa.—Jɔn 3:​16; 6:​29, 40; 11:​25, 26; 14:​1, 12.

11. Aw wi go sho Jiova se wi gladi fɔ we i mek wi no di tru tin dɛn bɔt am?

¹¹ Jiova bin yuz in oli spirit fɔ ɛp wi fɔ ɔndastand di tru tin bɔt in ɛn in Pikin ɛn fɔ ɛp wi fɔ gɛt fet pan dɛn. (Rid Lyuk 10:​21.) Aw wi go sho se wi gladi fɔ ɔl wetin Jiova dɔn du fɔ wi? Wi nɔ fɔ ɛva stɔp fɔ de tɛl am tɛnki fɔ we i mek Jizɔs we na di “Chif Lida ɛn di wan we de mek wi fet pafɛkt,” mek am pɔsibul fɔ lɛ wi gɛt tayt padi biznɛs wit am. (Di Ibru Pipul Dɛn 12:​2, NW) Ɛn wi nid fɔ kɔntinyu fɔ mek wi fet strɔng bay we wi de pre to Jiova ɔltɛm ɛn stɔdi in Wɔd.—Lɛta Fɔ Ɛfisɔs 6:​18; Pita In Fɔs Lɛta 2:​2.

12. Wetin wi go du if wi gɛt fet?

¹² Wi fɔ kɔntinyu fɔ sho se wi gɛt strɔng fet pan di tin dɛn we Jiova dɔn prɔmis bay di tin dɛn we wi de du. Fɔ ɛgzampul, wi de kɔntinyu fɔ prich to pipul dɛn bɔt Gɔd in Kiŋdɔm ɛn ɛp dɛn fɔ bi Jizɔs in disaypul. Ɛn wi de kɔntinyu bak fɔ du “gud to ɔlman, bɔt . . . mɔ to di wan dɛn we wi ɔl biliv di sem tin.” (Lɛta Fɔ Galeshya 6:​10, NW) Ɛn wi de wok tranga wan fɔ lɛf wi “ol layf” ɛn “dɛn bad trik” we wi bin gɛt bikɔs wi nɔ want fɔ du ɛnitin we go pwɛl wi padi biznɛs wit Jiova.—Lɛta Fɔ Kɔlɔse 3:​5, 8-10.

13. Wetin mek “fet pan Gɔd” impɔtant? Aw di Baybul ɛksplen am? Wetin mek?

¹³ Di Baybul se: “If pɔsin nɔ gɛt fet i nɔ go ebul fɔ du wetin Gɔd want fayn fayn wan; ɛnibɔdi we want kam to Gɔd fɔ biliv se i de, ɛn i fɔ biliv se na in de blɛs di wan dɛn we de tray tranga wan fɔ no am.” (Di Ibru Pipul Dɛn 11:​6, NW) Di Baybul sho bak se wan pan di fɔs tin dɛn we tru Kristian fɔ gɛt na “fet pan Gɔd,” ɛn i kɔmpia fet to fawndeshɔn we bildin kin gɛt. (Di Ibru Pipul Dɛn 6:​1, NW) Bɔt apat frɔm di fet we wi gɛt, wi nid ɔda kwaliti dɛn we impɔtant so dat wi padi biznɛs wit Jiova go kɔntinyu.—Rid Pita In Sɛkɛn Lɛta 1:​5-7; Jud In Lɛta 20, 21.

14, 15. Wetin mek fɔ gɛt lɔv impɔtant pas fɔ gɛt fet nɔmɔ?

¹⁴ Di wan dɛn we bin rayt di Baybul tɔk bɔt fet pas ɔl dɛn ɔda kwaliti dɛn. Fɔ se na fet impɔtant pas ɔl di ɔda kwaliti dɛn we wi fɔ gɛt?

¹⁵ Pɔl bin kɔmpia fet wit lɔv. I bin rayt se: “If a gɛt ɔl di fet we go mek a muv mawnten dɛn, bɔt a nɔ gɛt lɔv, mi na natin.” (Fɔs Lɛta Fɔ Kɔrint 13:​2, NW) Jizɔs bin se di lɔ we “pas ɔl di ɔda lɔ dɛn” na fɔ lɛk Gɔd. (Matyu 22:​35-40) Lɔv go ɛp wi fɔ gɛt bɔku ɔda kwaliti dɛn we go mek Gɔd gladi fɔ wi. Fɔ ɛgzampul, di Baybul se lɔv de “biliv” ɔltin. So lɔv go ɛp wi fɔ biliv, ɔ put fet pan ɔl wetin Gɔd de tɛl wi na di Baybul.—Fɔs Lɛta Fɔ Kɔrint 13:​4, 7.

16, 17. Wetin di Baybul tɔk bɔt fet ɛn lɔv? Uswan pan dɛn kwaliti ya rili impɔtant pas di ɔda wan? Wetin mek?

¹⁶ Fet ɛn lɔv na kwaliti dɛn we rili impɔtant, ɛn bɔku tɛm di wan dɛn we rayt di Baybul kin tɔk bɔt dɛn tu kwaliti dɛn ya togɛda. Pɔl bin ɛnkɔrej in brɔda dɛn fɔ sho se dɛn “biliv Gɔd ɛn lɛk am: dat go tan lɛkɛ se wi wɛr tin fɔ tek gyad di bɔdi.” (Fɔs Lɛta Fɔ Tɛsalonayka 5:​8) Pita bin rayt bɔt Jizɔs se: “Pan ɔl we una nɔ si Jizɔs yet, una lɛk am. Pan ɔl we una nɔ de si am naw, una biliv ɔ [“sho se una gɛt fet,” NW] pan am.” (Pita In Fɔs Lɛta 1:​8) Jems bin aks in anɔyntɛd brɔda dɛn se: “Una nɔ tink se Gɔd pik di wan dɛn we di pipul dɛn na di wɔl tink se po fɔ lɛ dɛn rili gɛt fet ɛn rul na di Kiŋdɔm, we i dɔn prɔmis to di wan dɛn we lɛk am?” (Jems 2:​5, NW) Jɔn bin rayt se Gɔd gi wi di lɔ “fɔ biliv ɔ [“sho se wi gɛt fet,” NW] pan in Pikin, Jizɔs Krays, ɛn wi fɔ lɛk wi kɔmpin mɔtalman.”—Jɔn In Fɔs Lɛta 3:​23.

¹⁷ Bɔt Pɔl bin rayt se: “Na dɛn tri tin ya pɔsin go de du sote go: biliv [“ɔ gɛt fet,” NW], abop, ɛn lɛk, bɔt di wan we pas dɛn ɔl na lɛk.” (Fɔs Lɛta Fɔ Kɔrint 13:​13) Tumara bambay, wi nɔ go nid fɔ put fet pan Gɔd in prɔmis dɛn bɔt di nyu wɔl bikɔs dɛn go dɔn apin. Wi go de liv di wɔndaful layf we di Baybul bin tɔk bɔt. Bɔt wi go nid fɔ gɛt lɔv fɔ Gɔd ɛn pipul dɛn ɔltɛm. Infakt, wi go kɔntinyu fɔ lɛk dɛn mɔ ɛn mɔ sote go.

18, 19. Wetin dɔn apin we Gɔd in pipul dɛn gɛt fet tide?

¹⁸ Insay wi yon tɛm Jiova in pipul dɛn gɛt fet pan Gɔd in Kiŋdɔm ɛn dɛn de sɔpɔt am. Ɛn dɛn lɛk dɛnsɛf. Dɛn lɛk dɛnsɛf bikɔs dɛn de alaw Gɔd in spirit fɔ gyad di we aw dɛn de liv dɛn layf. (Lɛta Fɔ Galeshya 5:​22, 23) Wetin na di bɛnifit? Wɛl, i pas et milyɔn brɔda ɛn sista dɛn arawnd di wɔl we gɛt kolat ɛn wanwɔd na dɛn kɔngrigeshɔn dɛn. Wi dɔn si klia wan se, fet ɛn lɔv na pawaful kwaliti dɛn.

¹⁹ Na wi Gɔd dɔn ɛp wi fɔ gɛt dis wanwɔd. Na in wi fɔ prez fɔ dis wanwɔd. (Ayzaya 55:​13) Wi rili gladi fɔ we i dɔn mek am pɔsibul fɔ lɛ wi sev ‘bikɔs wi biliv’ ɔ gɛt fet. (Lɛta Fɔ Ɛfisɔs 2:​8) Jiova go kɔntinyu fɔ ɛp bɔku pipul dɛn fɔ gɛt fet pan am. Dɔn, di wan ol wɔl go ful ɔp wit pafɛkt pipul dɛn we de du wetin rayt, ɛn we go prez Jiova sote go wit gladi at!