Usay Yu Go Fɛn Rial Op?

IMAJIN se yu wɔch stɔp fɔ wok. We yu de luk fɔ we fɔ mek am, difrɛn pipul dɛn se dɛn go ebul fɔ mek am. Yu gɛt bɔku pipul dɛn arawnd we de tɔk se dɛn sabi fɔ mek wɔch; dɛn ɔl de gi yu kɔnfidɛns, bɔt sɔm de mek yu kɔnfyus. Bɔt wetin yu go du we yu kam fɔ no se yu neba na in na di man we bin mek da wɔch de, dɔn bak i rɛdi fɔ ɛp yu, ɛn yu nɔ go pe natin? I go izi fɔ mek yu disayd wetin fɔ du nɔto so?

Naw kɔmpia da wɔch de to op. If yu kam fɔ si se yu dɔn lɛf fɔ gɛt op lɛk bɔku pipul dɛn insay dis tɛm we tin nɔ izi, usay yu go tɔn fɔ ɛp? Bɔku pipul dɛn go tɔk se dɛn ebul fɔ ɛp, bɔt dɛn ɔl de tɔk difrɛn tin ɛn de mek yu kɔnfyus. So wetin mek yu nɔ go go to di Pɔsin we mek mɔtalman ɛn we mek i ebul gɛt op? Di Baybul se “i nɔ de fa frɔm ɛniwan pan wi” ɛn i rili rɛdi fɔ ɛp wi.​—Akt 17:​27; 1 Pita 5:​7.

Wetin Op Rili Min?

Wetin di Baybul tɔk bɔt op rili tru ɛn i izi fɔ ɔndastand pas di we aw dɔktɔ dɛn, sayɛntist, ɛn saykɔlɔjist dɛn tide de tɔk bɔt op. Di orijinal wɔd we dɛn yuz na di Baybul fɔ translet “op” min fɔ peshɛnt wet ɛn fɔ ɛkspɛkt gud tin. Rili na tu tin mekɔp op. Di want we wi go want sɔntin we gud ɛn di rizin we mek wi biliv se wi go gɛt am. Di op we di Baybul tɔk bɔt, pas di wish we pɔsin kin wish fɔ sɔntin. Strɔng rizin ɛn pruf de fɔ da op de.

So dis min se op jɔs tan lɛk fet we pɔsin fɔ gɛt pruf fɔ. (Ibruz 11:⁠1) Bɔt stil, di Baybul sho di difrɛns we de bitwin fet ɛn op.​—1 Kɔrintians 13:​13.

Fɔ ɛgzampul: If yu aks yu padi we yu trɔst fɔ du sɔntin fɔ yu, yu go op se i go du am. Yu gɛt op bikɔs yu gɛt fet pan yu padi, yu no am wɛl ɛn yu dɔn si aw i dɔn de ɛp ɔda pipul dɛn. Yu fet ɛn yu op de wok togɛda bɔt dɛn difrɛn. Aw yu go gɛt op pan Gɔd?

Wetin Mek Wi Gɛt Op?

Na Gɔd de gi tru tru op. Insay di tɛm we dɛn bin de rayt di Baybul, dɛn bin kɔl Jiova di wan we “Izrɛl abop pan.” (Jɛrimaya 14:⁠8) Na in bin gi in pipul dɛn tru tru op so in na bin dɛn op. Dɛn kayn op dɛn de nɔ jɔs min fɔ wish fɔ sɔntin. Gɔd bin gi dɛn gud rizin fɔ gɛt op. I bin du ɔl wetin i bin prɔmis se i go du. Jɔshwa we na bin di Izrɛlayt dɛn lida bin tɛl dɛn se: “Una ɔl no . . . se pan ɔl di gud tin dɛn we Jiova we na una Gɔd dɔn prɔmis una, nɔn pan dɛn nɔ fel.”​—Jɔshwa 23:⁠14, NWT.

Lɔng tɛm dɔn pas, bɔt Jiova stil de du wetin i dɔn prɔmis. Di Baybul ful-ɔp wit Gɔd in wɔndaful prɔmis dɛn, ɛn aw i dɔn du di tin dɛn we i bin prɔmis. In prɔfɛsi dɛn so tru dat sɔm tɛm dɛn de, dɛn bin de tɔk bɔt dɛn lɛk se dɛn dɔn ɔlrɛdi apin.

Na dat mek wi se di Baybul na buk we de gi op. As yu de stɔdi bɔt aw Gɔd bin de dil wit mɔtalman, yu go gɛt strɔng rizin fɔ put yu op pan am. Di apɔsul Pɔl bin rayt se: “Ɔl di tin dɛn we dɛn bin dɔn rayt trade na fɔ tich wi, so dat di bia we wi de bia ɛn di kɔrej we di Skripchɔ dɛn de kɔrej wi go mek wi gɛt op.”​—Romans 15:⁠4.

Us Op Gɔd De Gi Wi?

Ustɛm wi kin rili nid op? Nɔto we pɔsin we wi lɛk day? Na tru se fɔ bɔku pipul dɛn na jɔs fɔ da tɛm de we pɔsin we dɛn lɛk day, bɔt dɛn nɔ kin kɔntinyu fɔ gɛt op. Fɔ tru, day kin mek pɔsin nɔ gɛt op. I de afɛkt wi ɔl. Wi kin avɔyd am jɔs fɔ sɔm tɛm bɔt wi nɔ gɛt di pawa fɔ stɔp am. Na in mek di Baybul kɔl am “di las ɛnimi.”​—1 Kɔrintians 15:​26.

Bɔt aw wi go gɛt op we pɔsin we wi lɛk day? Wɛl di Baybul vas we kɔl day di las ɛnimi tɔk bak se dis ɛnimi nɔ go “de igen.” Jiova gɛt pawa pas day. I dɔn pruv dat bɔku tɛm. Aw? Na bay we i gi layf bak to pipul dɛn we bin dɔn day. Di Baybul tɔk bɔt nayn difrɛn tɛm dɛn we Gɔd bin yuz in pawa fɔ gi layf bak to pipul dɛn we bin dɔn day.

Wan fayn ɛgzampul na di tɛm we Jiova bin gi Jizɔs pawa fɔ gi layf bak to in padi we i lɛk we nem Lazarɔs, we bin dɔn day fɔ 4 dez. Jizɔs nɔ bin du dis na kɔna, i bin du am bifo bɔku bɔku pipul dɛn.​—Jɔn 11:​38-​48, 53; 12:​9, 10.

Sɔntɛm yu go de wɔnda, ‘Wetin mek Gɔd bin gi layf bak to dɛn pipul dɛn de? Dɛn nɔ bin ol ɛn as tɛm de go dɛn day bak?’ Yɛs, dɛn bin ol ɛn day bak. Bɔt di layf we dɛn pipul dɛn de bin gɛt bak nɔ jɔs mek wi want fɔ si di wan dɛn we wi lɛk we dɔn day; bɔt i mek wi gɛt strɔng rizin fɔ biliv se dɛn go gɛt layf bak. Dat min se wi gɛt tru tru op.

Jizɔs bin se: “Na mi de gi layf bak ɛn na mi na di layf.” (Jɔn 11:​25) Na in Jiova go gi pawa fɔ gi layf bak to pipul dɛn we dɔn day na difrɛn say dɛn na di wɔl. Jizɔs bin se: “Di tɛm de kam we ɔl di wan dɛn we de na di grev dɛn we Gɔd de mɛmba go yɛri di Pikin in vɔys ɛn kɔmɔt na do.” (Jɔn 5:​28, 29) Yɛs, di tɛm de kam we ɔl di wan dɛn we de na di grev gɛt di op fɔ gɛt layf bak fɔ de na paradays na dis wɔl.

Di prɔfɛt Ayzaya bin tɔk bɔt aw pipul dɛn go gɛt layf bak. I bin se: “Una dayman dɛn go gɛt layf, dɛn bɔdi go grap. Una we de na grev, una wek ɛn siŋ wit jɔy; bikɔs una dyu, na dyu we gɛt layt ɛn una go mek i fɔdɔm na di land we dayman dɛn de.”​—Ayzaya 26:​19 The New English Bible.

Yu nɔ tink se da prɔmis de de kɔrej wi? Di wan dɛn we dɔn day de na say we sef pas ɔl, jɔs lɛk aw yɔŋbebi kin sef we i de na in mama in bɛlɛ. Fɔ tru, di wan dɛn we de na di grev sef, bikɔs dɛn de na di Ɔlmayti Gɔd in maynd. (Lyuk 20:​37, 38) Ɛn i nɔ go te igen, dɛn go gɛt layf bak. Wi go gladi fɔ wɛlkɔm dɛn jɔs lɛk aw pipul dɛn kin gladi fɔ wɛlkɔm yɔŋbebi! So op de ivin fɔ di wan dɛn we dɔn day.

Wetin Op Go Du fɔ Yu?

Pɔl tich wi bɔku tin bɔt wetin mek op impɔtant. I tɔk bɔt op as impɔtant pat pan di spirichwal klos we wi de yuz fɔ fɛt; dat na di ɛlmɛt. (1 Tɛsalonians 5:⁠8) Wetin mek Pɔl bin kɔmpia op to ɛlmɛt? Wɛl insay di tɛm we dɛn bin de rayt di Baybul, sojaman dɛn bin de wɛr ɛlmɛt dɛn we dɛn mek wit ayɛn fɔ go fɛt wɔ. Dɛn ɛlmɛt dɛn de bin de protɛkt di sojaman dɛn ed fɔ mek dɛn nɔ go damej bad bad wan. Wetin Pɔl bin de tray fɔ tɔk? Jɔs lɛk aw ɛlmɛt de protɛkt di ed, na so op de protɛkt wi maynd we wi de yuz fɔ tink. If yu gɛt strɔng op bikɔs ɔf Gɔd in prɔmis dɛn, yu go kɔntinyu fɔ gɛt kolat ɛn no prɔblɛm nɔ go mek yu panik ɔ mek yu gɛt pwɛlat. Udat pan wi nɔ want da kayn ɛlmɛt de?

Pɔl bin yuz wan ɔda ɛgzampul fɔ tɔk bɔt di op we wi gɛt bikɔs ɔf Gɔd in prɔmis dɛn. I bin rayt se: “Dis op we wi gɛt tan lɛk ankɔ fɔ wi layf we de ɛp wi fɔ tinap tranga wan ɛn nɔ gɛt wan dawt.” (Ibruz 6:​19) Pɔl bin dɔn de insay ship we pwɛl na si so I no aw di ankɔ rili impɔtant. We big briz de blo, di kaptin dɛn kin sɛn di ship in ankɔ insay di wata. If i tɔch na grɔn insay di si ɛn ol tayt wan, di big big briz we de blo nɔ go kapsay di ship bifo dat, i de push di ship fɔ go na dray land.

Jɔs lɛk aw ankɔ de ol ship tranga wan, na so Gɔd in prɔmis dɛn de ɛp wi fɔ “tinap tranga wan ɛn nɔ gɛt wan dawt” we prɔblɛm mit wi. Jiova prɔmis se tɛm de kam we wɔ, kraym, pwɛlat ɛn ivin day nɔ go de igen. (Rid di bɔks na pej 10.) We wi ol da op de tranga wan, dat de ɛp wi fɔ tinap tranga wan we prɔblɛm mit wi. I go ɛp wi bak fɔ liv wi layf di we aw Gɔd want ɛn avɔyd fɔ du tin dɛn we pipul dɛn we de na di wɔl we nɔ de sav Gɔd de du.

Yusɛf go bɛnifit frɔm di op we Jiova de gi. I want yu fɔ ɛnjɔy layf jɔs lɛk aw i bin want. I want mek “ɔlkayn pipul dɛn sev.” Aw? Fɔs, wi ɔl fɔ no di “kɔrɛkt tin bɔt di trut.” (1 Timoti 2:⁠4) Di wan dɛn we rayt dis buk de ɛnkɔrej yu fɔ lan di tru tin we de insay Gɔd in Wɔd, di Baybul. Di op we Gɔd de gi yu, bɛtɛ fa we pas di op we yu go gɛt na dis wɔl.

We yu gɛt da kayn op de, yu nɔ go ɛva fil se yu nɔ gɛt ɛp, bikɔs Gɔd go gi yu di trɛnk we yu nid fɔ rich ɛni gol dɛn we yu dɔn sɛt we gri wit wetin Gɔd want. (2 Kɔrintians 4:​7; Filippians 4:​13) Yu nɔ tink se na da kayn op de yu nid? So if yu nid op, i dɔn te we yu de luk fɔ am, nɔ pwɛl at. Yu go ebul fɔ gɛt am!

[Bɔks/Pikchɔ na pej 10]

Wetin Mek Wi Fɔ Gɛt Op

Di tin dɛn we dɛn Skripchɔ dɛn ya tɔk go ɛp yu fɔ gɛt op:

◼ Gɔd prɔmis se tin go fayn tumara bambay.

In Wɔd se di wan ol wɔl go bi paradays, usay pipul dɛn go gladi ɛn de togɛda wit wanwɔd.​—Sam 37:​11, 29; Ayzaya 25:​8; Rɛvɛleshɔn 21:​3, 4.

◼ Gɔd nɔ de lay.

Jiova et ɔlkayn lay. In na Gɔd we oli, so i nɔ posibul fɔ mek i lay.​—Prɔvabs 6:​16-​19; Ayzaya 6:​2, 3; Taytɔs 1:​2; Ibruz 6:​18.

◼ Gɔd gɛt pawa we nɔ de dɔn.

Na Jiova nɔmɔ na di ɔlmayti. Natin nɔ de na di wan ol wɔl we go stɔp am fɔ mek i nɔ gu wetin i dɔn prɔmis.​—Ɛksodɔs 15:​11; Ayzaya 40:​25, 26.

◼ Gɔd want yu fɔ de sote go.

​—Jɔn 3:​16; 1 Timoti 2:​3, 4.

◼ Gɔd de luk wi wit op.

I disayd nɔ fɔ pe atɛnshɔn pan di mistek dɛn we wi de mek, bɔt i de pe atɛnshɔn pan wi gud kwaliti dɛn ɛn di ɛfɔt we wi de mek. (Sam 103:​12-​14; 130:​3; Ibruz 6:​10) I op se wi go du wetin rayt ɛn mek i gladi.​—Prɔvabs 27:​11.

◼ Gɔd prɔmis fɔ ɛp yu fɔ rich yu gol dɛn we gri wit wetin i want.

Gɔd savant dɛn nɔ fɔ ɛva fil se pɔsin nɔ de we de ɛp dɛn. I de gi in oli spirit we gɛt pawa pas ɔl, fɔ ɛp wi.​—Filipians 4:​13.

◼ We yu abop pan Gɔd i nɔ go ɛva fel yu.

In na Gɔd we yu kin abop pan wit ɔl yu at, i nɔ go ɛva disapɔynt yu.​—Sam 25:​3.

[Pikchɔ na pej 12]

Jɔs lɛk aw ɛlmɛt de protɛkt di ed, na so op de protɛkt wi maynd

[Pikchɔ na pej 12]

Jɔs lɛk ankɔ, we wi gɛt op dat de mek wi nɔ fred

[Credit Line]

Courtesy René Seindal/Su concessione del Museo Archeologico Regionale A. Salinas di Palermo