“Yu Fɔ Lɛk . . . Gɔd”

 1. Wetin mek Gɔd ɛn in Pikin bin kam fɔ lɛk dɛnsɛf?

JIOVA in Pikin, we na Jizɔs Krays, bin tɔk se: “A lɛk mi Papa.” (Jɔn 14:31) Jizɔs bin tɔk bak se: “Di Papa lɛk in Pikin.” (Jɔn 5:20) Dis nɔ fɔ sɔprayz wi bikɔs we Jizɔs bin de na ɛvin lɔng lɔng tɛm bifo i kam na di wɔl, na in bin de ɛp Gɔd fɔ du bɔku tin. (Prɔv. 8:30) As Jiova ɛn Jizɔs bin de wok togɛda, Jizɔs bin lan plɛnti tin bɔt in Papa in kwaliti dɛn ɛn dis bin mek i lɛk in Papa. Bikɔs dɛn ɔl tu bin de togɛda fɔ lɔng tɛm, dɛn kam fɔ lɛk dɛnsɛf mɔ ɛn mɔ.

 2. (a) Aw wi fɔ fil bɔt Gɔd? (b) Us kwɛstyɔn dɛn wi go tɔk bɔt?

² Devid bin siŋ se: “E PAPA GƆD, a lɛk yu! Yu na di wan we de gi mi trɛnk.” (Sam 18:1) Na so wisɛf fɔ fil bɔt Gɔd, bikɔs i lɛk wi. If wi obe Jiova, i go sho wi se i lɛk wi. (Rid Ditarɔnɔmi 7:12, 13.) Bɔt yu tink se wi go ebul fɔ rili lɛk Gɔd we wi nɔ de si am? Wetin i min fɔ lɛk Jiova? Wetin mek wi fɔ lɛk am? Ɛn aw wi go sho se wi lɛk Gɔd?

3, 4. Wetin mek wi go ebul fɔ lɛk Jiova?

³ “Gɔd na Spirit”; so wi nɔ go ebul fɔ si am. (Jɔn 4:24) Bɔt, stil wi go ebul fɔ lɛk Jiova, ɛn di Baybul tɛl wi se wi fɔ sho se wi lɛk am. Fɔ ɛgzampul, Mozis bin tɛl di Izrɛlayt dɛn se: “Dɛn fɔ lɛk PAPA GƆD wit ɔl dɛn at, wit ɔl dɛn sol ɛn wit ɔl dɛn trɛnk.”—Dit. 6:5.

⁴ Wetin mek wi go ebul fɔ lɛk Gɔd gud gud wan? Bikɔs na so i mek wi. I mek wi fɔ wɔship am ɛn sho lɔv. We wi de wɔship Jiova di rayt we, wi go lɛk am mɔ ɛn gɛt gladi at. Jizɔs bin se: “Dɛn wan we abop pan Gɔd, gɛt blɛsin, bikɔs Gɔd de rul dɛn!” (Mat. 5:3) Insay wan buk we dɛn kɔl Man Does Not Stand Alone, we A. C. Mɔrisin, bin rayt, i bin se i rili wɔndaful fɔ no se mɔtalman dɔn de luk fɔ Gɔd ɔltɛm ɛn dɛn want fɔ biliv pan am. Jɔs lɛk dis man, bɔku pipul dɛn tide biliv se Gɔd mek wi fɔ no am.

 5. Aw wi no se nɔto fɔ natin wi de luk fɔ Gɔd?

⁵ Yu tink se na fɔ natin wi de luk fɔ Gɔd? Nɔ, nɔto fɔ natin, bikɔs Gɔd insɛf sɛf want mek wi luk fɔ am. Di apɔsul Pɔl insɛf bin tɔk bɔt dis klia wan we i bin de tɔk to sɔm pipul dɛn we bin gɛda na Atɛns. Bɔku pan dɛn bin de fil se dɛn fɔ go na wan patikyula tɛmpul fɔ go wɔship wan uman gɔd we dɛn kɔl Atina. Bɔt Pɔl bin tɛl dɛn se: “Gɔd we mek di wɔl ɛn ɔltin we [de] de . . . nɔ tap na os we mɔtalman bil fɔ pre to am.” Pɔl bin kɔntinyu fɔ tɔk se di pipul dɛn we de luk fɔ Gɔd go ebul fɔ fɛn am, ilɛk usay dɛn de na di wɔl. Dɔn, i tɔk se Gɔd de nia wi ɔl. (Akt 17:24-27) So wi dɔn si se pipul dɛn go ebul fɔ fɛn Gɔd. I dɔn pas sɛvin ɛn af milyɔn Jiova Witnɛs dɛn we dɔn rili ‘fɛn Gɔd,’ ɛn dɛn lɛk am wit ɔl dɛn at.

 6. Us lɔ Jizɔs bin se “pas ɔl di ɔda wan dɛn”?

⁶ Di lɔv we wi gɛt fɔ Jiova fɔ kɔmɔt na wi at. Jizɔs bin ɛp wi fɔ ɔndastand dat we wan Faresi bin aks am se: “Ticha, us lɔ pas ɔl di ɔda lɔ dɛn?” Jizɔs bin ansa am se: “‘Yu fɔ lɛk di Masta we na yu Gɔd wit ɔl yu at, wit ɔl yu layf ɛn wit ɔl yu maynd.’ Dis na di lɔ we pas ɔl di ɔda wan dɛn.”—Mat. 22:34-38.

 7. Wetin i min fɔ lɛk Gɔd wit (a) ‘ɔl wi at’? (b) ‘ɔl wi layf’? (c) ‘ɔl wi maynd’?

⁷ Wetin Jizɔs bin min we i se wi fɔ lɛk Gɔd wit ‘ɔl wi at,’ wit ‘ɔl wi layf,’ ɛn wit ‘ɔl wi maynd’? We Jizɔs bin se wi fɔ lɛk Jiova wit ‘ɔl wi at,’ i bin min se di we aw wi lɛk Jiova fɔ afɛkt di we aw wi de fil ɛn di tin dɛn we wi want fɔ du. We i se wi fɔ lɛk am wit ‘ɔl wi layf,’ i bin min se di we aw wi lɛk Jiova fɔ afɛkt ɔltin we wi de du na layf. Ɛn we i tɔk se wi fɔ lɛk Jiova wit ‘ɔl wi maynd,’ i bin min se di we aw wi lɛk Jiova fɔ afɛkt di we aw wi de tink ɛn di tin dɛn we wi de tink bɔt. Jizɔs bin de tɔk se wi fɔ lɛk Jiova wit ɔl wetin wi gɛt.

 8. We wi rili lɛk Gɔd, wetin dat go mek wi du?

⁸ If wi lɛk Gɔd wit ɔl wi at, wit ɔl wi layf, ɛn wit ɔl wi maynd, wi go de stɔdi di Baybul gud gud wan, wi go du wetin i want wit ɔl wi at, ɛn prich di gud nyus bɔt in Kiŋdɔm wit zil. (Mat. 24:14; Rom 12:1, 2) We wi rili lɛk Jiova, dat go mek wi kam nia am mɔ ɛn mɔ. (Jems 4:8) Wi nɔ go ebul fɔ tɔk bɔt ɔl di rizin dɛn we mek wi fɔ lɛk Gɔd. Bɔt lɛ wi tɔk bɔt sɔm.

 9. Wetin mek yu lɛk Jiova?

⁹ Na Jiova mek wi ɛn na in de gi wi wetin wi nid. Pɔl bin se: “Na Gɔd de gi wi layf, nain de mek wi ebul waka ɛn nain de mek wi ebul du ɔltin!” (Akt 17:28) Jiova dɔn gi wi dis fayn fayn wɔl usay wi de. (Sam 115:16) I dɔn gi wi bak tin fɔ it ɛn ɔda tin dɛn we wi nid fɔ kɔntinyu fɔ liv. Na dat mek Pɔl bin tɛl di pipul dɛn na Listra, we bin de wɔship lay lay gɔd dɛn se: “Gɔd we gɛt layf . . . bin de sho ɔlman udat i bi bay di gud we i kin du fɔ dɛn ɔl. Gɔd kin gi una ren. Di ren kin fɔdɔm frɔm di klawd, ɛn mek wetin una plant bia wɛn di tɛm rich, so dat una go gladi.” (Akt 14:15-17) Yu nɔ tink se dis na rizin we mek wi fɔ lɛk wi Gɔd we mek ɔltin ɛn we de gi wi ɔl wetin wi nid?—Ɛkli. 12:1.

10. Aw wi fɔ fil we Gɔd dɔn mek we fɔ pul wi pan sin ɛn day?

¹⁰ Gɔd dɔn mek we fɔ pul wi pan di sin ɛn day we Adam put wi pan. (Rom 5:12) Fɔ tru, “Gɔd dɔn sho wi aw i lɛk wi bikɔs pan ɔl we sin bin plɛnti na wi layf, Krays day fɔ wi.” (Rom 5:8) Wi rili gladi we Jiova dɔn mek we fɔ fɔgiv wi sin dɛn. If wi pul an pan di bad tin dɛn we wi bin de du ɛn sho se wi rili biliv se na di day we Jizɔs kam day fɔ wi go mek wi gɛt layf sote go, Gɔd go fɔgiv wi fɔ wi sin dɛn.—Jɔn 3:16.

11, 12. Wetin na di difrɛn op dɛn we Jiova dɔn gi wi?

¹¹ Jiova dɔn gi wi plɛnti tin fɔ abop pan ɛn dis de mek wi gladi ɛn gɛt kolat. (Rom 15:13) Di tin dɛn we Gɔd dɔn prɔmis se i go gi wi, de ɛp wi fɔ bia ɛni bad tin we de mit wi. Di anɔyntɛd Kristian dɛn we “nɔ lɛf fɔ biliv” pan Gɔd ‘go gɛt layf we go de sote go na ɛvin.’ (Rɛv. 2:10) Di wan dɛn we de du wetin Gɔd want, we gɛt di op fɔ de na dis wɔl go gɛt bɔku bɔku blɛsin we go de sote go na Paradays. (Lyuk 23:43, NW) Aw wi fil bɔt ɔl dɛn fayn fayn blɛsin ya? Yu nɔ tink se wi fɔ gladi, gɛt kolat, ɛn lɛk di Gɔd we de gi wi “ɔl dɛn tin we gud ɛn we mek wi nɔ want ɛnitin mɔ”?—Jems 1:17.

¹² Gɔd dɔn gi wi op se di wan dɛn we dɔn day go gɛt layf bak. (Akt 24:15) Wi at kin pwɛl bad we sɔmbɔdi we wi lɛk kin day, bɔt bikɔs wi gɛt op se di wan dɛn we dɔn day go gɛt layf bak, wi nɔ kin fil am tumɔs lɛk di wan dɛn we nɔ gɛt op. (1 Tɛs. 4:13, NW) Bikɔs Jiova Gɔd lɛk wi, i rili want fɔ gi layf bak to di wan dɛn we dɔn day, mɔ so di wan dɛn we bin fetful to am, lɛk Job. (Job 14:15) Tink bɔt di tɛm we di wan dɛn we gɛt layf go gladi fɔ si dɛn fambul ɛn padi dɛn we bin dɔn day. Wi rili lɛk wi Papa we de na ɛvin, we dɔn gi wi dis wɔndaful op!

13. Wetin sho se Gɔd rili bisin bɔt wi?

¹³ Jiova rili bisin bɔt wi. (Rid Sam 34:6, 18, 19; Pita In Fɔs Lɛta 5:6, 7.) Bikɔs wi no se Papa Gɔd lɛk wi ɛn rɛdi fɔ ɛp di wan dɛn we fetful to am ɔltɛm, dat kin mek wi fil sef. (Sam 79:13) Pantap dat, di tin dɛn we Gɔd in Kiŋdɔm gɛt fɔ du fɔ wi, de sho se Gɔd lɛk wi. Gɔd dɔn pik Jizɔs Krays fɔ bi Kiŋ. Afta Jizɔs Krays go dɔn pul di wan dɛn we de fɛt ɛn tek advantej pan dɛn kɔmpin, ɛn ɔl di ɔda bad bad tin dɛn we de apin na di wɔl, i go mek di wan dɛn we de du wetin Gɔd want gɛt kolat, ɛn i go gi dɛn ɔltin we dɛn nid fɔ ɛnjɔy layf. (Sam 72:7, 12-14, 16) Yu nɔ tink se ɔl dɛn prɔmis ya fɔ mek wi lɛk Papa Gɔd wit ɔl wi at, wi layf, wi trɛnk, ɛn wi maynd?—Lyuk 10:27.

14. Us big big ɔnɔ Gɔd dɔn gi wi?

¹⁴ Jiova dɔn ɔnɔ wi we i mek wi bi in Witnɛs dɛn. (Ayz. 43:10-12) Wi lɛk Gɔd bikɔs i dɔn gi wi di chans fɔ sɔpɔt di we aw i de rul ɛn fɔ ɛp pipul dɛn we de na dis wikɛd wɔl fɔ abop pan di fayn fayn tin dɛn we i dɔn prɔmis. Apat frɔm dat, wi gɛt fet ɛn kɔrej fɔ tɛl pipul dɛn di gud nyus we de na Gɔd in Wɔd bikɔs wi no se Gɔd go du ɔl wetin i dɔn prɔmis. (Rid Jɔshwa 21:45; 23:14.) Wi nɔ go ebul fɔ kɔnt ɔl di blɛsin dɛn ɛn di rizin dɛn we mek wi fɔ lɛk Jiova. Bɔt aw wi go sho se wi lɛk am?

15. We wi de stɔdi Gɔd in Wɔd ɛn du di tin dɛn we wi de lan, aw dat de ɛp wi?

¹⁵ Stɔdi Gɔd in Wɔd gud gud wan ɛn du wetin yu de lan. We wi du dis, i de sho se wi lɛk Jiova ɛn wi rili want lɛ in wɔd bi lɛk ‘layt fɔ mek wi si wi rod.’ (Sam 119:105) If wi gɛt prɔblɛm we de mɔna wi, i go fayn lɛ wi tek kɔrej frɔm di prɔmis dɛn we de na Gɔd in Wɔd, we se: “PAPA GƆD yu go gladi fɔ ɛnibɔdi we nɔ de es insɛf ɔp, bɔt we de sɔri fɔ in sin ɛn beg yu fɔ fɔgiv am.” “PAPA GƆD, na yu lɔv nɔmɔ kin gi mi kɔrej. Wɛn a kin ɛŋ-at na yu nɔmɔ ebul kɔrej mi dɔn a gladi.” (Sam 51:17; 94:18, 19) Jiova de fil sɔri fɔ pipul dɛn we de sɔfa, ɛn Jizɔs insɛf de fil sɔri fɔ dɛn. (Ayz. 49:13; Mat. 15:32) We wi de stɔdi di Baybul, i de ɛp wi fɔ no aw Jiova lɛk wi ɛn bisin bɔt wi. Ɛn dis kin mek wisɛf rili lɛk Jiova.

16. We wi de pre to Gɔd ɔltɛm, aw dat go ɛp wi fɔ lɛk am mɔ ɛn mɔ?

¹⁶ Pre to Gɔd ɔltɛm. Di pre we wi kin pre kin mek wi go nia Gɔd “we de ansa wi prea.” (Sam 65:2) We wi no se Gɔd de ansa wi prea dɛn, dat de mek wi lɛk am mɔ ɛn mɔ. Fɔ ɛgzampul, wi go dɔn si se Gɔd nɔ de gri fɔ lɛ sɔntin mit wi we wi nɔ ebul bia. (1 Kɔr. 10:13) If wi gɛt sɔntin we de wɔri wi ɛn wi pre to Jiova wit ɔl wi at, i go gi wi “kol at.” (Fil. 4:6, 7) Sɔntɛnde, wi kin pre na wi at, lɛk aw Nɛimaya bin du ɛn kam fɔ si se Gɔd dɔn ansa wi prea. (Nɛi. 2:1-6) As wi de “pre ɔltɛm” ɛn si se Jiova de ansa wi prea dɛn, wi go lɛk am mɔ ɛn mɔ, ɛn wi go biliv se i go ɛp wi fɔ bia ɛni ɔda tin we go mit wi fɔ tɛst wi fet.—Rom 12:12.

17. If wi lɛk Gɔd, aw wi go si wi mitin dɛn?

¹⁷ Lɛ wi de go wi mitin, asɛmbli, ɛn kɔnvɛnshɔn dɛn ɔltɛm. (Ibru 10:24, 25) Di Izrɛlayt dɛn bin de gɛda fɔ lisin ɛn lan bɔt Jiova so dat dɛn go rɛspɛkt ɛn wɔship am ɛn du ɔl wetin de na in Lɔ. (Dit. 31:12) If wi rili lɛk Gɔd, i nɔ go tranga fɔ du wetin i want. (Rid Jɔn In Fɔs Lɛta 5:3.) So lɛ wi nɔ ɛva alaw ɛnitin fɔ mek wi tek wi mitin dɛn mek ple ple. Wi nɔ go want mek natin ambɔg di we aw wi bin lɛk Jiova.—Rɛv. 2:4.

18. If wi lɛk Gɔd, aw wi go prich di gud nyus?

¹⁸ Prich “di Gud Nyuz” wit zil. (Gal. 2:5) Di lɛk we wi lɛk Gɔd, de mek wi tɔk bɔt in Kiŋdɔm. We Amagɛdɔn kam, di Kiŋ we Gɔd dɔn pik, we na Jizɔs Krays go mek pipul dɛn no se na Jiova nɔmɔ gɛt di rayt fɔ rul. (Sam 45:4; Rɛv. 16:14, 16) Wi gladi fɔ du di prichin wok we de ɛp pipul dɛn fɔ lan bɔt di we aw Gɔd lɛk wi ɛn di nyu wɔl we i dɔn prɔmis wi!—Mat. 28:19, 20.

19. Wetin mek wi fɔ gladi fɔ di ɛlda dɛn we de na di kɔngrigeshɔn?

¹⁹ Sho se yu gladi fɔ di we aw Gɔd dɔn arenj fɔ kia fɔ wi. (Akt 20:28) Jiova want wetin gud fɔ wi ɔltɛm, so i dɔn gi wi di ɛlda dɛn fɔ kia fɔ wi. Di ɛlda dɛn tan lɛk “ples fɔ ayd we ebi briz de blo, lɛk watasay dɛn we de rɔn na dray ples, lɛk di shed we rɔk de mek usay di land dɔn taya.” (Ayz. 32:1, 2) Wi kin gladi bad fɔ de na say we sef we ebi ebi briz ɛn ren de kam! Ɛn we di san kin de bɔn wi, wi kin gladi fɔ de na say usay di san nɔ go mit wi. Na di sem tin di ɛlda dɛn de du. Dɛn de ɛp ɛn ɛnkɔrej wi so dat wi go kɔntinyu fɔ sav Jiova ilɛk uskayn prɔblɛm mit wi. We wi de obe di ɛlda dɛn, wi de sho se wi gladi we Jiova de yuz dɛn fɔ gi ‘wi ɔl wetin i want fɔ gi wi.’ Ɛn wi de sho bak se wi lɛk Gɔd ɛn Krays, we na di edman na di kɔngrigeshɔn.—Ɛfi. 4:8; 5:23; Ibru 13:17.

20. Wetin wi go du if wi lɛk Gɔd?

²⁰ If yu ɛn Jiova na tayt padi, yu go de ‘du wetin in wɔd se, yu nɔ go jɔs de lisin in wɔd nɔmɔ.’ (Rid Jems 1:22-25.) Pɔsin we de “du wetin Gɔd in wɔd se” gɛt fet. Ɛn da fet de we i gɛt de mek i prich di gud nyus wit zil ɛn gi kɔmɛnt na mitin. Bikɔs wi rili lɛk Gɔd, wi go du wetin i de “tich wi.” Jiova de tich wi ɔl wetin i want lɛ wi du.—Sam 19:7-11.

21. Aw wi prea to Jiova fɔ tan lɛk?

²¹ If wi lɛk Jiova Gɔd, wi go de pre to am ɔltɛm wit ɔl wi at. Insay di Izrɛlayt dɛn tɛm, di prist dɛn bin de bɔn insɛns to Jiova ɛvride, so Devid bin kɔmpia in prea to insɛns, we i siŋ se: “Lɛ mi prea tan lɛkɛ insɛns we a de bɔn fɔ yu, ɛn lɛ mi an dɛn we a es ɔp fɔ pre tan lɛkɛ sakrifays we pɔsin kin mek ivintɛm to yu.” (Sam 141:2; Ɛks. 30:7, 8) If wi put wisɛf dɔŋ we wi de pre, tɛl Gɔd ɔl wetin de na wi at, ɛn prez am ɛn tɛl am tɛnki, wi prea go tan lɛk insɛns we go mek Jiova gladi fɔ ansa wi.—Rɛv. 5:8.

22. Wetin wi go lan insay di nɛks atikul?

²² Jizɔs bin se wi fɔ lɛk Gɔd ɛn wi kɔmpin mɔtalman. (Mat. 22:37-39) We wi lɛk Jiova ɛn di advays dɛn we i de gi wi, dat go ɛp wi fɔ lɛk wi kɔmpin mɔtalman. Na dis wi go tɔk bɔt insay di nɛks atikul.