Kɔntinyu fɔ Pe Atɛnshɔn pan di Tin we Impɔtant Pas Ɔl

1, 2. (a) Wetin fɔ impɔtant pas ɔl tin to wi? (b) Wetin mek i impɔtant to wi?

FƆ BƆKU pipul dɛn tide, mɔni na di tin we impɔtant pas ɔl ɔda tin. Na in dɛn de tink ɛn wɔri bɔt. Dɛn kin spɛn bɔku tɛm de tray fɔ gɛt bɔku mɔni ɔ fɔ kip di wan we dɛn gɛt. Fɔ ɔda pipul dɛn, di tin we impɔtant pas ɔl ɔda tin na dɛn famili, dɛn wɛlbɔdi, ɔ di tin dɛn we dɛn want fɔ du na layf.

² Sɔntin de we rili impɔtant pas ɔl dɛn tin dɛn de. Dat na fɔ sɔpɔt Jiova se na in gɛt rayt fɔ rul. I rili impɔtant fɔ mek wi nɔ ɛva stɔp fɔ pe atɛnshɔn to dis. If wi nɔ tek tɛm, wi go bizi wit di tin dɛn we wi de du ɛn wɔri bɔt wi yon prɔblɛm dɛn te wi fɔgɛt bɔt aw i impɔtant fɔ sɔpɔt Jiova se na in gɛt rayt fɔ rul. If wi de sɔpɔt se na Jiova gɛt di rayt fɔ rul, wi go ebul fɔ dil wit wi yon prɔblɛm dɛn we wi de gɛt, ɛn wi go kam nia Jiova mɔ ɛn mɔ.

 3. Wetin Setan bin tɔk bɔt di we aw Gɔd de rul?

³ Setan bin dɔn chalenj di rayt we Jiova gɛt fɔ rul. I want mek mɔtalman dɛn tink se Jiova na Rula we kɔrɔpt, ɛn i nɔ want wetin gud fɔ dɛn. Setan bin se mɔtalman go gladi if dɛn rul dɛnsɛf. (Jɛnɛsis 3:​1-5) I bin tɔk bak se no mɔtalman nɔ de we go kɔntinyu fɔ de biɛn Jiova, ɛn if tin rili tranga fɔ am, i nɔ go alaw Gɔd fɔ bi in Rula. (Job 2:​4, 5) So Jiova de alaw tɛm fɔ pas so dat ɔlman go no se tin go rili bad fɔ dɛn if Gɔd nɔ rul dɛn.

 4. Wetin mek i impɔtant fɔ mek Jiova pruv se wetin Setan tɔk na lay?

⁴ Fɔ tru, Jiova no se ɔl wetin Setan tɔk na lay. So wetin mek i dɔn alaw tɛm fɔ pas fɔ mek Setan tray fɔ pruv se wetin i bin tɔk na tru? Di ansa to dis kwɛstyɔn gɛt sɔntin fɔ du wit ɔlman; di wan dɛn we de na ɛvin ɛn di wan dɛn we de na dis wɔl. (Rid Sam 83:​18, NW.) Adam ɛn Iv nɔ bin gri fɔ mek Jiova rul dɛn, ɛn frɔm da tɛm de bɔku ɔda pipul dɛn dɔn falamakata dɛn. Dis kin mek sɔm pipul dɛn de tink se wetin Setan tɔk na tru. If dis prɔblɛm nɔ sɔlv fɔ mek mɔtalman ɔ enjɛl dɛn si, pis ɛn wanwɔd nɔ go ɛva de. Bɔt we Jiova go dɔn sho se na in gɛt rayt fɔ rul, ɔlman go de ɔnda in rul sote go. Da tɛm de, pis go de ɔlsay na di wɔl.—Lɛta Fɔ Ɛfisɔs 1:​9, 10.

 5. Aw dis prɔblɛm bɔt udat gɛt rayt fɔ rul gɛt sɔntin fɔ du wit wi?

⁵ Ɔlman go no se na Gɔd gɛt rayt fɔ rul. Setan ɛn mɔtalman gɔvmɛnt nɔ go ebul fɔ rul ɛn Gɔd go pul dɛn kɔmɔt. Na di Kiŋdɔm we Krays gɛt fɔ rul Gɔd go yuz fɔ du ɔl wetin I want. Fetful pipul dɛn go pruv se mɔtalman ebul fɔ tinap tranga wan ɛn kɔntinyu fɔ sɔpɔt Gɔd in rul. (Ayzaya 45:​23, 24) Yu want fɔ bi wan pan dɛn fetful wan dɛn de? Yɛs, yu go want fɔ bi wan pan dɛn! So yu nid fɔ ɔndastand aw dis prɔblɛm rili impɔtant.

 6. Wetin mek wi fɔ sɔpɔt Jiova se na in gɛt di rayt fɔ rul?

⁶ Fɔ sɔpɔt Jiova se na in gɛt di rayt fɔ rul impɔtant fa fawe pas fɔ mek wi gɛt gladi at. Bɔt dat nɔ min se fɔ mek wi sev nɔ impɔtant ɔ Jiova nɔ bisin bɔt wi. Aw wi no dis?

7, 8. Aw wi go bɛnifit if wi sɔpɔt di we aw Gɔd de rul?

⁷ Jiova rili lɛk mɔtalman. Infakt, wi so valyu to am dat i mek in Pikin kam day fɔ wi so dat wi go gɛt layf we go de sote go. (Jɔn 3:​16; Jɔn In Fɔs Lɛta 4:​9) If Jiova nɔ du di tin dɛn we i bin dɔn prɔmis fɔ du fɔ wi tumara bambay, ɔl wetin Setan ɛn di wan dɛn we de biɛn am bin dɔn tɔk go bi tru. Setan bin dɔn se Jiova de lay, i nɔ want wetin gud fɔ mɔtalman, ɛn i nɔ de rul di rayt we. Pipul dɛn we nɔ de fɔ Jiova nɔ de tek wetin Jiova dɔn prɔmis siriɔs. Dɛn kin se: “We di pɔsin we dɛn bin se go kam? Frɔm we wi grampapa papa dɛn day te tide natin nɔ chenj na di wɔl; natin nɔ chenj frɔm di tɛm we Gɔd mek di wɔl!” (Pita In Sɛkɛn Lɛta 3:​3, 4) Bɔt Jiova go du ɔl wetin i dɔn prɔmis. I dɔn mek shɔ se we i de sho se na in gɛt rayt fɔ rul, i go sev mɔtalman dɛn we de obe am. (Rid Ayzaya 55:​10, 11.) Jiova de rul wit lɔv. So wi shɔ se, i lɛk ɛn valyu in savant dɛn we nɔ de kɔmɔt biɛn am.—Ɛksodɔs 34:​6.

⁸ Bikɔs di rayt we Jiova gɛt fɔ rul rili impɔtant pas ɛni ɔda tin nɔ min se fɔ mek wi sev nɔ impɔtant to am. Jiova rili bisin bɔt wi. Ɔltɛm, wi want fɔ de mɛmba di tin we impɔtant pas ɔl ɛn kɔntinyu fɔ de sɔpɔt di we aw Jiova de rul.

 9. Wetin Setan bin se bɔt Job? (Luk di pikchɔ nia dis atikul in taytul.)

⁹ I impɔtant fɔ mek wi tink di rayt we bɔt Jiova in rayt fɔ rul. Wi go no dis we wi rid di Baybul buk we nem Job, we na wan pan di fɔs Baybul buk dɛn we dɛn bin rayt. Insay de, wi rid se Setan bin tɔk se if Job sɔfa bad bad wan, i go tɔn in bak pan Gɔd. Setan ivin tɛl Gɔd fɔ mek Job sɔfa. Jiova nɔ go du dat, bɔt i bin alaw Setan fɔ tɛst Job, we i se: “I de lɛf Job gi am mek i nyakanyaka ɔl wetin Job gɛt.” (Rid Job 1:​7-12.) Jɔs afta dat, Job in savant dɛn day ɛn i lɔs ɔl wetin i bin gɛt. Dɔn, i kam fɔ no bak se in tɛn pikin dɛn ɔl dɔn day. Setan mek i tan lɛk se na Gɔd mek dɛn tin dɛn ya apin. (Job 1:​13-19) Afta dat, Setan put bad bad sik pan Job. (Job 2:​7) Fɔ mek tin wɔs, Job in wɛf ɛn in tri lay lay padi dɛn bin tɔk bad tin dɛn we mek Job in at pwɛl.—Job 2:​9; 3:​11; 16:​2.

10. (a) Aw Job bin sho se i de biɛn Gɔd? (b) Wetin mek nid bin de fɔ kɔrɛkt Job?

¹⁰ Yu tink se wetin Setan bin tɔk na tru? Nɔ. Pan ɔl we bad bad tin dɛn bin apin to Job, i nɔ ɛva tɔn in bak pan Jiova. (Job 27:​5) Bɔt fɔ shɔt tɛm, Job bin fɔgɛt bɔt wetin rili impɔtant ɛn tink mɔ bɔt insɛf. I bin kɔntinyu fɔ de se i nɔ du ɛnitin we bad. Job bin fil bak se i gɛt rayt fɔ no wetin mek i de sɔfa. (Job 7:​20; 13:​24) I go mɔs bi se wi ɔndastand di we aw Job bin de fil. Bɔt Jiova bin no se Job nɔ bin de tink di rayt we ɛn i bin kɔrɛt am. Aw i bin du dis?

11, 12. Wetin Jiova bin ɛp Job fɔ no? Wetin Job bin du?

¹¹ Wi kin rid bɔt wetin Jiova bin tɛl Job na Job chapta 38 to 41. Jiova nɔ bin ɛksplen to Job wetin mek i de sɔfa. Bifo dat, Jiova bin want fɔ ɛp Job fɔ ɔndastand se dɛn ɔl tu nɔ ikwal. I bin tich Job se sɔntin de we rili impɔtant pas di prɔblɛm we i gɛt. (Rid Job 38:​18-21.) Di tin dɛn we Jiova bin tɔk ɛp Job fɔ ajɔst di we aw i de tink.

¹² Yu tink se na bad tin Jiova bin du we i tɔk to Job dis kayn we, pan ɔl we i bin de sɔfa? Nɔ, nɔto so i bi. Job insɛf nɔ bin de tink dis kayn we. Job bin ɔndastand di advays we Jiova bin gi am ɛn i bin valyu am. I bin se: “A dɔn shem, so a de rɔb dɔst ɛn ashis [fɔ] beg yu, lɛ yu sɔri fɔ mi.” (Job 42:​1-6) Bifo dis tɛm, wan yɔŋ man we nem Ilayu bin dɔn ɛp Job fɔ ajɔst di we aw i bin de tink. (Job 32:​5-10) Afta Job bin lisin to di fayn advays we Jiova gi am ɛn chenj di we aw i bin de tink, Jiova bin mek ɔda pipul dɛn no se i gladi fɔ we Job kɔntinyu fɔ fetful to am.—Job 42:​7, 8.

13. Aw di advays we Jiova bin gi Job bin ɛp am afta we i bin dɔn lɛf fɔ sɔfa?

¹³ Di advays we Jiova bin gi Job bin bɛnifit am pan ɔl we i nɔ bin de sɔfa igen. Jiova ‘blɛs Job we i bin ol, pas we i bin yɔŋ.’ As tɛm de go, Job bin “gɛt sɛvin bɔypikin ɛn tri gyal pikin.” (Job 42:​12-14) Pan ɔl we Job bin lɛk dɛn pikin dɛn ya, i go mɔs bi se i bin de mis di wan dɛn we bin dɔn day. I go bi se i nɔ ɛva fɔgɛt ɔl di bad bad tin dɛn we bin apin to in ɛn in famili. Ivin if Job bin kam fɔ no wetin mek i bin sɔfa, i go mɔs dɔn de wɔnda wetin mek Gɔd alaw am fɔ sɔfa bad bad wan. If Job bin de tink dis kayn we, i go bi se i mɛmba wetin Jiova bin dɔn tɛl am. Dis go dɔn ɛnkɔrej am ɛn ɛp am fɔ ajɔst di we aw i bin de tink.—Sam 94:​19.

14. Wetin wi lan frɔm Job in stori?

¹⁴ We wi tink gud wan bɔt wetin bin apin to Job, i go ɛp wi fɔ ajɔst di we aw wi de tink, ɛn i go ɛnkɔrej wi. Di Baybul buk we nem Job na buk we Jiova bin mek dɛn rayt “fɔ lan wi sɔntin, so dat, we di tin we rayt de, de mek wi ebul bia ɛn mek wi gɛt kɔrej, wi go no se Gɔd nɔ go lɛf wi.” (Lɛta Fɔ Rom 15:​4) I de tich wi se wi nɔ fɔ de tink mɔ bɔt wi yon prɔblɛm dɛn te wi stɔp fɔ de tink bɔt di rayt we Jiova gɛt fɔ rul. Jɔs lɛk Job, wisɛf de sho se na Jiova gɛt di rayt fɔ rul bay we wi de kɔntinyu fɔ gɛt fet ilɛksɛf tin nɔ izi fɔ wi.

15. Wetin go apin if wi kɔntinyu fɔ gɛt fet we wi gɛt prɔblɛm dɛn?

¹⁵ Di tin we bin apin to Job kin ɛnkɔrej wi bikɔs i de sho se di sɔfa we wi de sɔfa nɔ min se Jiova vɛks pan wi. We wi de sɔfa, dat de gi wi di chans fɔ sho se na Jiova gɛt di rayt fɔ rul. (Prɔvabs 27:​11) We wi kɔntinyu fɔ bia ɛn gɛt fet pan am, wi de mek Jiova gladi ɛn wi go gɛt fet mɔ ɛn mɔ. (Rid Lɛta Fɔ Rom 5:​3-5.) Di tin we apin to Job sho se “Gɔd de sɔri fɔ wi wɛn wi de sɔfa, ɛn i de sɔri fɔ wi pan ɔl we wi du tin we fɔ mek i vɛks.” (Jems 5:​11) If wi sɔpɔt Jiova se na in gɛt di rayt fɔ rul, i go blɛs wi. We wi no dis, dat go ɛp wi fɔ “gɛt maynd so dat [wi] go ebul bia ɔltin.”—Lɛta Fɔ Kɔlɔse 1:​11.

16. Wetin mek wi nid fɔ de mɛmba wisɛf se di rayt we Jiova gɛt fɔ rul rili impɔtant?

¹⁶ Na tru se we wi gɛt prɔblɛm dɛn, i nɔ kin izi fɔ pe atɛnshɔn to di rayt we Jiova gɛt fɔ rul. Ivin smɔl prɔblɛm dɛn kin tan lɛk big prɔblɛm dɛn if wi tink tumɔs bɔt dɛn. Ilɛk tin nɔ izi fɔ wi, wi nid fɔ de mɛmba wisɛf ɔltɛm se fɔ sɔpɔt Gɔd se na in gɛt di rayt fɔ rul, rili impɔtant.

17. We wi bizi de du Jiova in wok, aw dat go ɛp wi fɔ pe atɛnshɔn to wetin rili impɔtant?

¹⁷ We wi bizi de du Jiova in wok, i go ɛp wi fɔ mɛmba wetin rili impɔtant. Fɔ ɛgzampul, wan sista we nem Rine bin gɛt wan sik we dɛn kɔl strok, i de fil pen ɔltɛm, ɛn i bin gɛt kansa bak. We i bin de na ɔspitul, i bin de prich to di wan dɛn we de wok de, to ɔda peshɛnt dɛn, ɛn to di wan dɛn we bin de go fɛn dɛn fambul dɛn we sik. Wantɛm, we Rine bin de na ɔspitul fɔ tu ɛn af wik, i bin prich fɔ 80 awa. Pan ɔl we Rine bin no se i gɛt fɔ day, i nɔ ɛva fɔgɛt bɔt wetin rili impɔtant. Rine bin gɛt kolat bikɔs i bin sho se na Jiova gɛt di rayt fɔ rul.

18. Wetin Jɛnifa in stori tich wi bɔt aw fɔ sho se na Jiova gɛt di rayt fɔ rul?

¹⁸ Wi go sɔpɔt bak di rayt we Jiova gɛt fɔ rul bay di we aw wi de dil wit smɔl smɔl prɔblɛm dɛn we de mit wi ɛvride. Wan sista we nem Jɛnifa bin spɛn tri dez na iapɔt de wet fɔ di plen we fɔ kɛr am go na di say usay i kɔmɔt. Jɛnifa kin fil taya ɛnitɛm we dɛn anawns se di plen we fɔ kɛr dɛn go nɔ de go, ɛn i nɔ bin gɛt ɛnibɔdi fɔ kip in kɔmpin. I fɔ dɔn fil sɔri fɔ insɛf. Bɔt bifo dat, Jɛnifa pre to Jiova fɔ ɛp am fɔ prich di gud nyuz wit ɔda pipul dɛn we dɛn bin de wet na di iapɔt. I bin ɛnd ɔp fɔ prich to bɔku pipul dɛn ɛn i bin gi bɔku buk, magazin, ɛn trakt dɛn. Jɛnifa tɔk se, “A fil lɛk se Jiova blɛs mi pan ɔl we dis tin bin apin to mi, ɛn i gi mi trɛnk fɔ tɔk bɔt in nem wit rɛspɛkt.”

19. Wetin de sho udat dɛn de wɔship Gɔd di rayt we?

¹⁹ Na Jiova in pipul dɛn nɔmɔ rili ɔndastand wetin mek i impɔtant fɔ sho se na in gɛt di rayt fɔ rul. Na dis de sho se na dɛn de wɔship Gɔd di rayt we. So wi ɔl fɔ mek shɔ se wi kɔntinyu fɔ sho se na Jiova gɛt di rayt fɔ rul.

20. Aw Jiova de fil bɔt ɔl wetin yu de du fɔ sho se na in gɛt di rayt fɔ rul?

²⁰ Jiova de si yu, ɛn i valyu ɔl wetin yu de du fɔ sho se na in gɛt di rayt fɔ rul, bay we yu de sav am fetful wan ɛn bia wit prɔblɛm dɛn we de mit yu. (Sam 18:​25) Insay di nɛks atikul, wi go tɔk mɔ bɔt wetin mek yu nid fɔ sho se na Jiova gɛt di rayt fɔ rul ɛn aw yu go sɔpɔt am mɔ ɛn mɔ.