Biliv Tranga Wan pan di Kiŋdɔm

1, 2. Wetin go ɛp wi fɔ biliv tranga wan se di Kiŋdɔm go du ɔl wetin Gɔd want fɔ mɔtalman? Wetin mek wi fɔ biliv? (Luk di pikchɔ nia dis atikul in taytul.)

JIOVA WITNƐS DƐN kin prich se na Gɔd in Kiŋdɔm nɔmɔ go sɔlv ɔl wi prɔblɛm dɛn, ɛn dɛn kin gladi fɔ sho pipul dɛn dis na di Baybul. Wi kin gɛt kɔrej we wi de tink bɔt di fayn fayn tin dɛn we di Kiŋdɔm gɛt fɔ du fɔ wi. Wetin mek wi biliv se di Kiŋdɔm de? Wetin mek wi biliv se i go du wetin Gɔd want? Ɛn wetin mek wi fɔ biliv tranga wan pan di Kiŋdɔm?—Ibru 11:1.

² Jiova go yuz di Kiŋdɔm we Jizɔs de rul fɔ du ɔl wetin i want fɔ mɔtalman. Gɔd mek dis Kiŋdɔm bikɔs na in wangren gɛt di rayt fɔ rul. Na dat mek di Kiŋdɔm go de sote go. Wetin na sɔm impɔtant tin dɛn we wi fɔ no bɔt di Kiŋdɔm? Wi fɔ no bɔt di kiŋ, di wan dɛn we go rul wit am, ɛn di pipul dɛn we dɛn go rul. Jiova dɔn arenj fɔ mek ɔl dɛn tin ya bi, ɛn i dɔn mek agrimɛnt wit sɔm pipul dɛn fɔ sho se i go du ɔl dɛn impɔtant tin ya. Dɛn agrimɛnt ya na Gɔd ɔ Jizɔs Krays mek dɛn. We wi de tink bɔt dɛn agrimɛnt ya, i go ɛp wi fɔ ɔndastand aw Gɔd go du ɔl wetin i want, ɛn i go ɛp wi fɔ si se di tin dɛn we i dɔn arenj nɔ go chenj.—Rid Lɛta Fɔ Ɛfisɔs 2:12.

 3. Wetin wi go tɔk bɔt insay dis atikul ɛn di nɛks atikul?

³ Di Baybul tɔk bɔt siks men agrimɛnt dɛn we gɛt sɔntin fɔ du wit di Kiŋdɔm we Krays Jizɔs go rul. (1) Na di agrimɛnt wit Ebraam, (2) di Lɔ agrimɛnt, (3) di agrimɛnt wit Devid, (4) di agrimɛnt fɔ gɛt wan prist we tan lɛk Mɛlchizidɛk, (5) di nyu agrimɛnt, ɛn (6) di Kiŋdɔm agrimɛnt. Lɛ wi si aw ɛniwan pan dɛn agrimɛnt ya gɛt sɔntin fɔ du wit di Kiŋdɔm ɛn aw dɛn go mek wetin Gɔd want, bi.—Luk di bɔks we tɔk bɔt “Aw Gɔd Go Du Wetin I Want?”

 4. Insay Jɛnɛsis, wetin na di difrɛn tin dɛn we Jiova tɔk bɔt we gɛt fɔ du wit mɔtalman?

⁴ Afta Jiova bin dɔn mek di wɔl fayn fayn wan fɔ lɛ mɔtalman de de, i tɔk tri tin dɛn we gɛt sɔntin fɔ du wit mɔtalman: Wan, Gɔd se i go mek mɔtalman lɛk aw i tan; tu, Gɔd tɛl mɔtalman fɔ mek di wan ol wɔl bi Paradays ɛn ful-ɔp am wit pikin dɛn we de du wetin rayt, ɛn tri, Gɔd tɛl mɔtalman nɔ fɔ it frɔm di sɛns tik we de sho gud ɛn bad. (Jɛn. 1:26, 28; 2:16, 17) Apat frɔm dɛn tri tin ya, nid nɔ bin de fɔ ɛni ɔda tin. Afta Gɔd bin dɔn mek mɔtalman, na di tu las tin dɛn we i tɔk bɔt na in nɔmɔ dɛn bin fɔ du fɔ mek wetin i want, bi. Bɔt, wetin mek naw, Gɔd disayd fɔ mek agrimɛnt dɛn?

5, 6. (a) Aw Setan bin tray fɔ pwɛl wetin Gɔd want? (b) Wetin Jiova bin du we Setan chalenj am na Idɛn?

⁵ Setan na di fɔs pɔsin we tɔn in bak pan Gɔd ɛn i nɔ bin want lɛ di tin dɛn we Gɔd tɔk, apin. So i tray fɔ mek mɔtalman tɔn dɛn bak pan Gɔd. Aw i du dis? I bin mek Iv it di frut we bin de na di sɛns tik we de sho gud ɛn bad. (Jɛn. 3:1-5; Rɛv. 12:9) We Setan du dis, i chalenj Gɔd se i nɔ gɛt rayt fɔ rul. Leta, Setan tɔk bak se mɔtalman nɔ de wɔship Gɔd fɔ di rayt rizin.—Job 1:9-11; 2:4, 5.

⁶ Wetin Jiova bin du we Setan chalenj am na Idɛn? If Jiova bin kil Setan, Adam, ɛn Iv, dat bin fɔ dɔn stɔp dɛn tranga-yes. Bɔt dat nɔ bin fɔ dɔn mek wetin Gɔd tɔk apin, dat na fɔ lɛ di wɔl ful-ɔp wit Adam ɛn Iv dɛn pikin dɛn. So Gɔd nɔ bin kil Setan, Adam, ɛn Iv wantɛm wantɛm. As Gɔd we gɛt sɛns ɛn we mek ɔltin, i tɔk sɔntin we gɛt fɔ apin. Dɛn kɔl dis tin we i tɔk di prɔmis na Idɛn. Gɔd mek dis prɔmis fɔ mek shɔ se ɔl wetin i tɔk mɔs bi.—Rid Jɛnɛsis 3:15.

 7. Aw di prɔmis we Gɔd bin mek na Idɛn ɛp wi fɔ no wetin Gɔd gɛt fɔ du to di snek ɛn in pikin?

⁷ Insay di prɔmis we Jiova mek na Idɛn, i sɛntɛns di snek ɛn in pikin, dat na Setan ɛn ɔl di wan dɛn we go sɔpɔt am se Gɔd nɔ gɛt rayt fɔ rul. Gɔd gi pawa to di uman in pikin fɔ kil Setan. So di prɔmis we Gɔd mek na Idɛn nɔ jɔs tɔk se Setan ɛn di prɔblɛm dɛn we i kam wit nɔ go de igen, bɔt i tɛl wi wetin Gɔd go yuz fɔ pul Setan ɛn in prɔblɛm dɛn.

 8. Uskayn pɔsin di uman ɛn in pikin bi?

⁸ Udat na di uman in pikin? Di uman in pikin fɔ bi spirit pɔsin. Wetin mek wi se so? Na bikɔs dis pikin gɛt fɔ nyamanyama di snek in ed, we min se i gɛt fɔ mek Setan we na spirit pɔsin, “nɔ de igen.” Fɔ lɛ di pikin go ebul fɔ du dis, insɛf fɔ bi spirit pɔsin. (Ibru 2:14) So di uman insɛf we bɔn dis pikin fɔ bi spirit pɔsin. As tɛm de go, di snek in pikin bigin fɔ bɔku na di wɔl, bɔt nɔbɔdi nɔ bin no udat na di uman ɛn in pikin fɔ lɛk 4,000 ia so afta Jiova bin dɔn mek da prɔmis na Idɛn. Insay da 4,000 ia de, Jiova mek bɔku agrimɛnt dɛn we sho udat di pikin go bi ɛn i mek In savant dɛn no se na dis pikin i go yuz fɔ pul ɔl di prɔblɛm dɛn we Setan dɔn briŋ kam pan mɔtalman.

 9. Ustɛm di agrimɛnt we Jiova mek wit Ebraam bigin?

⁹ Afta 2,000 ia pas we Jiova sɛntɛns Setan, Jiova bin tɛl Ebraam fɔ kɔmɔt na di say we i de na Ɔ we bin de na Mɛsopotemia ɛn go na Kenan. (Akt 7:2, 3) Jiova tɛl am se: “Kɔmɔt na di say we yu de, di say we yu fambul dɛn de, ɛn yu papa in ples ɛn go na di say we a go sho yu. A go mek yu bi wan big neshɔn, a go blɛs yu, a go mek pipul dɛn no yu nem, ɛn yu go bi blɛsin to pipul dɛn. A go blɛs di wan dɛn we blɛs yu, a go swɛ di wan dɛn we want mek bad tin mit yu, ɛn fɔseka yu, ɔl di famili dɛn we de na di wɔl go gɛt blɛsin.” (Jɛn. 12:1-3) Dis na di fɔstɛm we dɛn rayt bɔt di agrimɛnt we Jiova Gɔd mek wit Ebraam. Bɔt wi nɔ no ustɛm Jiova mek dis agrimɛnt wit Ebraam. Wetin wi no na dat, di agrimɛnt bigin insay di ia 1943 bifo Krays, dat na di tɛm we Ebraam bin ol 75 ia we i lɛf Eran ɛn krɔs di Riva Yufretis.

10. (a) Aw Ebraam bin sho se i biliv tranga wan pan di prɔmis dɛn we Gɔd mek? (b) Wetin na di tin dɛn we Jiova tɔk bɔt di uman in pikin?

¹⁰ Bɔku tɛm, Jiova bin de ripit dis prɔmis to Ebraam, ɛn i bin de tɔk mɔ tin dɛn bɔt dis prɔmis. (Jɛn. 13:15-17; 17:1-8, 16) Fɔ ɛgzampul, we Ebraam bin sho se i biliv tranga wan pan di prɔmis dɛn we Gɔd mek, ɛn i bin rɛdi fɔ sakrifays in wangren pikin to Jiova, Jiova bin tɔk ɔda tin dɛn we ɛp Ebraam fɔ no se i go du wetin i dɔn prɔmis. (Rid Jɛnɛsis 22:15-18; Di Ibru Pipul Dɛn 11:17, 18.) Afta di agrimɛnt we Jiova bin mek wit Ebraam bigin, Jiova stat fɔ tɔk smɔl smɔl bɔt sɔm impɔtant tin dɛn we gɛt fɔ du wit di uman in pikin. Di pikin go kɔmɔt frɔm Ebraam, bɔt ɔda pikin dɛn bak go de, dɛn go bi kiŋ dɛn, dɛn go kil ɔl Gɔd in ɛnimi dɛn, ɛn dɛn go bi blɛsin to ɔda pipul dɛn.

11, 12. Aw di Baybul sho wi se di agrimɛnt we Jiova mek wit Ebraam gɛt bɔku ɔda bɛnifit dɛn? Wetin dat min fɔ wi?

¹¹ Di agrimɛnt we Jiova bin mek wit Ebraam bin apin we Ebraam in pikin dɛn go na di land we i bin dɔn prɔmis dɛn. Bɔt nɔto dat nɔmɔ, di Baybul sho wi se di tin dɛn we de insay da agrimɛnt de go briŋ bɔku ɔda bɛnifit dɛn. (Gal. 4:22-25) We di apɔsul Pɔl bin de ɛksplen udat na Ebraam in pikin, i bin se di men wan na Krays, bɔt i gɛt ɔda wan dɛn we na di 144,000 anɔyntɛd Kristian dɛn. (Gal. 3:16, 29; Rɛv. 5:9, 10; 14:1, 4) Di uman we go bɔn dɛn pikin ya na “di Jerusɛlɛm we de ɔp” we na di pat pan Gɔd in ɔganayzeshɔn we de na ɛvin. Di wan dɛn we de na dis ɔganayzeshɔn na soso spirit dɛn we de du wetin Jiova want. (Gal. 4:26, 31) Jɔs lɛk aw Jiova bin prɔmis insay di agrimɛnt we i mek wit Ebraam, di uman in pikin go kam wit bɔku blɛsin to mɔtalman.

¹² Di agrimɛnt we Gɔd bin mek wit Ebraam ɛp wi fɔ no di Kiŋ ɛn di wan dɛn we gɛt fɔ rul wit am na Gɔd in Kiŋdɔm, ɛn dis mek wi no se di Kiŋdɔm na rial gɔvmɛnt we de na ɛvin. (Ibru 6:13-18) Fɔ aw lɔng dis agrimɛnt go de? Jɛnɛsis 17:7 se “dis agrimɛnt go de sote go.” I go de te di Kiŋdɔm we Jizɔs de rul kil ɔl Gɔd in ɛnimi dɛn ɛn mek ɔl di famili dɛn na di wɔl gɛt blɛsin. (1 Kɔr. 15:23-26) Di wan dɛn we go de na di wɔl go gɛt bɛnifit dɛn we go de sote go. Di agrimɛnt we Gɔd bin mek wit Ebraam sho se i rɛdi fɔ mek wetin i want, bi, dat na fɔ lɛ mɔtalman dɛn we de du wetin rayt “ful-ɔp di wɔl”!—Jɛn. 1:28.

13, 14. Wetin di agrimɛnt we Gɔd bin mek wit Devid de sho wi bɔt di Mɛsaya in rul?

¹³ Di prɔmis na Idɛn ɛn di agrimɛnt we Jiova bin mek wit Ebraam, de sho se Jiova de rul di rayt we ɔltɛm. So dis min se di Kiŋdɔm we Gɔd mek go du wetin rayt. (Sam 89:14) Bɔt wetin wi go se bɔt di wan dɛn we go rul di Kiŋdɔm, dɛn go ɛva du tin dɛn we nɔ rayt, we go mek dɛn kɔmɔt na pawa? Wan ɔda agrimɛnt we Jiova mek dɔn sho wi se dis nɔ go ɛva apin.

¹⁴ Lɛ wi tɔk bɔt di prɔmis we Jiova bin mek to Kiŋ Devid we bin de na Izrɛl. Dɛn kɔl dis prɔmis di agrimɛnt wit Devid. (Rid 2 Samiɛl 7:12, 16.) Jiova mek dis agrimɛnt wit Devid di tɛm we Devid bin de rul na Jerusɛlɛm. Jiova prɔmis am se di Mɛsaya go kɔmɔt frɔm in famili. (Lyuk 1:30-33) So Jiova bin tɔk mɔ tin dɛn bɔt di famili we di Mɛsaya go kɔmɔt. I se wan pan Devid in pikin dɛn go gɛt “di rayt” fɔ bi Kiŋ na in Kiŋdɔm. (Izik. 21:25-27) So bikɔs Jizɔs kɔmɔt na Devid in famili, dat go mek Devid in kiŋdɔm “de sote go.” Di Baybul se Jizɔs “go de sote go” ɛn “in kiŋdɔm go de sote go lɛk di san.” (Sam 89:34-37) Di Mɛsaya in gɔvmɛnt nɔ go ɛva du tin we nɔ rayt, ɛn di tin dɛn we i go du go de sote go!

15-17. Insay di agrimɛnt fɔ gɛt wan prist we tan lɛk Mɛlchizidɛk, us ɔda wok di pikin go du? Wetin mek i gɛt fɔ du dis wok?

¹⁵ Di agrimɛnt we Jiova bin mek wit Ebraam ɛn Devid bin mek wi no klia wan se di uman in pikin go bi kiŋ. Bɔt fɔ lɛ i go ebul fɔ briŋ blɛsin to ɔlman, nɔto kiŋ nɔmɔ i fɔ bi. Ɛn fɔ lɛ ɔlman gɛt di blɛsin we i go briŋ kam, i min se ɔlman nɔ fɔ gɛt sin igen ɛn dɛn fɔ de na Jiova in wan big famili. Fɔ lɛ dis go bi, di pikin fɔ du di wok bak we prist fɔ du. Papa Gɔd we gɛt sɛns ɛn we mek ɔltin arenj fɔ lɛ dis go apin. Dɛn kɔl dis tin we i du, di agrimɛnt fɔ gɛt wan prist we tan lɛk Mɛlchizidɛk.

¹⁶ Jiova tɛl Kiŋ Devid se I go mek wan agrimɛnt wit Jizɔs fɔ du tu tin: (1) na fɔ lɛ Jizɔs “sidɔm na [in] rayt an” te i kil ɔl in ɛnimi dɛn, ɛn (2) na fɔ lɛ i bi “prist sote go jɔs lɛk Mɛlchizidɛk.” (Rid Sam 110:1, 2, 4.) Wetin mek Jizɔs fɔ bi prist “lɛk Mɛlchizidɛk”? Na bikɔs ivin bifo Ebraam in pikin dɛn go na di land we Jiova bin dɔn prɔmis dɛn, Mɛlchizidɛk na bin kiŋ na Salɛm, ɛn in na bin “prist to Papa Gɔd we de pantap ɔlman.” (Ibru 7:1-3) Na Jiova insɛf sɛf bin pik am fɔ bi kiŋ ɛn prist. We yu chɛk frɔm Jɛnɛsis to Malakay, na in nɔmɔ dɔn bi kiŋ ɛn prist. Ɛn di Baybul se in na “prist sote go” bikɔs natin nɔ de we de sho udat bin de bifo am ɔ udat tek in ples afta i day.

¹⁷ Jiova bin mek wan agrimɛnt wit Jizɔs. Dis agrimɛnt sho se na Jiova insɛf sɛf pik Jizɔs fɔ bi prist, ɛn Jizɔs go bi “prist sote go jɔs lɛk Mɛlchizidɛk.” (Ibru 5:4-6) Dis agrimɛnt de sho klia wan se Jiova go rili yuz di Kiŋdɔm we Jizɔs de rul fɔ mek wetin i want, bi fɔ mɔtalman na dis wɔl.

18, 19. (a) Wetin di agrimɛnt dɛn we wi dɔn lan bɔt, de tɛl wi bɔt di Kiŋdɔm? (b) Us kwɛstyɔn dɛn wi gɛt fɔ ansa?

¹⁸ Wi dɔn si se ɔl di agrimɛnt dɛn we wi dɔn tɔk bɔt gɛt sɔntin fɔ du wit di Kiŋdɔm we Jizɔs de rul, ɛn dɛn de sho se Gɔd bin dɔn mek agrimɛnt dɛn fɔ di Kiŋdɔm. Di prɔmis we Jiova bin mek na di gadin we bin de na Idɛn de sho wi klia wan se Jiova go yuz di uman in pikin fɔ du ɔl wetin i bin dɔn tɔk se i go du fɔ di wɔl ɛn fɔ mɔtalman. Udat na di uman in pikin, ɛn us wok we i go du? Di agrimɛnt we Jiova bin mek wit Ebraam ɛp wi fɔ no di ansa to dɛn kwɛstyɔn ya.

¹⁹ Di agrimɛnt we Jiova mek wit Devid sho di famili we di uman in pikin go kɔmɔt, ɛn i sho bak se Jiova dɔn gi am di rayt fɔ rul di wɔl so dat ɔl wetin di Kiŋdɔm go du go de sote go. Di agrimɛnt we Jiova mek fɔ gɛt prist we tan lɛk Mɛlchizidɛk de sho wi se di uman in pikin go bi prist. Nɔto Jizɔs wangren go ɛp mɔtalman fɔ pafɛkt. Bɔt Jiova dɔn pik ɔda pipul dɛn bak fɔ bi kiŋ ɛn prist. Usay dɛn pipul ya go kɔmɔt? Wi go tɔk bɔt dis insay di nɛks atikul.