A Fɔ Gi Mi Layf To Gɔd ɛn Baptayz?

 1. Wetin yu go tink bɔt afta yu dɔn tek tɛm stɔdi dis buk?

YU DƆN lan bɔku tru tin dɛn frɔm di Baybul we yu de stɔdi dis buk, lɛk Gɔd in prɔmis fɔ gi wi layf we go de sote go, wetin kin apin to pɔsin we dɔn day, ɛn di op we de fɔ di wan dɛn we dɔn day. (Ɛkliziastis 9:​5; Lyuk 23:​43, NW; Jɔn 5:​28, 29; Rɛvɛleshɔn 21:​3, 4) Yu go dɔn stat fɔ atɛnd Jiova Witnɛs dɛn mitin ɛn biliv se dɛn de wɔship Gɔd di rayt we. (Jɔn 13:​35) Yu go dɔn bigin fɔ gɛt tayt padi biznɛs wit Jiova, ɛn yu go dɔn disayd se yu want fɔ sav am. So yu go de tink se, ‘Wetin a fɔ du naw fɔ sav Jiova?’

 2. Wetin mek di Itiopian man bin want fɔ baptayz?

² Na dat wan Itiopian man we bin de insay Jizɔs in tɛm bin tink. Afta sɔm tɛm we Jizɔs bin dɔn gɛt layf bak, Jizɔs in disaypul we nem Filip bin prich to dis man. Filip pruv to am se Jizɔs na di Mɛsaya. Di Itiopian man bin rili lɛk wetin i dɔn lan, so wantɛm wantɛm i se: “Luk wata na ya, wetin mek yu nɔ go baptayz mi?”—Di Apɔsul Dɛn Wok [Akt] 8:​26-36.

 3. (a) Wetin Jizɔs bin tɛl in disaypul dɛn fɔ du? (b) Aw pɔsin fɔ baptayz?

³ Di Baybul tich klia wan se if yu want fɔ sav Jiova, yu gɛt fɔ baptayz. Jizɔs bin tɛl in disaypul dɛn se: “Mek di pipul dɛn bi mi lanin bɔy dɛn; una baptayz dɛn.” (Matyu 28:​19) Jizɔs sɛt di ɛgzampul bay we insɛf bin baptayz. Ɔl in bɔdi bin go ɔnda di wata. Dɛn nɔ bin jɔs tɔn wata na in ed. (Matyu 3:​16) Tide we Kristian de baptayz, ɔl in bɔdi fɔ go ɔnda di wata.

 4. We yu baptayz wetin dat de sho ɔda pipul dɛn?

⁴ We yu baptayz, yu de sho ɔda pipul dɛn se yu rili want fɔ bi Jiova in padi ɛn fɔ sav am. (Sam 40:​7, 8) So yu go de wɔnda se, ‘Wetin a fɔ du fɔ mek a go baptayz?’

 5. (a) Wetin yu fɔ du fɔs bifo yu baptayz? (b) Wetin mek di mitin dɛn we wi kin gɛt impɔtant?

⁵ Bifo yu baptayz, yu fɔ no Jiova ɛn Jizɔs. Yu dɔn de du dis bay we yu de stɔdi di Baybul. (Rid Jɔn 17:​3.) Bɔt nɔto dat nɔmɔ. Di Baybul se yu fɔ “no wetin Gɔd want una fɔ du.” (Lɛta Fɔ Kɔlɔse 1:​9) Di mitin dɛn we Jiova Witnɛs dɛn kin gɛt go ɛp yu fɔ gɛt tayt padi biznɛs wit Jiova. Dat na wan gud rizin we mek yu fɔ de atɛnd di mitin dɛn ɔltɛm.—Di Ibru Pipul Dɛn 10:​24, 25.

 6. Na ɔltin yu fɔ no na di Baybul bifo yu baptayz?

⁶ Fɔ tru, Jiova nɔ de tink se yu fɔ no ɔltin na di Baybul bifo yu baptayz. I nɔ bin tink se di Itiopian man fɔ no ɔltin bifo i baptayz. (Di Apɔsul Dɛn Wok [Akt] 8:​30, 31) Wi go kɔntinyu fɔ lan bɔt Jiova sote go. (Ɛkliziastis 3:​11, NW) Bɔt fɔ lɛ yu go baptayz, yu nid fɔ no ɛn biliv di men tin dɛn we di Baybul de tich.—Di Ibru Pipul Dɛn 5:​12.

 7. Aw di stɔdi we yu de stɔdi di Baybul dɔn ɛp yu?

⁷ Di Baybul se: “If pɔsin nɔ gɛt fet, i nɔ go ebul fɔ du wetin Gɔd want fayn fayn wan.” (Di Ibru Pipul Dɛn 11:​6, NW) So yu nid fɔ gɛt fet bifo yu go baptayz. Di Baybul tɛl wi se trade sɔm pipul dɛn na wan siti we nem Kɔrint yɛri wetin Jizɔs in disaypul dɛn bin de tich, so dɛn ‘biliv ɛn baptayz.’ (Di Apɔsul Dɛn Wok [Akt] 18:​8) Semweso, we yu de stɔdi di Baybul, dat dɔn ɛp yu fɔ gɛt fet pan Gɔd in prɔmis dɛn ɛn di pawa we Jizɔs in sakrifays gɛt, we go sev wi frɔm sin ɛn day.—Jɔshwa 23:​14; Di Apɔsul Dɛn Wok [Akt] 4:​12; Sɛkɛn Lɛta To Timoti 3:​16, 17.

 8. Wetin go mek yu want fɔ tɛl ɔda pipul dɛn bɔt wetin yu dɔn lan?

⁸ As yu de lan mɔ frɔm di Baybul ɛn si aw i de ɛp yu na yu layf, yu go gɛt fet mɔ ɛn mɔ. Yu go want fɔ tɛl ɔda pipul dɛn bɔt wetin yu de lan. (Jɛrimaya 20:​9; Sɛkɛn Lɛta Fɔ Kɔrint 4:​13) Bɔt udat dɛn yu fɔ tɛl?

9, 10. (a) Udat yu go want fɔ tɛl fɔs bɔt wetin yu dɔn lan? (b) Wetin yu fɔ du if yu want fɔ prich wit di kɔngrigeshɔn?

⁹ Yu go want fɔ tɛl yu famili, padi dɛn, neba dɛn, ɔ yu wokmet dɛn bɔt wetin yu de lan. Dat na gud tin, bɔt na fɔ du dat ɔltɛm wit lɔv ɛn rɛspɛkt. Smɔl smɔl, yu go ebul bigin fɔ prich wit di kɔngrigeshɔn. If yu fil se yu dɔn rɛdi fɔ du dat, yu go tɔk to di pɔsin we de stɔdi yu di Baybul ɛn tɛl am se yu go lɛk fɔ jɔyn di kɔngrigeshɔn pan di prichin wok. If di pɔsin we de stɔdi yu tink se yu dɔn rɛdi ɛn if i si se yu de fala di Baybul in advays bay di we aw yu de liv yu layf, una tu go mit wit tu ɛlda dɛn na di kɔngrigeshɔn.

¹⁰ Wetin go apin we una mit wit di ɛlda dɛn? Di ɛlda dɛn go tɔk wit yu fɔ si if yu ɔndastand ɛn biliv di mɛn tin dɛn we di Baybul de tich, if yu de du wetin di Baybul se, ɛn if yu rili want fɔ bi wan pan Jiova Witnɛs dɛn. Mɛmba se na di ɛlda dɛn de kia fɔ ɔl di mɛmba dɛn na di kɔngrigeshɔn, ivin yu, so nɔ fred fɔ tɔk to dɛn. (Di Apɔsul Dɛn Wok [Akt] 20:​28, NW; Pita In Fɔs Lɛta 5:​2, 3) Afta una dɔn tɔk wit di ɛlda dɛn, dɛn go mek yu no if yu fɔ bigin prich wit di kɔngrigeshɔn.

11. Wetin mek i impɔtant fɔ chenj di we aw wi de liv wi layf bifo wi bigin fɔ prich wit di kɔngrigeshɔn?

¹¹ Sɔntɛm di ɛlda dɛn go ɛksplen to yu se yu nid fɔ chenj di we aw yu de liv yu layf ɛn lɛf di bad abit dɛn we yu gɛt bifo yu go bigin fɔ prich wit di kɔngrigeshɔn. Wetin mek i impɔtant fɔ mek dɛn chenj ya? Na bikɔs we wi de tɔk to pipul dɛn bɔt Gɔd wi de sho se wi de fɔ Jiova. So wi fɔ liv wi layf di we we go briŋ ɔnɔ to am.—Fɔs Lɛta Fɔ Kɔrint 6:​9, 10; Lɛta Fɔ Galeshya 5:​19-21.

12. Wetin mek ɔlman nid fɔ ripɛnt?

¹² Ɔda tin de bak we yu fɔ du bifo yu baptayz. Di apɔsul Pita bin se: “Una ripɛnt ɛn lɛf fɔ du bad, so dat Gɔd go wep una sin dɛn.” (Di Apɔsul Dɛn Wok [Akt] 3:​19, NW) Wetin i min fɔ ripɛnt? I min fɔ rili fil sɔri fɔ di bad tin dɛn we wi bin dɔn du. Fɔ ɛgzampul, if yu na pɔsin we bin de du mami ɛn dadi biznɛs di we aw Gɔd nɔ want, yu nid fɔ ripɛnt. Ivin if yu bin dɔn de tray tranga wan fɔ du wetin rayt, yu stil nid fɔ ripɛnt, bikɔs wi ɔl dɔn sin ɛn wi nid fɔ beg Gɔd fɔ mek i go fɔgiv wi.—Lɛta Fɔ Rom 3:​23; 5:​12.

13. Wetin i min fɔ “chenj”?

¹³ Yu tink se wi fɔ jɔs fil sɔri nɔmɔ fɔ wetin wi dɔn du? Nɔ. Pita bin se igen wi nid fɔ “chenj.” Dis min se yu nid fɔ lɛf ɛni bad abit we yu bin gɛt ɛn stat fɔ du wetin rayt. Fɔ ɛgzampul, imajin se yu de travul go na wan ples fɔ di fɔstɛm. Dɔn, afta sɔm tɛm, yu notis se yu de fala di rɔng rod. Wetin yu go du? Fɔ tru yu go stɔp, tɔn bak, ɛn fala di rayt rod. Semweso, as yu de stɔdi di Baybul, yu go kam fɔ si se sɔm abit dɛn ɔ tin dɛn de na yu layf we yu nid fɔ chenj. Yu fɔ rɛdi fɔ “chenj” we min se, yu fɔ lɛf fɔ du bad ɛn bigin fɔ du wetin rayt.

14. Aw yu de gi yu layf to Jiova?

¹⁴ Di ɔda impɔtant tin we yu nid fɔ du bifo yu baptayz na fɔ gi yu layf to Jiova. Dis min se yu fɔ pre to am ɛn prɔmis am se na in nɔmɔ yu go wɔship ɛn na wetin i want go bi di tin we impɔtant pas ɔl ɔda tin na yu layf.—Ditarɔnɔmi 6:​15.

15, 16. Wetin go mek pɔsin want fɔ gi in layf to Jiova?

¹⁵ We yu prɔmis fɔ sav Jiova nɔmɔ, i tan lɛk we yu prɔmis fɔ spɛn ɔl yu layf wit pɔsin we yu lɛk. Imajin se wan man ɛn wan uman de wach dɛnsɛf fɔ mared. We di man dɔn no di uman gud gud wan, i kam fɔ lɛk am ɛn want fɔ mared am. Pan ɔl we dis na siriɔs tin fɔ disayd, di man rɛdi fɔ mared di uman bikɔs i rili lɛk am.

¹⁶ As yu lan bɔt Jiova, yu go kam fɔ lɛk am ɛn want fɔ du yu bɛst fɔ sav am. Dis go mek yu pre ɛn prɔmis fɔ sav am. Di Baybul se ɛnibɔdi we want fɔ bi Jizɔs in disaypul “nɔ fɔ du wetin in want fɔ du nɔmɔ.” (Mak 8:​34) Wetin dat min? I min se di tin we fɔ impɔtant pas ɔl na yu layf na fɔ obe Jiova. Wetin Jiova want impɔtant pas wetin yu want ɛn di tin dɛn we yu dɔn plan fɔ du.—Rid Pita In Fɔs Lɛta 4:​2.

17. Wetin mek sɔm pipul dɛn nɔ de gri fɔ gi dɛn layf to Jiova?

¹⁷ Sɔm pipul dɛn nɔ de gri fɔ gi dɛn layf to Jiova bikɔs dɛn de fred se dɛn nɔ go ebul fɔ kip dɛn prɔmis fɔ sav am. Dɛn nɔ want fɔ pwɛl Jiova in at, ɔ dɛn kin tink se if dɛn nɔ gi dɛn layf to am, Jiova nɔ go ol dɛn fɔ wetin dɛn du.

18. Wetin go ɛp yu fɔ mek yu nɔ fred se yu go pwɛl Jiova in at?

¹⁸ We yu lɛk Jiova, dat go ɛp yu fɔ mek yu nɔ fred se yu go pwɛl in at. Bikɔs yu lɛk am, yu go du yu bɛst fɔ kip di prɔmis we yu mek to am. (Ɛkliziastis 5:​4; Lɛta Fɔ Kɔlɔse 1:​10) Yu nɔ go tink se fɔ du wetin Jiova want tranga. Di apɔsul Jɔn bin rayt se: “We wi lɛk Gɔd wi de du ɔl wetin i tɛl wi fɔ du. Wetin i tɛl wi fɔ du nɔ traŋa fɔ wi.”—Jɔn In Fɔs Lɛta 5:​3.

19. Wetin mek yu nɔ fɔ fred fɔ gi yu layf to Jiova?

¹⁹ I nɔ min se yu fɔ pafɛkt bifo yu gi yu layf to Jiova. I nɔ de ɛva tink se wi fɔ du pas wetin wi ebul fɔ du. (Sam 103:​14) I go ɛp yu fɔ du wetin rayt. (Ayzaya 41:​10) Abop pan Jiova wit ɔl yu at, ɛn “yu go si yu we klia.”—Prɔvabs 3:​5, 6.

20. Afta we yu dɔn gi yu layf to Gɔd, wetin na di nɛks tin we yu fɔ du?

²⁰ Yu tink se yu dɔn rɛdi fɔ gi yu layf to Jiova? Afta we yu dɔn gi yu layf to Jiova, yu dɔn rɛdi fɔ du di nɛks tin. Yu nid fɔ baptayz.

21, 22. Aw yu go ‘tɛl ɔlman’ se yu gɛt fet?

²¹ Mek di kɔdinatɔ fɔ di ɛlda dɛn na di kɔngrigeshɔn no se yu dɔn gi yu layf to Jiova ɛn naw yu want fɔ baptayz. Dɔn i go mek sɔm ɛlda dɛn mit wit yu fɔ aks yu sɔm kwɛstyɔn dɛn bɔt di mɛn tin dɛn we di Baybul de tich. If dɛn gri se yu dɔn rɛdi, dɛn go tɛl yu se yu go baptayz na di nɛks asɛmbli ɔ kɔnvɛnshɔn we Jiova Witnɛs dɛn go gɛt. Na di asɛmbli ɔ kɔnvɛnshɔn, dɛn go gi wan tɔk we na fɔ ɛksplen wetin i min fɔ baptayz. Di pɔsin we go gi di tɔk go aks di wan dɛn we rɛdi fɔ baptayz tu simpul kwɛstyɔn dɛn. We yu ansa dɛn kwɛstyɔn dɛn de, yu de ‘tɛl ɔlman’ se yu gɛt fet.—Lɛta Fɔ Rom 10:​10.

²² Dɔn dɛn go baptayz yu. Yu wan ol bɔdi fɔ go ɔnda di wata. We yu baptayz, yu de sho ɔlman se yu dɔn gi yu layf to Jiova ɛn naw yu na wan pan Jiova Witnɛs dɛn.

23. Wetin i min fɔ baptayz “wit di pawa we PAPA GƆD ɛn in pikin ɛn in spirit gi”?

²³ Jizɔs bin se in disaypul dɛn go baptayz “wit di pawa we PAPA GƆD ɛn in pikin ɛn in spirit gi.” (Rid Matyu 28:​19.) Wetin dat min? I min se yu no se na Jiova de pantap ɔlman ɛn yu no di wok we Jizɔs de du fɔ mek wetin Gɔd want bi ɛn yu no bak aw Gɔd de yuz in oli spirit fɔ du wetin i want.—Sam 83:​18, NW; Matyu 28:​18; Lɛta Fɔ Galeshya 5:​22, 23; Pita In Sɛkɛn Lɛta 1:​21.

24, 25. (a) Wetin di baptayz we yu baptayz de sho? (b) Wetin wi go tɔk bɔt insay di nɛks chapta?

²⁴ Di baptayz we yu de baptayz de sho sɔntin we rili impɔtant. We yu dɔn go ɔnda di wata, dat min se yu dɔn lɛf ɔ avɔyd di bad layf we yu bin de liv trade. We yu kɔmɔt insay di wata, yu dɔn bigin nyu layf we na fɔ du wetin Gɔd want. I sho se frɔm naw te go yu go sav Jiova. Mɛmba se yu nɔ gi yu layf to mɔtalman, ɔganayzeshɔn, ɔ wok. Na to Jiova yu gi yu layf.

²⁵ We yu gi yu layf to Jiova, dat go ɛp yu fɔ gɛt tayt padi biznɛs wit am. (Sam 25:​14) Dis nɔ min se pɔsin go sev jɔs bikɔs i dɔn baptayz. Di apɔsul Pɔl bin rayt se: “Una fɔ fred Gɔd, dat go mek una du ɔl wetin Gɔd want una fɔ du.” (Lɛta Fɔ Filipay 2:​12) We pɔsin baptayz, min se i jɔs dɔn bigin du wetin go mek i sev. Bɔt aw yu go kɔntinyu fɔ de nia Jiova? Di las chapta na dis buk go ansa da kwɛstyɔn de.