Wetin Go Mek Gɔd Gladi fɔ di We Aw Wi De Wɔship Am?

As wi bin dɔn tɔk na di lɛsin bifo dis, nɔto ɔl rilijɔn dɛn de mek Gɔd gladi. Bɔt wi ebul fɔ wɔship di Wan we mek wi di kayn we we go mek i gladi. Us “wɔship” [ɔ rilijɔn] de mek I gladi? (Jems 1:​27) Lan bɔt wetin di Baybul de tich.

1. Wetin wi go yuz fɔ wɔship Gɔd?

Wi fɔ yuz di Baybul we wi de wɔship Gɔd. Jizɔs bin tɛl Gɔd se: “Yu wɔd na trut.” (Jɔn 17:​17) Sɔm rilijɔn dɛn nɔ de gri fɔ fala di tru tin we de insay Gɔd in Wɔd, di Baybul. Bifo dat, dɛn de chenj am to wetin mɔtalman de tich ɛn mɔtalman tradishɔn dɛn. Jiova nɔ de gladi fɔ di wan dɛn we “nɔ de obe [in] Lɔ.” (Rid Mak 7:​9.) Bɔt wi go mek Gɔd gladi bay we wi yuz di Baybul ɛn fala di advays dɛn we de insay de.

2. Aw wi fɔ wɔship Jiova?

Na Jiova nɔmɔ wi fɔ wɔship bikɔs na in mek wi. (Rɛvɛleshɔn 4:​11) Dis min se wi fɔ lɛk am ɛn wɔship in wangren, ɛn wi nɔ fɔ yuz imej we wi de wɔship am.​—Rid Ayzaya 42:​8, NWT.

Wi wɔship fɔ “oli” ɛn bi “di kayn” we Jiova go tek. (Romans 12:​1) Dis min se wi nid fɔ obe in lɔ dɛn. Fɔ ɛgzampul, di wan dɛn we lɛk Jiova, lɛk di lɔ dɛn we i put bɔt mared ɛn dɛn de obe dɛn. Ɛn dɛn nɔ de put an pan bad tin dɛn lɛk fɔ smok, fɔ tek drɔgs, ɔ fɔ drink pasmak.a

3. Wetin mek wi fɔ wɔship Jiova wit wi brɔda ɛn sista dɛn?

Di mitin dɛn we wi de atɛnd ɛni wik de gi wi chans fɔ “prez PAPA GƆD [“Jiova,” NWT] usay bɔku pipul de.” (Sam 26:​12) Wan we we wi de du dat, na bay we wi de siŋ fɔ prez Gɔd. (Rid Sam 104:​33.) Jiova tɛl wi fɔ atɛnd mitin dɛn bikɔs i lɛk wi, ɛn i no se dɛn mitin dɛn de go ɛp wi fɔ ɛnjɔy layf we go de sote go. We wi atɛnd mitin dɛn, wi de ɛnkɔrej ɔda pipul dɛn ɛn dɛnsɛf de ɛnkɔrej wi.

LAN MƆ

4. Wi nɔ fɔ yuz imej dɛn we wi de wɔship Gɔd

VIDIO: Yu Tink se Gɔd Want Wi fɔ Yuz Imej dɛn fɔ Wɔship Am? (3:​26)

• Wetin bin apin we sɔm pan Gɔd in pipul dɛn we bin de trade bin tray fɔ yuz aydɔl fɔ wɔship am?

Sɔm pipul dɛn kin yuz imej we dɛn de wɔship Gɔd bikɔs dɛn fil se dat go mek dɛn go nia am. Bɔt yu nɔ tink se dat go mek dɛn go fa frɔm Gɔd? Rid Ɛksodɔs 20:​4-6 ɛn Sam 106:​35, 36, dɔn una tɔk bɔt dɛn kwɛstyɔn dɛn ya:

• Uskayn imej dɛn yu dɔn si pipul dɛn de yuz fɔ wɔship Gɔd?

• Aw Jiova de fil we pipul dɛn de yuz imej dɛn?

• Yu tink se i fayn fɔ yuz imej fɔ wɔship Gɔd?

5. We wi wɔship Jiova in wangren, dat go mek wi fri frɔm lay lay tichin dɛn

VIDIO: Di Tru Dɔn Mek I Fri (5:​16)

Rid Sam 91:​14, dɔn una tɔk bɔt dis kwɛstyɔn:

• Wetin Jiova dɔn prɔmis fɔ du fɔ wi we wi sho se wi lɛk am bay we wi wɔship in wangren?

6. Wi de wɔship Gɔd na wi kɔngrigeshɔn mitin dɛn

Wi de prez Jiova ɛn ɛnkɔrej ɔda pipul dɛn bay we wi de siŋ ɛn gi kɔmɛnt na kɔngrigeshɔn mitin dɛn. Rid Sam 22:​22, dɔn una tɔk bɔt dɛn kwɛstyɔn dɛn ya:

• Yu kin gladi fɔ yɛri pipul dɛn kɔmɛnt dɛn na mitin?

• Yu go lɛk fɔ pripia fɔ gi kɔmɛnt?

7. Jiova de gladi we wi tɛl ɔda pipul dɛn bɔt wetin wi de lan

Bɔku we dɛn de we wi kin ebul fɔ tɛl ɔda pipul dɛn bɔt di tru tin dɛn we wi de lan insay di Baybul. Rid Sam 9:​1 ɛn 34:​1, dɔn una tɔk bɔt dis kwɛstyɔn:

• Wetin na wan tin we yu dɔn lan frɔm di Baybul we yu go lɛk fɔ tɛl ɔda pɔsin bɔt?

WETIN YU DƆN LAN?

Wi de mek Jiova gladi bay we wi wɔship in wangren, we wi prez am na kɔngrigeshɔn mitin dɛn, ɛn we wi tɛl ɔda pipul dɛn bɔt wetin wi dɔn lan.

Rivyu

• Usay wi go lan aw wi go wɔship Gɔd di we we go mek i gladi?

• Wetin mek na Jiova nɔmɔ wi fɔ wɔship?

• Wetin mek wi fɔ wɔship Gɔd wit di wan dɛn we de du wetin i want?

DU MƆ RISACH

Insay di stori we gɛt di taytul “Mi Nɔto Slev Igen to Aydɔl Dɛn,” rid bɔt aw wan uman bin lɛf fɔ wɔship aydɔl dɛn.

“Di Baybul De Chenj Layf” (Di Wachtawa, Julay 1, 2011)

Lan bɔt wetin go ɛp yu fɔ gi kɔmɛnt na mitin.

“Prez Jiova na di Kɔngrigeshɔn” (Di Wachtawa, Janwari 2019)

Lan bɔt aw wan yɔŋman bin bɛnifit frɔm di kɔngrigeshɔn mitin dɛn pan ɔl we i nɔ bin izi fɔ am fɔ atɛnd.

Jiova Kia fɔ Mi (3:​07)

Bɔku pipul dɛn biliv se na Kristian dɛn de yuz di krɔs, bɔt yu tink se wi fɔ yuz am fɔ wɔship Gɔd?

“Wetin Mek Jiova Witnɛs dɛn Nɔ De Yuz di Krɔs We Dɛn De Wɔship?” (Atikul na di wɛbsayt)