“I Go Mek Yu Strɔng” —Aw?

 1. Aw Gɔd bin ɛp in savant dɛn we bin de trade?

BƆKU tɛm, we Gɔd in Wɔd de tɔk bɔt fetful man dɛn, i kin se na pipul dɛn we gɛt maynd. Bɔt ivin di wan dɛn we rili strɔng nɔ kin fil se dɛn strɔng ɔltɛm. Fɔ ɛgzampul, sɔntɛnde Kiŋ Devid bin de fil lɛk se “i strɔng lɛk mawntin” bɔt ɔda tɛm dɛn de we i bin de “fred.” (Sam. 30:​7, NWT) Pan ɔl we Samsin bin rili gɛt trɛnk bikɔs ɔf Gɔd in spirit, i bin no se if nɔto bin Gɔd, i bin fɔ “wik ɛn tan jɔs lɛk ɛni ɔda mɔtalman.” (Jɔj 14:​5, 6; 16:17) Na Jiova gi dɛn fetful man dɛn ya di pawa we dɛn bin gɛt.

 2. Wetin mek apɔsul Pɔl bin tɔk se i bin wik ɛn pawaful? (2 Kɔrintians 12:​9, 10)

² Apɔsul Pɔl sɛf bin no se i nid trɛnk frɔm Jiova. (Rid 2 Kɔrintians 12:​9, 10.) Lɛk bɔku pan wi, Pɔl sɛf bin gɛt wɛlbɔdi prɔblɛm dɛn. (Gal. 4:​13, 14) Tɛm dɛn de we i nɔ bin izi fɔ am fɔ du wetin rayt. (Rom. 7:​18, 19) Ɔda tɛm dɛn de we i bin de fred bikɔs i nɔ bin no wetin gɛt fɔ apin to am. (2 Kɔr. 1:​8, 9) Bɔt, we Pɔl bin wik, na da tɛm de i bin gɛt pawa. Aw? Jiova bin gi Pɔl di trɛnk we i bin nid fɔ bia in prɔblɛm dɛn. I bin mek Pɔl strɔng.

 3. Us kwɛstyɔn dɛn wi go tɔk bɔt insay dis atikul?

³ Jiova dɔn prɔmis fɔ gi wi di trɛnk we wi nid fɔ bia prɔblɛm dɛn. (1 Pit. 5:10) Bɔt wi nɔ fɔ ɛkspɛkt se Jiova go ɛp wi if wi nɔ du natin. Fɔ ɛgzampul, injin de mek motoka muv, bɔt di drayva nid fɔ mas di asiliretɔ fɔ mek di motoka muv. Semweso, Jiova rɛdi fɔ gi wi di trɛnk we wi nid, bɔt wisɛf nid fɔ du sɔntin fɔ bɛnifit frɔm da ɛp de. Wetin Jiova dɔn gi wi fɔ mek wi gɛt di trɛnk we wi nid? Ɛn wetin wi nid fɔ du fɔ mek wi gɛt da trɛnk de? Wi go no di ansa to dɛn kwɛstyɔn dɛn ya bay we wi tɔk bɔt aw Jiova bin ɛp tri pipul dɛn na di Baybul, dat na prɔfɛt Jona, Meri we na Jizɔs in mama, ɛn apɔsul Pɔl. Wi go si bak aw Jiova de kɔntinyu fɔ gi in savant dɛn tide di trɛnk we dɛn nid.

 4. Wetin wi fɔ du fɔ mek Jiova gi wi trɛnk?

⁴ Wan we aw Jiova de gi wi di trɛnk fɔ bia na bay we wi de pre to am. Fɔ ansa wi prea, Jiova kin gi wi “di pawa we pas mɔtalman in yon.” (2 Kɔr. 4:7) Wan ɔda tin we kin ɛp wi fɔ gɛt di trɛnk fɔ bia, na we wi de rid in Wɔd ɛn tek tɛm tink bɔt am. (Sam 86:11) Jiova in mɛsej we de insay di Baybul “gɛt pawa.” (Ibru. 4:12) We yu pre to Jiova ɛn rid in Wɔd, yu go gɛt di trɛnk we yu nid fɔ bia, fɔ kɔntinyu fɔ gɛt gladi-at, ɔ fɔ du wok we rili at fɔ du. Notis aw Jiova bin gi prɔfɛt Jona di trɛnk we i bin nid fɔ bia.

 5. Wetin mek prɔfɛt Jona bin nid fɔ gɛt trɛnk?

⁵ Prɔfɛt Jona bin nid fɔ gɛt trɛnk. I bin dɔn rɔnawe frɔm wan wok we Jiova bin gi am we nɔ bin izi fɔ du. Dat bin mek in ɛn di wan dɛn we bin de wit am insay di ship ɔlmost lɔs dɛn layf we wan ebi ebi briz blo. We dɛn trowe am insay di wata, i bin de na say usay i nɔ wande de bifo dis tɛm, dat na, insay wan big big fish in bɛlɛ. Aw yu tink se Jona bin de fil? Fɔ se i bin de tink se na de i go day? Fɔ se i bin de wɔnda if Jiova dɔn lɛf am? Wan dawt nɔ de se Jona bin de wɔri pasmak.

 6. Akɔdin to Jona 2:​1, 2, 7, wetin bin ɛp Jona we i bin de insay di big fish in bɛlɛ?

⁶ Wetin Jona bin du fɔ mek i gɛt di trɛnk we i nid na da ples de usay in wan bin de? I bin pre to Jiova. (Rid Jona 2:​1, 2, 7.) Pan ɔl we i nɔ bin obe Jiova, i bin ripɛnt ɛn gɛt fet se Jiova go lisin to in prea. Jona bin tink gud gud wan bɔt di Skripchɔ dɛn. Wi no dis bikɔs insay di prea we i bin pre, we Jona chapta 2 tɔk bɔt, i bin yuz bɔku pan di sem wɔd dɛn we de na di Baybul buk we nem Sam. (Fɔ ɛgzampul, kɔmpia Jona 2:​2, 5 wit Sam 69:1; 86:7.) Dis sho klia wan se Jona bin sabi dɛn vas dɛn de gud gud wan. Ɛn we i tek tɛm tink bɔt dɛn gud gud wan di tɛm we i gɛt prɔblɛm, dat bin mek i biliv se Jiova go ɛp am. Leta, Jona bin go bak na dray land, ɛn i bin rɛdi fɔ du wetin Jiova tɛl am fɔ du.—Jona 2:10–3:4.

7-8. Wetin bin ɛp wan brɔda na Taywan di tɛm we i bin gɛt prɔblɛm dɛn?

⁷ Jona in ɛgzampul go ɛp wi we wi gɛt difrɛn prɔblɛm dɛn. Fɔ ɛgzampul, Zimiŋ,b we na wan brɔda na Taywan, gɛt siriɔs wɛlbɔdi prɔblɛm dɛn. Pantap dat, in famili de trit am bad bikɔs i de sav Jiova. I kin gɛt trɛnk frɔm Jiova bay we i de pre to am ɛn stɔdi. I tɔk se: “Sɔntɛnde we prɔblɛm dɛn kin mit mi, a kin rili wɔri ɛn a nɔ kin ebul lɛf fɔ wɔri, ɛn dat kin mek a nɔ kin want fɔ du mi pasɔnal stɔdi.” Bɔt i nɔ giv-ɔp. I tɔk bak se: “Fɔs, a kin pre to Jiova. Dɔn a kin put mi iafon na mi yes ɛn lisin to wi Kiŋdɔm siŋ dɛn. Sɔntɛnde, a kin ivin siŋ dɛn lo wan te a stɔp fɔ wɔri. Dɔn a kin bigin fɔ stɔdi.”

⁸ Zimiŋ bin gɛt trɛnk frɔm in pasɔnal stɔdi fɔ bia di tɛm we tin nɔ bin rili izi fɔ am. Fɔ ɛgzampul, afta dɛn du wan big ɔpreshɔn pan am, wan nɔs bin tɛl am se bikɔs in rɛd blɔd sɛl dɛn lo, dɛn go nid fɔ gi am blɔd. Di nɛt bifo in ɔpreshɔn, Zimiŋ bin rid bɔt wan sista we dɛn bin du di sem ɔpreshɔn pan. In rɛd blɔd sɛl dɛn bin lo pas Zimiŋ in yon, bɔt di sista nɔ bin gri fɔ mek dɛn gi am blɔd, ɛn i bin wɛl. Da ɛkspiriɛns de bin mek Zimiŋ mekɔp in maynd fɔ kɔntinyu fɔ fetful to Jiova.

 9. Wetin yu go du if yu gɛt prɔblɛm we mek yu at rili pwɛl? (Luk bak di pikchɔ dɛn.)

⁹ We prɔblɛm dɛn kin mit yu, yu kin wɔri te yu nɔ ebul fɔ pre? Ɔ yu kin taya fɔ stɔdi? Mɛmba se Jiova ɔndastand gud gud wan wetin de apin to yu. So ivin we yu pre to am shɔt wan, gɛt kɔnfidɛns se i go gi yu di rayt tin we yu nid. (Ɛfi. 3:20) If i nɔ izi fɔ mek yu rid ɛn stɔdi di Baybul bikɔs yu sik, yu taya, ɔ yu at rili pwɛl, yu kin lisin to di odio Baybul ridin ɔ di odio rɛkɔdin fɔ wan pan wi pɔblikeshɔn dɛn. Yu kin lisin bak to wan pan wi siŋ dɛn ɔ wach vidio na jw.org. We yu de pre to Jiova ɛn luk fɔ we dɛn we i de ansa yu prea na di Baybul ɛn ɔl di ɔda tin dɛn we i de gi, dat go mek yu gɛt trɛnk.

10. Aw wi Kristian brɔda ɛn sista dɛn go ɛnkɔrej wi?

¹⁰ Jiova kin yuz wi Kristian brɔda ɛn sista dɛn fɔ ɛnkɔrej wi. Dɛn kin “rili kɔrej” wi we wi gɛt prɔblɛm dɛn ɔ we i nɔ izi fɔ wi fɔ du wi wok. (Kol. 4:​10, 11) Wi rili nid padi dɛn “di tɛm we prɔblɛm go kam.” (Prɔv. 17:​17, NWT) We wi fil se wi nɔ gɛt bɛtɛ trɛnk, wi brɔda ɛn sista dɛn kin gi wi wetin wi nid, dɛn kin kɔrej wi, ɛn ɛp wi fɔ kɔntinyu fɔ sav Jiova fetful wan. Lɛ wi tɔk bɔt aw ɔda pipul dɛn bin ɛnkɔrej Meri we na Jizɔs in mama.

11. Wetin mek Meri bin nid ɛnkɔrejmɛnt?

¹¹ Meri bin nid fɔ gɛt maynd fɔ du wetin Jiova want. Imajin aw Meri bin wɔri we enjɛl Gebrɛl tɛl am se i go gɛt bɛlɛ pan ɔl we i nɔ mared yet. Bifo dis tɛm, i nɔ bin dɔn mɛn pikin dɛn yet, bɔt i go gɛt fɔ kia fɔ di pikin we go bi di Mɛsaya. Ɛn bikɔs i nɔ wande du mami ɛn dadi biznɛs, aw Meri go ɛksplen to Josɛf we fɔ mared am se i dɔn gɛt bɛlɛ?—Lyuk 1:​26-33.

12. Akɔdin to Lyuk 1:​39-45, aw Meri bin gɛt di ɛnkɔrejmɛnt we i bin nid?

¹² Aw Meri bin gɛt di ɛnkɔrejmɛnt we i bin nid fɔ du dis wok we nɔ bin izi? I bin alaw ɔda pipul dɛn fɔ ɛp am. Fɔ ɛgzampul, i bin aks Gebrɛl fɔ tɛl am mɔ bɔt dis wok. (Lyuk 1:34) Shɔt tɛm afta dat, i bin travul go na “wan eria usay mawntin dɛn de” na Juda fɔ go fɛn in fambul we na Ilizabɛt. Da patrol de bin ɛp am. Ilizabɛt bin ɛnkɔrej Meri bay we i tɛl am tɛnki ɛn Jiova bin yuz am fɔ tɔk bɔt wan prɔfɛsi we gɛt fɔ du wit Meri in pikin we i gɛt fɔ kam bɔn. (Rid Lyuk 1:​39-45.) Meri tɔk se Jiova “dɔn du pawaful tin dɛn wit in an.” (Lyuk 1:​46-51) Jiova bin yuz Gebrɛl ɛn Ilizabɛt fɔ gi Meri di ɛnkɔrejmɛnt we i bin nid.

13. Aw wan sista na Bolivia bin bɛnifit we i aks in kɔmpin Kristian dɛn fɔ ɛp am?

¹³ Lɛk Meri, yusɛf go gɛt ɛnkɔrejmɛnt frɔm yu kɔmpin Kristian dɛn. Wan sista we de na Bolivia we nem Dasuri bin nid da kayn ɛnkɔrejmɛnt de. In papa bin rili sik, ɛn dɛn nɔ bin ebul fɔ mɛn di sik we i gɛt. We i bin de na ɔspitul, Dasuri bin want fɔ de nia am ɔltɛm. (1 Tim. 5:4) Bɔt dat nɔ bin izi fɔ du ɔltɛm. Dasuri tɔk se, “Bɔku tɛm, a bin de fil se a nɔ go ebul kɔntinyu.” Fɔ se i bin aks fɔ mek pɔsin ɛp am? Fɔs, i nɔ bin aks. I ɛksplen se, “A nɔ bin want fɔ ambɔg di brɔda dɛn. A bin tink se, ‘Na Jiova go gi mi di ɛp we a nid.’ Bɔt leta, a kam fɔ si se we a de kip to misɛf, i tan lɛk se a de tray fɔ sɔlv mi prɔblɛm dɛn mi wangren.” (Prɔv. 18:1) Dasuri bin disayd fɔ rayt lɛta to sɔm pan in padi dɛn ɛn ɛksplen in prɔblɛm to dɛn. I tɔk se, “Wɔd dɛn nɔ de fɔ tɔk bɔt di kayn ɛnkɔrejmɛnt we a bin gɛt frɔm mi Kristian brɔda ɛn sista dɛn. Dɛn bin de kam wit it na di ɔspitul ɛn sho mi sɔm Baybul vas dɛn we rili ɛnkɔrej mi. I rili fayn fɔ no se nɔto wi wangren de. Wi ɔl de pat pan Jiova in big famili, ɛn wi brɔda ɛn sista dɛn want fɔ ɛp wi, fɔ kia fɔ di tin dɛn we wi nid, fɔ kray wit wi we wi de sɔfa, ɛn fɔ ɛnkɔrej wi fɔ kɔntinyu fɔ sav Jiova wit gladi-at.”

14. Wetin mek wi fɔ gri fɔ mek di ɛlda dɛn ɛp wi?

¹⁴ Wan we aw Jiova de ɛnkɔrej wi na we i de yuz di ɛlda dɛn. Dɛn na gift dɛn we i kin yuz fɔ ɛnkɔrej wi ɛn mek wi fil fayn. (Ayz. 32:​1, 2) So we yu de wɔri bɔt yu prɔblɛm dɛn, na fɔ tɛl di ɛlda dɛn. Na fɔ gladi fɔ tek di ɛp we dɛn gi yu. Jiova go yuz dɛn fɔ ɛnkɔrej yu.

15. Us op ɔl Kristian dɛn valyu?

¹⁵ Di op we di Baybul de gi wi go mek wi gɛt trɛnk. (Rom. 4:​3, 18-20) As Kristian dɛn, wi gɛt di wɔndaful op fɔ gɛt layf we go de sote go na Paradays insay dis wɔl ɔ na ɛvin. Wi op de ɛp wi fɔ bia prɔblɛm dɛn, fɔ prich di gud nyuz, ɛn fɔ du difrɛn wok dɛn na di kɔngrigeshɔn. (1 Tɛs. 1:3) Da sem op de bin ɛp apɔsul Pɔl fɔ gɛt trɛnk.

16. Wetin mek apɔsul Pɔl bin nid fɔ gɛt trɛnk?

¹⁶ Pɔl bin nid fɔ gɛt trɛnk. Insay in lɛta to di Kristian dɛn na Kɔrint, i bin kɔmpia insɛf to kɔntri pɔt we dɛn mek wit kle we izi fɔ pwɛl. Tin nɔ bin rili izi fɔ am, i “nɔ [bin] no wetin fɔ du,” “dɛn [bin] de mek [i] sɔfa,” ɛn dɛn bin “ib [am] dɔŋ.” Infakt, sɔntɛnde in layf bin de pan denja. (2 Kɔr. 4:​8-10) Pɔl bin rayt dɛn wɔd dɛn de di tɛm we i bin de pan in tɔd mishɔnari patrol. Ɛn afta i rayt dɛn wɔd dɛn ya, mɔ prɔblɛm dɛn bin mit am. Bɔku pipul dɛn bin de agens am, dɛn bin arɛst am, i bin de na ship we pwɛl, ɛn dɛn bin put am na prizin.

17. Akɔdin to 2 Kɔrintians 4:​16-18, wetin bin ɛp Pɔl fɔ bia prɔblɛm dɛn?

¹⁷ Pɔl bin gɛt trɛnk fɔ bia bay we i bin de pe atɛnshɔn pan di op we i gɛt. (Rid 2 Kɔrintians 4:​16-18.) I bin tɛl di Kristian dɛn we de na Kɔrint se ivin if in bɔdi bin “de west,” i nɔ go mek dat pwɛl in at. Pɔl bin de tink bɔt in tumara bambay. In op fɔ gɛt layf we go de sote go na ɛvin bin “de mek [i] gɛt glori mɔ ɛn mɔ,” we bin pas ɛnikayn prɔblɛm we i go gɛt. Pɔl bin de tink gud wan bɔt da op de, ɛn bikɔs ɔf dat, i bin de fil se di pɔsin we i bi insay “de nyu ɛvride.”

18. Aw op dɔn ɛp Tiomia ɛn in famili?

¹⁸ Di op we wan brɔda we de na Bɔlgeria we nem Tiomia gɛt, de mek i gɛt trɛnk fɔ bia. Sɔm ia bifo dis tɛm, in smɔl brɔda we nem Stravko bin day pan aksidɛnt. Afta dat, Tiomia in at bin rili pwɛl fɔ sɔm tɛm. Fɔ lɛ dɛn go ebul bia di pen, in ɛn in famili bin imajin aw i go tan lɛk we di wan dɛn we dɔn day go gɛt layf bak. I ɛksplen se: “Fɔ ɛgzampul, wi kin tɔk bɔt usay wi go mit Stravko, us it wi go mek fɔ am, udat dɛn wi go invayt na di fɔs pati we wi go mek we i gɛt layf bak, ɛn wetin wi go tɛl am bɔt di las dez.” Tiomia se we dɛn de pe atɛnshɔn pan di op we dɛn gɛt, dat de mek in ɛn in famili gɛt trɛnk fɔ bia ɛn kɔntinyu fɔ wet fɔ Jiova in tɛm we i go gi in brɔda layf bak.

19. Wetin yu go du fɔ mek yu op strɔng mɔ ɛn mɔ? (Luk bak di pikchɔ.)

¹⁹ Aw yu go mek yu op strɔng mɔ ɛn mɔ? Fɔ ɛgzampul, if yu gɛt di op fɔ gɛt layf we go de sote go na dis wɔl, rid bɔt di tin dɛn we di Baybul tɔk bɔt Paradays ɛn tink gud wan bɔt dɛn. (Ayz. 25:8; 32:​16-18) Tink bɔt aw layf go tan lɛk na di nyu wɔl. Imajin yusɛf sɛf de. Udat yu de si? Us sawnd dɛn yu de yɛri? Aw yu de fil? Fɔ mek yu go ebul imajin gud gud wan, luk di pikchɔ dɛn na wi buk ɛn magazin dɛn we de sho Paradays ɔ wach myuzik fim dɛn lɛk, We Dis Wɔl Go Dɔn Nyu, Di Nyu Wɔl Nɔ De Fa, ɔ Imagine the Time. If wi kɔntinyu fɔ tink gud gud wan bɔt di nyu wɔl, wi prɔblɛm dɛn go bi ‘fɔ shɔt tɛm ɛn dɛn go smɔl.’ (2 Kɔr. 4:17) Di op we Jiova de gi yu go ɛp yu fɔ bia prɔblɛm dɛn.

20. Aw wi go gɛt pawa pan ɔl we wi wik?

²⁰ Ivin we wi fil se wi wik, ‘wit Gɔd wi go gɛt pawa.’ (Sam 108:13) Jiova dɔn ɔlrɛdi gi yu di tin dɛn we yu nid fɔ gɛt trɛnk. So we yu nid ɛp fɔ du wan patikyula wok, fɔ bia we prɔblɛm mit yu, ɔ fɔ kɔntinyu fɔ gɛt gladi-at, na fɔ pre to Jiova wit ɔl yu at, beg am fɔ gayd yu we yu de du pasɔnal stɔdi. Gri fɔ lɛ yu brɔda ɛn sista dɛn ɛnkɔrej yu. Mek tɛm ɔltɛm fɔ tink bɔt yu op fɔ tumara bambay. Dɔn, Gɔd go “yuz in pawa fɔ mek [yu] tinap tranga wan so dat [yu] go bia ɔltin ɛn gɛt peshɛnt ɛn gladi-at.”—Kol. 1:11.