Fɔ Salut Flag, fɔ Vot, ɛn fɔ Du Sivilian Savis

Fɔ salut flag. Jiova Witnɛs dɛn biliv se fɔ butu to flag ɔ fɔ salut am ɛn siŋ nashɔnal antɛm, na wan we dat pipul dɛn kin wɔship ɛn abop pan dɛn kɔntri ɔ di wan dɛn we de rul dɛn. (Ayzaya 43:11; Fɔs Lɛta Fɔ Kɔrint 10:14; Jɔn In Fɔs Lɛta 5:21) Wan kiŋ we bin de na Babilɔn we nem Nɛbukanɛza, bin bil wan ay ay tin fɔ butu to. Wetin mek i du dis? Fɔ sho in pipul dɛn se i pawaful ɛn i lɛk Gɔd biznɛs. Kiŋ Nɛbukanɛza bin se ɔlman fɔ butu to di tin we i dɔn mek we dɛn de ple di myuzik. Di myuzik bin jɔs tan lɛk di nashɔnal antɛm we pipul dɛn kin siŋ we dɛn de salut di flag. Bɔt tri Ibru bɔbɔ dɛn we bin nem Shedrak, Mishak, ɛn Abɛdnigo, nɔ bin gri fɔ butu to dis tin we Kiŋ Nɛbukanɛza bin mek, pan ɔl we i se i go pɔnish dɛn ɔ ivin kil dɛn.​—Daniɛl, chapta 3.

Wan man we de rayt bɔt tin dɛn we dɔn apin, bin se di flag na “tin we pipul dɛn de wɔship. Man dɛn kin pul dɛn kap we dɛn kin si we dɛn de pas wit di flag; ɛn pipul dɛn kin rayt pɔɛm dɛn fɔ prez di flag ɛn pikin dɛn kin siŋ im dɛn.” Dɔn, i tɔk bak bɔt di wan dɛn we fil se dɛn kɔntri bɛtɛ pas ɔda kɔntri. I se dɛn gɛt de dɛn na di ia fɔ prez dɛn kɔntri. Dɛn gɛt tɛm dɛn fɔ wɔship pipul dɛn we bin dɔn du fayn wok na di kɔntri, ɛn ples dɛn fɔ wɔship dɛn kɔntri. Wan bigman pan di sojaman dɛn na Brazil, bin tɔk se: “Pipul dɛn de rɛspɛkt ɛn wɔship di flag . . . jɔs lɛk aw dɛn de wɔship dɛn kɔntri.” The Encyclopedia Americana tɔk se, “di flag tan lɛk di krɔs; insɛf na tin we oli.”

Da sem buk de, tɔk bɔt wetin mek pipul dɛn de siŋ di nashɔnal antɛm. I se “na we fɔ sho se pɔsin lɛk in kɔntri ɛn na we fɔ beg Gɔd fɔ lɛ i ɛp ɛn protɛkt di pipul dɛn ɛn di wan dɛn we de rul dɛn.” So Jiova in pipul dɛn si se fɔ tek dɛn kɔntri impɔtant pas ɔda kɔntri, fɔ salut di flag, ɛn fɔ siŋ nashɔnal antɛm na wan we dat we pipul dɛn kin wɔship dɛn kɔntri. Bɔt dis nɔ min se Gɔd in pipul dɛn gɛt-na-an we dɛn nɔ de put an pan dɛn tin ya. Wan buk we de tɔk bɔt aw di pipul dɛn na Amɛrika de biev, bin tɔk bɔt aw Jiova Witnɛs pikin dɛn nɔ de gri fɔ salut di flag ɛn fɔ rid di plɛj. I bin tɔk bak se: “Di Ay Kɔt dɔn disayd pan plɛnti kes dɛn se, dɛn tin ya we [pipul] dɛn de du ɛvride, na tin dɛn we gɛt fɔ du wit wɔship.”

Jiova in pipul dɛn nɔ de put an pan tin dɛn we nɔ de na di Baybul. Bɔt dɛn rɛspɛkt di rayt we ɔda pipul dɛn gɛt fɔ du wetin dɛn want. Dɔn, dɛn de rɛspɛkt di nashɔnal flag ɛn “dɛn wan we de rul na di kɔntri.” Dɛn no se dɛn pipul ya we de rul “na Gɔd in wokman dɛn.” (Lɛta Fɔ Rom 13:1-4) Na dis mek Jiova Witnɛs dɛn kin pre fɔ “dɛn wan we de rul ɛn ɔl dɛn bigman” na di kɔntri. Wetin mek wi kin du dis? Wi kin du dis “so dat waala nɔ go de na wi layf, wi go gɛt kol at, wi go de waka klos Gɔd ɛn wi nɔ go du ɛnitin we go mek wi shem.”​—Fɔs Lɛta To Timoti 2:2.

Fɔ vot pan ilɛkshɔn. Tru Kristian dɛn rɛspɛkt di rayt we ɔda pipul dɛn gɛt fɔ vot. Dɛn nɔ de tɛl pipul dɛn se dɛn nɔ fɔ vot, ɛn dɛn de put dɛnsɛf ɔnda di wan dɛn we pipul dɛn dɔn vot fɔ. Bɔt dɛn nɔ de put an pan pɔlitiks atɔl. (Matyu 22:21; Pita In Fɔs Lɛta 3:16) Wetin Kristian fɔ du if i de na kɔntri usay ɔlman fɔ vot pawpa, ɔ i de usay dɛn rili et di wan dɛn we nɔ de vot? If ɛni Kristian de na dis kayn ples, i fɔ mɛmba se Shedrak, Mishak, ɛn Abɛdnigo bin go na Dura; di say we Kiŋ Nɛbukanɛza bin mek da tin fɔ wɔship, bɔt dɛn nɔ bin wɔship am. So i lɛf to di pɔsin in kɔnshɛns fɔ disayd if i fɔ go usay dɛn de vot ɔ if i nɔ fɔ go. Bɔt i fɔ tek tɛm mek i nɔ put an pan pɔlitiks. I fɔ tink bɔt dɛn siks tin ya:

1. Di wan dɛn we de fala Jizɔs “nɔ de si wan we” wit di pipul dɛn na di wɔl.​—Jɔn 15:19.

2. Kristian dɛn de sɔpɔt Krays ɛn in Kiŋdɔm.​—Jɔn 18:36; Sɛkɛn Lɛta Fɔ Kɔrint 5:20.

3. Di Kristian dɛn na ɔl di kɔngrigeshɔn dɛn biliv di sem tin ɛn dɛn lɛk dɛnsɛf lɛk aw Krays bin lɛk di kɔngrigeshɔn.​—Fɔs Lɛta Fɔ Kɔrint 1:10; Lɛta Fɔ Kɔlɔse 3:14.

4. If di pɔsin we yu vot fɔ nɔ du in wok fayn, yusɛf go gɛt sin.​—Rid ɛn tink bɔt wetin de na Fɔs Samiɛl 8:5, 10-18 ɛn Fɔs Lɛta To Timoti 5:22.

5. We di Izrɛlayt dɛn bin se dɛn want mɔtalman kiŋ, Jiova bin tek am se na In dɛn dɔn pul kɔmɔt as Kiŋ.​—Fɔs Samiɛl 8:7.

6. Kristian dɛn nɔ fɔ fred fɔ tɔk bɔt Gɔd in Kiŋdɔm to pipul dɛn we de sɔpɔt difrɛn gɔvmɛnt dɛn. Dɛn fɔ fil fri fɔ tɔk to dɛn. So pipul dɛn fɔ si se na Gɔd in gɔvmɛnt nɔmɔ wi de sɔpɔt.​—Matyu 24:14; 28:19, 20; Di Apɔsul Dɛn Wok [Akt] 28:31.

Sivilian savis. Sɔm kɔntri dɛn kin put lɔ se ɔl di wan dɛn we nɔ gri fɔ du soja wok fɔ du sivilian savis fɔ sɔm tɛm. Sivilian savis na ɛni ɔda wok apat frɔm soja wok. If dɛn tɛl wi fɔ du sivilian savis, wi fɔ pre to Jiova ɛn wi kin ivin tɔk wit ɔda Kristian we sabi di Baybul. Afta dat, wi fɔ yuz wi kɔnshɛns fɔ disayd wetin fɔ du.​—Prɔvabs 2:1-5; 11:14.

Gɔd in Wɔd tɛl tru Kristian dɛn se, dɛn fɔ “de du wetin di gɔvmɛnt ɛn di pipul dɛn we dɛn put oba dɛn, tɛl dɛn fɔ du ɛn [dɛn] fɔ rɛdi fɔ du ɔltin we gud. . . . Mek dɛn de bia wit pipul.” (Taytɔs 3:1, 2) So lɛ wi aks wisɛf dɛn kwɛstyɔn ya: ‘If a gri fɔ du dis wok, i go mek a put an pan pɔlitiks, ɔ i go mek a put an pan lay lay rilijɔn?’ (Mayka 4:3, 5; Sɛkɛn Lɛta Fɔ Kɔrint 6:16, 17) ‘If a du dis wok, i go mek i at fɔ lɛ a du wetin Kristian fɔ du, ɔ i go ivin mek a nɔ ebul du am?’ (Matyu 28:19, 20; Lɛta Fɔ Ɛfisɔs 6:4; Di Ibru Pipul Dɛn 10:24, 25) ‘If a tek dis wok, i go mek a gɛt tɛm fɔ du tin dɛn we Kristian fɔ du, lɛk fɔ de prich ɔltɛm?’​—Di Ibru Pipul Dɛn 6:11, 12.

If wi Kristian brɔda disayd fɔ du sivilian savis so dat i nɔ go go na jel, ɔlman na di kɔngrigeshɔn fɔ rɛspɛkt di tin we i dɔn disayd fɔ du. (Lɛta Fɔ Rom 14:10) Bɔt, if i fil se i nɔ go du sivilian savis, wi ɔl fɔ rɛspɛkt wetin i du.​—Fɔs Lɛta Fɔ Kɔrint 10:29; Sɛkɛn Lɛta Fɔ Kɔrint 1:24.