Matai

12 Muna ntangwa yayina, Yesu oviokele muna mpatu za masa muna lumbu kia Vundu. Alongoki andi bamwene nzala, bayantikidi tolola ntu mia masa yo dia. 2 Afarisi wau bamwene wo, bamvovese vo: “Tala, alongoki aku bavangidi edi ke diansongi ko omu lumbu kia Vundu.” 3 Ubavutwidi vo: “Nga ke nwatanga dio ko dina kavanga Davidi vava kafwa nzala kumosi ye ana bakala yandi e? 4 Wau kakota muna nzo a Nzambi, badia e mbolo zatambikwanga vana ndose a Nzambi, zina kavaninwa nswa ko mu dia, ngatu ana bakala yandi, kansi anganga kaka e? 5 Yovo, nga ke nwatanga wo ko muna Nsiku vo muna lumbu kia Vundu anganga muna tempelo sala besalanga, yau ke banati nkanu e? 6 Kansi inuvovese wo vo, oyu osundidi e tempelo una vava. 7 Kele vo nwazaya e nsas’a diambu edi: ‘Nkenda nzolele ke yimenga ko,’ ke nwadi tumba minkondwa kuma ko. 8 Kadi o Mwan’a muntu i Mfumu a lumbu kia Vundu.”

9 Una kakatukidi vo, wele muna sambilu diau, 10 mukedi muntu una yo koko kwa yuminina!* Muna vava kuma kia kumfundila, banyuvuidi, “Nga diansongi mu wuka muna lumbu kia Vundu e?” 11 Ubavovese vo: “Nani vovo nwina una ye meme dimosi, avo dibwidi mu wulu muna lumbu kia Vundu, kalembi dio simba, katombola dio e? 12 O muntu nga kasundidi e meme ko e? Dianu vo, diansongi mu vanga edi diambote mu lumbu kia Vundu.” 13 I bosi ovovese muntu vo: “Lambul’o koko kwaku.” O lambwidi ko, o koko kuvutukidi o vimpi nze kuna kwankaka. 14 Kansi, Afarisi bavaikidi, bele kumvuandila e mfulu kimana bamvonda. 15 Wau kazeye wo, Yesu okatukidi ko. Ndonga inlende, owukidi awonso ana bakala ye mayela, 16 kansi otomene kubakanikina vo ke bazayisi kwa wantu ko kana yandi i nani, 17 kimana dialungana dina diavovua muna Yesaya wa ngunza vo:

18 “Tala, ntaudi ame ona yasola, nzolw’ame, ona ngiangalele! O mwand’ame muna yandi isia wo, okiesesa unsongi kwa zula. 19 Ke tantana ko, ngatu kaza, ke muntu ko owa nding’andi muna nzila zampwena. 20 E tutu diabosoka ke tolola dio ko, e vusu difwitanga ke zima dio ko, yavana kesunda muna sikidisa unsongi. 21 Kieleka, e zula besia nkumbu andi e vuvu.”

22 I bosi, bantwasidi nkwa nkuya una vo baba ye mpofo, unwukidi, e baba divovele yo mona. 23 E ndonga yawonso isivikidi yo vova vo: “Ondioyu, ke Mwan’a Davidi ko e?” 24 Afarisi una bawidi wo, bavovele vo: “Ondioyu ke mu nkatu ko kevaikisilang’e nkuya, mu Belezebube* kaka, wa mfumu a nkuya.” 25 Wau kazeye ngindu zau, ubavovese vo: “Konso kintinu kiavambana, bwa kibwa, konso mbanza yovo nzo yavambana ke isikila ko. 26 Diau dimosi, avo Satana ovaikisi Satana, ukivambanese; ozevo, e kintinu kiandi aweyi kisikidila? 27 Kansi, avo omono muna Belezebube ivaikisilanga nkuya, o wan’eno muna nani bevaikisilanga mio? Kiaki i kuma bekadila se afundisi eno. 28 Kansi, avo muna mwand’a Nzambi ivaikisilang’e nkuya, e Kintinu kia Nzambi kinuluakidi kikilu. 29 Yovo, aweyi muntu kalenda kotela muna nzo a nkwa ngolo yo kutumuna mavua mandi, nanga vo kateka kanga o nkwa ngolo? I bosi kelenda sanza e nzo andi. 30 Konso ona olembi kala ku sambu diame, i ntantu ame, konso ona olembi kutika yame, mwanganisa kemwanganisanga.

31 “Dianu inuvovesele vo, konso sumu yo lutiangu lulolokwa kwa wantu, kansi ndiona otianguna mwand’avelela ke lolokwa ko. 32 Muna bong’e nona, konso ona oyikila Mwan’a muntu e mbi, lolokwa kelolokwa; kansi konso ona oyikila mwand’avelela e mbi, ke lolokwa ko, kana mu tandu* kiaki, ngatu kina kikwiza.

33 “Avo nukitwidi o nti se wambote, e mbongo andi yambote ikala, kansi avo nukitwidi o nti se wambi, e mbongo andi yambi ikala, kadi konso nti uzayilwanga muna mbongo andi. 34 Wan’a mpidi, aweyi nulenda vovela mambu mambote wau nwina yo bi? Kadi muna ntima i mutukanga mana kevovang’o nua. 35 Muntu ambote ovovanga oma mambote, kadi o ntim’andi wazala ye mambu mambote. Muntu ambi ovovanga oma mambi, kadi o ntim’andi wazala ye mambu mambi. 36 Inuvovese wo vo, konso diambu diakondwa mfunu dina bevova wantu, mbalu betela dio muna Lumbu kia Lufundisu; 37 kadi muna mvovo miaku olungisilwa, muna mvovo miaku mpe oyeleselwa.”

38 I bosi, ankaka muna asoneki* ye Afarisi bamvovese vo: “E Nlongi, sinsu kiaku tuzolele mona.” 39 Ubavutwidi vo: “E mbandu ambi ye minta-zumba,* nuvavanga mona e sinsu, kansi kana sinsu kimosi ke nusongwa kio ko, nanga sinsu kia Yona wa ngunza kaka. 40 Kadi wauna Yona kakadila mini tatu ye mafuku matatu muna vumu kia mbizi ampwena ya maza, o Mwan’a muntu mpe okala mini tatu ye mafuku matatu muna nsi a ntoto. 41 Muna lufundisu esi Ninive befuluka kumosi ye mbandu yayi yo yelesa yo, kadi baviluk’o ntima muna nsangu za Yona. Kansi tala, oyu osundidi Yona una vava. 42 Muna lufundisu o ntinu ankento a sude ofuluka kumosi ye mbandu yayi yo yelesa yo, kadi kuna nsuk’a nza katuka mu kwiza wá ngangu za Solomo. Kansi tala, oyu osundidi Solomo una vava.

43 “O mwand’a usafu avo uvaikidi muna muntu, wele vumvula muna makanga mu vava fulu kia vundila, kiau ke umoni. 44 I bosi uvovele vo: ‘Ivutuka muna nzo ame yatuka,’ vava uluaka, uwene nzo yankatu, yatoma kombwa yo kubikwa. 45 I bosi wele, ubakidi mianda nsambwadi miankaka, emi misundidi o bi ke mu yandi kibeni ko, mikotele yo vuanda mo; e kadilu kiansukinina kia muntu ndioyo kivioka kina kiantete o bi. I wau wuwu mpe ukala e mbandu yayi yambi.”

46 Una kavovelenge kwa ndonga, o ngudi andi ye mpangi zandi batelamene kuna mbazi, bazolele vovana yandi. 47 Muntu mosi umvovese vo: “Tala, o ngudi aku ye mpangi zaku kuna mbazi bena, bazolele vovana yaku.” 48 Oyuvuidi ndiona unsamunwini wo vo: “Nani i ngudi ame? Aki nani i mpangi zame?” 49 Olambwidi o koko kuna kw’alongoki andi, oku vo: “Tala o ngudi ame ye mpangi zame! 50 Kadi, konso ona ovanganga luzolo lwa Se diame una kuna zulu, yandi i mpangi ame, i nsang’ame yo ngudi ame.”