Yeremiya

32 Muna mvu wa kumi wa luyalu lwa Sedekiya wa Ntinu a Yuda, i sia vo, muna mvu wa 18 wa luyalu lwa Nebukandesa,*+ e diambu dia Yave diayiza kwa Yeremiya. 2 Muna ntangwa yayina, o makesa ma ntinu a Babele mazunga Yerusaleme, o Yeremiya wa ngunza wakangama vana Yanzala kia Nyingidi+ muna nzo a* ntinu a Yuda. 3 Kadi Sedekiya wa Ntinu a Yuda wankanga+ yo kumvovesa vo: “Ekuma osakulwilanga mambu mama? Ovovele vo, ‘I wau wuwu kavovele o Yave: “Iyekola e mbanza yayi vana moko ma ntinu a Babele, okutumuna yo,+ 4 Sedekiya wa ntinu a Yuda ke vuka ko vana moko ma Akaladi, yekolwa keyekolwa vana moko ma ntinu a Babele, omokena yandi mantalani, o meso mau metalana.”’+ 5 ‘Onata Sedekiya kuna Babele, kûna kekala yavana ivutuka kunsia e sungididi’ u kavovele o Yave. ‘Kana una vo nukwamanene nuana ye Akaladi, ke nusikila ko.’”+

6 Yeremiya ovovele vo: “E diambu dia Yave dizidi kwa mono, oku vo, 7 ‘Kanamele wa mwan’a Salumi wa mpangi a se* diaku okwiza kwa ngeye, okuvovesa vo: “Sumba kwaku mpatu ame ina kuna Anatote,+ kadi ngeye ntete una ye nswa wa sumbulula yo.”’”+

8 Nze una kavova Yave, o Kanamele wa mwan’a mpangi a se diame, wizidi, okotele muna Yanzala kia Nyingidi, umpovese vo: “Dodokolo sumba mpatu ame ina kuna Anatote kuna nsi a Benyamini, kadi ngeye una ye nswa watambula yo se vua yo sumbulula yo. Sumba yo kwaku.” Ozevo mbakwidi wo vo ediadi i diambu dia Yave.

9 I dianu vo, nsumbidi mpatu ina kuna Anatote kwa Kanamele wa mwan’a mpangi a se diame. Ntezele nzimbu+ zandi, sekele nsambwadi* ye sekele kumi za palata. 10 I bosi, nsoneke zo muna nkanda,+ nkangidi wo, mbokelese ambangi,+ ntezele nzimbu vana balanza. 11 Mbongele nkanda wa nsumbilu una wakangama mun’owu wa nsiku ye nkanikinu, kumosi yo nkanda una waziuka, 12 ntambikidi nkanda wa nsumbilu kwa Baruki+ wa mwan’a Neraya,+ wa mwan’a Makeseya vana meso ma Kanamele wa mwan’a mpangi a se diame, mbangi ana basoneka e nkumbu zau muna nkanda ye Ayuda awonso ana bavuanda vana Yanzala kia Nyingidi.+

13 Nkanikini Baruki vana bena, oku vo: 14 “I wau wuwu kavovele o Yave a vu, wa Nzambi a Isaele: ‘Bonga nkanda miami, nkanda wa nsumbilu, owu wakangama y’owu waziuka, sia mio muna mvungu a tûma, kimana miazingila mu kolo kiandá.’ 15 Kadi i wau wuwu kavovele o Yave a vu, wa Nzambi a Isaele, ‘E nzo ye yana ye mpatu za vinyu zisumbwa diaka mu nsi yayi.’”+

16 Vava mpene nkanda wa nsumbilu kwa Baruki wa mwan’a Neraya, nsambidi kwa Yave, oku vo: 17 “E Mfumu Yave! Ngeye wavanga zulu ye ntoto muna nkum’aku anene+ ye koko kwaku kwalambuka. Kavena diambu ko dina vo diampasi kwa ngeye, 18 ona osonganga walakazi kwa mafunda ma wantu, kansi ovutulanga o bi wa mase kwa wana.+ Ngeye i Nzambi aludi, Wanene ye Mpungu-ngolo, ndiona una ye nkumbu vo Yave a vu. 19 Makani maku manene,* mavangu maku ma nkuma;+ o meso maku metalanga nzila zawonso za wantu+ yo senda konso muntu mun’owu wa nzila zandi ye mun’owu wa mavangu mandi. + 20 Wavanga sinsu ye masivi muna nsi ya Engipito, oma mazayakene yamu unu, wakivangila nkumbu muna Isaele yo vana vena wantu+ nze una dimonekene o unu kiaki. 21 Wavaikisa nkangu aku Isaele muna nsi ya Engipito muna sinsu, masivi, muna koko kwaku kwankuma ye koko kwaku kwalambuka ye mavangu mansisi.+

22 “Kuna kwalanda wabavana nsi eyi wadila ndofi kwa mase mau,+ nsi ifwafumukanga kimvumina yo wiki.+ 23 Oyau bakota mu nsi yo vua yo, kansi ke balemvokela nding’aku ko, ngatu kangalela muna nsiku aku. Mawonso wabakanikina ke bavanga mo ko, i kuma ubatwasidi e mpasi zazi zawonso.+ 24 Tala, o wantu bezidi bumba kundubulu kia nuanina kimana bakutumuna e mbanza,+ muna kuma kia nsosolo,+ nzala ye vuku,*+ e mbanza bwa kikilu ibwa vana moko ma Akaladi ana benuanisanga yo; mawonso mana wavova, mavangamene nze una omwene. 25 E Mfumu Yave, ngeye umpovese vo: ‘Sumba e mpatu muna nzimbu yo bokela ambangi,’ kana una vo mbanza iyekolwa kikilu vana moko ma Akaladi.”

26 I bosi, e diambu dia Yave dizidi kwa Yeremiya, oku vo: 27 “Omono i Yave wa Nzambi a wantu awonso.* Nga vena ye diambu dina vo diampasi kwa mono? 28 Ozevo, i wau wuwu kavovele o Yave, ‘Ngiekwele mbanza yayi kwa Akaladi ye vana moko ma Nebukandesa* wa Ntinu a Babele, yandi okutumuna yo.+ 29 Akaladi ana benuanisanga e mbanza yayi bekota, beyoka yo+ kumosi ye nludi mia nzo zina wantu bekelelanga yimenga kwa Bale yo yitila tukau twa ndua kwa nzambi zankaka muna kunkendeleka.’+

30 “‘Kadi o nkangu a Isaele yo nkangu a Yuda mambu mambi kaka bevanganga ova meso mame tuka muna kileke kiau;+ o nkangu a Isaele utatamene kunkendeleka muna salu ya moko mau,’ u kavovele o Yave. 31 ‘Kadi e mbanza yayi tuka yatungilwa yamu unu kiaki, ibundumunanga nganzi ye nsita za makasi mame,+ muna kuma kiaki ifwete katulwa ova ndose ame, + 32 muna kuma kia mambi mawonso bevanganga nkangu a Isaele yo nkangu a Yuda muna kunkendeleka—oyau, atinu au,+ mfumu zau,+ nganga zau,+ ngunza zau, esi Yuda yo nkangu a Yerusaleme. 33 Bakwamanana kumfila nima, ke ndose zau ko;+ kana una vo yavava kubalonga ntangwa ke ntangwa,* ke basidi wá ko, ngatu tambulwila e longi.+ 34 Basia teke yau yangemi muna nzo iyikilwanga nkumbu ame kimana basafula yo.+ 35 Vana ntandu, batungidi Bale mabata vana Ndimb’a Mwan’a Inomi+ kimana bayoka vana tiya wan’au amakala ye amakento kwa Moleke.+ Diambu dina kiabakanikina ko,+ ke disidi kala nkutu muna ntim’ame ko,* diakubalomba vo bavanga diambu diadi diangemi yo sumukisa Yuda.

36 “Ozevo, i wau wuwu kavovele o Yave wa Nzambi a Isaele muna kuma kia mbanza yayi ina nuvovelanga vo yekolwa iyekolwa vana moko ma ntinu a Babele, muna nsosolo, muna mvengele ye vuku, 37 ‘Ikutika yau awonso muna nsi zina yabamwanganisina muna nganzi ye nsita za makasi mame,+ ikubavutula va fulu kiaki yo kubayambula bazingila muna luvuvamu.+ 38 Bekala se nkangu ame, omono ikala se Nzambi au.+ 39 Ikubavana ntima mosi+ ye nzila imosi kimana bamvumina yakwale mvu, muna wete diau ye muna wete dia wan’au ana bekubalandila.+ 40 Ikanga yau e kangu dia mvu ke mvu,+ kiyambula kubavanga o wete ko,+ isia vumi wame muna ntima miau kimana balembi kungiambula.+ 41 Iyangalala muna kuma kiau yo kubavanga o wete,+ ikubasikidisa kikilu mwamu nsi yayi,+ muna ntim’ame wawonso yo moyo* ame wawonso.’”

42 “Kadi i wau wuwu kavovele o Yave: ‘Nze una yatwasila mpasi zazi zayingi kwa nkangu wau, i una ikubatwasila o wete* wawonso una yabasila nsilu.+ 43 Besumba diaka e mpatu muna nsi yayi,+ kana una vo nuvovanga vo: “E mbanza yayi yasala e nkatu, yakondwa wantu ngatu bulu, yayekolwa vana moko m’Akaladi.”’

44 “‘Mpatu zisumbwa muna nzimbu, e nkanda mia nsumbilu misonekwa yo siwa e dimbu, mbangi zibokelwa muna nsi ya Benyamini+ ye muna mbela-mbela za Yerusaleme, muna mbanza za Yuda,+ muna mbanza za zunga ya miongo, muna mbanza za ndimba+ ye muna mbanza za sude, kadi itwasa diaka abakami a nkangu au,’+ u kavovele o Yave.”