Luvaiku

16 Vava bakatukidi kuna Elime, nkangu awonso wa Aneyisaele ulweke muna makanga ma Sini,+ oma mena vana kati-kati kwa Elime ye Sinai, muna lumbu kia 15 kia ngonde yazole tuka bakatukila kuna nsi ya Engipito.

2 I bosi, nkangu awonso wa Aneyisaele uyantikdi yidimina Mose yo Arone muna makanga.+ 3 Aneyisaele bavovesanga Mose yo Arone vo: “Kele vo twafwila kweto vana koko kwa Yave muna nsi ya Engipito, ekolo twavuandanga vana ndambu a nzungu za mbizi,+ ekolo twadianga e mbolo konso una tuzolele! Owau nututwese mu makanga mama nuavonda e nkutakani yawonso mu kuma kia nzala.”+

4 I bosi, Yave ovovese Mose vo: “Ikununokesena mbolo tuka kuna zulu,+ o nkangu ufwete vaika, konso muntu kakutika e kunku kiandi kia konso lumbu,+ kimana yabatonta mu zaya kana vo bekangalela muna nsiku miame yovo ve.+ 5 Kansi, muna lumbu kiasambanu,+ bafwete kutika kunku yole lutila kina bekutikanga konso lumbu yo kuyilambila yo.”+

6 Muna diadi, Mose yo Arone bavovese Aneyisaele awonso vo: “Muna nkokela nuzaya wo kikilu vo Yave yandi wanuvaikisi muna nsi ya Engipito.+ 7 Muna mene numona o nkembo a Yave, kadi Yave owidi e ngidima zeno kwa yandi. Nga oyeto tu aki nani nuatuyidimina?” 8 Mose okudikidi vo: “Vava Yave kekunuvana e mbizi nudia muna nkokela ye mbolo nudia muna mene, konso una nuzolele, numona vo Yave owidi e ngidima nunyidimini. Kansi, oyeto tu aki nani? Ke yeto ko nuyidimini, kansi Yave nuyidimini.”+

9 I bosi, Mose ovovese Arone vo: “Zayisa o nkangu awonso wa Isaele vo: ‘Nuiza ova ndose a Yave, kadi owidi e ngidima zeno.’”+ 10 Vava Arone kamokene yo nkangu awonso wa Isaele, oyau bavilukidi, batadidi kuna makanga, o nkembo a Yave umonekene mun’e tuti.+

11 Yave ovovese diaka Mose vo: 12 “Ngwidi e ngidima za Aneyisaele.+ Ubazayisa vo: ‘Muna nkokela, vitila tombe kiabukama,* mbizi nudia, muna mene mbolo nudia yavana nuyukuta,+ kieleka nuzaya wo vo mono i Yave wa Nzambi eno.’”+

13 Muna nkokela, e yimbimbi izidi atomboki, ifukidi e ndo,+ muna mene, e dime* dizungidi e ndo yawonso. 14 Vava e dime* diyumini, vakedi lekwa yaketekete ifukidi o makanga+ nze mvul’ampembe. 15 Aneyisaele vava bamwene yo, bayantikidi vova muntu yo kwandi: “Nki kiaki?” Kadi ke bazaya ko kana nki kiakina. Mose ubavovese vo: “I madia* mama kanuvene o Yave nuadia.+ 16 I wau wuwu kakanikini o Yave: ‘Konso muntu kafwete mo kutika mun’owu wa kunku kina kalenda dia. Kafwete bonga ome mosi*+ muna konso muntu, mun’owu wa lutangu lwa wantu* bena muna saba kiandi.’” 17 Aneyisaele bavangidi wo, bakutikidi mo, ankaka bakutikidi mayingi, ankaka bakutikidi makete. 18 Vava bazongele mo muna ome, ona okutikidi mayingi kasuvisi ko, ona okutikidi makete kakondelo ko.+ Konso muntu okutikidi mun’owu wa tezo kalenda dia.

19 I bosi, Mose ubavovese vo: “Ke vakadi muntu ko olunda mo yamuna mene.”+ 20 Kansi, ke bawididi Mose ko. Akaka vava balundidi e ndambu yamuna mene, ivaikisi mimvidi* yo tá e nsudi; Mose okendalele mu kuma kiau. 21 Bakutikanga mo konso mene, konso muntu mun’owu wa kina kalenda dia. Vava o mwini wayandukanga, mazelokanga.

22 Muna lumbu kiasambanu, babongele kunku yole ya madia:*+ ome yole muna konso muntu. Akuluntu awonso a nkangu bele wo zayisa kwa Mose. 23 Muna diadi ubavovese vo: “I wau wuwu kavovele o Yave. O mbazi kikala se lumbu kia vundu emvimba,* lumbu kia vundu kiavauka kuna kwa Yave.+ Nuyoka konso kina nuzolele yoka, nulamba konso kina nuzolele lamba;+ i bosi, konso kina kisuva nulunda kio yamuna mene.” 24 Muna kuma kiaki, balundidi mo yamuna mene, wauna o Mose kabakanikina; mana balundidi ke matele nsudi ko ngatu kota mimvidi. 25 I bosi, Mose ovovele vo: “Nudia mo unu, kadi o unu lumbu kia vundu kuna kwa Yave. O unu ke nusolola mo ko muna nzanza. 26 Lumbu sambanu nukutika mo, kansi kina kiansambwadi, kina vo i Lumbu kia Vundu,+ ke mekala ko.” 27 Kansi, ankaka muna nkangu bavaikidi muna lumbu kiansambwadi, bakutika mo, kansi ke basolwele lekwa ko.

28 I bosi, Yave ovovese Mose vo: “Yamu nkia kolo nukolamena e nkanikinu miame ye nsiku miame?+ 29 Ke nuvilakana ko vo Yave unuvene Lumbu kia Vundu.+ Kiaki i kuma kekunuvaninanga e madia ma* lumbu yole muna lumbu kiasambanu. Muna lumbu kiansambwadi konso muntu kafwete kala vana fulu kiandi; ke muntu ko ovaika vana fulu kiandi.” 30 Muna kuma kiaki, o nkangu ulundidi e Lumbu kia Vundu* muna lumbu kiansambwadi.+

31 E nzo a Isaele iyikidi madia momo* vo “mâna.”* Makala nze nginga zaketekete zampembe,* o ntomo andi nga yimbolombolo yavangilwa mu wiki.+ 32 Mose ovovele vo: “I wau wuwu kakanikini o Yave: ‘Nukutika ome mosi ya mâna, yalundwa muna mbandu zeno zawonso,+ kimana bamona madia* yanuvana muna makanga vava nuavaika muna nsi ya Engipito.’” 33 Muna kuma kiaki, Mose ovovese Arone vo: “Bonga e mbidika watula mo ome mosi ya mâna, tula yo vana ndose a Yave kimana yalundwa muna mbandu zeno zawonso.”+ 34 Arone osidi yo vana ntwal’a Nkel’a Kimbangi+ wauna o Yave kakanikina Mose, kimana malundwa. 35 Aneyisaele mvu 40 badia e mâna,+ yavana balwaka mu nsi yazingilanga wantu.+ Badidi e mâna yavana balweke vana mwingilu a nsi ya Kenani.+ 36 E ome i tini kiakumi kia efa.*