“Fu yambi yakala yau”

Kuna mbanza Turco yasansukila, yakala va ndambu a simu dia mbu yaningamenanga nzaza. O s’ame nwani a box kakala, omono mpe ye mpangi ame twayivananga muna nsaka zazi. Nkumbu miayingi yanwananga vava yatanganga kuna sikola. Vava yakituka se toko, yakota mu buka kia yimpumbulu, ediadi diawokesa mavangu mame ma nsoki. Yayantika mpe sika miziki mia heavy-metal y’ekani diatoma zayakana yo kembelelwa.

Yasumba masikilu yo vanga e buka kia mono kibeni. Ke kolo ko, yakituka se mfidi a buka kieto. Vava yasikanga miziki vana tenda nkongolo yavanganga mavwanga yo kina nze lau. Wau vo e buka kieto kia yimpumbulu kiakala ye mpw’eto yambi, wantu batuyangalelanga kikilu. Twayantika sika miziki vana fulu ya ndonga. Twavaikisa e disku ya miziki mieto, e disku yansuka yatoma sanisinwa kikilu. Muna mvu wa 1980 twayenda kuna Estados Unidos muna sika miziki. Twasika miziki kuna Nova York ye Los Angeles yo vanga kikundi ye wantu besadilanga muna makompani ma miziki vitila twavutuka kuna Finlândia.

Kana una vo yayangalelanga e buka kiame, kansi yavavanga zaya nsas’a zingu kiame. Yakendalalanga kikilu mu fu kia vava sunda akaka besonganga asiki awonso a miziki. Yakendalalanga mpe mu kuma kia zingu kia kondwa mfunu yakala kiau. Yakimwenanga vo i muntu ambi, muna kuma kiaki yamonanga wonga wavia kuna bilungi bia tiya. Yavava zaya mvutu muna nkanda miawonso mia mabundu. Kana una vo yayindulanga vo kilendi yangidika Nzambi ko, yasamba kwayingi muna lomba lusadisu lwandi.

Muna kuyilunga-lunga, yasadilanga kuna correios. Lumbu kimosi yabakula vo mosi muna akw’ame a salu Mbangi a Yave kakala. Yanyuvula yuvu yayingi. E mvutu za ­sikididi za Nkand’a Nzambi kampana zansivikisa kikilu yo tambulwila longoka yandi o Nkand’a Nzambi. Ke vavioka tumingu twayingi ko e buka kieto kiavewa elau dia bandula disku mosi y’ekani dia sunzula yo kuna Estados Unidos. Yabadikila dio se lau diampwena muna tomesa zingu kiame.

Yavovesa kwa Mbangi a Yave ndiona walongokanga yame vo, nzolele bandula diaka disku imosi kaka, i bosi iyayantika sadila nkanikinu mia Nkand’a Nzambi muna zingu kiame. Lembi vova konso diambu, wandomba yatanga mvovo mia Yesu muna Matai 6:24. E sono kiaki kivovanga vo: “Ke ven’on’olenda sadila mfumu zole ko.” Yasivika kikilu vava yabakula nsas’a mvovo miami. Kansi, ke vavioka kolo ko, o nlongi ame a Nkand’a Nzambi wasivika mu kuma kiame. Yanzayisa vo yavaika muna buka kia miziki kadi yakala y’ekani dia landa Yesu.

Nkand’a Nzambi wakala nze pelo kiasengomona vilwa wame. (Yakobo 1:22-25) Yabakula vo fu yambi yakala yau, yazala ye lulendo y’eketo. Yasadilanga mvovo miansoni, nwana, nua fomo ye malavu mankolwa. Vava yabakula vo e zingu kiame ke kiakala ngwizani ko ye nkanikinu mia Nkand’a Nzambi, yakendalala kikilu. Ozevo, yabaka nzengo za soba e mpila zingu kiame.—Efeso 4:22-24.

Kuna lubantiku yakitumbanga mu kuma kia mambu mambi yavanganga. Mbangi a Yave walongokanga yame Nkand’a Nzambi watoma kunsadisa. Wantangila sono kia Nkand’a Nzambi muna Yesaya 1:18 kivovanga vo: “O masumu meno kana mabwaka, mepemba nze mvul’ampembe.” E sono kiaki ye yakaka yansadisa mu zaya vo o S’eto ezulu nkwa nkenda ye ozolele wuka e mputa z’awana bevilukanga o ntima muna masumu mau.

Vava yazaya Yave yo kunzola, yabaka nzengo za yekola zingu kiame kwa yandi. (Nkunga 40:8) Yavubwa muna mvu wa 1992 muna lukutakanu lwa mvivu lwa nsi zayingi lwa Mbangi za Yave kuna mbanza São Petersburgo, Rússia.

Yavanga kikundi ye asambidi ayingi a Yave. Owau kumosi yo yau tuyimbilanga e nkunga miambote yo yangalela lukau lwalu lwa Nzambi. (Yakobo 1:17) E nsambu zakaka yatambula i sompana yo Kristina wa nkaz’ame anzolwa. Tuvanganga mambu mayingi kumosi, okunsadisanga muna ntangwa mpasi ye kiese.

Kele vo kiakituka Mbangi a Yave ko nanga yamu wau kiadi kala diaka moyo ko. Muna mvu miavioka, kiakala ye luvuvamu ko, yayisianga mu mpasi ye muna mavangu ma nsoki. Kansi owau e zingu kiame kiavuvama ye kina ye nsasa.