Yesu Wasonga una Tulenda Kadila ye Zingu Kiakiese

‘Kangala nze una Yesu kakangalela.’—1 Yoane 2:6.

NZE una tulongokele kala mun’elongi divitidi, Yesu wakala ye zingu kiakiese. Avo tuzolele kala ye zingu kiakiese, tufwete tanginina mbandu a Yesu yo lemvokela luludiku lwandi.

Yave okutuwondelelanga twalemvokela sono kiyikilu kala ova ntandu. O kangala nze una Yesu kakangalela divavanga vo twalanda e mbandu a Yesu yo zingila ngwizani ye malongi mandi. Avo tuvangidi wo tuvwa edienga dia Yave yo kala ye zingu kiakiese.

Muna malongi ma Yesu muna ye nkanikinu milenda kutusadisa muna kangala nze una kakangalela. Tulenda solola nkanikinu miami mun’Elongi diandi vana Mongo. Yambula twabadika e miaka nkanikinu ye una tulenda mio sadila muna zingu kieto.

NKANIKINU: ‘Akwa nsambu awana bazeye nsatu zau za mwanda.’—Matai 5:3.

AWEYI O NKANIKINU WAU ULENDA KUTUTWASILA ZINGU KIAKIESE:

Yesu wasonga vo wantu nsatu za mwanda bena zau. Tulakukwang’o moyo mu zaya e mvutu za yuvu nze yayi: Ekuma twinina ova ntoto? Ekuma vena ye mpasi zayingi ova nza? Nga Nzambi okutuvwanga kieleka o mfunu? Nga vena ye moyo kunima lufwa? Tufwete zaya e mvutu za yuvu yayi muna kala ye zingu kiakiese. Yesu wazaya wo vo Nkand’a Nzambi i Nto ya ziku ilenda vana mvutu za yuvu yayi. Yesu wasamba kwa S’andi vo: “E diambu diaku i ludi.” (Yoane 17: 17) Nga Nkand’a Nzambi ulenda kutusadisa mu lungisa nsatu zeto za mwanda?

NONA KIA LUSANSU LWAKIELEKA:

Esa wa mfidi a buka kimosi kia miziki mia heavy-metal, wakala ye tunda ye wayangalelanga e salu kiandi. Kana una vo i wau, Esa kakala ye zingu kiakiese ko. Wavova vo: “Kana una vo yayangalelanga e buka kiame, yavavanga zaya nsasa zingu kiame.” Ke kolo ko, Esa wawanana ye Mbangi mosi a Yave. Wavova vo: “Yanyuvula yuvu yayingi. E mvutu za sikididi za Nkand’a Nzambi kampana, zansivikisa yo tambulwila longoka yandi o Nkand’a Nzambi.” Mana Esa kalongoka ma simba ntim’andi yo kumfila muna yekola e zingu kiandi kwa Yave yo vubwa. Wavova diaka vo: “Muna mvu miavioka, kiakala ye luvuvamu ko, yayisianga mu mpasi ye muna mavangu ma nsoki. Kansi owau, yabakula e nsasa zingu.”a

NKANIKINU: ‘Akwa nsambu ana befwilanga akaka e nkenda.’—Matai 5:7.

AWEYI O NKANIKINU WAU ULENDA KUTUTWASILA ZINGU KIAKIESE:

O fwila akaka e nkenda divavanga vo wabasong’e ngemba ye kubavwa o mfunu. Yesu wafwilanga e nkenda ana bavavanga lusadisu lwandi. E nkenda zamfila muna vevola e mpasi z’akaka. (Matai 14:14; 20: 30- 34) Avo tutanginini Yesu mu song’e nkenda, tuwokesa kiese kieto wau vo ofwila akaka e nkenda nsambu ditwasanga muna zingu. (Mavangu 20: 35) Tulenda songa nkenda kwa akaka muna mavangu ye mvovo mieto yo vevola mpasi z’awana bena ye mfunu a lusadisu lweto. O songa e nkenda nga dilenda kututwasila kiese?

NONA KIA LUSANSU LWAKIELEKA:

Maria yo Carlos wa nkaz’andi bena se mbandu ambote a wantu besonganga nkenda. O se dia Maria una vo yakala dia nsona, wabakama kimbevo ye kelendanga diaka katuka vana mfulu ko. Maria yo Carlos banata kuna nzo au yo lunga-lunga nsatu zandi zawonso. Nkumbu miayingi ke balendanga leka ko, ezak’e ntangwa banatanga mu nswalu kuna lupitalu vava mpasi za kimbevo kia diabete zanlwakilanga. Bavova vo, ezak’e ntangwa bayoyanga kikilu. Kansi, nze una Yesu kavova, kiese bemonanga wau bazeye vo besianga ngolo mu lunga-lunga se dia Maria.

NKANIKINU: “Akwa nsambu avangi a ungudi.”—Matai 5:9.

AWEYI O NKANIKINU WAU ULENDA KUTUTWASILA ZINGU KIAKIESE:

O kala ‘mvangi a ungudi’ disongele vo kadila kuna ‘luvuvamu.’ O kadila ye akaka kuna luvuvamu aweyi dilenda twasila zingu kiakiese? Vava tusiamisanga ungudi ye akaka, tukalanga ye ngwizani ambote yo yau. Muna kuma kiaki, diambote twalemvokela luludiku lwa Nkand’a Nzambi: “Ovo dilendakana, vana dieno’sambu, nukadila kuna ungudi yo wantu awonso.” (Roma 12: 18) O mvovo “wantu awonso,” usonganga yitu yeto ye wantu akaka bena vo mindembi-kwikila. O kadila kuna ungudi yo “wantu awonso” nga dilenda wokesa e kiese muna zingu kieto?

NONA KIA LUSANSU LWAKIELEKA:

Badika e nona kia nkento oyikilwanga vo Nair. Vioka mvu miayingi, wanwana ye ntonta za kadila kuna ungudi, musungula ye yitu yandi. Vioka mvu 15 tuka nkaz’andi kambembola, osansanga o wan’andi yandi mosi. Mosi muna wan’andi wayantika nua fomo zangolo yo kituka se kimpumbulu, wayantika vumisa ngudi ye mpangi zandi. Nair okwikilanga vo mana kalongokanga muna Nkand’a Nzambi mankumika mu zizidila e mpasi zazi yo kadila kuna ungudi. Katantananga ko ngatu nwana, kansi wasonganga ngemba yo vava bakula akaka. (Efeso 4: 31, 32) Okwikilanga vo o kadila kuna ungudi dikunsadisanga mu kala ye ngwizani ambote ye yitu yandi yo wantu akaka.

SIA SUNGIDIDI MUN’OMA MA KUSENTU

Avo tulemvokela luludiku lwa Yesu, tukala ye kiese yo luyangalalu lwa ntima. Muna kala ye zingu kiakiese tufwete zaya mpe oma mebwa kuna sentu. Kansi, aweyi tulenda kadila ye zingu kiakiese, wau vo yeto awonso tuyelanga, tununanga yo fwa? O mama mebwanga mu zingu kieto yamu unu.

Kansi, vena ye nsangu zambote. Yave osinga sambula awana besianga ngolo mu ‘kangala nze una Yesu kakangalela.’ Yave osianga nsilu vo ke kolo ko otwasa nz’ampa yansongi ina bezingila akwa kwikizi yakwele mvu yo vimpi wambote nze una Yave kakana kuna lubantiku. Nkand’a Nzambi uvovanga vo: “Tala, e saba kia Nzambi kina yo wantu, kakala yau, bekala nkangu andi, Nzambi yandi kibeni okala yau, se Nzambi au: Kakunguna mansanga mawonso muna meso mau; o lufwa, ke lukala diaka ko; musungula kala diaka dilu, yovo kazu, ngatu mpasi: Oma mantete maviokele.” —Lusengomono 21: 3, 4.

Maria oyikilu kala mun’elongi divitidi una ye mvu 84 osutilanga mona e ndungan’a mvovo miami. Adieyi tuvova mu kuma kiaku? Nga ozolele zaya mayingi mu kuma kia “moyo wina vo moyo kikilu” una tuvwa muna Kintinu kia Nzambi? (1 Timoteo 6: 19) Avo i wau, vava Mbangi za Yave mu zunga kieno yovo soneka nkanda kw’amwangi a finkanda fiafi.b

a Olenda tanga lusansu lwa zingu kia Esa muna lukaya lwa 8-9 mun’Eyingidilu diadi.

b O nkanda, O Nkand’a Nzambi Adieyi Kieleka Kelonganga? usadisanga ulolo wa wantu mu longoka Nkand’a Nzambi.