Nkand’a Nzambi Ulenda Kusadisa mu Kala ye Kiese

KANA una vo Nkand’a Nzambi ke nkanda usasilanga mambu ma mawuku ko, usonganga una ngindu zambi yovo zambote zilenda vanga muna vimpi wa muntu. “O ntim’a kiese, nlongo miambote: O ntim’atoloka, visi uyumisa.” Tutanganga mpe: “Ovo ozeza muna lumbu kiampasi, o nkum’aku ukè.” (Ngana 17:22; 24:​10) Lukendalalu lwa ntima lulenda kutuyoyesa yo lembi kala ye luzolo lwa vanga e diambu yovo vava lusadisu.

O lukendalalu lulenda fwasa mpe kimwanda kia muntu. Ana bekuyimwenanga vo ke bena mfunu ko, beyindulanga vo ke balendi kala ye ngwizani ambote ko yo Nzambi ngatu sambulwa kwa yandi. Simone oyikilu mun’elongi diantete, wavovanga vo “kalendi zolwa ko kwa Nzambi.” Kansi, muna Nkand’a Nzambi tutanganga vo o Nzambi ozolanga awana bevavanga kunyangidika.

Nzambi Ovwanga Wantu o Mfunu

Muna Nkand’a Nzambi tutanganga vo “o Yave ofinamene awana babudik’e ntima, ovuluzang’awana bakendalala.” Nzambi kevezanga “awana babudik’e ntima” ko, kansi wasia nsilu vo ‘ovutula mwand’a nlembami, ovutula ntima mi’awana bakosomoka.’​—⁠Nkunga 34:18; 51:17; Yesaya 57:⁠15.

Lumbu kimosi, Mwan’a Nzambi, wazayisa alongoki andi vo Nzambi omonanga edi diambote dina muna selo Yandi. Muna nona kabatela, wabazayisa vo Nzambi ozayanga vava ntietie ibwanga ova ntoto, ediadi dilenda moneka nze diambu diakondwa o mfunu kuna kwa wantu. Wavova mpe vo Nzambi ozeye mawonso mu kuma kia wantu, yo zaya nkutu lutangu lwa nsuki zau. Yesu wafokola e nona kiandi ye mvovo emi: “Dianu vo, ke numoni wonga ko; ntietie zingi nusundidi.” (Matai 10:​29-31)a Kanele vo wantu balenda kala ye ngindu zambi mu kuma kia yau kibeni, Yesu wasonga vo akwikidi mfunu bena vana meso ma Nzambi. Kieleka, Petelo wa ntumwa utusungamese vo ‘Nzambi ke swaswanisanga wantu ko: kansi muna zula yawonso, on’okumvumina yo vanga nsongi, wina y’edienga oku kena.’​—⁠Mavangu 10:​34, 35.

Kala ye Ngindu Zasikila

Nkand’a Nzambi ukutulonganga twakala ye ngindu zasikila mu kuma kia yeto kibeni. Paulu wa ntumwa wasoneka vo: “Muna nsambu zina yavewa, i mpovesèle konso muntu vovo nwina, kayiyindwila ngindula iviokele ina kafwete yindula ko; kayindul’aka ngindul’ansongi, muna nkaya kakay’o Nzambi kwa konso muntu o nzongo a lukwikilu.”​—⁠Roma 12:⁠3.

Dialudi vo katufwete kiyindwila ngindula iviokele ko yaluaka muna tezo kia kuyitundidika vana vena akaka; ngatu kuyisakidika kwayingi yamu tezo kia yindula vo ke tuna mfunu ko. Kansi, tufwete kalanga ye ngindu zasikila mu mpila tukuyibadikilanga yo zayanga e nkendelo zeto. Nkento mosi wa Nkristu edi kavova: “Omono ki muntu ambi ko ngatu muntu ambote. Ngina ye fu yambote ye fu yambi, i wau dina kwa wantu awonso.”

Kansi ke diambu diakete ko kwa muntu mu lwaka muna tezo kiaki. Ngolo zayingi divavanga muna venga e ngindu zambi mu kuma kia yeto kibeni. Kansi muna lusadisu lwa Nzambi, tulenda soba e kiwuntu kieto ye ngindu zeto. I diau tuwondelelwanga muna Nkand’a Nzambi vo twavanga. “Nutengola wo, una wa nkal’eno antete, o wuntu wankulu, una uyivanga muna maketo ma luvuki; yo vanguluka muna mwand’a ntima mieno, nuvwat’o wuntu wampa, una uvangamène kontwa kwa Nzambi, muna ndungidi yo songa kwa ludi.”​—⁠Efeso 4:​22-24.

Muna sianga ngolo za vangulula ‘mwand’a ntima mieto,’ i sia vo makani ma ntima mieto, tulenda soba kiwuntu kieto yo vingisa e ngindu zambote vana fulu kia ngindu zambi. Lena oyikilu mun’elongi diantete, wamona vo tuka kakatulwila e ngindu za sia vo ke vena muntu ko olenda kunzola yovo kunsadisa ngatu soba e ngindu zandi, e mambu masoba. Nkia malongi mena muna Nkand’a Nzambi masadisa Lena, Simone ye akaka mu soba e ngindu zau?

Nkanikinu mia Nkand’a Nzambi emi Mitwasanga e Kiese

“Yekek’ezitu diaku kwa Yave, yandi okusikina.” (Nkunga 55:​22) Ediantete, e sambu kilenda kutusadisa mu kala ye kiese. Simone wavova vo: “Konso ntangwa nkendalalanga, nsambanga kwa Yave yo lomba lusadisu lwandi. Okunkumikanga yo kumfila muna mambu mawonso.” Vava ntozi a nkunga kekutuvovesanga vo twayekeka ezitu dieto kwa Yave, okutusungamesanga vo Yave kekutuvwanga kaka mfunu ko, kansi okutubadikilanga vo tufwanukini lusadisu lwandi. Muna fuku w’elambu dia Nduta ya mvu a 33 wa tandu kia Kristu, alongoki a Yesu bakendalala kikilu vava Yesu kabavovesa vo vondwa kevondwa. Yesu wabavovesa vo basamba kwa Se, yo kudikil’o vova: “Nulomba, nwatambula, kiese kieno kialunga.”​—⁠Yoane 16:​23, 24.

“Edi diviokele e nsambu, dia vana, ke mu tambula ko.” (Mavangu 20:​35) Nze una kalonga o Yesu, vana, i nsabi za kala ye kiese muna zingu. O lemvokela e ludi kiaki kia Nkand’a Nzambi kikutusadisa mu zayanga e nsatu z’akaka ke mu nsatu zeto kaka ko. Vava tusadisanga akaka yo mona nluta ditwasanga, kiese dikutuvana. Lena wavova vo, o sila umbangi kwa mfinangani zandi diansadisa mu mpila zole: “Diantete, diampana e kiese kina kayika o Yesu.” “Dianzole, wantu akaka nsilanga umbangi besonganga luzolo lwa wá, ediadi kiese dikumpananga.” Avo tuyivene mu sadisa akaka, tumona e ziku kia mvovo mia Ngana 11:25 muna tutanganga vo: “Nkwa moyo amvevodi okala ye mpongo: On’ovungila maza, oyandi ovungilwa mo.”

‘E lumbu yawonso ya mumbona-mpasi, yayiva: Nkwa ntim’a kiese wina y’elambu lumbu ke lumbu.’ (Ngana 15:​15) Yeto awonso tulenda kweto sola e mpila tufwete kuyibadikilanga. Tulenda kala nze muntu omonanga vo mawonso ke mena mambote ko yo kendalala, yovo yindula vo mawonso mambote kwandi yo kala “nkwa ntim’a kiese” yo yangalala nze yeto tuna y’elambu. Simone wavova vo: “Yasianga ngolo mu kala ye kiese. Yakalanga ntangwa zawonso y’elongi dia mono kibeni, yavaikanga mu salu kia umbangi yo zizidila muna sambu. Yavavanga mpe kala vamosi ye akwa kiese yo sadisa akaka.” E fu kia mpila yayi kiese kitwasanga, nze una tutanganga muna Nkand’a Nzambi vo: “Numwena Yave kiese y’ekembo, e yeno asongi: Nuyengolokela kuna kiese yeno awonso akwa ntima miansongi.”​—⁠Nkunga 32:⁠11.

“O nkundi ozolanga ntangwa zawonso, o mpangi muna mpasi kawutukila.” (Ngana 17:​17) O zayisanga mana mekututokanesanga kwa nkundi yovo kwa ndiona obundanga e vuvu, dilenda kutusadisa mu sunda e ngindu zambi. Mokenanga ye akaka dikutusadisa yo mwena mambu una mena, yo kala ye nyindu asikila. Simone wavova vo, “o mokena ye akaka sadisa dikunsadisanga. Songanga e ngindu zaku kwa nkw’aku.” Ovanga wo dikusadisa mu mona e ziku kia kingana kivovanga vo: ‘E ntantu muna ntim’a muntu kivumbika wo: E diambu diambote dimwesa wo e kiese.’​—⁠Ngana 12:⁠25.

Adieyi Olenda Vanga

Tufimpidi nkanikinu miamfunu mia Nkand’a Nzambi milenda kutusadisa mu sunda e ngindu zambi yo kala ye kiese. Avo ngindu zambi onwananga zau, tukasakese watanganga Nkand’a Nzambi. Vava zaya e mpila ofwete kadila ye ngindu zasikila mu kuma kia ngeye kibeni ye mu kuma kia ngwizani aku yo Nzambi. Tusidi e vuvu vo muna landa luludiku lwa Nkand’a Nzambi, olenda kala ye kiese muna mawonso ovanga.

[Mvovo Vana Yand’a lukaya]

[Mvovo mia Fwaniswa mina muna lukaya lwa 7]

Zingila ngwizani ye nkanikinu mia Nkand’a Nzambi kiese kutwasanga