Ofundisu Kuna Mbazi A Nkanu, Oneto Kwa Pilato

O kuma vava se ku kiá, Petelo kavakwidi Yesu nkalu mu nkumbu wantatu. Afundisi kuna Mbazi a Nkanu bafokwele fundisa Yesu mu nzaki-nzaki, e vuandu kimwangane. Bakutakane diaka muna lumbu Kiatanu mu mene. Bavangidi wo muna vava lunda e mbumba ya mfundisa ya kondwa unsongi bafundisi Yesu muna fuku waviokele. Yesu oneto diaka vana ndose au.

Banyuvuidi vo: “Avo nge i Kristu, utusamunwina wo.” Yesu ubavutwidi vo: “Kana inusamunwini wo, ke nukwikila wo ko. Kana inuyuvuidi, ke nuvana mvutu ko.” Kansi kuna unkabu wawonso Yesu ubavovese vo yandi oyikwanga muna Daniele 7:13. Ubavovese vo: “Tuk’owau, o Mwan’a muntu ovuanda kuna koko kwalunene kwa nkuma kwa Nzambi.”—Luka 22:67-69; Matai 26:63.

Bansiandamene, oku vo: “Ngeye i Mwan’a Nzambi e?” Yesu ubavutwidi vo: “Yeno kibeni nuvovele dio vo i Mwan’a Nzambi.” Oyau bamwene vo Yesu kafwete fwa wau kiatiangwini Nzambi. Bayuvuidi vo: “Nkia kimbangi diaka tuvuidi o mfunu?” (Luka 22:70, 71; Maku 14:64) Dianu vo, bakangidi Yesu mu nsinga, bele yandi kwa Pontio Pilato wa nguvulu a Roma.

Nanga Yuda wa musi Kereote omwene Yesu wau kenatwanga kwa Pilato. O Yuda vava kamwene vo Yesu ozengelo tumbu kia lufwa, okendalele, e ngangu zandi zisukidi. Kansi vana fulu kia viluka o ntima yo vutuka kwa Nzambi, wele vutula palata 30 kavewa kwa nganga zambuta. Ubavovese vo: “Nsumukini wau ngiekwele menga ma munkondwa kuma.” Bamvutwidi matingu: “Ke diambu dieto ko. Matadidi!”—Matai 27:4.

Yuda wele veta palata 30 muna tempelo, i bosi wele vanga o bi wankaka, uyivondele. Vava kayivakikidi o nsinga vana laka, e tayi kia nti kitolokele. Obwidi vana ntandu a tadi, e vumu kiandi kibûkidi.—Mavangu 1:17, 18.

Muna mene-mene, Yesu oneto kuna lûmbu lwa Pontio Pilato. Kansi Ayuda ana banete Yesu ke bazolele kota muna lûmbu ko. Kadi babenze vo befunzuka avo bamonanene y’esi Zula. Ke belenda dia lambu ko muna lumbu kia 15 kia Nisani, e lumbu kiantete kia Nkinzi a Mbolo Zalembi Funa, ubadikilwanga vo nkinzi a Nduta.

Pilato wele kwa Ayuda, ubayuvuidi vo: “Nkia mfundu nwizidi fundila muntu ndioyu?” Bamvutwidi vo: “O muntu ndioyo kele vo ke kimpumbulu ko, ke twadi kunyekola kwa ngeye ko.” Pilato obenze vo Ayuda komekena bena kunkomekena, ubavovese vo: “Numbonga yeno kibeni, nwamfundisila muna nsiku eno.” E mvutu za Ayuda zisongele vo Yesu kafwete vondwa. Bavovele vo: “Ke diansongi ko kwa yeto twavonda o muntu.”—Yoane 18:29-31.

Kadi, avo bavondele Yesu mu kolo kia nkinzi a Nduta, dilenda twasa mvuanga kwa nkangu. Kansi, ayadi a Roma avo bavondele Yesu, wau kakolamene e wisa kiau, ke bekala ye ngielele ko, Ayuda mpe ke bevola nkanu ko kwa nkangu.

Mfumu za mabundu ke bazayisi Pilato ko vo Yesu tumbu kia lufwa banzengele wau katiangwini Nzambi. Bavovele mfundu mia luvunu, oku vo: “Ondioyu tunsolwele [1] obendomonanga zula kieto [2] yo sima o futa e mpaku kwa Kaisa, [3] okukiyikilanga vo Kristu wa ntinu.”—Luka 23:2.

Wau vo Pilato nsunzudi a luyalu lwa Roma, ovuidi kuma kia sikila mu tokana wau kawidi vo Yesu okiyikilanga vo ntinu. Dianu vo, Pilato okotele diaka muna lûmbu, obokele Yesu, unyuvuidi vo: “Ongeye i Ntinu a Ayuda e?” Pilato edi kazolele yuvula, ‘Nga okulwidi e nsiku mia Roma wau ukiyikidi vo u ntinu yo telamena Kaisa?’ Nanga muna vava zaya kana vo Pilato mayingi kawidi mu kuma kiandi, Yesu ovutwidi vo: “Nga mu ngindu za ngeye kibeni oyuvulwidi mu kuma kiame yovo akaka bavovese dio?”—Yoane 18:33, 34.

Pilato ovunini vo kazeye Yesu ko, kansi owau ozolele toma kunzaya, Pilato ovutwidi Yesu vo: “Nga mono i Nyuda e? Esi zula kiaku ye nganga zambuta bayekwele kwa mono. Adieyi ovangidi?”—Yoane 18:35.

Yesu kazolele kuyisweka ko vo yandi i ntinu. E mvutu zandi zitomene sivikisa Pilato wa Nguvulu.