Petelo Ovakwidi Yesu Nkalu Kuna Nzo A Kayafa

Vava makesa bakangidi Yesu muna mpatu a Ngetesemane, antumwa bamwene wonga, batinini. Awole muna yau baningamene. Mosi muna yau i Petelo “ye nlongoki ankaka,” i Yoane wa ntumwa. (Yoane 18:15; 19:35; 21:24) Nanga balende Yesu wau kenatwanga kuna nzo a Anasi. Vava Anasi kasindikidi Yesu kwa Kayafa wa Ngang’ambuta, Petelo yo Yoane balende kuna vala. Babakamene kwa wonga wa mioyo miau ye batokanene mu kuma kia dina o Mfumu au kevangwa.

Wau vo ngang’ambuta otomene zaya Yoane, unkotese vana yanzala kia nzo ya Kayafa. Vo i Petelo osidi kuna mbazi yavana Yoane kavaikidi wizidi mokena ye selo kia nkento una vana muelo. I bosi, Petelo oveno o nswa kakota.

Wau vo kiozi kiangolo kina ko, o wantu bena vana yanzala kia nzo bakwikidi tiya mu yotela. Petelo mpe ovuende vavana, ovingilanga “kamona e mfoko a diambu.” (Matai 26:58) Mu kuma kia ntemo wa tiya, e selo kia nkento ona okotese Petelo, osidi e sungididi kiandi kwa Petelo. Unyuvuidi vo, “Ongeye mpe nga kumosi ko muna alongoki a muntu ndioyu e?” (Yoane 18:17) Ke yandi kaka ko ozayididi Petelo yo vova vo kumosi kekangalanga yo Yesu.—Matai 26:69, 71-73; Maku 14:70.

E diambu diadi ditokanese Petelo. Kazolele tunta sungididi kia wantu ko, okatukidi vo, wele vuandila vana muelo a nzo. Muna vanga wo, Petelo ovakwidi nkalu vo ke kalanga yo Yesu ko, ovovele nkutu vo: “Kinzeye kwame ko ngatu bakula dina ovovele.” (Maku 14:67, 68) I bosi, oyantikidi “kuyisiba yo dia ndofi,” edi kazolele vova vo e ndofi andi ya ludi, avo ke ya ludi ko diambote nkutu kafwa kwandi.—Matai 26:74.

Muna kolo kiaki, Yesu mu fundiswa kena, nanga muna suku dimosi diantandu muna nzo ya Kayafa. Petelo ye wantu akaka mu vingila bena kuna yanda, mu mona bena ulolo wa wantu bezidi tá kimbangi.

Petelo musi Ngalili, e mpila kavovele isongele vo, vuna kena vuna, wau kavovele vo kazeye Yesu ko. Kuna diak’e sambu, “Mosi muna antaudi a ngang’ambuta, una vo yitu kia ndiona wazengwa o kutu kwa Petelo, ovovele vo: “Ke ngeye ko mbwene okedi yandi muna mpatu e?” Vava o Petelo kavakuluidi o nkalu nkumbu tatu, e nsusu ikokwele nga una wasakulwa.”—Yoane 13:38; 18:26, 27.

Mu ola yayi, nanga o Yesu vana varanda ya ntandu kena. Mfumu Yesu ovilukidi, otomene tungununa Petelo, ediadi dilwekele Petelo mu ntima. Kadi, oyindwidi dina o Yesu kavovelenge kuna suku dia ntandu. Yindula una Petelo kamwene wau kabakwidi dina kavangidi. Vana vau, ovaikidi yo bokomoka ye dilu.—Luka 22:61, 62.

Ekuma kavangidi e diambu dia mpila yayi? Aweyi o Petelo wa nkwa ziku ye kwikizi kavakulwidi mfumu andi o nkalu? O wantu baswekele ludi, kuna kwa yau, o Yesu kimpumbulu. Petelo lau diampwena kakedi diau mu vovela muntu ansongi, kansi ofididi e nima kwa ndiona una ye “mambu ma moyo a mvu ya mvu.”—Yoane 6:68.

E diambu diadi dia nkenda divangama kwa Petelo, disonganga vo, kana nkutu nkwa kwikizi yo vumi olenda bwa mu ntambu, avo katekele kubama ko muna zizidila e mpasi yovo ntonta. Mana mabwila Petelo mena se mbandu a lulukisu kwa selo yawonso ya Nzambi.