“Dhowananive wenda muimbarimbari”

 1. N’nga tapanya moda waromile i-yo “imbarimbari” unonikami-a a-vi?

“N’NGA mwaromile a-vi imbarimbari?” Pyo-okaikela ira mukadhi mufukiwanga yofuka yei fendo dhinjinji dhene. Yei chiimbo-i mwavyofuka vyevyo Makristau afwi-u vinonifuka aliwa nafuna idhiwana. Ninofuna idhiwa mwemo abali naarongoli-u mwaromile aliwa idhiwa thitho mdhiveliwana Yohova noawandelamo moda unasangalala i-yo na mwasa oidhiwa imbarimbari. (Aroma 1:11) Tapanya vyevi unonikami-a dowanave ona ira imbarimbari njapereso yavadhulu. Thitho vyaira e-no ninokala osimikizela rima ira “nidhowenave wenda muimbarimbari” vyevi pinofuna nikami-a dhowanave ira vyongo vinam’mwiri-e Yohova sangalalanga na i-yo thitho niraeli-a.—3 Ju. 4.

 2. N’nga ninotapanyan’ni muyofunjedha yei?

² Muyofunjedha yei ninotapanya myasa inango inoniiri-a ira nidhiveliwengana imbarimbari. Namala ninotapanya vinaire i-yo ira nidhowenave thonyi-edha ira ninodhiveliwana yotuva ya pereso yavadhulu. Pyo-okaikela ira tapanya vyevi unonikami-a ira nisimbenga maningi viirile Yohova vonikami-a idhiwa imbarimbari. (Juwau 6:44) Unonilimbi-a thitho ira nifunechechenga wandela atu enango imbarimbari.

 3. N’nga ngumwasa uvi ulukulu unoniiri-a dhiveliwana imbarimbari?

³ Vatokala myasa injinji inoniiri-a dhiveliwana imbarimbari. Mwasa ulukulu ngoi ninodhiveliwana Yohova Nlungu, oi ngu mwim’nya wa imbarimbari. Dhela Mumadhwee Bibilyani nitofiya vom’mwidhiwa ninga Babi-u wa dhulu oi unonisamalela mwaudhivela a-kala m’muidhiwa wene ninga namapanducha wa kopolo dhothene upanduchile dhulu nailambo yavathi. (1 Pe. 5:7) Ninoidhiwa ira Nlungwi-u “ngwatangaranga na walelo o-othakaleliwa mobaranya na odhaleliwa na riya rima o-omala na imbarimbari.” (Ekis. 34:6) Yohova unodhiveliwana longomano. (Esaya 61:8) Vinompa rimani anionanga nirucheyanga thitho ngokozeya na ofunechecha dhamali-a nyarwa dothene vahora yofwanelela. (Jer. 29:11) Vyevi pyosangalali-a! Ngu mwasiwa i-yo ninodhiveliwana maningi Yohova!

4-5. Mwasiwa ngwan’ni rumiwi Paulo atofwanafwani-edha idedi-edho yi-u na nangula?

⁴ N’nga ngumwasa uvi unango unoniiri-a dhiveliwana imbarimbari? Imbarimbari inonikami-a mu ndhila dinjinji. Dhoweni nithuuleleni ifwanafwani-o. Imbarimbari ya Bibilyani inothangani-avo idedi-edho yi-u ya sogolo. Vofuna thoyi-edha funeya wa idedi-edho yei, rumiwi Paulo alembile ira: “Idedi-edho ina i-yo ili ninga nangula wa vingumi vi-u thitho pyosikimizeyela nayokaatheya.” (Aeb. 6:19) Ninga mwemo nangula munairi-a aliwa ira barko la-awendenga, idedi-edhwi-u inonikami-a ira nikaleve olimba nagumanangana vyowesedha.

⁵ Veva Paulo aonga vya idedi-edho yodhowa dhulu yeyo Makristau ozoziwa ina aliwa. Mbwenye vyaongile liyevi vinokuza thitho atu anaidedi-edho yodhakala paradaizo vailambo yavathi. (Juwau 3:16) Onga mwa imbarimbari funjedha vya idedi-edho ya ingumi yo-omala utonikami-a ira nikaena ingumi yokaana yotapulela.

6-7. N’nga idhiwa imbarimbari yoonga vya sogolo wamkami-idhe a-vi Ivonne?

⁶ Kathuulelani vyamuirele rongola mwinango dhinalee Ivonne. Liye kaulukulile banja la Mboni thitho angali mwana anoova wukwa. Liye unothuulelave madhu enango alerile liye oi tanomsowi-a rendele oonga ira: “Dambo n’nango ninodhakwa.” Ivonne atoonga ira: “Madhu enala anondiiri-a ira ndiimwananenga gona nama-iyu thuulelanga vya sogolo. ‘Ndanothuulela ira ingumi,’ kayafwanenle kalanga e-ni. ‘Mwasiwa ngwan’ni nitokaana ingumi?’ Ndanothuulela vyevyi na mwasa oi kandafuna wukwa!”

⁷ Ee-no a-anakwakwani-e vyawa 20, Ivonne atongumanana na a Mboni dha Yohova. Liye aongile ira: “Ndatoroma roromela ira nditokaana idedi-edho yodhakaana ingumi yo-omala paradaizo vailamboi.” N’nga funjedha imbarimbari wamkami-idhe a-vi rongoli-ula? Liye atowenjedhela voonga ira: “Kandinoimwanana thitho gona na mwasa okumbanya vya sogolo venango wukwa.” pyooneelatu ira Ivonne unoona ira imbarimbari cha pereso yavadhulu thitho unosangalala wandela atu enango vya idedi-edho ina liye.—1 Timo. 4:16.

8-9. a) N’nga mutu mwinango wa muifwanafwani-o ya Yesu aona a-vi fuma yafwaidhe liye? b) N’nga nyo munoona a-vi imbarimbari?

⁸ Imbarimbari ya Bibilyani inothangani-avo thitho milanyu yapama ya Umwene wa Nlungu. Yesu atofwanafwani-edha imbarimbari ya Umwenuo na fuma yolokoteya. Va Mateu 13:44, liye aongile ira: “Umwene wa dhulu uli ninga fuma yolokoteya mundani yeyo mutu yafwaidhe liye noilokota. Na mwasa wosangalala atodhowa maguli-a vyongo vyothene vyana liye nogula munduo.” Kaonani ira mutu uongiwile va lembali kaiira funafuna fumiyo baa-i. Mbwenye angaifwaidhe atorumela i-yanchi vyongo vinjinji ira aikaena. Thitho atoguli-a yongo ili yothene yan’na liye. Mwasiwa ngwan’ni? Anoidhiwa ira fumiyo yali yapereso yavadhulu maningi kwaranya yongo iliyothene i-iidhe liye.

⁹ N’nga mwemo pumwemo munoonela nyo imbarimbari? Kaninokaikela ira pumwemodi munoonela i-yo. Ninoidhiwa ira kavali yongo inofuna niva-a ilamboi yeyo inaode i-yo ifwanafwani-edha na sangalala unokaana i-yo namwasa olambela Yohova va-eni ninodedi-edha dhakaana ingumi yo-omala mu Umwene wa Nlungu. Ngari yokala na liye vauxamwali ndi ya pereso yavadhulu maningi kwaranya yongo yothene inofwanela i-yo i-yachi. Ninosangalala maningi namdhiveliwi-a va “vyongo vili vyothene.”—Akol. 1:10.

10-11. N’nga chini yakami-idhe Michaeli ira achinje vyongo va ingumiyee?

¹⁰ Anjinji a i-yo natochinja vyongo vinjinji ira nimsangalali-e Yohova. Atu enango tato-iya mabasa avadhulu a ilamboi. Atu enango thitho tato-iyachi funafuna fuma. Atu enango thitho tangafunjedhile vya Yohova tatochinja umutwiwa. Vyevyo pyairile Michaeli. Liye kaulukulile m’banja la Mboni thitho angali zombwe atofunjedha karati. Michaeli aongile ira: “Ndanosangalala ira ndioneenga ira ndili mutu wakopolo thitho hora dhinango ndaona ira kavali unandigonji-e.” Mbwenye angaromile funjedha Bibilya Michaeli atoidhiwa mwemo Yohova munoonela liye vyauwalanga. (Sal. 11:5) Voonga vya banja lamfunji-a Bibilya liye aongile ira: “Aliwa katandiwandenlevo ira ndi-iyachi karati. Tadhowanave ndifunji-a imbarimbari ya Bibilya.”

¹¹ Vadhowanave aliwa ndifunji-anga vyokuza Yohova, paevo thitho varoma miyo mdhiveliwana maningi. Liye atokuziwa maningi na mwemo Yohova mwairela liye vyongo mwatangaranga na arumiwee. Vangavirile hora Michaeli atozindiela ira anofwanela chinja vyongo va ingumiyee. Liye aongile ira: “Ndanoidhiwa ira vinokala vyorucha maningi ira ndi-iyachi karati.” Mbwenye anoidhiwa thitho ira vyevyo vinodha sangalali-a Yohova thitho kandakaikela ira lambela Yohova kofuneya maningi kwaranya yongo iliyothene inofuna miyo i-yachi. Michaeli unosimba imbarimbari ya pereso yavadhulu ifaidhe liye thitho vyevi piyevyo vyamwiri-idhe chinja vyongo va ingumiyee.—Tiy. 1:25.

12-13. N’nga imbarimbari ya Bibilyani yamkami-idhe a-vi Mayili?

¹² Vofuna thonyi-edha ira imbarimbari cha pereso yavadhulu Bibilya ninoifwanafwani-edha na nyale inomoneya isini. (Sal. 119:105; Aef. 5:8) Mayili wau Azerbaijan, unosimba maningi na mwasa mwemo madhu a Nlungu munomukami-edhela aliwa. Liye ulukunle banja loi anamabalee thali mumareligiau o-iyana. Babee ali silamu thitho mee ali mu religiau la Iyuda. Liye aongile ira: “Angalive ira kandakaikela ira Nlungu utokalawo vatokala myasa inango yakonda miyo avwecheche pama. Ndanodhifuka ira mwasuwa ngwan’ni Nlungu atopanducha atu? Thitho chonganyali-a ivi mutu oona nyarwa va ingumiye yothene amala liye maka-iwa muloni modhowa nodhowa? Voi atu anoonga ira yongo iliyothene inoireya ndi ifunelo ya Nlungu ndanodhifuka ira, ‘N’nga Nlungu unosangalala aonanga i-yo nirucheyanga?’”

¹³ Mayili atodhowanave sakasaka vyowakula vya vyofuka vyana liye. Vangavirile hora, liye atorumela funjedha Bibilya thitho atokala wa Mboni dha Yohova. Liye aongile ira: “Ona mwemo Bibilya mwaongela aliwa vyongo movweya pama watondikami-a pama,” ira ndirome sangalala. “Funjedha makundo onyideleya ofwanyeya m’madhu a Nlungu unondikami-a ira ndikaena rendele wa rimani.” Mofwanafwana na Mayili, ninosimba Yohova “uniitane kuma isini nonivolocha mu njezee yodabwi-a.”—1 Pe. 2:9.

14. N’nga ninaire a-vi ira nidhiveliwengana maningi imbarimbari? (Muone kwadru loi, “Vyongo vinango vinofwanafwani-edhiwa na imbarimbari.”)

¹⁴ Vyevi ndivifwanafwani-o vyoyeva vyothonyi-edha ira imbarimbari cha pereso yavadhulu. Kaninokaikela ira vatokala vifwanafwani-o vinango vyoi nyo mutoviidhiwa. N’nga munoona a-vi ira masaka-edho oi mwafunjedhanga vamwekene musakenga myasa inango inoniiri-a ira nidhiveliwengana imbarimbari? Nadhiveliwangana maningi imbarimbari, paevo thitho vanosakasaka iyo ndhila dhinango dhothonyi-edha ira ninoidhiveliwana.

15. N’nga ndi ndhila imbo-i ivi inathonyi-edhele i-yo ira ninodhiveliwana imbarimbari?

¹⁵ Ninothoyi-edha ira ninodhiveliwana imbarimbari vofunjedha hora dhothene Bibilya thitho mabukhu okami-a funjedha Bibilya. Thitho akala nikanle mu imbarimbari hora yolapela moi a-vi, hora dhothene vanokala vinjinji ira nivifunjedhe. Nsanja ya Olonda yoromene yaongile ira: “Mofwanafwana na folori Lili okene angani, ilamboi mutokala makundo manjinji onama oi ananiiri-e ira nirucheye zindiela imbarimbari. Ira mutu aifwanye unofwanela sakasaka mopwasedha. . . . Ira aikaena unofwanela kaana thindhi. Mutu kanofanela kwakwanana imbarimbari yoyeva ifwaidhe liye baa-i. . . . Unofwanela dhowanave sakasaka ira afwanye makundo manjinji a imbarimbari.” Funjedha unofuneela thindhi Mbwenye kokami-a maningi.

16. N’nga ndhindila ivi inoona nyo ira inoukami-ani mwafunjedhanga? (Sanganikho 2:4-6)

¹⁶ Kai i-yo othene anodhiveliwana leri nofunjedha. Mbwenye Yohova unonilimbi-a ira “nifunefunenga” “nosakasaka” ira nivwecheche pama makundo odi-a aimbarimbari. (Muleri Sanganikho 2:4-6.) Nairanga vyevi, hora dhothene ninoganyali. Voonga vinoireya aleringa Bibilya, Corey aongile ira unothuulela vili vaverso lilothene vaokene. Liye atoonga ira: “Ndinoleri madhu achindo othene, thitho sakasaka maverso enango oonga likundo lofwanafwana na verso lelo thitho vyongo vinango vyowenjedhela. . . . I-ndi-edha basa ndhila yen’na unondikami-a ira ndifunjedhe vinjinji.” Akala nino-indi-edha basa ndhila yen’na venango inango, ninooni-a ira ninodhiveliwana imbarimbari nakaangana hora thitho thindhi lofunjedha.—Sal. 1:1-3.

17. N’nga ira vyongo movwelana na imbarimbari unothapulelan’ni? (Tiyago 1:25)

¹⁷ Mbwenye iyo ninoidhiwa ira funjedha imbarimbari baa-i kai okwakwanela. Ira niganyali mokwakwanela ninofwanela iranga vyongo movwelana na imbarimbario, venango ira i-ndi-edha basa makundwee va ingumi yi-u. Nairanga vyevyo paevo vanofwanya iyo imwerumweru yaimbarimbari. (Muleri Tiyago 1:25.) N’nga ninoidhiwa a-vi ira ninoira vyongo movwelana na imbarimbari? Bali unango atoonga ira ninoira vyevyo vodhisakasaka noona vikundu vinoira iyo pama thitho vinofwanela iyo chinja. Rumiwi Paulo atoonga likhundo leli moi e-ni: “Mulimothene mudhowele iyo vasogolo, dhoweni nidhowenave dhowa vasogolo vowenda mofwanelela ndila yenio.”—Afil. 3:16.

18. Mwasiwa ngwani ninodhilimbi-edha ira “nidhowenave wenda muimbarimbari”?

¹⁸ Kathuulelani maraeli-o anofwanya i-yo na mwasa odhilimbi-edha ira nidhowenave wenda muimbarimbari. Kaiira imbarimbari inonikami-a baa-i ira nikaena ingumi yapama, mbwenye inonikami-a thitho ira nisangalali-enga Yohova na Makristau afwi-u. (Sang. 27:11; 3 Ju. 4) Onga mwaimbarimbari, yen’na ndi myasa yapama yoniiri-a ira nidhiveliwengana imbarimbari thitho iranga vyongo movwelana na imbarimbariyo.