Mokanda ya mibale ya

7 Sikoyo Elisha alobaki: “Bóyoka liloba ya Yehova. Talá oyo Yehova alobi: ‘Lobi pene na ngonga oyo na porte* ya Samaria, sea moko* ya farini ya malamu ekokóma na ntalo ya shekele moko,* mpe sea mibale ya ɔrje ekokóma na ntalo ya shekele moko.’”+ 2 Bongo komanda-mosungi oyo mokonzi azalaki kotyela motema alobaki na moto ya Nzambe ya solo ete: “Ata soki Yehova afungoli baporte ya mai na likoló, likambo* ya bongo ekoki mpenza kosalema?”+ Na yango Elisha alobaki na ye: “Okomona yango na miso na yo,+ kasi okolya yango te.”+

3 Ezalaki na mibali minei ya maba oyo bafandaki na esika ya kokɔta na porte ya engumba.+ Balobanaki bango na bango: “Mpo na nini tozali kofanda awa mpo na kozela liwa? 4 Soki tolobi: ‘Tókɔta na kati ya engumba,’ lokola nzala ezali na engumba,+ tokokufa kuna. Soki mpe tofandi awa, tokokufa kaka. Malamu kutu tókende na kaa ya bato ya Siri. Soki batiki biso na bomoi, tobiki. Kasi soki babomi biso, tokufi kaka.” 5 Na yango batɛlɛmaki mpe bakendaki na kaa ya bato ya Siri na mpokwa, ntango molili ebandaki. Ntango bakómaki pembeni ya kaa ya bato ya Siri, bamonaki ata moto moko te.

6 Mpo Yehova asalaki ete bato oyo bazalaki na kaa ya Siri báyoka makɛlɛlɛ ya makalo ná bampunda, mpe makɛlɛlɛ ya limpinga moko monene ya basoda.+ Bongo balobanaki bango na bango: “Talá! Mokonzi ya Yisraele afuti bakonzi ya Bahiti mpe bakonzi ya Ezipito mpo báya kobunda na biso!” 7 Na mbala moko, batɛlɛmaki mpe bakimaki na mpokwa, ntango molili ebandaki. Batikaki bahema na bango, bampunda na bango, mpe badɔngi na bango. Batikaki mpe kaa mobimba kaka ndenge ezalaki, mpe bakimaki mpo na kobikisa bomoi* na bango.

8 Ntango bato wana ya maba bakómaki pembeni ya kaa yango, bakɔtaki na hema moko mpe babandaki kolya mpe komɛla. Na nsima bazwaki palata, wolo, ná bilamba mpe bakendaki kobomba yango. Nsima na yango bazongaki, bakɔtaki na hema mosusu mpe bazwaki biloko kuna mpe bakendaki kobomba yango.

9 Nsukansuka balobanaki bango na bango: “Likambo oyo tozali kosala ezali malamu te. Mokolo oyo ezali mokolo ya nsango malamu! Soki tolobi eloko te mpe tozeli tii ntɔngɔ etana, tokozala bato oyo babongi kozwa etumbu. Sikoyo tókende mpe tóyebisa likambo oyo na ndako ya mokonzi.” 10 Bongo bakendaki mpe babelelaki bakɛngɛli ya porte ya engumba mpe bayebisaki bango: “Tokɔtaki na kaa ya bato ya Siri, kasi moto moko azalaki kuna te; toyoki mpe makɛlɛlɛ ya moto te. Tomonaki kaka bampunda mpe badɔngi oyo ekangisami, mpe bahema oyo basundoli kaka boye.” 11 Na mbala moko bakɛngɛli ya porte babelelaki mpe bapesaki nsango na ndako ya mokonzi.

12 Na mbala moko mokonzi atɛlɛmaki na butu mpe alobaki na basaleli na ye: “Tiká nayebisa bino likambo oyo bato ya Siri basali biso. Bayebi ete tozali na nzala,+ yango wana babimi na kaa mpo na komibomba na esobe. Balobi: ‘Bakobima na engumba, tokokanga bango na bomoi mpe tokokɔta na engumba yango.’”+ 13 Bongo moko ya basaleli na ye alobaki: “Nabondeli yo, tiká mibali mosusu bázwa bampunda mitano kati na bampunda oyo etikali na engumba mpe bákende kotala makambo oyo ezali koleka. Soki babomi bango kuna, ekozala kaka ndenge moko ata soki batikali mpo na kokufa elongo na ebele ya bato nyonso ya Yisraele oyo batikali awa.” 14 Bongo bazwaki makalo mibale ná bampunda, mpe mokonzi atindaki bango bákende na kaa ya bato ya Siri mpo na kotala nini ezali koleka kuna. 15 Bato yango balandaki makolo ya bato ya Siri tii na Yordani. Nzelanzela, bazalaki komona bilamba ná biloko oyo bato ya Siri babwakaki ntango bazalaki kokima na nsɔmɔ. Bato yango bazongaki mpe bapesaki mokonzi nsango.

16 Bongo bato babimaki mpe bapunzaki kaa ya bato ya Siri. Na yango, mezire ya sea moko ya farini ya malamu ekómaki na ntalo ya shekele moko, mpe mezire ya sea mibale ya ɔrje ekómaki na ntalo ya shekele moko, kaka ndenge Yehova alobaki.+ 17 Mokonzi apesaki komanda-mosungi oyo azalaki kotyela motema mokumba ya kokɛngɛla porte. Kasi bato banyatanyataki ye na porte mpe akufaki, kaka ndenge moto ya Nzambe ya solo alobaki ntango mokonzi akendaki epai na ye. 18 Esalemaki kaka ndenge moto ya Nzambe ya solo alobaki na mokonzi: “Sea mibale ya ɔrje ekokóma na ntalo ya shekele moko mpe sea moko ya farini ya malamu ekokóma na ntalo ya shekele moko lobi pene na ngonga oyo, na porte ya Samaria.”+ 19 Kasi komanda-mosungi yango alobaki na moto ya Nzambe ya solo: “Ata soki Yehova afungoli baporte ya mai na likoló, likambo* ya ndenge wana ekoki mpenza kosalema?” Nzokande Elisha alobaki na ye: “Okomona yango na miso na yo, kasi okolya yango te.” 20 Yango nde ekómelaki ye, mpo bato banyatanyataki ye na porte mpe akufaki.