Mokanda ya mibale ya Ntango

11 Ntango Rehoboame akómaki na Yerusaleme, na mbala moko ayanganisaki libota ya Yuda mpe ya Benyamina,+ bato 180 000 oyo babongisami* mpo na etumba, mpo bákende kobundisa Yisraele mpe bázongisela Rehoboame+ bokonzi. 2 Bongo Yehova alobaki na Shemaya+ moto ya Nzambe ya solo boye: 3 “Yebisá Rehoboame mwana ya Salomo mokonzi ya Yuda mpe Bayisraele nyonso ya Yuda mpe ya Benyamina ete: 4 ‘Talá oyo Yehova alobi: “Bosengeli te komata mpo na kobundisa bandeko na bino. Moto na moto azonga na ndako na ye, mpo ngai nde nasali ete likambo oyo esalema.”’”+ Na yango, batosaki liloba ya Yehova, bazongaki, mpe bakendaki kobundisa Yeroboame te.

5 Rehoboame afandaki na Yerusaleme mpe atongaki bingumba oyo ebatelami makasi na Yuda. 6 Na yango akómisaki makasi* Beteleme,+ Etami ná Tekoa,+ 7 Bete-zure, Soko,+ Adulame,+ 8 Gate,+ Maresha, Zife,+ 9 Adoraime, Lakishi,+ Azeka,+ 10 Zora, Aiyalone+ ná Hebrone,+ bingumba oyo ebatelami makasi, oyo ezalaki na Yuda mpe na Benyamina. 11 Lisusu, bisika oyo ebatelami makasi, akómisaki yango makasi mpenza mpe atyaki bakomanda kuna, mpe atondisaki bingumba yango na biloko ya kolya, mafuta mpe vinyo; 12 na bingumba ndenge na ndenge atondisaki banguba ya minene ná makɔnga; akómisaki bingumba yango makasi mpenza. Mpe Yuda ná Benyamina etikalaki na nse ya bokonzi na ye.

13 Banganga-nzambe ná Balevi oyo bazalaki na Yisraele mobimba batikaki bateritware na bango nyonso mpe bayaki kopesa Rehoboame mabɔkɔ. 14 Balevi batikaki bisika na bango ya koleisa bibwɛlɛ matiti ná mabele na bango,+ mpe bayaki na Yuda mpe na Yerusaleme, mpo Yeroboame ná bana na ye balongolaki bango na mokumba na bango ya banganga-nzambe ya Yehova.+ 15 Bongo Yeroboame atyaki banganga-nzambe na ye moko mpo na bisika oyo etombwaná+ mpe mpo na bademo oyo bazali na lolenge ya bantaba*+ mpe mpo na bana-ngɔmbɛ oyo asalaki.+ 16 Mpe bato ya mabota nyonso ya Yisraele oyo motema na bango ezalaki na mposa ya koluka Yehova Nzambe ya Yisraele balandaki banganga-nzambe mpe Balevi na Yerusaleme mpo na kopesa Yehova Nzambe ya bankɔkɔ na bango bambeka.+ 17 Mbula misato mobimba, bakómisaki bokonzi ya Yuda makasi mpe bapesaki Rehoboame mwana ya Salomo mabɔkɔ, mpo balandaki ndakisa* ya Davidi mpe ya Salomo na boumeli ya mbula misato.

18 Na nsima Rehoboame abalaki Mahalate, oyo azalaki mwana mwasi ya Yerimote mwana ya Davidi, mpe mama na ye ezalaki Abihaile mwana ya Eliabe,+ mwana ya Yese. 19 Na nsima, Mahalate abotelaki ye bana: Yeushe, Shemaria ná Zahame. 20 Nsima na ye, Rehoboame abalaki Maaka, nkɔkɔ* ya Abisalome.+ Maaka abotelaki ye: Abiya,+ Atai, Ziza ná Shelomite. 21 Rehoboame alingaki Maaka mwana mwasi ya mwana ya Abisalome mingi koleka basi na ye nyonso,+ mpo abalaki basi 18 mpe azalaki na basi mosusu* 60; abotaki na bango bana mibali 28 mpe bana basi 60. 22 Bongo Rehoboame atyaki Abiya mwana ya Maaka azala nkumu, mpe mokambi kati na bandeko na ye mpo azalaki kokana kokómisa ye mokonzi. 23 Nzokande, asalelaki mayele mpe atindaki* basusu kati na bana na ye na bitúká nyonso ya Yuda mpe ya Benyamina, na bingumba nyonso oyo ebatelami makasi;+ atondiselaki bango ebele ya biloko ya kolya mpe azwelaki bango basi ebele.