Mokanda ya mibale ya Ntango

2 Bongo Salomo apesaki etinda ete bátonga ndako mpo na nkombo ya Yehova+ mpe ndako ya mokonzi.*+ 2 Na yango, Salomo azwaki bato 70 000 mpo bázala basali,* bato 80 000 mpo bákataka mabanga na bangomba,+ mpe atyelaki bango bakɛngɛli 3 600.+ 3 Lisusu, Salomo atindelaki Hirame+ mokonzi ya Tire maloba oyo: “Salelá ngai kaka ndenge osalaki mpo na tata na ngai Davidi ntango otindelaki ye banzete ya sɛdrɛ mpo amitongela ndako ya kofanda.*+ 4 Nalingi kotonga ndako mpo na nkombo ya Yehova Nzambe na ngai, mpe kosantisa yango mpo na ye; kuna, bakotumba mpaka ya malasi ya nsolo kitoko+ liboso na ye, bakotya ntango nyonso mampa ya kotanda*+ ná makabo ya kotumba na ntɔngɔ mpe na mpokwa,+ na mikolo ya Sabata,+ na basanza ya sika,+ mpe na bileko ya bafɛti+ ya Yehova Nzambe na biso. Yango ezali mokumba ya Yisraele mpo na libela. 5 Ndako oyo nalingi kotonga ekozala monene, mpo Nzambe na biso azali monene koleka banzambe mosusu nyonso. 6 Kasi nani akokoka kotongela ye ndako? Mpo likoló, na bonene na yango nyonso* ezali kokoka ye te,+ bongo ngai nde nani mpo natongela ye ndako? Nakoki kotongela ye kaka esika mpo na kobimisa milinga ya bambeka liboso na ye. 7 Sikoyo tindelá ngai moto moko oyo ayebi malamu mosala ya wolo, ya palata, ya kwivre,+ ya ebende, mpe ya kosala bilamba ya lɛnɛ ya motane-bulé, nsinga ya motane makasi mpe ya bulé, oyo ayebi kosala mayemi. Akosala na Yuda mpe na Yerusaleme elongo na bato na ngai oyo bayebi mosala malamu, oyo tata na ngai Davidi aponaki.+ 8 Tindelá ngai mpe mabaya ya sɛdrɛ, ya jenevriye+ mpe ya algume+ oyo euti na Liban, mpo nayebi malamu ete basaleli na yo bamesaná na mosala ya kokata banzete ya Liban.+ Basaleli na ngai bakosala elongo na basaleli na yo+ 9 mpo na kobongisela ngai mabaya ebele mpenza, mpo ndako oyo nakotonga ekozala monene mingi mpenza. 10 Yoká! Nakopesa basaleli na yo oyo bakokata banzete bilei:+ korosi* 20 000 ya blé, korosi 20 000 ya ɔrje, bati* 20 000 ya vinyo, mpe bati 20 000 ya mafuta.”

11 Na yango Hirame mokonzi ya Tire atindelaki Salomo mokanda na maloba oyo: “Lokola Yehova alingaka bato na ye, akómisi yo mokonzi na bango.” 12 Hirame alobaki: “Yehova Nzambe ya Yisraele asanzolama, ye oyo asalá likoló ná mabele, mpo apesi Mokonzi Davidi mwana moko ya bwanya,+ oyo atondi na bokɛngi mpe na mayele,+ oyo akotonga ndako mpo na Yehova mpe ndako mpo na bokonzi na ye. 13 Boye nazali kotindela yo Hirame-abi,+ oyo ayebi mosala malamu mpe azali na mayele mingi. 14 Azali mwana ya mwasi moko ya libota ya Dani, kasi tata na ye azalaki moto ya Tire; Hirame-abi amesaná na mosala ya wolo, palata, kwivre, ebende, mabanga, mpe mabaya. Ayebi kosala bilamba ya lɛnɛ ya mwa motane-bulé, nsinga ya bulé, elamba ya kitoko, mpe nsinga ya motane makasi.+ Akoki kosala mayemi ya ndenge nyonso mpe bililingi ya eloko nyonso oyo bakoki kosɛnga ye.+ Akosala elongo na bato na yo oyo bayebi mosala malamu mpe bato ya nkolo na ngai Davidi, tata na yo, oyo bayebi mosala malamu. 15 Sikoyo, tiká ete nkolo na ngai atinda blé, ɔrje, mafuta, ná vinyo oyo alaki basaleli na ye.+ 16 Biso mpe tokokata na Liban+ nzete nyonso oyo ozali na yango mposa, tokotindela yo yango ekangisami esika moko, ezali kotepatepa na mbu tii na Yope;+ mpe yo okomema yango na Yerusaleme.”+

17 Na nsima Salomo atángaki motángo ya mibali nyonso oyo bafandaki bapaya na mokili ya Yisraele,+ nsima ya kotánga oyo tata na ye Davidi atángaki;+ bazalaki 153 600. 18 Bongo atyaki bato 70 000 kati na bango bázala basali,* bato 80 000 bákataka mabanga+ na bangomba, mpe bakɛngɛli 3 600 mpo na kosalisa bato mosala.+