Yosua

7 Nzokande Bayisraele bazangaki bosembo na likambo etali biloko oyo esengelaki kobebisama, mpo Akana+ mwana ya Karami, mwana ya Zabedi, mwana ya Zera, moto ya libota ya Yuda, azwaki biloko mosusu oyo esengelaki kobebisama.+ Mpo na yango, nkanda ya Yehova engalelaki Bayisraele.+

2 Na nsima, uta na Yeriko, Yosua atindaki bato bákende na Ai,+ oyo ezali pene ya Bete-avene mpe ɛsti ya Betele,+ mpe alobaki na bango: “Bómata mpe bónɔnga mokili yango.” Bongo bato yango bamataki mpe banɔngaki Ai. 3 Ntango bazongaki epai ya Yosua, bayebisaki ye: “Esɛngi te bato nyonso bámata kuna. Mibali soki nkóto mibale to nkóto misato bakoki mpo na kokweisa Ai. Kotinda bato nyonso kuna te, okolɛmbisa bango mpamba, mpo mboka yango ezali na bato mingi te.”

4 Bongo mibali soki 3 000 bamataki kuna, kasi bakimaki liboso ya bato ya Ai.+ 5 Bato ya Ai babomaki mibali 36, mpe balandaki bango banda libándá ya porte ya engumba tii na Shebarime,* mpe bakobaki koboma bango nzelanzela wana bazalaki kokita. Na yango, mitema ya bato ya Yisraele enyangwaki mpe ekómaki lokola mai.*

6 Bongo Yosua apasolaki bilamba na ye mpe akweaki elongi na nse liboso ya Sanduku ya Yehova tii na mpokwa, ye ná bankulutu ya Yisraele, mpe bazalaki se kobwaka putulu na mitó na bango. 7 Yosua alobaki: “Aa! Yehova Nkolo Mokonzi-Oyo-Aleki-Nyonso, mpo na nini okatisaki bato oyo Yordani kaka mpo na kokaba biso na mabɔkɔ ya Baamore, mpo báboma biso? Soki tótikalaka na biso ata na ngámbo mosusu* ya Yordani! 8 Limbisá ngai, Ee Yehova, sikoyo naloba nini awa Yisraele akimi liboso ya banguna na ye?* 9 Ntango Bakanana mpe bato nyonso oyo bafandi na mokili oyo bakoyoka likambo yango, bakozinga biso mpe bakolimwisa nkombo na biso na mabele. Bongo okosala nini mpo na nkombo na yo monene?”+

10 Yehova ayanolaki Yosua ete: “Tɛlɛmá! Mpo na nini okwei boye elongi na nse? 11 Yisraele asali lisumu. Babuki kondimana na ngai+ oyo napesaki bango mitindo ete bátosa. Bazwi biloko mosusu oyo esengelaki kobebisama,+ bayibi+ yango mpe babombi yango na kati ya biloko na bango moko.+ 12 Yango wana, Bayisraele bakokoka kotɛlɛma te liboso ya banguna na bango. Bakopesa nde banguna na bango mokɔngɔ mpe bakokima bango, mpo bakómi eloko oyo esengeli kobebisama. Nakozala na bino lisusu te soki bolongoli* te na kati na bino eloko oyo esengeli kobebisama.+ 13 Tɛlɛmá mpe santisá bato!+ Yebisá bango: ‘Bómisantisa mpo na lobi, mpo Yehova Nzambe ya Yisraele alobi: “Eloko oyo esengeli kobebisama ezali kati na bino, Ee Yisraele. Bokokoka te kotɛlɛma liboso ya banguna na bino tii ntango bokolongola kati na bino eloko oyo esengeli kobebisama. 14 Bosengeli koya na ntɔngɔ, etuluka na etuluka,* mpe etuluka oyo Yehova akozwa+ ekopusana pene, libota na libota, mpe libota oyo Yehova akozwa ekopusana pene, ndako na ndako, mpe ndako oyo Yehova akozwa ekopusana pene, mobali na mobali. 15 Mpe moto oyo bakokanga na eloko oyo esengeli kobebisama akotumbama na mɔtɔ,+ ye ná nyonso oyo azali na yango, mpo abuki kondimana+ ya Yehova mpe asali likambo moko ya nsɔni na Yisraele.”’”

16 Bongo Yosua alamukaki ntɔngɔntɔngɔ na mokolo oyo elandaki mpe asɛngaki Bayisraele bápusana pene, libota na libota, mpe libota ya Yuda ezwamaki. 17 Asɛngaki mabota ya Yuda epusana pene mpe azwaki libota ya Bazera,+ na nsima asɛngaki libota ya Bazera epusana pene, mobali na mobali, mpe Zabedi azwamaki. 18 Na nsuka, asɛngaki bato ya ndako ya Zabedi bápusana pene, mobali na mobali, mpe Akana mwana ya Karami, mwana ya Zabedi, mwana ya Zera, ya libota ya Yuda, azwamaki.+ 19 Bongo Yosua alobaki na Akana boye: “Mwana na ngai, nabondeli yo, kumisá Yehova Nzambe ya Yisraele mpe yambolá epai na ye. Nabondeli yo, yebisá ngai likambo oyo osali. Kobombela ngai eloko te.”

20 Akana ayanolaki Yosua ete: “Ya solo ngai nde nasaleli Yehova Nzambe ya Yisraele lisumu, mpe talá likambo oyo nasalaki: 21 Ntango namonaki na biloko ya kopunza elamba moko ya kitoko mpe ya lokumu oyo euti na Shinare+ mpe shekele* 200 ya palata mpe eteni moko ya wolo oyo ezali na kilo ya shekele 50, nalulaki biloko yango, mpe nazwaki yango. Biloko yango ebombami na mabele na kati ya hema na ngai, ná mbongo na nse na yango.”

22 Na mbala moko Yosua atindaki bato, mpe bakendaki mbangu tii na hema yango. Kuna, bakutaki elamba yango ebombami na kati ya hema na ye, ná mbongo na nse na yango. 23 Bongo babimisaki biloko yango oyo ebombamaki na hema, bamemaki yango epai ya Yosua mpe Bayisraele nyonso, mpe batyaki yango liboso ya Yehova. 24 Na nsima Yosua ná Bayisraele nyonso bazwaki Akana+ mwana ya Zera, ná palata, ná elamba ya lokumu, mpe eteni ya wolo,+ elongo na bana na ye ya mibali mpe ya basi, ngɔmbɛ na ye, mpunda na ye, etonga na ye, hema na ye, ná biloko nyonso oyo azalaki na yango, mpe bamemaki bango na Lobwaku* ya Akore.+ 25 Yosua alobaki: “Mpo na nini omemeli biso mpasi?*+ Yehova akomemela yo mpasi na mokolo ya lelo.” Na yango, Yisraele mobimba babambaki ye mabanga,+ na nsima batumbaki bango na mɔtɔ.+ Ndenge wana nde babambaki bango nyonso mabanga. 26 Mpe batɛlɛmisaki libondo moko monene ya mabanga likoló na ye, oyo ezali kuna tii na mokolo ya lelo. Na yango, nkanda ya kongala ya Yehova ekitaki.+ Yango wana esika yango ebengami Lobwaku ya Akore* tii na mokolo ya lelo.