Kobima
24 Na nsima, alobaki na Moize ete: “Matá epai ya Yehova, yo ná Arona, Nadabe ná Abihu+ mpe mibali 70 kati na bankulutu ya Yisraele, mpe bokogumbama mwa mosika. 2 Kaka Moize nde asengeli kopusana pene na Yehova; kasi bato mosusu basengeli kopusana te, mpe bato basengeli te komata elongo na ye.”+
3 Bongo Moize ayaki mpe ayebisaki bato maloba nyonso ya Yehova mpe bikateli nyonso,+ mpe bato nyonso bazongisaki maloba na mongongo moko ete: “Maloba nyonso oyo Yehova alobi, tokosala yango.”+ 4 Na yango, Moize akomaki maloba nyonso ya Yehova.+ Bongo alamukaki ntɔngɔntɔngɔ mpe atongaki etumbelo na nse ya ngomba ná makonzí 12 oyo ekokani na mabota 12 ya Yisraele. 5 Nsima na yango atindaki bilenge mibali ya Yisraele mpe bapesaki mbeka ya makabo ya kotumba mpe bapesaki Yehova mbeka ya bangɔmbɛ-mibali, mpo ezala bambeka ya kimya.*+ 6 Bongo Moize azwaki ndambo ya makila mpe atyaki yango na mabakuli, mpe ndambo mosusu ya makila amwangisaki yango likoló ya etumbelo. 7 Na nsima, azwaki buku ya kondimana mpe atángelaki yango bato na mongongo makasi.+ Mpe balobaki ete: “Nyonso oyo Yehova alobi tondimi kosala mpe tokotosa yango.”+ 8 Bongo Moize azwaki makila mpe amwangiselaki yango bato+ mpe alobaki ete: “Oyo ezali makila ya kondimana oyo Yehova asali ná bino na kotalela maloba oyo nyonso.”+
9 Moize ná Arona, Nadabe ná Abihu mpe mibali 70 kati na bankulutu ya Yisraele bamataki, 10 mpe bamonaki Nzambe ya Yisraele.+ Na nse ya makolo na ye ezalaki na eloko moko oyo emonanaki lokola pavema ya karokaro ya libanga ya safire, mpe ezalaki pɛto lokola likoló.+ 11 Asalaki bato minene ya Yisraele mabe te,+ mpe bamonaki emonaneli ya Nzambe ya solo, balyaki mpe bamɛlaki.
12 Sikoyo Yehova alobaki na Moize ete: “Matá epai na ngai na ngomba mpe fandá kuna. Nakopesa yo bitanda ya mabanga ná mobeko mpe mitindo oyo nakokoma mpo na koteya bango.”+ 13 Bongo Moize ná mosaleli na ye Yosua+ bakendaki mpe Moize amataki na ngomba ya Nzambe ya solo.+ 14 Kasi alobaki na bankulutu ete: “Bózela biso na esika oyo tii tokozonga.+ Arona ná Hure+ bazali elongo na bino. Moto nyonso oyo azali na likambo ya kosamba akoki kokende epai na bango.”+ 15 Na nsima, Moize amataki na ngomba, wana lipata ezalaki kozipa ngomba yango.+
16 Nkembo ya Yehova+ ezalaki kaka likoló ya Ngomba Sinai,+ mpe lipata ezipaki yango mikolo motoba. Na mokolo ya nsambo abengaki Moize uta na lipata. 17 Mpo na Bayisraele oyo bazalaki kotala, nkembo ya Yehova ezalaki komonana lokola mɔtɔ oyo ezali kozikisa na nsɔngɛ ya ngomba. 18 Na nsima, Moize akɔtaki na kati ya lipata mpe amataki na ngomba.+ Mpe Moize afandaki na ngomba mikolo 40 butu moi.+