Basambisi

6 Kasi Bayisraele basalaki lisusu makambo oyo ezali mabe na miso ya Yehova.+ Yango wana Yehova apesaki bango na lobɔkɔ ya Midiane mbula nsambo.+ 2 Bamidiane bakómaki kokonza Yisraele.+ Mpo na Bamidiane, Bayisraele basalaki bisika ya komibomba* na bangomba, na kati ya mibenga, mpe na bisika oyo ezali mpasi mpo na kokóma.+ 3 Ntango Bayisraele bazalaki kolona mboto, Bamidiane ná Baamaleke+ mpe bato ya Ɛsti+ bazalaki koya kobundisa bango. 4 Bazalaki kotya kaa na teritware ya Yisraele mpe kobebisa biloko oyo bilanga na bango eboti, nzelanzela tii na Gaza, mpe bazalaki kotikela Yisraele eloko ya kolya te, mpate te, ngɔmbɛ te, mpunda mpe te.+ 5 Mpamba te bazalaki komata, bango ná bibwɛlɛ na bango mpe bahema na bango. Bazalaki koya ebele lokola mayoyo.+ Bango ná bakamela na bango bakokaki kotángama te,+ mpe bazalaki kokɔta na mokili yango mpo na kobebisa yango. 6 Na yango Bayisraele bakómaki babola mpenza mpo na Bamidiane; mpe Bayisraele babelelaki Yehova asalisa bango.+

7 Ntango Bayisraele babelelaki Yehova mpo abikisa bango na lobɔkɔ ya Midiane,+ 8 Yehova atindelaki Bayisraele mosakoli moko oyo alobaki na bango: “Talá oyo Yehova Nzambe ya Yisraele alobi: ‘Nabimisaki bino na mokili ya Ezipito, epai bozalaki baombo.+ 9 Bongo nabikisaki bino na lobɔkɔ ya Ezipito mpe ya bato nyonso oyo bazalaki konyokola bino; nabenganaki bango liboso na bino mpe napesaki bino mokili na bango.+ 10 Mpe nalobaki na bino: “Nazali Yehova Nzambe na bino.+ Bosengeli te kosambela* banzambe ya Baamore oyo bozali kofanda na mokili na bango.”+ Kasi botosaki ngai te.’”*+

11 Na nsima anzelu ya Yehova ayaki+ mpe afandaki na nse ya nzete monene oyo ezalaki na Ofra, oyo ezalaki ya Yoashe, Moabi-ezere.+ Mwana na ye Gideone+ azalaki kotutatuta blé na ekamwelo ya vinyo mpo Bamidiane bámona yango te. 12 Anzelu ya Yehova abimelaki ye mpe alobaki: “Yehova azali elongo na yo,+ yo elombe ya etumba.” 13 Na yango Gideone alobaki na ye: “Limbisá ngai, nkolo na ngai, kasi soki Yehova azali elongo na biso, mpo na nini makambo oyo nyonso ekómeli biso?+ Wapi misala na ye nyonso ya kokamwa oyo batata na biso bayebisaki biso,+ ntango bazalaki koloba: ‘Yehova abimisaki biso na Ezipito?’+ Sikoyo Yehova asundoli biso+ mpe apesi biso na lobɔkɔ ya Midiane.” 14 Yehova atalaki ye mpe alobaki: “Kende na nguya oyo ozali na yango, mpe okobikisa Yisraele na lobɔkɔ ya Midiane.+ Ngai nde nazali kotinda yo, boye te?” 15 Gideone ayanolaki ye ete: “Limbisá ngai, Yehova. Nakobikisa Yisraele ndenge nini? Talá! Libota* na ngai eleki moke na kati ya libota ya Manase, mpe nazali moto mpamba mpenza na ndako ya tata na ngai.” 16 Kasi Yehova alobaki na ye: “Lokola nakozala elongo na yo,+ okolonga Bamidiane lokola nde bazalaki moto moko.”

17 Bongo Gideone alobaki na ye: “Soki ya solo nandimami na miso na yo, lakisá ngai elembo oyo ekomonisa ete yo moto ozali kosolola na ngai. 18 Nabondeli yo, kolongwa awa te tii ntango nakoya na likabo na ngai mpe nakotya yango liboso na yo.”+ Bongo ye alobaki: “Nakofanda awa tii ntango okozonga.” 19 Na yango Gideone akɔtaki na ndako na ye, alambaki mwana-ntaba, mpe asalaki limpa oyo ezangá levire na efa* moko ya farini.+ Atyaki mosuni na kitunga, mpe atyaki supu na nzungu ya kolambela. Na nsima amemelaki ye biloko yango mpe apesaki ye yango na nse ya nzete monene.

20 Bongo anzelu ya Nzambe ya solo alobaki na ye: “Zwá mosuni wana ná limpa oyo ezangá levire, tyá yango na libanga wana ya monene, mpe sopá supu likoló na yango.” Mpe Gideone asalaki kaka bongo. 21 Na nsima, anzelu ya Yehova azwaki lingenda oyo ezalaki na lobɔkɔ na ye, mpe atutisaki nsɔngɛ na yango na mosuni ná limpa oyo ezangá levire. Na mbala moko mɔtɔ ebimaki na libanga yango mpe ezikisaki mosuni ná limpa oyo ezangá levire.+ Bongo anzelu ya Yehova alimwaki na miso na ye. 22 Na yango, Gideone asosolaki ete ezalaki anzelu ya Yehova.+

Bongo Gideone alobaki: “Mawa na ngai, Yehova Nkolo Mokonzi-Oyo-Aleki-Nyonso, mpo namoni anzelu ya Yehova na miso!”+ 23 Kasi Yehova alobaki na ye: “Zalá na kimya. Kobanga te.+ Okokufa te.” 24 Na yango Gideone atongelaki Yehova etumbelo kuna, mpe babengaka yango Yehova-Shalome*+ tii na mokolo ya lelo. Ezali na Ofra ya Baabi-ezere tii lelo.

25 Na butu wana, Yehova alobaki na ye boye: “Kamatá mwana-ngɔmbɛ mobali ya tata na yo, mwana-ngɔmbɛ mobali ya mibale oyo ezali na mbula nsambo, bukábuká etumbelo oyo tata na yo asalaki mpo na Baala, mpe katá nzete ya losambo* oyo ezali pembeni na yango.+ 26 Mpe likoló ya esika makasi oyo ya libateli, tongelá Yehova Nzambe na yo etumbelo na mabanga oyo etyami na molɔngɔ. Na nsima zwá mwana-ngɔmbɛ mobali ya mibale mpe pesá yango likabo ya kotumba likoló ya biteni ya nkoni ya nzete ya losambo* oyo okokata.” 27 Bongo Gideone azwaki mibali zomi kati na basaleli na ye mpe asalaki kaka ndenge Yehova ayebisaki ye. Nzokande, lokola abangaki mpenza bato ya libota ya tata na ye mpe mibali ya engumba, asalaki yango na moi te, kasi na butu.

28 Na mokolo oyo elandi, ntango mibali ya engumba balamukaki ntɔngɔntɔngɔ, bamonaki ete etumbelo ya Baala ebukani mpe nzete ya losambo* oyo ezalaki pembeni na yango ekatani, mpe mwana-ngɔmbɛ mobali ya mibale euti kopesama mbeka likoló ya etumbelo oyo etongami sika. 29 Batunanaki boye: “Nani asali likambo oyo?” Nsima ya kolukaluka, balobaki: “Ezali Gideone mwana ya Yoashe nde asali likambo yango.” 30 Bongo mibali ya engumba balobaki na Yoashe boye: “Bimisá mwana na yo awa mpo abomama, mpo abuki etumbelo ya Baala mpe akati nzete ya losambo* oyo ezalaki pembeni na yango.” 31 Bongo Yoashe+ alobaki na bato nyonso oyo bayaki kotɛmɛla ye ete: “Bino nde bato bokosamba likambo ya Baala? Bino nde bato bokobikisa ye? Moto oyo akomeka kosamba likambo na ye akobomama na ntɔngɔ ya lelo.+ Soki Baala azali nzambe, lokola moto moko abuki etumbelo na ye, bótika ye moko asamba likambo na ye!”+ 32 Mpe na mokolo wana, Yoashe abengaki Gideone Yerubaala,* mpo alobaki: “Tiká Baala ye moko asamba likambo na ye, mpo moto moko abuki etumbelo na ye.”

33 Midiane+ mobimba, Amaleke+ mpe bato ya Ɛsti basanganaki esika moko,+ bakatisaki ebale, bayei na Lobwaku* ya Yizireele mpe batyaki kaa. 34 Bongo elimo ya Yehova esalaki epai ya* Gideone+ mpe ayulaki liseke,+ mpe Baabi-ezere+ bayanganisamaki mpe balandaki ye. 35 Atindaki bamemi-nsango na Manase mobimba; bango mpe bayanganisamaki mpe balandaki ye. Atindaki mpe bamemi-nsango na Ashere, na Zebulone mpe na Nafatali mpe bamataki mpo na kokutana na ye.

36 Bongo Gideone alobaki na Nzambe ya solo boye: “Soki mpenza okobikisa Yisraele na nzela na ngai, ndenge olakaki yango,+ 37 talá, nazali kotanda nsuki ya mpate na esika ya kotutatuta mbuma. Soki mamwɛ ekweli kaka nsuki yango ya mpate, kasi mabele mobimba na esika yango etikali ya kokauka, wana nde nakoyeba mpenza ete okobikisa Yisraele na nzela na ngai, ndenge olakaki yango.” 38 Mpe esalemaki bongo. Na mokolo oyo elandaki, alamukaki ntɔngɔntɔngɔ mpe akamolaki nsuki wana ya mpate; mamwɛ ebimaki ebele na nsuki yango ya mpate mpe etondisaki saani ya monene mpenza na mai. 39 Atako bongo, Gideone alobaki na Nzambe ya solo boye: “Kopelisela ngai nkanda na yo te, kasi tiká nasɛnga lisusu likambo moko. Nabondeli yo, tiká nameka lisusu likambo moko na nzela ya nsuki ya mpate. Nabondeli yo, tiká nsuki ya mpate yango moko ezala ya kokauka, mpe mamwɛ ezala esika nyonso na mabele.” 40 Bongo Nzambe asalaki kaka ndenge wana na butu yango; kaka nsuki ya mpate nde ezalaki ya kokauka, kasi mamwɛ ezalaki esika nyonso na mabele.