Kobima

40 Na nsima, Yehova alobaki na Moize ete: 2 “Na mokolo ya liboso ya sanza ya liboso, okotɛlɛmisa tabernakle, hema ya kokutana.+ 3 Tyá sanduku ya Litatoli na kati+ mpe zipá Sanduku yango na rido.+ 4 Okokɔtisa mesa+ mpe okotya biloko na yango na molɔngɔ, mpe okokɔtisa etɛlɛmiselo ya miinda+ mpe okopelisa miinda na yango.+ 5 Na nsima tyá etumbelo ya wolo mpo na mpaka ya malasi+ liboso ya sanduku ya Litatoli mpe tyá elamba ya kozipa* mpo na monɔkɔ ya tabernakle.+

6 “Okotya etumbelo ya likabo ya kotumba+ liboso ya monɔkɔ ya tabernakle, hema ya kokutana, 7 mpe tyá saani monene kati na hema ya kokutana ná etumbelo mpe tyá mai na kati.+ 8 Na nsima, tyá lopango+ zingazinga na yango mpe tyá elamba ya kozipa*+ mpo na monɔkɔ ya lopango. 9 Nsima na yango, zwá mafuta mosantu+ mpe tyá tabernakle mafuta ná nyonso oyo ezali na kati,+ mpe santisá yango ná bisaleli na yango nyonso, mpo ekokóma eloko bosantu. 10 Okotya mafuta na etumbelo ya likabo ya kotumba ná bisaleli na yango nyonso mpe okosantisa etumbelo, mpo ekokóma etumbelo moko oyo eleki mosantu.+ 11 Mpe okotya saani monene mafuta ná etɛlɛmiselo na yango mpe okosantisa yango.

12 “Na nsima okoya na Arona ná bana na ye ya mibali na ekɔtelo ya hema ya kokutana mpe okosukola bango na mai.+ 13 Mpe okolatisa Arona bilamba mosantu,+ okotya ye mafuta,+ okosantisa ye, mpe akosalela ngai mosala ya nganga-nzambe. 14 Nsima na yango okoya na bana na ye ya mibali mpe okolatisa bango bazambala.+ 15 Okotya bango mafuta kaka ndenge otyaki tata na bango,+ mpo básalela ngai mosala ya banganga-nzambe, mpe kotyama oyo bakotyama mafuta ekopesa bango nzela ya kosala mosala ya bonganga-nzambe mpo na libela, na boumeli ya mabota na bango.”+

16 Moize asalaki na kolanda mitindo nyonso oyo Yehova apesaki ye.+ Asalaki kaka bongo.

17 Na sanza ya liboso, na mbula ya mibale, na mokolo ya liboso ya sanza, tabernakle etɛlɛmisamaki.+ 18 Ntango Moize atɛlɛmisaki tabernakle, atyaki na nse bitɛlɛmiselo na yango oyo ezali na mabulu,+ atyaki bakadrɛ,+ atyaki bikangiseli na yango+ mpe atɛlɛmisaki makonzí na yango. 19 Asembolaki hema+ likoló ya tabernakle mpe atyaki ezipeli+ ya hema likoló na yango, kaka ndenge Yehova apesaki ye mitindo.

20 Nsima na yango, Moize azwaki Litatoli+ mpe atyaki yango na kati ya Sanduku+ mpe akɔtisaki banzete ya komema+ Sanduku mpe atyaki ezipeli+ likoló ya Sanduku.+ 21 Akɔtisaki Sanduku na Tabernakle mpe atyaki rido+ ya elamba ya kozipa mpe azipaki sanduku ya Litatoli,+ kaka ndenge Yehova apesaki ye mitindo.

22 Na nsima atyaki mesa+ na kati ya hema ya kokutana na ngámbo ya nɔrdi ya tabernakle, libándá ya rido, 23 mpe abongisaki molɔngɔ ya mampa+ likoló na yango liboso ya Yehova, kaka ndenge Yehova apesaki ye mitindo.

24 Atyaki etɛlɛmiselo ya miinda+ na kati ya hema ya kokutana, etalani na mesa, na ngámbo ya sudi ya tabernakle. 25 Apelisaki miinda+ liboso ya Yehova, kaka ndenge Yehova apesaki Moize mitindo.

26 Na nsima atyaki etumbelo ya wolo+ na kati ya hema ya kokutana liboso ya rido, 27 mpo asala ete mpaka ya malasi+ ebimisa milinga likoló na yango,+ kaka ndenge Yehova apesaki ye mitindo.

28 Nsima na yango, atyaki elamba ya kozipa*+ mpo na monɔkɔ ya tabernakle.

29 Atyaki etumbelo ya likabo ya kotumba+ na monɔkɔ ya tabernakle, hema ya kokutana, mpo apesa likabo ya kotumba+ mpe likabo ya mbuma* likoló na yango, kaka ndenge Yehova apesaki ye mitindo.

30 Na nsima atyaki saani monene kati na hema ya kokutana ná etumbelo mpe atyaki na kati ya saani yango mai ya kosukola.+ 31 Moize ná Arona ná bana na ye ya mibali basukolaki mabɔkɔ mpe makolo na bango na saani yango. 32 Ntango nyonso oyo bazalaki kokɔta na hema ya kokutana to kopusana na etumbelo, bazalaki kosukola,+ kaka ndenge Yehova apesaki Moize mitindo.

33 Nsukansuka atɛlɛmisaki lopango+ zingazinga ya tabernakle ná etumbelo mpe atyaki elamba ya kozipa* mpo na monɔkɔ ya lopango.+

Bongo Moize asilisaki mosala. 34 Mpe lipata ebandaki kozipa hema ya kokutana, mpe nkembo ya Yehova etondisaki tabernakle.+ 35 Moize akokaki te kokɔta na hema ya kokutana, mpo lipata etikalaki likoló na yango mpe nkembo ya Yehova etondisaki tabernakle.+

36 Mpe ntango lipata ezalaki kolongwa na tabernakle mpe emati, Bayisraele bazalaki kolongola kaa, na boumeli ya mibembo na bango nyonso.+ 37 Nzokande, soki lipata elongwe te, bazalaki kolongola kaa te tii na mokolo oyo yango ezalaki kolongwa mpe komata.+ 38 Mpo lipata ya Yehova ezalaki likoló ya tabernakle na moi, mpe mɔtɔ ezalaki kotikala likoló na yango na butu, na miso ya bato nyonso ya Yisraele, na boumeli ya mobembo nyonso oyo basalaki ndambondambo.+