Danyele

4 “Talá maloba oyo Mokonzi Nebukadenezare alobi na bato ya bikólo nyonso, bamboka nyonso mpe bato ya minɔkɔ nyonso oyo bafandi na mabele mobimba: Kimya ezala na bino! 2 Nasepeli koyebisa bino bilembo mpe makambo ya kokamwa oyo Nzambe Oyo-Aleki-Likoló asaleli ngai. 3 Bilembo na ye ezali minene, mpe misala na ye ya kokamwa ezali na nguya! Bokonzi na ye ezali bokonzi ya seko, mpe boyangeli na ye ezali libota na libota.+

4 “Ngai, Nebukadenezare, nafandaki na kimya na ndako na ngai mpe makambo ezalaki kotambola malamu na ndako na ngai ya bokonzi.* 5 Nalɔtaki ndɔtɔ moko oyo ebangisaki ngai. Ntango nalalaki na mbeto na ngai, bililingi mpe bimonaneli oyo namonaki epesaki ngai nsɔmɔ.+ 6 Na yango napesaki mitindo ete báya na bato nyonso ya bwanya ya Babilone liboso na ngai mpo bápesa ngai ndimbola ya ndɔtɔ yango.+

7 “Bongo banganga-nzambe ya maji, bato oyo babelelaka bilimo, Bakaladea* mpe banganga-minzoto+ bayaki. Nayebisaki bango ndɔtɔ yango, kasi bakokaki te kopesa ngai ndimbola na yango.+ 8 Nsukansuka Danyele, oyo babengaka Beleteshazare,+ na kolanda nkombo ya nzambe na ngai,+ mpe oyo azalaki na elimo ya banzambe basantu,+ ayaki liboso na ngai mpe nayebisaki ye ndɔtɔ yango:

9 “‘Ee Beleteshazare mokambi ya banganga-nzambe ya maji,+ nayebi malamu ete elimo ya banzambe basantu ezali kati na yo+ mpe ete sekele ata moko te ezali makasi mpenza mpo na yo.+ Sikoyo limbolelá ngai bimonaneli oyo namonaki na ndɔtɔ na ngai mpe pesá ngai ndimbola na yango.

10 “‘Na bimonaneli oyo namonaki ntango nazalaki na mbeto na ngai, namonaki nzete+ moko na katikati ya mabele, mpe ezalaki molai mingi mpenza.+ 11 Nzete yango ekolaki mpe ekómaki makasi, nsɔngɛ na yango ekómaki tii na likoló, mpe ezalaki komonana tii na bansuka ya mabele mobimba. 12 Nkasa na yango ezalaki kitoko, ezalaki na mbuma beboo, mpe ezalaki kobimisa bilei mpo na bikelamu nyonso. Banyama ya zamba ezalaki koya na nse ya elili na yango, bandɛkɛ ya likoló ezalaki kofanda na bitape na yango, mpe bikelamu nyonso ya bomoi* ezalaki kolya mbuma na yango.

13 “‘Ntango nazalaki komona bimonaneli yango na mbeto na ngai, namonaki mokɛngɛli moko, mosantu moko, oyo autaki na likoló, azali kokita.+ 14 Abelelaki na mongongo makasi ete: “Bókata nzete yango,+ bókata bitape na yango, bókweisa nkasa na yango, mpe bópanzapanza mbuma na yango! Banyama ekima, elongwa na nse na yango, mpe bandɛkɛ elongwa na bitape na yango. 15 Kasi bótika ekumu* ná misisa na yango na mabele, na kati ya matiti ya esobe, bákanga yango nsinga ya ebende mpe ya kwivre. Tiká mamwɛ ya likoló epɔlisa yango, mpe likabo na yango ezala esika moko na banyama na kati ya matiti ya mabele.+ 16 Motema na yango ebongwana, ezala lisusu ya moto te, mpe bápesa yango motema ya nyama, mpe tiká ete ntango nsambo+ eleka.+ 17 Bakɛngɛli nde bapesi mitindo yango,+ mpe basantu basakoli ekateli yango, mpo bato oyo bazali na bomoi báyeba ete Oyo-Aleki-Likoló azali Moyangeli na bokonzi ya bato+ mpe ete apesaka yango moto oyo ye alingi, mpe atyaka ata moto oyo aleki moke* mpo azala mokonzi na yango.”

18 “‘Yango nde ndɔtɔ oyo ngai, Mokonzi Nebukadenezare, nalɔtaki; sikoyo yo, Ee Beleteshazare, pesá ngai ndimbola na yango, mpo bato mosusu nyonso ya bwanya ya bokonzi na ngai bakoki te kopesa ngai ndimbola na yango.+ Kasi yo okokoka kosala yango, mpo ozali na elimo ya banzambe basantu.’

19 “Na yango Danyele, oyo babengaka Beleteshazare,+ atungisamaki mpo na mwa ntango, mpe makanisi na ye ekómaki kobangisa ye.

“Mokonzi alobaki na ye: ‘Ee Beleteshazare, ndɔtɔ yango mpe ndimbola na yango ebangisa yo te.’

“Beleteshazare azongisaki: ‘Ee Nkolo na ngai, tiká ete ndɔtɔ yango ekokisama epai ya baoyo bayinaka yo, mpe ndimbola na yango epai ya banguna na yo.

20 “‘Nzete oyo omonaki, oyo ekolaki mingi mpe ekómaki makasi, oyo nsɔngɛ na yango ekómaki tii na likoló mpe ezalaki komonana na mabele mobimba,+ 21 oyo ezalaki na nkasa kitoko, mbuma beboo, mpe oyo ezalaki kobimisa bilei mpo na bikelamu nyonso, oyo banyama ya zamba ezalaki kofanda na nse na yango, mpe oyo bandɛkɛ ya likoló ezalaki kofanda na bitape na yango,+ 22 nzete yango ezali yo, Ee mokonzi, mpo okoli mingi mpe okómi makasi, mpe bonene na yo emati mpe ekómi tii likoló,+ mpe boyangeli na yo ekómi tii na bansuka ya mabele.+

23 “‘Mpe mokonzi amonaki mokɛngɛli moko, mosantu moko,+ oyo autaki na likoló azali kokita, mpe azalaki koloba: “Bókata nzete yango, mpe bóbebisa yango. Kasi bótika ekumu* ná misisa na yango na mabele, na kati ya matiti ya esobe, bákanga yango nsinga ya ebende mpe ya kwivre. Mpe tiká mamwɛ ya likoló epɔlisa yango, likabo na yango ezala na kati ya matiti ya mabele, esika moko na banyama ya zamba tii ntango nsambo ekoleka.”+ 24 Talá ndimbola na yango, Ee mokonzi: yango nde ekokómela nkolo na ngai mokonzi; ezali ekateli ya Oyo-Aleki-Likoló. 25 Bakobengana yo kati na bato, okofanda esika moko na banyama ya zamba, mpe bakopesa yo matiti olya lokola bangɔmbɛ; mamwɛ ya likoló ekopɔlisa yo,+ mpe ntango nsambo+ ekoleka likoló na yo+ tii okoyeba ete Oyo-Aleki-Likoló azali Moyangeli na bokonzi ya bato, mpe ete apesaka yango na moto oyo ye alingi.+

26 “‘Kasi lokola balobaki ete bátika ekumu* ya nzete yango ná misisa na yango,+ okozongela bokonzi na yo ntango okoyeba mpenza ete likoló ezali koyangela. 27 Yango wana, Ee mokonzi, ndimá toli na ngai. Tiká masumu na yo mpe salá oyo ezali malamu, tiká mabe na yo mpe moniselá babola motema mawa. Mbala mosusu makambo na yo ekotambola malamu mpo na ntango molai.’”+

28 Nyonso wana ekómelaki Mokonzi Nebukadenezare.

29 Sanza zomi na mibale na nsima, azalaki kotambola likoló* ya ndako ya mokonzi na Babilone. 30 Mokonzi azalaki koloba: “Oyo ezali te Babilone engumba monene, oyo natongaki mpo ezala ndako ya mokonzi, na makasi na ngai mpe na nguya na ngai moko mpe mpo na nkembo ya lokumu na ngai?”

31 Wana maloba yango ezalaki naino na monɔkɔ ya mokonzi, mongongo moko eutaki na likoló elobi: “Ee mokonzi Nebukadenezare, talá oyo balobi na yo: ‘Bokonzi elongwe epai na yo,+ 32 bakobengana yo kati na bato. Okofanda esika moko na banyama ya zamba, mpe bakopesa yo matiti olya lokola bangɔmbɛ, mpe ntango nsambo ekoleka likoló na yo tii okoyeba ete Oyo-Aleki-Likoló azali Moyangeli na bokonzi ya bato, mpe ete apesaka yango na moto oyo ye alingi.’”+

33 Na mbala moko, liloba yango ekokisamaki epai ya Nebukadenezare. Babenganaki ye kati na bato mpe akómaki kolya matiti lokola bangɔmbɛ; nzoto na ye ekómaki kopɔla na mamwɛ ya likoló, tii nsuki na ye ekómaki milai lokola nsala ya bampongo mpe manzaka na ye ekómaki lokola ya bandɛkɛ.+

34 “Na nsuka ya ntango yango,+ ngai Nebukadenezare natalaki na likoló, mpe mayele na ngai ezongelaki ngai. Bongo nasanzolaki Oyo-Aleki-Likoló, napesaki masanzoli mpe nkembo na oyo azali na bomoi libela na libela, mpo boyangeli na ye ezali boyangeli ya seko mpe bokonzi na ye ezali libota na libota.+ 35 Bafandi nyonso ya mabele bazali eloko mpamba liboso na ye, asalaka ndenge alingi ezala na limpinga ya likoló mpe na bafandi ya mabele. Mpe ezali na moto moko te oyo akoki kopekisa ye* kosala likambo+ to koloba na ye: ‘Osali nini?’+

36 “Na ntango yango, mayele na ngai ezongelaki ngai. Mpe nkembo ya bokonzi na ngai, lokumu na ngai mpe bonene na ngai ezongelaki ngai.+ Basaleli na ngai minene mpe bato na ngai ya lokumu balukaki ngai na mposa makasi; nazongelaki bokonzi na ngai, mpe babakiselaki ngai lokumu mingi koleka oyo ya liboso.

37 “Sikoyo ngai, Nebukadenezare, nazali kosanzola, kokumisa mpe kopesa Mokonzi ya likoló nkembo,+ mpo misala na ye nyonso ezali solo mpe banzela na ye ezali sembo,+ mpe azali na likoki ya kokitisa baoyo bazali na lolendo.”+