Kobima

12 Sikoyo Yehova alobaki na Moize mpe na Arona na mokili ya Ezipito ete: 2 “Sanza oyo ekozala ebandeli ya basanza mpo na bino. Na basanza ya mbula, yango ekozala sanza ya liboso mpo na bino.+ 3 Bóloba na liyangani mobimba ya Yisraele ete: ‘Na mokolo ya zomi ya sanza oyo, moto na moto asengeli kozwa mpo na ndako ya tata na ye mpate moko,+ mpate moko mpo na ndako moko. 4 Kasi soki bato ya ndako yango bazali mingi te mpo na kosilisa mpate yango, bino* ná bato oyo bafandi penepene na bino* bosengeli kokabola yango na bandako na bino na kolanda motángo ya bato.* Ntango bokokabola yango, bóluka koyeba eteni oyo moto mokomoko akolya. 5 Mpate yango oyo bokozwa esengeli kozanga mbeba,+ mpe ezala ya mobali, ya mbula moko. Bokoki kozwa yango na kati ya bana-mpate ya mibali to bana-ntaba. 6 Bosengeli kobatela yango tii na mokolo ya 14 ya sanza oyo,+ mpe lisangá mobimba ya liyangani ya Yisraele esengeli koboma yango na mpokwa, liboso molili ekɔta.*+ 7 Basengeli kozwa ndambo ya makila mpe kopakola yango na makonzí mibale ya porte mpe na libaya ya likoló oyo esimbaka makonzí ya porte, esika oyo bakolya yango.+

8 “‘Basengeli kolya mosuni na butu yango.+ Basengeli kotumba yango na mɔtɔ mpe kolya yango ná limpa ezangá levire+ ná ndunda ya bololo.+ 9 Bólya ata ndambo na yango te ya mobesu to ya kotɔkisa, to oyo elambami na mai, kasi nde bótumba yango na mɔtɔ: motó na yango ná makolo na yango mpe biloko na yango ya kati. 10 Bosengeli te kobomba ata ndambo na yango tii na ntɔngɔ, kasi ndambo na yango oyo etikali tii na ntɔngɔ, bosengeli kozikisa yango na mɔtɔ.+ 11 Mpe bokolya yango boye: mokaba ekangami na loketo,* sandale na makolo mpe lingenda na lobɔkɔ; mpe bosengeli kolya yango mbangumbangu. Yango ezali Elekeli ya Yehova. 12 Mpo nakoleka na mokili ya Ezipito na butu yango mpe nakoboma mwana nyonso ya liboso ya mokili ya Ezipito, banda na moto tii na nyama,+ mpe nakopesa banzambe nyonso ya Ezipito bitumbu.+ Nazali Yehova. 13 Makila ekozala elembo na bino likoló ya bandako oyo bokozala; nakomona makila mpe nakoleka likoló na bino, mpe etumbu ekoyela bino te mpo na kobebisa bino ntango nakobɛta mokili ya Ezipito.+

14 “‘Mokolo oyo ekozala ekaniseli mpo na bino, mpe bosengeli kokanisa yango lokola fɛti moko mpo na Yehova na boumeli ya mabota na bino nyonso. Bosengeli kokanisa yango lokola mobeko mpo na libela. 15 Bokolya limpa ezangá levire mikolo nsambo.+ Ɛɛ, na mokolo ya liboso bokolongola pɔtɔpɔtɔ ya farini ya ngayi na bandako na bino, mpo moto nyonso oyo akolya eloko oyo etyami levire, banda mokolo ya liboso tii mokolo ya nsambo, moto yango asengeli* kobomama* na Yisraele. 16 Na mokolo ya liboso bokosala liyangani mosantu, mpe na mokolo ya nsambo bokosala liyangani mosantu mosusu. Mosala moko te ekosalema na mikolo yango.+ Bokobongisa kaka eloko oyo moto nyonso asengeli* kolya.

17 “‘Bosengeli kosalaka fɛti ya Limpa ezangá levire,+ mpo na mokolo yango mpenza nakobimisa ebele ya bato* na bino na mokili ya Ezipito. Mpe bosengeli kokanisa mokolo yango na boumeli ya mabota na bino nyonso lokola mobeko mpo na libela. 18 Na sanza ya liboso, na mokolo ya 14 ya sanza yango, na mpokwa bokolya limpa ezangá levire tii na mokolo ya 21 ya sanza yango na mpokwa.+ 19 Na boumeli ya mikolo nsambo, pɔtɔpɔtɔ ya farini ya ngayi ekozala te na bandako na bino, mpo moto nyonso oyo akomeka kolya eloko oyo ezali na levire, ata soki azali mopaya to mwana-mboka,+ moto yango asengeli* kobomama* na liyangani ya Yisraele.+ 20 Bosengeli te kolya eloko nyonso oyo ezali na levire. Na bandako na bino nyonso, bokolya limpa oyo ezangá levire.’”

21 Moize abengaki bankulutu nyonso ya Yisraele+ nokinoki mpe alobaki na bango ete: “Bókende mpe bózwa mpo na mabota na bino banyama* oyo ezali naino bana, mpe bóboma nyama ya Elekeli. 22 Na yango bosengeli kozindisa liboke ya nzete ya izope na makila oyo ezali na saani mpe kopakola yango na libaya ya likoló oyo esimbaka makonzí ya porte mpe na makonzí mibale ya porte; mpe moto moko te kati na bino akobima na porte ya ndako na ye tii na ntɔngɔ. 23 Bongo ntango Yehova akoleka mpo na kopesa Baezipito etumbu mpe akomona makila na libaya ya likoló oyo esimbaka porte mpe na makonzí mibale ya porte, Yehova akoleka mpenza likoló ya porte ya ndako, mpe akopesa nzela te ete etumbu ya liwa* ekɔta na bandako na bino.+

24 “Bosengeli kokoba kosalaka yango: ekozala mobeko mpo na bino ná bana na bino, mpo na libela.+ 25 Mpe ntango bokokɔta na mokili oyo Yehova akopesa bino, kaka ndenge alobaki, bosengeli kokoba kosalaka molulu oyo ya losambo.+ 26 Mpe ntango bana na bino bakotuna bino ete: ‘Molulu oyo ya losambo elimboli nini?’+ 27 bosengeli koloba ete: ‘Ezali mbeka ya Elekeli mpo na Yehova, oyo alekaki likoló ya bandako ya Bayisraele na Ezipito ntango apesaki Baezipito etumbu, kasi abikisaki bandako na biso.’”

Bongo bato bagumbamaki mpe bafukamaki bilongi na nse. 28 Na nsima Bayisraele bakendaki mpe basalaki kaka ndenge Yehova apesaki Moize ná Arona mitindo.+ Basalaki kaka bongo.

29 Na yango, na midi ya butu Yehova abomaki mwana nyonso ya liboso na mokili ya Ezipito,+ banda na mwana ya liboso ya Farao oyo azalaki kofanda na kiti na ye ya bokonzi tii na mwana ya liboso ya mokangami oyo azalaki na bolɔkɔ,* mpe mwana nyonso ya liboso ya nyama.+ 30 Farao alamukaki na butu yango, elongo na basaleli na ye nyonso mpe Baezipito mosusu nyonso, mpe kolela moko monene ezalaki epai ya Baezipito, mpo ezalaki ata na ndako moko te oyo ezangaki ebembe.+ 31 Na mbala moko abengaki Moize ná Arona+ na butu mpe alobaki ete: “Bótɛlɛma, bólongwa na kati ya bato na ngai, bino ná Bayisraele mosusu. Bókende, bósalela Yehova, kaka ndenge bolobi.+ 32 Bózwa bitonga na bino ya bampate mpe bitonga na bino ya bangɔmbɛ, mpe bókende, kaka ndenge bolobi.+ Kasi bosengeli mpe kopambola ngai.”

33 Mpe Baezipito babandaki kotya bato mbamba bálongwa nokinoki+ na mokili, “mpo” bazalaki koloba ete: “ezali lokola nde biso nyonso tosili kokufa!”+ 34 Na yango, bato bamemaki pɔtɔpɔtɔ ya farini na bango liboso ete etyama levire, ná biloko* na bango ya kobɛta pɔtɔpɔtɔ ya farini oyo elíngami na bilamba na bango likoló ya mapeka na bango. 35 Bayisraele basalaki ndenge Moize ayebisaki bango mpe bakendaki kosɛnga Baezipito biloko ya palata ná biloko ya wolo mpe bilamba.+ 36 Yehova asalaki ete bándimama na miso ya Baezipito, bongo bapesaki bango oyo basɛngaki; mpe bapunzaki Baezipito.+

37 Na yango, Bayisraele balongwaki na Ramesese+ bakei na Sukote,+ bazalaki mibali 600 000 oyo bazalaki kotambola na makolo, longola bana.+ 38 Etuluku monene ya bato ndenge na ndenge*+ bakendaki mpe elongo na bango, ná bitonga ya bampate mpe bitonga ya bangɔmbɛ, ebele mpenza ya bibwɛlɛ. 39 Babandaki kotumba pɔtɔpɔtɔ ya farini oyo bautaki na yango na Ezipito: basalaki mampa ya libungutulu, oyo ezangá levire. Etyamaki levire te, mpo babenganaki bango na Ezipito mbangumbangu mpe babongisaki biloko na bango ya kolya te.+

40 Kofanda ya bana ya Yisraele,+ oyo bafandaki na Ezipito, ezalaki mbula 430.+ 41 Na nsuka ya mbula 430, na mokolo yango mpenza, bato nyonso* ya Yehova babimaki na mokili ya Ezipito. 42 Yango ezali butu oyo bakokanisa ndenge oyo Yehova abimisaki bango na mokili ya Ezipito. Ezali butu yango nde bato nyonso ya Yisraele basengeli kokanisa likambo oyo Yehova asalaki, na boumeli ya mabota na bango.+

43 Na yango Yehova alobaki na Moize mpe Arona ete: “Mobeko ya Elekeli yango oyo: Mopaya ata moko te akoki kolya yango.+ 44 Kasi soki moto azali na moombo-mobali oyo asombamá na mbongo, asengeli kokata ye ngenga.+ Na nsima nde akoki kolya yango. 45 Moto oyo autá na mboka mosusu mpe mosali oyo azwaka lifuti bakoki kolya yango te. 46 Ekolyama na ndako moko. Osengeli te kobimisa ata ndambo ya mosuni na yango na libándá, mpe bosengeli kobuka ata mokuwa na yango moko te.+ 47 Liyangani mobimba ya Yisraele ekosala yango. 48 Soki mopaya azali kofanda elongo na yo mpe soki alingi kosala Elekeli mpo na Yehova, mobali nyonso oyo azali epai na ye asengeli kokatama ngenga. Nsima na yango nde akoki kosala yango, mpe akokóma lokola mwana-mboka ya mokili. Kasi mobali nyonso oyo akatami ngenga te akoki kolya yango te.+ 49 Mobeko ekozala moko mpo na mwana-mboka mpe mpo na mopaya oyo azali kofanda kati na bino.”+

50 Bongo Bayisraele nyonso basalaki kaka ndenge Yehova apesaki Moize ná Arona mitindo. Basalaki kaka bongo. 51 Mpe na mokolo yango mpenza, Yehova abimisaki Bayisraele elongo na ebele ya bato* oyo bazalaki na bango na mokili ya Ezipito.