Kobima

23 “Osengeli te kopalanganisa nsango ya lokuta.+ Kopesa moto mabe mabɔkɔ te, kokóma te motatoli oyo azali kokana kosala mabe.+ 2 Osengeli te kolanda ebele ya bato mpo na kosala mabe, mpe ntango ozali kopesa litatoli, osengeli te koboya koloba solo mpo na koluka kosepelisa ebele ya bato. 3 Osengeli te komonisa ezaleli ya kopona bilongi na likambo ya moto oyo azangá.+

4 “Soki okutani na ngɔmbɛ-mobali ya monguna na yo to na mpunda na ye oyo ebungi, osengeli kozongisela ye yango.+ 5 Soki omoni mpunda ya moto oyo ayinaka yo ekwei na nse ya mokumba na yango, osengeli te kosala lokola omoni yango te mpe kotika yango. Osengeli kosalisa ye nakolongola nyama yango.+

6 “Osengeli te kozanga bosembo ntango ozali kosambisa mobola oyo azali kati na yo.+

7 “Boyá bifundeli* ya lokuta, mpe koboma te moto oyo asali likambo te mpe moto ya sembo, mpo nakotánga te moto mabe moto ya sembo.*+

8 “Osengeli te kondima kanyaka, mpo kanyaka ebomaka miso ya bato oyo bamonaka malamu mpe ekoki kobebisa maloba ya bato ya sembo.+

9 “Osengeli te konyokola moto oyo afandi mopaya. Boyebi ndenge kozala mopaya* ezalaka, mpo bino mpe bofandaki bapaya na mokili ya Ezipito.+

10 “Okolona mboto na mokili na yo mpe okoyanganisa mbuma na yango mpo na mbula motoba.+ 11 Kasi na mbula ya nsambo, osengeli kolona te, okotika yango epema, mpe babola kati na bato na yo bakolya biloko oyo ekobima yango moko, mpe oyo bango bakotika, banyama ya zamba oyo efandaka na esobe ekolya yango. Okosala bongo na elanga na yo ya vinyo mpe na elanga na yo ya olive.

12 “Mikolo motoba okosala mosala na yo; kasi na mokolo ya nsambo, okotika kosala mosala, mpo ngɔmbɛ-mobali na yo mpe mpunda na yo epema mpe mwana mobali ya moombo na yo ya mwasi mpe moto oyo afandi mopaya bázwa lisusu makasi.+

13 “Bosengeli kokeba ete bósala makambo nyonso oyo nayebisi bino,+ mpe bosengeli te kotánga nkombo ya banzambe mosusu; báyokana ata koyokana te na monɔkɔ na yo.+

14 “Mbala misato na mbula bokosalela ngai fɛti.+ 15 Okosala fɛti ya Limpa ezangá levire.+ Okolya limpa ezangá levire mikolo nsambo, kaka ndenge napesaki yo mitindo, na ntango oyo etyamá na sanza ya Abibe,*+ mpo na ntango yango obimaki na Ezipito. Moto moko te akomonana liboso na ngai mabɔkɔ mpamba.+ 16 Lisusu, okosala fɛti ya Kobuka mbuma* ya liboso oyo eteli ya misala na yo ya makasi, ya biloko oyo olonaki na elanga;+ mpe fɛti ya Koyanganisa mbuma* na nsuka ya mbula, ntango okoyanganisa mbuma ya misala na yo ya makasi na elanga.+ 17 Mbala misato na mbula, mibali nyonso epai na yo bakomonana liboso ya Nkolo ya solo, Yehova.+

18 “Osengeli te kopesa makila ya mbeka na ngai elongo na eloko nyonso oyo etyami levire. Mpe bambeka ya mafuta oyo epesami na bafɛti na ngai esengeli te kotikala butu mobimba tii na ntɔngɔ.

19 “Osengeli komema na ndako ya Yehova Nzambe na yo mbuma oyo eleki malamu kati na mbuma ya liboso oyo eteli ya mabele na yo.+

“Osengeli te kotɔkisa mwana-ntaba na kati ya miliki ya mabɛlɛ ya mama na yango.+

20 “Nazali kotinda anzelu liboso na yo+ mpo na kobatela yo na nzela mpe kokɔtisa yo na esika oyo nabongisi.+ 21 Yokelá ye mpe tosá mongongo na ye. Kotombokela ye te, mpo akolimbisa te ezaleli na bino ya kobuka mibeko,+ mpo nkombo na ngai ezali na kati na ye. 22 Kasi, soki otosi mpenza mongongo na ye mpe osali nyonso oyo nalobi, nakozala monguna ya banguna na yo mpe nakotɛmɛla baoyo bazali kotɛmɛla yo. 23 Mpo anzelu na ngai akotambola liboso na yo mpe akomema yo epai ya Baamore, Bahiti, Baperizi, Bakanana, Bahivi mpe Bayebusi, mpe nakosilisa bango.+ 24 Osengeli te kogumbamela banzambe na bango to kobendama mpo na kosalela bango, mpe osengeli te komekola mimeseno na bango.+ Nzokande, okobebisa yango mpe okobuka makonzí na bango ya losambo.+ 25 Bosengeli kosalela Yehova Nzambe na bino,+ mpe akopambola mampa na yo mpe mai na yo.+ Nakolongola maladi na kati na yo.+ 26 Zemi ya mwasi ata moko te ekosopana mpe na mokili na yo mwasi ata moko te akozala ekomba,+ mpe nakopesa yo bomoi molai.*

27 “Nakosala ete bábanga ngai liboso okóma,+ mpe nakokɔtisa na mobulungano bato nyonso oyo okokutana na bango. Nakosala ete olonga banguna na yo nyonso mpe bakokima liboso na yo.+ 28 Liboso okóma nakosala ete banguna na yo bámiyoka ete balɛmbi nzoto,*+ mpe nakobengana Bahivi, Bakanana mpe Bahiti liboso na yo.+ 29 Nakobengana bango te liboso na yo na mbula moko, mpo mokili etikala mpamba te mpe banyama ya zamba oyo efandaka na esobe ekóma ebele te mpo na kosala yo mabe.+ 30 Nakobengana bango mokemoke liboso na yo, tii okobota mingi mpe okozwa mokili yango.+

31 “Nakotya ndelo na yo banda na Mbu Motane tii na mbu ya Bafilistia mpe banda na esobe tii na Ebale;*+ mpo nakopesa bato oyo bafandi na mokili yango na lobɔkɔ na bino, mpe okobengana bango liboso na yo.+ 32 Osengeli te kosala kondimana elongo na bango to na banzambe na bango.+ 33 Basengeli te kofanda na mokili na yo, noki bátinda yo osalela ngai lisumu. Soki osaleli banzambe na bango, yango ekokómela yo mpenza motambo.”+