Yosua

2 Bongo Yosua mwana ya Nunu atindaki mibali mibale na nkuku longwa na Shitime,+ bákende konɔnga. Alobaki na bango boye: “Bókende kotalatala mokili yango, mingimingi Yeriko.” Na yango bakendaki mpe bakómaki na ndako ya mwasi moko ya ndumba, na nkombo Rahaba,+ mpe bafandaki wana. 2 Bato bayebisaki mokonzi ya Yeriko ete mibali ya Yisraele bakɔtaki na butu mpo na konɔnga mokili. 3 Na yango, mokonzi ya Yeriko atindelaki Rahaba maloba ete: “Bimisá mibali oyo bayei mpe bafandi na ndako na yo, mpo bayei konɔnga mokili oyo nyonso.”

4 Kasi mwasi yango azwaki mibali yango mibale mpe abombaki bango. Na nsima alobaki: “Ya solo mibali yango bayaki epai na ngai, kasi nayebaki te epai bautaki. 5 Mpe ntango molili ekɔtaki, na ntango oyo balingaki kokanga porte ya engumba, mibali yango babimaki. Nayebi esika bakei te; kasi soki bolandi bango nokinoki, bokozwa bango.” 6 (Nzokande, mwasi yango amatisaki bango na nsamba ya ndako, mpe abombaki bango na nse ya mwa banzete ya lini oyo atandaki na milɔngɔ likoló ya nsamba.) 7 Na yango bato oyo mokonzi atindaki balandaki bango na nzela ya Yordani na bisika oyo bakatisaka na makolo,+ mpe bakangaki porte ya engumba mbala moko ntango babimaki.

8 Liboso mibali yango bálala, mwasi yango amataki likoló ya nsamba epai bazalaki. 9 Alobaki na bango: “Nayebi malamu ete Yehova akopesa bino mokili oyo.+ Mpe bozali mpenza kobangisa biso.+ Bato nyonso ya mokili na biso balɛmbi nzoto mpo na bino,+ 10 mpo toyokaki ndenge Yehova akaukisaki mai ya Mbu Motane liboso na bino ntango bobimaki na Ezipito,+ mpe makambo oyo bosalaki bakonzi mibale ya Baamore, Sihone+ ná Oge,+ oyo bobomaki na ngámbo mosusu* ya Yordani. 11 Ntango toyokaki nsango yango, tolɛmbaki nzoto,* mpe moto ata moko te azali lisusu na mpiko* ya kotɛlɛma liboso na bino, mpo Yehova Nzambe na bino azali Nzambe kuna na likoló mpe awa na mabele.+ 12 Sikoyo nabondeli bino, bólapela ngai ndai na nkombo ya Yehova ete, lokola namoniseli bino boboto,* bino mpe bokomonisela bato ya ndako ya tata na ngai boboto;* mpe bosengeli kopesa ngai elembo oyo nakotyela motema. 13 Bosengeli kotika tata na ngai ná mama na ngai na bomoi, ná bandeko na ngai ya mibali mpe ya basi mpe bato na bango nyonso, mpe bosengeli kobikisa biso* na liwa.”+

14 Bongo mibali yango balobaki na ye boye: “Tokopesa bomoi na biso mpo na bino!* Soki oyebisi likambo na biso epai ya moto te, ntango Yehova akopesa biso mokili oyo, tokomonisela yo boboto* mpe tokozala sembo epai na yo.” 15 Nsima na yango, akitisaki bango na nsinga moko na fɛnɛtrɛ, mpo ndako na ye ekanganaki na efelo ya engumba. Kutu, azalaki kofanda likoló ya efelo yango.+ 16 Bongo alobaki na bango: “Bókende na etúká ya ngombangomba mpe bóbombana kuna mikolo misato, mpo bato oyo bazali kolanda bino bázwa bino te. Na nsima ntango bato yango bakozonga, bokoki kokende na nzela na bino.”

17 Mibali yango balobaki na ye: “Tokozala na ngambo te mpo na ndai oyo olapisi biso,+ 18 soki, ntango tokokɔta na mokili oyo, okangi nsinga oyo ya motane na fɛnɛtrɛ oyo okitisi biso na yango. Osengeli mpe koyanganisa na ndako na yo tata na yo, mama na yo, bandeko na yo ná bato nyonso ya ndako ya tata na yo.+ 19 Mpe soki moto moko abimi na baporte ya ndako na yo mpe akei libándá, makila na ye ekozala na motó na ye moko, mpe biso tokozala na ngambo te. Kasi soki likambo moko ya mabe ekómeli* moto nyonso oyo akotikala elongo na yo na kati ya ndako, makila na ye ekozala na mitó na biso. 20 Kasi soki oyebisi moto mosusu likambo na biso,+ wana tokozala na ngambo te mpo na ndai oyo olapisi biso.” 21 Rahaba ayanolaki: “Esalema ndenge bolobi.”

Bongo abimisaki bango mpe bakendaki. Na nsima, akangaki nsinga wana ya motane na fɛnɛtrɛ. 22 Mibali yango mibale balongwaki wana mpe bakendaki na etúká ya ngombangomba mpe batikalaki kuna mikolo misato, tii ntango bato oyo bazalaki kolanda bango bazongaki. Bato oyo bazalaki kolanda bango balukaki bango na banzela nyonso, kasi bamonaki bango te. 23 Bongo mibali yango mibale bakitaki uta na etúká ya ngombangomba, bakatisaki ebale mpe bakómaki epai ya Yosua mwana ya Nunu. Bayebisaki ye makambo nyonso oyo ekómelaki bango. 24 Na nsima, balobaki na Yosua: “Yehova apesi biso mokili yango mobimba.+ Kutu, bato nyonso oyo bafandi na mokili yango balɛmbi nzoto mpo na biso.”+