Rahaba akamati etelemelo na ye

Mwa moke na nsima, Rahaba ayambi bapaya mibale oyo balakaki boyei na bango te​—banɔ́ngi oyo bauti na molako ya Yisraele. Bazali koluka esika ya kolala, mpe Rahaba akɔtisi bango na ndako na ye. Kasi nsango na bango ekómi epai na mokonzi ya Yeliko. Nokinoki atindi bapolisi na ye mpo na kokanga bango.​—Yosua 2:1, 2.

Ntango bapolisi ya mokonzi bakómaki, Rahaba asilaki kokamata etelemelo na ye mpo na kosalela Yehova Nzambe. Batindami ya mokonzi bapesaki etinda ete: “Bimisa mibali baoyo bakomi epai na yɔ.” Rahaba abombaki banɔ́ngi na nse ya nkongenkonge oyo etandamaki ete ekauka likoló na nsambá ya ndako na ye. Alobaki na bango ete: “Sɔlɔ mibali bakomi epai na ngai kasi nayebaki te sɔkɔ bauti epai wapi, mpe pɛnɛpɛnɛ na ntango na kojipa ekuke [ya engumba] na ntango na butu, bango babimi. Nayebi tɛ sɔkɔ bakei wapi. Bengana bango nɔki mpɔ ete okojua bango.” (Yosua 2:3-5) Basali ya mokonzi basalaki bongo​—kasi bobele mpamba.

Rahaba asili kozimbisa banguna. Nokinoki asali matambe mosusu oyo mamonisi kondima na ye epai na Yehova na nzela ya misala. Abuti na nsambá ya ndako na ye mpe alobi na banɔ́ngi ete: “Ngai nayebi ete [Yehova akopesa, NW] bino mokili oyo.” Rahaba andimi ete bafandi nyonso ya mboka bazali kolenga mpo bayokaki ete Nzambe “akaukisaki Mai Motane” liboso na Bayisraele esili koleka mibu 40. Bato yango bayebi lisusu ete Bayisraele babomaki mikonzi mibale ya Baamola. Rahaba alobi lisusu ete: “Noki eyokaki biso yango, tolɛmbaki mpe mpiko etikalaki na moto tɛ na ntina na bino, mpɔ ete [Yehova, NW] Njambe na bino ajali Njambe na lola na likolo mpe na mokili na nse.”​—Yosua 2:8-11.

Bongo tokoloba nini na lokutá oyo Rahaba alobaki na bato oyo bazalaki kolanda banɔ́ngi? Nzambe andimaki lolenge na ye ya kosala. (Talá Baloma 14:4.) Amityaki na likámá mpo na kobatela basaleli na ye, komonisáká bongo elembeteli ya kondima na ye. Soki lokutá ya mokano mabe eboyami na miso ya Yehova, tosɛngisami te koloba makambo nyonso ya solo epai na bato oyo bazali na ndingisa te ya koyeba yango. Ata Yesu Klisto ye moko azalaki ntango nyonso kopesa biyano ya polele te mpe ya mbala moko te soki yango ekokaki kopesa mpasi na moto moko. (Matai 7:6; 15:1-6; 21:23-27; Yoane 7:3-10) Na ntembe te, ezali na lolenge oyo nde esɛngeli kotalela maloba ya kozimbisa oyo Rahaba alobaki yango epai na bapolisi ya mokonzi.