Kobima
1 Sikoyo talá bankombo ya bana ya Yisraele oyo bakɔtaki na Ezipito elongo na Yakobo, moto na moto ayaki na libota* na ye:+ 2 Rubene, Simeone, Levi ná Yuda;+ 3 Isakare, Zebulone ná Benyamina; 4 Dani ná Nafatali; Gade mpe Ashere.+ 5 Mpe baoyo* nyonso babimaki na Yakobo* bazalaki bato* 70, kasi Yozefe azalaki na Ezipito banda kala.+ 6 Nsukansuka Yozefe akufaki,+ ná bandeko na ye nyonso ná bato nyonso ya eleko na ye. 7 Mpe Bayisraele* bazalaki kobota mpe kokóma ebele mpenza, bazalaki kaka kobakisama mpe kokóma makasi mingi koleka na ndenge moko ya kokamwa, mpe batondaki na mokili yango.+
8 Na nsima, mokonzi moko ya sika abimaki na Ezipito, oyo ayebaki Yozefe te. 9 Na yango, alobaki na bato na ye ete: “Talá! Bato ya ekólo Yisraele bazali mingi mpe makasi koleka biso.+ 10 Tóluka mayele moko ya kosala mpo bákóma mingi te. Soki te bakokoba kobakisama, mpe soki etumba ebimi, bango mpe bakozala na ngámbo ya banguna na biso, bakobunda na biso mpe bakolongwa na mokili oyo.”
11 Bongo batyelaki bango bakapita mpo na kosalisa bango misala ya makasi mpo na konyokola bango,+ mpe batongaki bingumba mpo na kobomba biloko ya Farao, elingi koloba, Pitome ná Raamesese.+ 12 Kasi wana bazalaki konyokola bango mingi, Bayisraele bazalaki kaka kokóma mingi mpe bazalaki kaka kopalangana mingi, bongo Baezipito bazalaki kobanga Bayisraele mpe koyoka mabe mpo na bango.+ 13 Na yango, Baezipito basalisaki Bayisraele misala ya boombo mpe ya makasi.+ 14 Bakómisaki bomoi na bango bololo na misala ya makasi. Bazalaki kosalisa bango misala ya pɔtɔpɔtɔ ya mabele* mpe ya briki mpe misala ya boombo ya lolenge nyonso na bilanga. Ɛɛ, basalisaki bango misala ya makasi ya boombo ya lolenge nyonso.+
15 Na nsima, mokonzi ya Ezipito asololaki na basi babotisi Baebre, moko nkombo na ye Shifara mpe mosusu Pua, 16 mpe alobaki na bango boye: “Ntango bokosalisa basi Baebre na kobota,+ bótala mwana oyo azali kobima:* Soki ezali mwana mobali, bosengeli koboma ye, kasi soki ezali mwana mwasi, bótika ye na bomoi.” 17 Kasi babotisi babangaki Nzambe ya solo, mpe basalaki te ndenge mokonzi ya Ezipito ayebisaki bango. Bazalaki kotika bana mibali na bomoi.+ 18 Na nsima, mokonzi ya Ezipito abengaki babotisi mpe alobaki na bango ete: “Mpo na nini botiki bana mibali na bomoi?” 19 Babotisi balobaki na Farao ete: “Basi Baebre bazali te lokola basi Baezipito. Lokola bazali kasakasa, babotaka liboso kutu mobotisi akɔta epai na bango.”
20 Bongo Nzambe asalelaki basi babotisi bolamu, mpe bato bazalaki se kokóma ebele mpe kokóma mpenza makasi. 21 Mpe lokola babotisi babangaki Nzambe ya solo, na nsima, apesaki bango mabota. 22 Nsukansuka Farao apesaki bato na ye nyonso etinda ete: “Bosengeli kobwaka na ebale Nile mwana mobali nyonso ya Baebre oyo abotami sika, kasi bosengeli kotika na bomoi mwana mwasi nyonso.”+