Mokanda ya liboso ya Ntango

14 Hirame+ mokonzi ya Tire atindelaki Davidi bamemi-nsango. Atindelaki ye mpe mabaya ya sɛdrɛ, bato oyo bapasolaka mabanga,* mpe bato oyo basalaka mosala ya mabaya mpo na kotongela ye ndako.*+ 2 Mpe Davidi ayebaki ete Yehova akómisi bokonzi na ye makasi na Yisraele,+ mpo boyangeli na ye etombwamaki mpenza mpo na bolamu ya bato na Ye Yisraele.+

3 Davidi azwaki lisusu basi mingi+ na Yerusaleme, mpe abotaki lisusu bana mingi ya mibali mpe ya basi.+ 4 Talá bankombo ya bana na ye oyo babotamaki na Yerusaleme:+ Shamua, Shobabe, Natane,+ Salomo,+ 5 Yibare, Elishua, Elepelete, 6 Noga, Nefege, Yafia, 7 Elishama, Beeliada, mpe Elifelete.

8 Ntango Bafilistia bayokaki ete Davidi atyami mafuta mpo azala mokonzi ya Yisraele mobimba,+ bango nyonso bamataki mpo na koluka Davidi.+ Ntango Davidi ayokaki yango, akendaki kobundisa bango. 9 Bongo Bafilistia bakómaki mpe babandaki kobundisa bato oyo bafandi na Lobwaku* ya Barefaime.+ 10 Davidi atunaki Nzambe, alobi: “Nakende mpo na kobunda na Bafilistia? Okopesa bango na lobɔkɔ na ngai?” Na yango Yehova alobaki na ye: “Kende, mpe nakopesa bango mpenza na lobɔkɔ na yo.”+ 11 Bongo Davidi amataki na Baala-perazime,+ mpe abomaki bango kuna. Na yango Davidi alobaki: “Lokola nzela oyo mai epasoli, Nzambe ya solo asaleli ngai mpo na kopasola nzela na kati ya banguna na ngai.” Yango wana bapesaki esika yango nkombo Baala-perazime.* 12 Bafilistia basundolaki banzambe na bango kuna, mpe ntango Davidi apesaki mitindo, batumbaki yango na mɔtɔ.+

13 Na nsima, Bafilistia bayaki lisusu kobundisa bato oyo bafandi na lobwaku.*+ 14 Davidi atunaki lisusu Nzambe, kasi Nzambe ya solo alobaki na ye boye: “Kobundisa bango na ndenge ya liboso te. Osengeli nde kobaluka mpe koyela bango na nsima, liboso ya zamba ya baka.+ 15 Mpe ntango okoyoka makɛlɛlɛ lokola ya bato bazali kotambola na bansɔngɛ ya banzete ya baka, bimá mpo na etumba, mpo na ntango yango Nzambe ya solo akobima liboso na yo mpo na koboma limpinga ya Bafilistia.”+ 16 Na yango, Davidi asalaki kaka ndenge Nzambe ya solo apesaki ye mitindo,+ mpe ye ná bato na ye babomaki limpinga ya Bafilistia banda na Gibeone tii na Gezere.+ 17 Mpe lokumu ya Davidi ekendaki nsango na mikili nyonso, mpe Yehova asalaki ete bikólo nyonso ebanga Davidi.+