Kobima

31 Yehova akobaki koloba na Moize ete: 2 “Talá, naponi* Bezalele+ mwana ya Uri mwana ya Hure na libota ya Yuda.+ 3 Nakotondisa ye na elimo ya Nzambe, nakopesa ye bwanya, mayele, mpe boyebi ya misala ya mabɔkɔ ya lolenge nyonso, 4 mpo na kosala misala ya koyema, mpo na kosala na wolo, palata, mpe kwivre, 5 mpo na kokata mabanga+ mpe kokangisa yango, mpo na kosala biloko ya lolenge nyonso ya mabaya.+ 6 Lisusu, naponi Oholiabe+ mwana ya Ahisamake na libota ya Dani mpo na kosalisa ye, mpe nazali kotya bwanya na motema ya moto nyonso oyo ayebi mosala malamu,* mpo básala eloko nyonso napesi yo mitindo:+ 7 hema ya kokutana,+ sanduku ya Litatoli+ mpe ezipeli+ oyo ezali likoló na yango, bisaleli nyonso ya hema, 8 mesa+ ná bisaleli na yango, etɛlɛmiselo ya miinda ya wolo ya pɛto ná bisaleli na yango nyonso,+ etumbelo ya mpaka ya malasi,+ 9 etumbelo ya likabo ya kotumba+ ná bisaleli na yango nyonso, saani monene ná etɛlɛmiselo na yango,+ 10 bilamba ya kitoko oyo batongi, bilamba mosantu mpo na Arona nganga-nzambe, bilamba ya bana na ye ya mibali mpo na kosala mosala ya banganga-nzambe,+ 11 mafuta mosantu, mpe mpaka ya malasi ya nsolo kitoko mpo na esika mosantu.+ Bakosala nyonso oyo napesi yo mitindo.”

12 Yehova alobaki lisusu na Moize ete: 13 “Lobá na bana ya Yisraele mpe yebisá bango ete: ‘Mingimingi, bokobatela basabata na ngai,+ mpo ezali elembo kati na ngai ná bino na boumeli ya mabota na bino mpo bóyeba ete ngai Yehova nazali kosantisa bino. 14 Bosengeli kobatela sabata, mpo ezali eloko moko mosantu mpo na bino.+ Moto oyo akotuka yango asengeli kobomama. Soki moto asali mosala na mokolo yango, moto* yango asengeli kolongolama* na kati ya bato na ye.+ 15 Mikolo motoba mosala ekoki kosalema, kasi mokolo ya nsambo ezali sabata ya kopema mpenza.+ Ezali eloko moko mosantu mpo na Yehova. Moto nyonso oyo akosala mosala na mokolo ya sabata asengeli kobomama. 16 Bayisraele basengeli kobatela sabata; basengeli kotosa sabata na boumeli ya mabota na bango nyonso. Ezali kondimana mpo na libela. 17 Ezali elembo oyo ekoumela kati na ngai ná bato ya Yisraele,+ mpo na mikolo motoba Yehova asalaki likoló ná mabele mpe na mokolo ya nsambo atikaki kosala mpe apemaki.’”+

18 Bongo ntango kaka asilisaki koloba na ye na Ngomba Sinai, apesaki Moize bitanda mibale ya Litatoli,+ bitanda ya mabanga oyo ekomami na mosapi ya Nzambe.+