Mokanda ya liboso ya Petro
1 Petro, ntoma ya Yesu Kristo,+ epai na bino bafandi ya ntango mokuse, oyo bopalangani na Ponti, Galatia, Kapadosi,+ Azia, mpe Bitinia, epai na bino baoyo boponami 2 na kolanda likoki ya Nzambe Tata ya koyeba makambo liboso,+ bosantisami na elimo santu,+ mpo bózala bato ya botosi mpe bómwangisama makila ya Yesu Kristo:+
Tiká ete boboto monene mpe kimya ebakisama epai na bino.
3 Nzambe mpe Tata ya Nkolo na biso Yesu Kristo asanzolama, mpamba te na motema mawa na ye monene apesi biso mbotama ya sika+ mpo na elikya oyo ezali na bomoi+ na nzela ya lisekwa ya Yesu Kristo uta na bakufi,+ 4 mpo na libula oyo ekoki kobebisama te, kokóma mbindo te, mpe konzuluka te.+ Yango ebombami mpo na bino na likoló,+ 5 bino baoyo bobatelami na nguya ya Nzambe na nzela ya kondima, mpo na lobiko oyo ezali pene ya komonisama na ntango ya nsuka. 6 Mpo na ntina yango bozali kosepela mingi, atako esengeli bóyoka mawa mpo na komekama ndenge na ndenge mpo na ntango mokuse,+ 7 mpo ete kondima na bino oyo emekami,+ oyo ezali na motuya monene koleka wolo oyo ebebaka atako emekami* na mɔtɔ, esala ete bózwa longonya, nkembo ná lokumu na ntango ya komonana ya Yesu Kristo.+ 8 Atako bomoná ye te, bolingi ye. Atako sikoyo bozali komona ye te, bozali komonisa kondima epai na ye mpe bozali kosepela mingi na esengo oyo ekoki kolimbolama te mpe ya nkembo mpenza, 9 awa bozali kokokisa mokano ya kondima na bino, lobiko na bino.*+
10 Mpo na lobiko yango, basakoli oyo basakolaki mpo na boboto monene oyo ebongisamaki mpo na bino batunatunaki na molende mpe basalaki bolukiluki na likebi.+ 11 Bazalaki se kolukaluka mpo na koyeba ntango nini mpenza mpe eleko nini elimo oyo ezalaki na kati na bango ezalaki kolakisa mpo na Kristo,+ mpo elimo yango etatolaki banda kala bampasi oyo ezalaki kozela Kristo+ mpe nkembo oyo elingaki koya na nsima. 12 Nzambe amonisaki bango polele ete makambo oyo bazalaki kosakola ezalaki mpo na bango moko te, kasi nde mpo na bino. Bazalaki kosakola mpo na makambo oyo eyebisami sikoyo epai na bino na nzela ya baoyo basakwelaki bino nsango malamu na lisalisi ya elimo santu oyo etindamaki uta na likoló.+ Ezali makambo wana nde baanzelu bazalaka na mposa ya kotalatala.
13 Yango wana bóbongisa makanisi na bino mpo na mosala,+ bóbatela likoki na bino ya kokanisa;+ bótya elikya na bino na boboto monene oyo bakomemela bino na ntango ya komonana ya Yesu Kristo. 14 Lokola bana ya botosi, bótika kolanda bamposa oyo bozalaki na yango kala, ntango bozalaki na boyebi te, 15 kasi lokola Mosantu oyo abengaki bino, bino mpe bókóma basantu na bizaleli na bino nyonso,*+ 16 mpo ekomamá boye: “Bosengeli kozala basantu, mpo ngai nazali mosantu.”+
17 Mpe soki bozali kobelela Tata oyo asambisaka kozanga kopona bilongi+ na kolanda mosala ya moto na moto, bómitambwisa na kobanga+ wana bozali bato oyo bafandi mpo na ntango mokuse. 18 Mpo boyebi mpenza ete ezalaki te na biloko oyo ekoki kobeba, na palata to na wolo, nde bosikolamaki*+ na lolenge ya bomoi ya mpambampamba oyo bankɔkɔ na bino batikelaki bino.* 19 Kasi ezalaki nde na makila moko ya motuya,+ lokola oyo ya mwana-mpate ezangi mbeba mpe ezangi litɔnɔ,+ makila ya Kristo.+ 20 Ya solo, aponamaki* liboso ya ebandeli ya mokili,+ kasi amonisamaki na nsuka ya bantango mpo na bino.+ 21 Na nzela na ye, bondimelaka Nzambe,+ oyo asekwisaki ye*+ mpe apesaki ye nkembo,+ mpo ete kondima na bino mpe elikya na bino ezala epai ya Nzambe.
22 Sikoyo lokola bomipɛtoli* na ndenge bozali kotosa solo mpe yango eboti bolingo ya bondeko oyo ezangi bokosi,+ bólinganaka makasi, na motema moko.+ 23 Mpo ezali te na nzela ya momboto oyo epɔlaka nde bozwi mbotama ya sika,+ kasi nde na nzela ya momboto oyo ekoki kopɔla te,*+ na lisalisi ya liloba ya Nzambe ya bomoi mpe ya libela.+ 24 Mpo “bato nyonso bazali* lokola matiti, mpe nkembo na bango mobimba ezali lokola fololo ya esobe; matiti ekaukaka, mpe fololo ekweaka, 25 kasi liloba ya Yehova* ekoumela seko.”+ Mpe “liloba” yango nde nsango malamu oyo basakwelaki bino.+