Kobima

35 Na nsima Moize abengisaki liyangani mobimba ya Bayisraele mpe alobaki na bango ete: “Talá makambo oyo Yehova apesi mitindo ete esalema:+ 2 Mosala ekoki kosalema mikolo motoba, kasi na mokolo ya nsambo, yango ekokóma eloko moko mosantu mpo na bino, sabata ya kopema mpenza mpo na Yehova.+ Moto nyonso oyo akosala mosala na mokolo yango akobomama.+ 3 Bosengeli te kopelisa mɔtɔ na mokolo ya sabata na bisika na bino nyonso ya kofanda.”

4 Bongo Moize alobaki na liyangani mobimba ya Bayisraele ete: “Talá mitindo oyo Yehova apesi: 5 ‘Bózwela Yehova likabo na kati ya biloko na bino.+ Moto nyonso oyo motema na ye etindi ye+ amemela Yehova likabo: wolo, palata, kwivre, 6 nsinga ya bulé, lɛnɛ oyo epakolami langi ya mwa motane-bulé, biloko oyo epakolami langi ya motane makasi, lini ya kitoko, nsuki ya ntaba,+ 7 mposo ya mpate-mobali oyo epakolami langi ya motane, mposo ya nyama ebengami fɔkɛ, nzete ya akasia, 8 mafuta mpo na miinda, balsame mpo na mafuta mosantu mpe mpo na mpaka ya malasi ya nsolo kitoko,+ 9 mabanga ya onikisi mpe mabanga mosusu ya kotya na efode+ mpe na libenga ya ntolo.+

10 “‘Tiká bato nyonso oyo bayebi mosala malamu*+ na kati na bino báya mpe básala likambo nyonso oyo Yehova apesi mitindo, 11 elingi koloba, tabernakle ná hema na yango mpe ezipeli na yango, bakroshɛ na yango ná bakadrɛ na yango, bikangiseli na yango, makonzí na yango mpe bitɛlɛmiselo na yango oyo ezali na mabulu; 12 Sanduku+ ná banzete ya komema yango,+ ezipeli,+ mpe rido+ oyo ezipi yango; 13 mesa+ ná banzete ya komema yango ná bisaleli na yango nyonso mpe mampa ya kolakisa;+ 14 etɛlɛmiselo ya miinda+ mpo na kongɛngisa ná bisaleli na yango ná miinda na yango mpe mafuta mpo na kongɛngisa;+ 15 etumbelo ya mpaka ya malasi+ ná banzete ya komema yango; mafuta mosantu ná mpaka ya malasi ya nsolo kitoko;+ elamba ya kozipa* ya esika ya kokɔta na monɔkɔ ya tabernakle; 16 etumbelo ya likabo ya kotumba+ mpe motalaka na yango ya kwivre, banzete ya komema yango mpe bisaleli na yango nyonso; saani monene ná etɛlɛmiselo na yango;+ 17 barido ya lopango,+ makonzí na yango ná bitɛlɛmiselo na yango oyo ezali na mabulu; elamba ya kozipa* monɔkɔ ya lopango; 18 bapike ya tabernakle mpe bapike ya lopango mpe bansinga na yango;+ 19 bilamba ya kitoko oyo batongi+ mpo na kosala mosala na esika mosantu, bilamba mosantu mpo na Arona+ nganga-nzambe, mpe bilamba ya bana na ye ya mibali mpo na kosala mosala ya banganga-nzambe.’”

20 Na yango liyangani mobimba ya Bayisraele balongwaki liboso ya Moize. 21 Bongo moto nyonso oyo motema na ye etindaki ye,+ mpe moto nyonso oyo elimo na ye etindaki ye, bayaki mpe bamemelaki Yehova likabo na bango mpo esalelama mpo na hema ya kokutana, mpo na mosala na yango nyonso mpe mpo na bilamba mosantu. 22 Bazalaki kaka koya, mibali elongo na basi, moto nyonso oyo motema na ye etindaki ye, bazalaki koya na babrɔshe ya monzɛlɛ, biloko ya matoi, mpɛtɛ ná babiju mosusu, mpe lolenge nyonso ya biloko ya wolo. Bango nyonso bamemaki makabo* na bango ya wolo epai ya Yehova.+ 23 Mpe baoyo nyonso bazalaki na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi, na lini ya kitoko, na nsuki ya ntaba, na mposo ya mpate-mobali oyo epakolami langi ya motane mpe na mposo ya nyama ebengami fɔkɛ, bazalaki koya na yango. 24 Baoyo nyonso bazalaki kopesa likabo ya palata ná kwivre bazalaki komemela Yehova likabo, mpe baoyo nyonso bazalaki na nzete ya akasia mpo na mosala nyonso oyo esengelaki kosalema, bazalaki koya na yango.

25 Basi nyonso oyo bayebaki mosala malamu+ bazalaki kosala nsinga na mabɔkɔ na bango, mpe bazalaki komema yango: nsinga ya bulé, lɛnɛ oyo epakolami langi ya mwa motane-bulé, biloko oyo epakolami langi ya motane makasi mpe lini ya kitoko. 26 Mpe basi nyonso oyo bayebaki mosala malamu, oyo motema etindaki bango, bazalaki kosala nsinga na nsuki ya ntaba.

27 Mpe bankumu bazalaki koya na mabanga ya onikisi ná mabanga mosusu ya kotya na efode ná libenga ya ntolo,+ 28 ná balsame ná mafuta mpo na kongɛngisa mpe mpo na mafuta mosantu+ mpe mpo na mpaka ya malasi ya nsolo kitoko.+ 29 Mobali nyonso ná mwasi nyonso oyo mitema ezalaki kotinda bango bamemaki eloko mpo na mosala oyo Yehova apesaki mitindo na nzela ya Moize ete esalema; Bayisraele bazalaki komemela Yehova likabo ya bolingo.+

30 Bongo Moize alobaki na Bayisraele ete: “Talá, Yehova aponi Bezalele mwana ya Uri mwana ya Hure na libota ya Yuda.+ 31 Atondisi ye na elimo ya Nzambe, apesi ye bwanya, mayele, mpe boyebi ya misala ya mabɔkɔ ya lolenge nyonso, 32 mpo na kosala misala ya koyema, mpo na kosala na wolo, palata, mpe kwivre, 33 mpo na kokata mabanga mpe kokangisa yango, mpo na kosala biloko ya lolenge nyonso ya koyema na mabaya. 34 Mpe Nzambe apesi ye ná Oholiabe+ mwana ya Ahisamake na libota ya Dani, makoki ya koteya basusu. 35 Atondisi bango na mayele ya mosala*+ mpo na kosala mosala nyonso ya moto oyo ayebi malamu misala ya mabɔkɔ, ya moto oyo asalaka mayemi na bansinga mpe ya moto oyo asalaka mayemi na bilamba na nsinga ya bulé, na lɛnɛ oyo epakolami langi ya mwa motane-bulé, na biloko oyo epakolami langi ya motane makasi, na lini ya kitoko, mpe ya mosali-bilamba. Mibali yango bakosala misala ya ndenge nyonso mpe bakobongisa misala ya ndenge nyonso.