Ruta
1 Na mikolo ya basambisi,*+ nzala ekɔtaki na mokili yango. Mobali moko autaki na Beteleme,+ na Yuda, mpe akendaki kofanda mopaya na mokili* ya Moabe.+ Akendaki elongo na mwasi na ye mpe bana na ye mibale ya mibali. 2 Nkombo ya mobali yango ezalaki Elimeleke,* nkombo ya mwasi na ye ezalaki Naomi,* mpe nkombo ya bana na ye ezalaki Mahalone* ná Kilione.* Bazalaki bato ya Efrata ya Beteleme, na Yuda. Bakómaki na mokili ya Moabe mpe bafandaki kuna.
3 Nsima ya mwa ntango, Elimeleke mobali ya Naomi akufaki, mpe atikaki Naomi ná bana yango mibale. 4 Na nsima, bana yango ya mibali babalaki basi ya Moabe; moko nkombo na ye Orpa, mpe mosusu nkombo na ye Ruta.+ Bafandaki kuna soki mbula zomi. 5 Na nsima bana yango mibale, Mahalone ná Kilione mpe bakufaki. Bongo Naomi atikalaki ye moko: mobali te, bana mpe te. 6 Na yango azwaki ekateli ya kolongwa na mokili ya Moabe, ye ná basi ya bana na ye, mpe kozonga na mboka na ye mpo ayokaki ete Yehova atyeli bato na ye likebi mpe apesi bango bilei.*
7 Alongwaki na esika oyo azalaki kofanda, mpe basi ya bana na ye bakendaki elongo na ye. Wana bazalaki kotambola na nzela mpo na kozonga na mokili ya Yuda, 8 Naomi alobaki na basi ya bana na ye boye: “Bózonga, bókende, moto na moto na ndako ya mama na ye. Tiká Yehova amonisela bino bolingo ya sembo,+ kaka ndenge bino bomonisaki yango epai ya mibali oyo basili kokufa mpe epai na ngai. 9 Tiká Yehova asalisa mokomoko na bino azwa* esika ya kopema, moto na moto na ndako ya mobali na ye.”+ Bongo ayambaki bango, mpe balelaki na mongongo makasi. 10 Bazalaki koloba na ye: “Te, tokokende elongo na yo epai ya bato na yo.” 11 Kasi Naomi alobaki: “Bózonga, bana na ngai. Mpo na nini bolingi kokende elongo na ngai? Nakoki nde kobota lisusu bana mibali oyo bakoki kokóma mibali na bino?+ 12 Bózonga, bana na ngai. Bókende, mpo nakoki kobala lisusu te mpo nakómi mobange mingi. Ata soki nazalaki na elikya ya kozwa mobali na butu ya lelo mpe kobota bana mibali, 13 bokozela nde bango tii bakokola? Bokoboya kobala lisusu kaka mpo na bango? Te, bana na ngai, nazali na mawa* mingi mpo na bino, mpo lobɔkɔ ya Yehova ebalukeli ngai.”+
14 Balelaki lisusu na mongongo makasi; nsima na yango Orpa ayambaki mama-bokilo na ye mpe azongaki. Kasi Ruta, akangamaki na ye. 15 Bongo Naomi alobaki na Ruta: “Talá! Mbanda na yo, oyo mobali akufá lokola yo, azongi epai ya bato na ye mpe epai ya banzambe na ye. Zongá elongo na ye.”
16 Kasi Ruta alobaki: “Kobondela ngai te ete nasundola yo, nazonga, natika yo; mpo epai okokende, ngai mpe nakokende, epai okolala, ngai mpe nakolala. Bato na yo bakozala bato na ngai, mpe Nzambe na yo, Nzambe na ngai.+ 17 Epai okokufa, ngai mpe nakokufa, mpe kuna nde bakokunda ngai. Tiká Yehova apesa ngai etumbu ya makasi* soki natiki eloko mosusu, longola kaka liwa, ekabola ngai ná yo.”
18 Ntango Naomi amonaki ete Ruta atingamaki kaka mpo akende elongo na ye, atikaki kopekisa ye. 19 Mpe bango mibale bakobaki nzela na bango tii na Beteleme.+ Ntango kaka bakómaki na Beteleme, engumba mobimba eninganaki mpo na bango, mpe basi bazalaki koloba: “Oyo Naomi?” 20 Azalaki koloba na basi yango: “Bóbenga ngai Naomi* te. Bóbenga ngai Mara,* mpo Mozwi-ya-Nguya-Nyonso akómisi bomoi na ngai bololo mpenza.+ 21 Nazalaki na nyonso ntango nakendaki, kasi Yehova azongisi ngai mabɔkɔ mpamba. Mpo na nini bozali kobenga ngai Naomi, awa Yehova atɛmɛli ngai mpe Mozwi-ya-Nguya-Nyonso ayeiseli ngai mpasi?”+
22 Ndenge wana nde Naomi autaki na mokili ya Moabe+ mpe azongaki elongo na Ruta Momoabe, mwasi ya mwana na ye. Bakómaki na Beteleme na ebandeli ya eleko ya kobuka ɔrje.+