Mokili mozangi bitumba—okoki komona yango
1-4. (a) Mpo na nini esengeli kozwa ekateli kozanga koumela? (b) Nini esengeli mpo na kozwa ekateli ya malamu?
ESAKWELI oyo ya ntina ya Yisaya mokapo 2 ezali solo kozwa kokokisama na yango na mikolo na biso. Mokili mozangi bitumba mosili kobelema. Bamilió ya Batatoli ya Yehova kati na mabelé mobimba basili kotula “mipanga na bango ete mizala bitimweli mpe makɔnga na bango ete mazala bikateli na matiti.” Atako bauti na mabota mingi mpe na mimeseno mikeseni, basili koyekola kolónga makanisi mabe na ntina na bamposo mosusu mpe koyina oyo ezalaki na bango liboso, mpe basili koyekola banzela ya kimya ya Nzambe na solo, Yehova. (Yisaya 2:4) Na ntina na etelemelo na bango ya bato balingi kimya, basili kozwa, elongo na Bayuda, minyoko na káa ya bakangami (1933-1945).
2 Atako bilikya mpo na mikolo mizali koya ezali lokola pole oyo ezali kongenga, ezali bongo te mpo na bato nyonso. Yehova akozela te kozanga nsuka ete bato nyonso batula mipanga na bango ete mizala bitimweli. Ezali na baoyo baboyi kosala bongo. Mokomi na Nzembo azali komonisa kozanga ntembe eloko oyo ezali kozela bato motindo wana: “Mpo ete basáli na mabe bakosuka, nde baoyo bakozelaka [Yehova] bakosangola mokili. Nsima na mwa ntango moke, moto na mabe akozala lisusu te; okotala esika na ye, nde akomonana te.” (Nzembo 37:9, 10) Ee, mosika te, Yehova ‘akotya nsuka na bitumba na mabelé mobimba.’—Nzembo 46:8-10 (Nz. 46:9-11, Liloba lya Nzambe).
3 Bobele esakweli wana ya Yesu oyo epesaki bilembo ya mikolo na nsuka ezali lisusu komonisa ete mosika te Nzambe akotya nsuka na makambo mabe. Yesu alobaki: “Libota oyo [libota ya 1914 oyo emonaki nsuka ya “ntango epesamaki”] ekoleka te kino ekobima makambo oyo nyonso.” (Matai 24:34; Luka 21:24) Libota yango lizali pene na koleka. Ee, sikawa ezali ntango mpo na bato nyonso ete bazwa ekateli! Sikawa, na mikolo oyo ya nsuka, to na “nsuka ya ekeke,” tosengeli kopona soki ‘tokokende na ngomba na [Yehova]’ mpo ete ‘toteyama na banzela na Ye’ to soki tokokende te. Kasi lokola tosili komona yango kati na mwa búku oyo, ezali na makambo masengami mpo na koyekola koyeba Nzambe ya solo, ‘koteyama na banzela na Ye, kotambola na bisika bikokendaka Ye.’ (Yisaya 2:2, 3) Kosala yango ezali te bobele kotanga makambo mazali na mwa búku oyo to koyekoláká mwa ntango moke. Esengi nde koteyama mozindo oyo ekozala na bopusi likoló na banzela nyonso ya bomoi na biso. Okolinga koyeba makambo mingi na ntina na Nzambe na kimya?
4 Batatoli ya Yehova bazali pene na kosalisa yo na kosala bolukiluki ya solo. Tozali kolendisa yo na kolanda kotalela likambo oyo na motuya mingi, mpo ete yo mpe okoka kozala kati na baoyo ‘bazali kokende na ngomba na Yehova, koteyama na banzela na Ye.’ Mpo na kozwa lisalisi mingi, luka Batatoli ya Yehova na Ndako ya Bokonzi oyo ezali pene na esika ofandi, to komá mokanda epai na babimisi ya mwa búku oyo. (Talá lokasa 32.) Mbano ya kosepelisa oyo ekozwama emonisami malamu na mosakoli Mika ete: “Bakofanda mpe na nse, moto na moto na nse na miwiti na ye mpe na nzeté na ye na mosuke, moto moko akobangisa bango te.” Tika ete yo mpe ozala kati na baoyo ‘bazali kotambola na nkombo na [Yehova] . . . libela na libela’ kati na mokili mozangi bitumba!—Mika 4:4, 5.