Sepelá na Liloba ya Nzambe

ESENGO ezali na moto oyo “asepelaka na mobeko ya Yehova.” Moto yango atángaka Liloba ya Nzambe “na mongongo ya nse butu na moi.” (Nz. 1:1, 2, NW) Yo mpe ozalaka na esengo ya ndenge yango? Ndenge nini okoki kosala ete Liloba ya Nzambe epesa yo esengo mingi lisusu?

Kosuka kaka na kotánga maloba te, kasi salá lokola ozali mpenza komona makambo oyo ozali kotánga. Salá lokola nde ozali koyoka mingongo ya bato oyo bazali kolobela bango. Ntango ozali kotánga mikapo ya liboso ya Biblia, yoká ndenge Yehova ye moko azali komonisa mokemoke makambo oyo asali mpo na kokómisa mabele esika kitoko mpo na moto. Yoká ndenge azali koyebisa Mwana na ye, Mosali Monene, ete ntango ekoki mpo na kozalisa bato ya liboso. Salá lokola ozali komona likambo yango: Adama na Eva batomboki, Nzambe asambisi bango mpe, na nsima, abengani bango na Paladiso. (Gen., mok. 1 tii 3) Ntango ozali kotánga ete mongongo moko euti na likoló mpe elobi ete Yesu Klisto azali Mwana ya Nzambe, molingami, ye oyo Nzambe atindaki na mabele ete akufa mpo na bato, kanisá nsɔmɔ oyo okokaki koyoka soki ozalaki wana. (Mat. 3:16, 17) Kanisá naino ndenge ntoma Yoane amiyokaki ntango Yehova azalaki koloba na ye: “Nazali kosala biloko nyonso biloko ya sika.” (Emon. 21:5) Ya solo, kotánga Liloba ya Nzambe na lolenge wana ekoki kopesa yo esengo mpenza!

Kotika te kotánga Biblia, yango ekosalisa yo oyeba ete Yehova azali moto oyo aleki na lokumu mpe azali na nguya ya kokamwa. Okoyoka mpenza mposa makasi ya kozala moninga ya Moto oyo alingaka biso, ayokelaka biso mawa, asalisaka biso soki tozali ntango nyonso kosala mokano na ye na komikitisa mpenza mpe amonisaka biso ndenge nini tokoki kolonga na makambo nyonso oyo tozali kosala.​—Yos. 1:8; Nz. 8:1; Yis. 41:10.

Soki ozali kolekisa ntango mingi na kotánga Biblia, okosepela mpe mingi wana okoyeba malamumalamu mokano ya Nzambe mpo na yo. Kasi esengo na yo ekosuka kaka wana te. Ntango makambo oyo ozali kotánga ekosalisa yo na kosilisa mikakatano na yo na mayele nyonso, okomiyoka lokola mokomi ya nzembo oyo alobaki boye: “[Makambo oyo ozongelaka, NW] ezali na kokamwa; bongo molimo na ngai ezali kobatela yango.” (Nz. 119:129) Yo mpe okosepela ntango okokanga ntina ya mitinda ya Makomami oyo ekosalisa yo obongola makanisi mpe bamposa na yo mpo eyokana na nzela ya Nzambe.​—Yis. 55:8, 9.

Biblia ezali na malako ya bizaleli malamu oyo ebatelaka biso na ntango ya mpasi mpe elakisaka biso nzela ya malamu. Ntango tozali kotánga yango, tozali komona Yehova lokola Tata oyo ayebi mikakatano oyo tokoki kokutana na yango soki totiki bamposa ya nzoto na biso ya kozanga kokoka etambwisa biso. Alingi te ete tónyokwama na makambo mabe oyo ezangaka te kokómela bato oyo bazali kotyola mitinda na ye ya bizaleli malamu. Azali komibanzabanza mpo na biso mpe alingi ete tózala na bomoi ya malamu koleka. Kotánga Liloba na ye ezali kosalisa biso tómona mpenza ete topambwami, mpamba te ye azali Nzambe mpe Tata na biso ya likoló.

Mokomi ya nzembo alobaki boye mpo na moto oyo atángaka Liloba ya Nzambe mokolo na mokolo: “Likambo nyonso akosala ekolonga.” (Nz. 1:3, NW) Ya solo, atako tozangi kokoka, atako tozali kobika na mokili mabe ya Satana mpe atako Zabolo azali kosala milende mpo na kolya biso, soki tozali kotánga mbala na mbala mpe kosalela makambo oyo ezali na Liloba ya Nzambe, yango ekosalisa biso tólonga na makambo nyonso etali boyokani na biso na Yehova.

Lokola mokili oyo ya kala ezali ntango nyonso komeka biso, soki mokolo na mokolo, tozali koyekola mpo na koyeba makanisi ya Mozalisi, ata mpo na ntango moke, yango ekoki kolendisa biso. Bato mosusu oyo bakɔtaki bolɔkɔ mpo na kondima na bango bazalaki kotánga kaka mwa maloba ya bavɛrsɛ oyo mbala mosusu bazalaki kokuta na bazulunalo ya mokili. Bazalaki kokata eteni ya zulunalo yango, kokanga bavɛrsɛ yango na motó mpe komanyola likoló na maloba na yango. Yehova apambolaki milende na bango mpamba te, basalaki oyo bakokaki kosala na ntango wana mpo na kozwa boyebi ya Liloba ya Nzambe. (Mat. 5:3) Nzokande, mingi kati na biso, tozali na bolɔkɔ te. Tosengeli kokanisa te ete soki tozali kotánga vɛrsɛ moko ya Biblia mbangumbangu mpe mbala moko na mokolo, yango ekosala likamwisi na bomoi na biso. Kasi tokozwa mapamboli soki tozali kotalela kotánga Biblia mokolo na mokolo ete ezali na ntina mingi koleka makambo mosusu, soki tozali komanyola likoló na yango mpe tozali kosalela yango na bomoi na biso.

Ata tobongisi programɛ na biso malamu mpenza, ekoki kokóma ete ebeba. Soki esalemi bongo, tosengeli koluka kotya makambo ya ntina mingi na esika ya liboso. Na ndakisa, tokoki te kaka mpamba boye koboya komɛla mai mokolo moko to mikolo mibale. Ndenge moko mpe, ezala likambo nini tozali kosala mokolo na mokolo, tosengeli kosomba ntango mpo na komɛla mai ya solo oyo ekopesa biso makasi.​—Mis. 17:11.

Osilá kotánga Biblia mobimba? Bato mosusu balɛmbaki nzoto kaka ntango bakanisi ete basengeli kotánga banda Genese tii Emoniseli. Yango wana, bato mingi oyo balingaki kotánga Biblia mobimba babandaki libosoliboso kotánga Makomami ya Grɛki ya boklisto. Mpo na nini? Ekoki kozala mbala mosusu ete, lokola balingi kolanda matambe ya Klisto, bamonaki ete ekozala mpasi te mpo báyeba ndenge nini bakoki kosalela mateya ya mikanda wana ya Biblia na bomoi na bango. To ekoki kozala ete bamonaki ete Makomami ya Grɛki ya boklisto ezali na makambo mingi te ya kotánga, mpo ezali kaka mwa ndambo moke ya Biblia (1/4). Kasi ntango basilisaki kotánga mikanda yango 27, batángaki mpe mikanda 39 ya Makomami ya Liebele mpe basepelaki na yango mingi. Ntango basilisaki kotánga Makomami ya Liebele, bakómaki na momeseno ya kotánga Biblia mokolo na mokolo. Mpe balandaki mbala moko kotánga lisusu Makomami ya Grɛki ya boklisto mpo na mbala ya mibale, mpe basalaka bongo mbala na mbala. Tiká ete yo mpe okóma na momeseno ya kotánga Liloba ya Nzambe mokolo na mokolo na bomoi na yo mobimba.

Na libota na bino to na lisangá na bino, bozali na moto moko oyo ayebi kotánga te? Mpo na nini te kosɛnga ye ete otángelaka ye Biblia mokolo na mokolo? Okozwa matomba, ye mpe akozwa matomba soki azali komanyola likoló na makambo oyo azali koyoka mpe soki na nsima, azali kosalela yango na bomoi na ye.​—Emon. 1:3.

Na nsima, okolinga mbala mosusu kotalela makambo ya ntina oyo etali botángi na yo ya Biblia. Yango ekoki kosalisa yo oyeba malamu mpenza boyokani oyo ezali kati na biteni ndenge na ndenge ya Biblia. Soki Biblia na yo ezali na mitindami (références), yango ekoki kosalisa yo oyeba makambo ndenge na ndenge oyo esalemaki liboso mpe ekoki kotinda yo na mikapo oyo ezali na masolo oyo ekokani na likambo oyo ozali kotánga. Mitindami yango ekoki kosalisa yo oyeba makambo oyo esalaki ete bákoma nzembo ndenge na ndenge mpe mikanda ya bantoma ya Yesu Klisto. Mokanda Étude perspicace des Écritures ezali koyebisa makambo ebele etali bato, bisika mpe bizaleli oyo Biblia elobeli. Ezali na bitanda oyo ezali kobenda likebi na biso na kokokisama ya bisakweli ya Biblia, etángi nkombo ya bakonzi mpe basakoli oyo bazalaki na bomoi na eleko moko mpe epesi badati oyo bakanisi ete makambo mingi ya Biblia esalemaki.

Soki ozali komanyola likoló na makambo oyo ozali koyekola, okoyeba ntina ya makambo mosusu oyo ekómelaki basaleli ya Nzambe. Okoyeba mpe ntina oyo Yehova asalelaki bato na ye likambo boye to boye. Okoyeba mpenza ndenge Yehova atalelaka misala ya baguvɛrnɛma, ya bikólo mpe ya moto mokomoko. Yango ekosalisa yo oyeba malamu mpenza makanisi na ye.

Masolo ya Biblia ekosepelisa yo mingi koleka soki osali lokola nde ozali kotala bisika oyo makambo yango esalemaki. Bakalati ya bamboka oyo elobelami na Biblia ezali komonisa ndenge mokili yango ezalaki mpe bantaka oyo ekabolaki bamboka yango. Na ndakisa, Bayisalaele bakatisaki Mai Motane na esika nini? Mokili ya Ndaka ezalaki monene ndenge nini? Bisika nini Yesu atambolaki ntango azalaki kosala mosala na ye awa na mabele? Paulo amonaki nini na mobembo na ye mokomoko ya misionɛrɛ? Bakalati ya bamboka wana mpe makambo mosusu ndenge na ndenge ekosalisa yo omona mpenza ete makambo oyo ozali kotánga ezali solo. Esika nini okokuta bakalati ya bamboka oyo elobelami na kati ya Biblia? Okokuta bakalati mosusu na Biblia Makomami Mosantu​—Libongoli ya Mokili ya Sika. Bavolimi mibale ya mokanda Étude perspicace ezali na kalati soki 70 mpe na nsuka ya volimi na yango ya liboso, okokuta Index moko ya bakalati yango. Mpo na komona bakalati mosusu, salelá Index des publications de la Société Watch Tower. Soki ozali na mikanda oyo totángi awa te, salelá bakalati oyo ezali kobima na Linɔ́ngi ya Mosɛnzɛli mpamba te yango ekosalisa yo na botángi na yo ya Biblia mokolo na mokolo.

Na Makomami ya Liebele, Mokonzi Davidi akumisaki mpenza Yehova na maloba oyo: “Ɛ Nzambe, [makanisi, NW] na yo epai na ngai ezali eloko ya motuya mingi! Motuya na yango ezali monene boni!” (Nz. 139:17) Na Makomami ya Grɛki ya boklisto, ntoma Paulo akumisaki Yehova mpamba te “angɛngi na mitema na biso mpo na kongɛngisa bango na boyebi ya nkembo ya Nzambe na nzela ya elongi ya Klisto.” (2 Kol. 4:6) Davidi azalaki na bomoi bikeke mingi liboso ya Paulo, nzokande bango nyonso mibale basepelaki mpenza na Liloba ya Nzambe. Yo mpe okoki kozala na esengo wana soki ozali kosomba ntango mpo na kotánga makambo nyonso oyo Yehova apesi yo na kati ya Liloba na ye epemami.