Lisolo ya nsuka ná baoyo bakozwa batisimo

Mbala mingi, bato bazwaka batisimo na mayangani ya mike mpe ya minene ya Batatoli ya Yehova. Na nsuka ya diskur ya batisimo, molobi akosɛnga baoyo bakozwa batisimo bátɛlɛma mpe bápesa biyano na mituna mibale oyo elandi, na mongongo makasi:

1. Osili kobongola motema, komipesa na Yehova na libondeli, mpe ondimi ete Yehova akopesa biso lobiko na nzela ya Yesu Kristo?

2. Okangi ntina ete awa ozali kozwa batisimo ozali kokóma Motatoli ya Yehova mpe kokɔta na ebongiseli na ye?

Soki baoyo bakozwa batisimo bayanoli ɛɛ na mituna wana, yango emonisi ete ‘balobi polele,’ bandimi lisiko mpe ete basili komipesa mobimba na Yehova. (Rom. 10:9, 10) Yango wana, ekozala malamu ete moto oyo akozwa batisimo akanisa na mituna wana liboso mpe abondela mpo na yango, mpo akoka kopesa biyano oyo eyokani na makambo oyo andimi mpenza na motema na ye mobimba.

Osili komipesa na Yehova na libondeli, mpe osili kolaka ye ete okosambela kaka ye mpe ete kosala mokano na ye ekozala likambo oyo eleki ntina na bomoi na yo?

Ondimi mpenza na motema mobimba ete osengeli kozwa batisimo soki kaka libaku emonani?

Bilamba ya ndenge nini ebongi mpo na batisimo? (1 Tim. 2:9, 10; Yoa. 15:19; Flp. 1:10)

Tosengeli kolata na ‘kolekisa ndelo te mpe kozala na makanisi ya malamu’ mpo na komonisa ete tozali na “ezaleli ya kokangama na Nzambe”. Na yango, baoyo bakozwa batisimo basengeli te kolata elamba oyo basalá mpo na kosakana na mai (maillot de bain) oyo ezali kotika nzoto libándá to bilamba oyo bakomakomá makambo. Basengeli kolata bilamba ya malamu, ya pɛto, ya mindɔndɔ te mpe oyo ebongi na libaku yango.

Ezaleli nini moto asengeli kozala na yango ntango azali kozwa batisimo? (Luka 3:21, 22)

Batisimo ya Yesu ezali ndakisa oyo bakristo basengeli kolanda lelo oyo. Yesu ayebaki malamu ete batisimo ezali likambo moko ya lisɛki te, mpe amonisaki yango na ezaleli na ye mpe na misala na ye. Yango wana, esika ya batisimo ezali te esika ya kosala masɛki, ya kosakana, ya kobɛta mai, to kosala makambo mosusu oyo ekokitisa valɛrɛ ya molulu yango. Ndeko oyo akómi mokristo sika asengeli te kosala makambo lokola nde azwi elonga monene. Atako batisimo ezali likambo ya esengo, tosengeli komonisa esengo yango na ndenge oyo ebongi.

Ndenge nini koyangana na makita pɔsɔ na pɔsɔ mpe komipesa na makambo ya lisangá ekosalisa yo okokisa ndai na yo ya komipesa na Yehova?

Ata nsima ya kozwa batisimo, mpo na nini ekozala na ntina mingi ete ozala ntango nyonso na programɛ malamu ya koyekola yo moko mpe ya kosakola sanza na sanza?

MALAKO MPO NA BANKULUTU YA LISANGÁ

Ntango mosakoli oyo azwi naino batisimo te ayebisi mposa na ye ya kozwa batisimo, esengeli kolendisa ye atalela malamumalamu “Mituna mpo na baoyo balingi kozwa batisimo,” oyo ezali na nkasa 185-207 ya buku oyo. Bokoyebisa ye atya likebi na “Liyebisi epai ya mosakoli oyo azwi naino batisimo te,” oyo ebandi na lokasa 182, oyo elimboli ndenge oyo akoki kobongisa masolo na ye ná bankulutu. Ndenge ekomami wana, mosakoli oyo alingi kozwa batisimo akoki kosalela mwa makambo oyo akomaki na papye mosusu mpe akoki kofungola buku na ye mpe mbala mosusu kotalaka na kati na ntango ya masolo wana. Kasi, ntina ezali te ete moto mosusu atalela naino mituna yango elongo na ye liboso asolola na bankulutu.

Mosakoli nyonso oyo alingi kozwa batisimo asengeli koyebisa mokambi-misala ya lisangani ya bankulutu. Soki mosakoli yango asilisi kotánga “Mituna mpo na baoyo balingi kozwa batisimo,” mokambi-misala ya lisangani ya bankulutu akotuna moto yango soki asili komipesa na Yehova na libondeli mpo na kosala mokano na ye. Soki moto yango asili kosala libondeli ya komipesa, wana mokambi-misala ya bankulutu akozwa bibongiseli mpo ete bankulutu mibale bátalela elongo na ye “Mituna mpo na baoyo balingi kozwa batisimo.” Nkulutu moko akotalela na ye eteni 1, nkulutu mosusu eteni 2. Ntina ezali te ete bózela naino bózwa liyebisi ete liyangani ya moke to ya monene ekómi pene mpo bótalela mituna yango na moto.

Bokoki kotalela biteni yango mibale, mokomoko na ngala na yango na boumeli ya ngonga moko, ata soki ezali mabe te koleka ngonga moko soki esengeli. Bosengeli kobanda mpe kosukisa lisolo yango na libondeli. Ezala mosakoli to bankulutu oyo bakosolola na ye, basengeli te kotalela mituna yango likolólikoló. Bankulutu oyo bazali na mokumba ya kosolola na moto yango basengeli kotya lisolo yango na esika ya liboso na programɛ na bango.

Ekozala malamu kotalela mituna yango elongo na moto mokomoko oyo alingi kozwa batisimo. Kasi ebongi te kosangisa esika moko bato mingi oyo balingi kozwa batisimo mpo na kotalela mituna yango elongo na bango. Soki bankulutu bapesi moto oyo alingi kozwa batisimo likoki ya kopesa biyano na motuna mokomoko, bakoyeba mpenza boyebi nini azali na yango mpe bakozala na mokakatano te mpo na koyeba soki akoki mpo na kozwa batisimo. Longola yango, soki bazali kotalela kaka ye moko, moto oyo alingi kozwa batisimo akokakatana te kobimisa makanisi na ye. Nzokande, bokoki kotalela mwasi ná mobali na ye esika moko.

Soki moto oyo alingi kozwa batisimo azali mwasi, esengeli kosolola na ye na esika oyo bato mosusu bakoki komona bino, kasi bakoki koyoka te makambo oyo bozali kosolola. Soki esengeli kozala na moto mosusu, moto yango asengeli kozala nkulutu to mosaleli na misala, na kotalela eteni oyo bokotalela, ndenge emonisami na paragrafe oyo elandi.

Na lisangá oyo bankulutu bazali mingi te, basaleli na misala oyo babongi, oyo bayebi kotalela makambo malamu mpe bazali na bososoli bakoki kotalela na moto mituna ya batisimo oyo ezali na “Eteni 1: Bindimeli ya bakristo.” Kaka bankulutu nde basengeli kotalela na ye “Eteni 2: Bomoi ya bakristo.” Soki lisangá ezali na bandeko mibali mingi te oyo babongi, bakoki kosolola na mokɛngɛli ya zongazonga mpo na kotala soki bankulutu ya lisangá oyo ezali pene bakoki kosalisa.

Soki moto oyo alingi kozwa batisimo akómi naino mokóló te na kotalela mibeko ya Leta, moboti to baboti na ye oyo bazali Batatoli basengeli kozala elongo na mwana na bango ntango bazali kosolola na ye. Soki baboti bakokoka te kozala elongo na ye, boye bankulutu mibale (to nkulutu moko ná mosaleli na misala, soki bakotalela Eteni 1) nde basengeli kosolola na ye.

Bankulutu basengeli kotala mpenza soki moto oyo alingi kozwa batisimo azali na boyebi oyo ekoki ya mateya ya moboko ya Biblia. Longola yango, basengeli koluka koyeba soki moto yango azwaka solo na lisɛki te mpe soki amemyaka mpenza ebongiseli ya Yehova. Soki moto yango akangi ntina te ya mateya ya moboko ya Biblia, bankulutu bakozwa bibongiseli ya kopesa ye lisalisi oyo esengeli mpo azwa batisimo na mbala ya nsima. Mpo na basusu, ekoki kosɛnga kotikela bango naino ntango mpo bámonisa ete balingi mosala ya kosakola to bámonisa ete batosaka bibongiseli oyo ezwamaka na lisangá. Bankulutu basengeli kosalela na mayele mpenza ngonga oyo bakolekisa na lisolo na bango mpo na kososola mpenza soki moto yango abongi kozwa batisimo. Atako mituna mosusu ekoki kozwa ntango mingi koleka mituna mosusu, bosengeli kotalela mituna nyonso.

Nsima ya lisolo ya mibale, bankulutu oyo bazwaki mokumba ya kosolola na moto oyo alingi kozwa batisimo bakokutana mpo na koyeba soki esengeli kondima moto yango azwa batisimo to te. Bankulutu bakotalela bomoi oyo moto azalaki na yango liboso, makoki na ye mpe makambo mosusu oyo etali ye. Bakoluka koyeba soki moto yango amipesi mpenza na Yehova mpe akangi ntina ya mateya ya moboko ya Biblia. Bolingo mpe lisalisi na bino ekopesa baoyo bazali kozwa batisimo nzela ya kokóma bakristo oyo babongisami mpo na kosakola nsango malamu.

Na nsima, nkulutu moko to bankulutu mibale oyo basololaki na moto yango bakokutana na ye mpe bakoyebisa ye soki akoki kozwa batisimo to te. Soki akozwa batisimo, bankulutu basengeli kotalela elongo na ye “Lisolo ya nsuka na baoyo bakozwa batisimo,” oyo ezali na nkasa 206-207. Soki moto oyo akozwa batisimo asilisi naino te koyekola buku Sepelá na bomoi libela na libela!—Boyekoli ya Biblia, bankulutu basengeli kolendisa ye asilisa yango nsima ya batisimo. Bóyebisa moto yango ete bakokoma dati ya batisimo na ye na Fishɛ ya lisangá mpo na mosakoli oyo ezali na nkombo na ye. Bókundwela ye ete bankulutu bakosala bongo mpo ebongiseli ya Yehova eyeba ndenge nini Batatoli ya Yehova bazali kokokisa mosala na bango na mokili mobimba. Yango ekosalisa ye asangana na makambo oyo lisangá ebongisi mpe azwa lisalisi oyo esengeli epai ya bankulutu. Lisusu, bankulutu bakoki kokundwela basakoli ya sika ete makambo oyo etali bango ekosalelama na kolanda mibeko ya kobomba makambo ya Batatoli ya Yehova, oyo ezali na jw.org. Lisolo yango esengeli koumela miniti koleka zomi te.

Mbula moko nsima ya batisimo ya moto, bankulutu mibale basengeli kokutana na ye mpo na kolendisa ye mpe kopesa ye makanisi oyo ekosalisa ye akola na elimo. Moko ya bankulutu yango asengeli kozala mokɛngɛli ya etuluku na ye ya mosala ya kosakola. Soki ndeko yango akómi naino mokóló te na kolanda mibeko ya Leta, mpe soki moboti to baboti na ye bazali Batatoli ya Yehova, basengeli kozala elongo na ye. Lisolo yango esengeli kosalema na esengo mpe esengeli kolendisa. Bankulutu bakolobela ndenge azali kokola na elimo mpe bakopesa ye toli oyo akoki kosalela mpo akoba koyekola ye moko mpe kotánga Biblia mokolo na mokolo, kosala losambo na kati ya libota pɔsɔ na pɔsɔ, koyangana na makita mpe kopesa biyano, mpe kosakola pɔsɔ na pɔsɔ. (Ef. 5:15, 16) Soki asilisi naino te koyekola buku Sepelá na bomoi libela na libela!—Boyekoli ya Biblia, bankulutu basengeli kozwa bibongiseli mpo mosakoli mosusu ayekola na ye. Bankulutu basengeli mpenza kopesa ye longonya na motema mobimba. Kopesa ye toli mpe makanisi na likambo moko to mibale ekoki kozala malamu.