Totalela likabo kitoko ya bomoi na motuya mingi

BOMOI​—oyo nde eloko na motuya! Soki yango te, mbɛlɛ tokoki kosala eloko moko te. Soki ebungi, ekoki kopesama lisusu te na nzela ma mayele na bato. Soki bomoi na biso ezali na likámá, tosalaka nyonso ekoki na biso mpo na kobikisa yango. Na ntango na mpasi, bato mosusu nkutu balukaka lisalisi lileki oyo ya bato.

Tala likambo oyo lizali kokundwela biso lisoló moko ya Biblia na ntina etali masuwa moko maningisamaki na mopepe makasi na mai monene. Na ntango masuwa malingaki kozinda, “basali na masuwa babandaki kobanga mpe moto na moto abelelaki nzambe na ye mpo na kozwa lisalisi.” Na nsima, bango nyonso babelelaki Nzambe ya solo, ete: “Ɛ Jéhovah, soki olingi, tika te ete tokufa!” Lisoló ya Biblia liyebisi lisusu ete: “Babandaki kobwaka biloko bizalaki na masuwa kati na mai monene, mpo ete ezala pɛpɛlɛ.”​—Yona 1:4-6, 14; Tala Misala 27:18, 19.

Na milende bazalaki kosala mpo na kobikisa bomoi na bango, basali na masuwa wana bazalaki pene na kobwaka biloko oyo bazalaki na yango. Bakoki kokitanya biloko ya mosuni, kasi bomoi te. Mpe ezali mpo ete tolingi mpenza kobatela bomoi na biso, nde tozali kokima makámá. Tobongisaka nzoto na biso, tolatisaka yango mpe toleisaka yango. Tomisalisaka na lopitalo wana ezali biso maladi.

Nzokande, Mopesi na bomoi asɛngi biso te bobele kolanda mposa na biso ya komibatela. Ya solo, bomoi ezali likabo ya motuya mingi lisili kopesamela biso Moto oyo aleki monene na molóngó mobimba. Soki tozali mpenza na botɔndi mpo na likabo mpe mpo na Ye oyo apesaki yango, tosengeli kosepela na bomoi, boye te? Yango esɛngi biso te mpo na komibanzabanza na ntina na bomoi ya bato mosusu?

Tosengeli kokamwa te na komona ete, kati na Mibeko oyo Jéhovah Nzambe apesaki na libota na Yisraele, ezalaki mpe na mitinda na ntina etali kobatela bomoi mpe kolongono malamu na nzoto ya bato mosusu. (Exode 21:29; Deteronome 22:8) Lelo, baklisto basengeli bobele bongo komibanzabanza na ntina na kobatela bomoi na bango. Na ndakisa, soki ozali na bana mike na ndako na yo, otikaka biloko lokola milangi, pɛngɛlɛ to biloko oyo bikoki kozokisa oyo bakoki komela yango to oyo bakoki kosakana na yango mpe komizokisa mpota monene? Bankisi oyo ekoki koboma mpe bankisi ya lopitalo etyami mosika na bana? Soki mai masopani na mabelé, opangwisaka yango na lombangu nyonso mpo na kopɛngola makámá? Osɛnzelaka nokinoki mpo na kobongisa biloko oyo bisalelami na kurá? Opetolaka motuka na yo mbala na mbala? Okumbaka motuka na bokɛngi nyonso? Soki ozali mpenza kotalela bomoi lokola eloko na motuya, okozwa meko ya mayele na makambo motindo oyo.

Ezali mawa na koloba yango, kasi bato mosusu bazali komibanzabanza te ata mpo na bomoi na bango moko. Na ndakisa, lelo oyo, nani ayebi te ete likaya ezali mabe mpo na kolongono na nzoto? Nzokande, bamilió na bato bazali baombo ya momeseno wana, atako bomoi na bango ezali kobeba na ntango nyonso oyo bamelaka milinga oyo mikobomaka. Basusu bamelaka drogue, mpe basusu bamelaka masanga makasi, biloko nyonso oyo bizali mabe mpo na bomoi na bango. SIDA ezali maladi oyo ekobomaka bato mpe oyo nkisi na yango eyebani te. Mbɛlɛ bato mingi bapɛngoli yango na koboyáká pite, kokɔtisa drogue na ntonga mpe kozongisa makila. Oyo nde kozanga kosepela na bomoi!​—Baloma 1:26, 27; 2 Bakolinti 7:1.

Likoki ya kobongwana ezali!

Baoyo balingi Jéhovah, Mozalisi na bango Monene, bazali na ntina eleki malamu ya kotalela bomoi na motuya mingi. Bomoi ezali likabo na ye ya bulee. Na yango, bato yango bazali mpenza kosala mabongwani minene mpo na kotalela yango lokola likabo liuti na Nzambe. Totalela likambo ya Kwaku, molakisi na mboka Ghana. Momeli na masanga makasi, mpe azalaki kobebisa bomoi na ye.

Kwaku azali komikundola ete: “Nazalaki kosɛngisa mwasi na ngai na makasi ete apesa ngai limemya, likambo oyo lizalaki komema biso mbala mingi na koswana mpe na kobunda, mingi mpenza soki nalangwi masanga. Lokola nazalaki komela masanga, nazalaki mbala mingi kozanga mbongo, mpe nazalaki kokokisa bamposa ya libota na ngai te. Yango ezalaki mbala mingi kookisa mwasi na ngai nkanda mingi. Ntango nyonso oyo nazalaki kozanga mosolo, lokola yango ezalaki kosalema mbala mingi, nazalaki kosala nyonso mpo na kokokisa mposa na ngai wana. Mokolo moko, nasalelaki nkutu mosolo oyo banakelasi na ngai bapesaki mpo na kokomisa nkombo na bango na momekano. Nalangwaki mpe nasombelaki lisusu baninga na ngai masanga. Mokolo oyo nasengelaki kozwa etumbu mobɛlɛmaki nokinoki. Soki directeur na ngai akɔtelaki ngai te, mbɛlɛ nabungisaki mosala na ngai.

“Bomoi na ngai ebebaki mpenza. Na ebandeli, naokaki nsɔni, kasi esilaki. Na nsima, nabandaki kolona makanisi ya komiboma, mpamba te nakanisaki ete nakómaka moto oyo azangi ntina na bomoi. Atako bongo, nazalaki kokoka te mpo na kotika masanga. Kasi, mokolo moko na bar, nakɔtaki na koswana moko ezalaki kati na balangwi masanga mpe batobolaki ngai na mbɛli; na ntango yango nazalaki na mawa wana nasosolaki ete, nakobongisa bomoi na ngai mokolo mosusu mpo na mposa ya komela masanga.

“Na boumeli ya ntango nyonso wana, ba Témoins de Jéhovah bazalaki koya mbala na mbala na ndako na biso, mpe bazalaki komeka kolamwisa mposa na biso mpo na Biblia. Ngai mpe mwasi na ngai, bozalaki kokima bango ntango nyonso, mpamba te tozalaki komona bango lokola nde bazalaki kotungisa biso. Kasi, mbala mosusu, nazwaki ekateli ya koyokamela bango na boboto nyonso. Boyekoli ya Biblia efungolaki miso na ngai likoló na elikya kitoko ya kozala na bomoi na seko kati na ebongiseli ya sika na Nzambe. Lokola nazalaki koyekola Biblia elongo na ba Témoins de Jéhovah, botɔndi na ngai epai na Jéhovah, Ye oyo akopesaka biso bomoi mpe mpo na likabo na ye ya bomoi ezalaki kokóla, mpe nakómaki kotalela likabo ya bomoi na motuya mingi; lisusu, nasosolaki motuya ya batoli ya Biblia. Yango elendisaki ngai mingi na kopetola bomoi na ngai. Ezalaki na ngai mpasi mpo na kosala yango, nasengelaki ntango nyonso komipekisa na komeka mwa kopo moke ya [masanga] mpe koboya kotambola elongo na baninga na ngai ya kala. Jéhovah, Ye oyo akoyokaka mabondeli, amonaki ekateli ezalaki na motema na ngai mpe ayokaki ngai.a

“Atako azali Témoin de Jéhovah te, mwasi na ngai azali lelo kosepela mingi na ngai mpe na lingomba na ngai mpo na mabongwani minene oyo azali komona kati na bomoi na ngai mpe na boyokani na biso kati na libala. Baninga na biso ya penepene bazali lisusu koya te mpo na kopekisa bitumba kati na ngai mpe mwasi na ngai. Nazali kosepela na kimya ya elimo oyo nazali na yango sikawa. Solo mpenza, mpo ete bomoi ezala na ntina, esengeli koyeba ete Jéhovah Nzambe azali Ye oyo akopesaka biso bomoi, kozala na likanisi na ye likoló na motuya ya bomoi, mpe kotósa malako na ye likoló na lolenge oyo esengeli kozala na bomoi.”

Bomoi ya seko bolakami na Nzambe

Lokola Kwaku, bankɔto na bato mingi basili kozwa lisalisi ya ba Témoins de Jéhovah mpo na “koláta bomoto na sika oyo bozalisami na mokano na Nzambe kati na boyengebene mpe na bosembo ya solo.” (Baefese 4:24, MN) Bazali kopesa motuya bobele na bomoi na bango ya lelo te, kasi lisusu na elikya ya bomoi ya seko kati na paradis awa na mabelé. Biblia elaki ete kati na Paradis wana esalami na Nzambe, mofandi moko te ya mabelé akooka mpasi euti na nzala, mpo ete “Jéhovah na bibele akobongisa elambo na bilei ya mafuta mpo na mabota nyonso.”​—Yisaya 25:6.

Na mikolo na biso, atako bomoi ezali likabo kitoko, kasi ezali bobele mpo na ntango mokuse. Bato nyonso bakokufaka, mpe liwa ezali mawa oyo ekookisaka mpasi mingi. Komona moto oyo yo olingi mingi kolongwa na bomoi kino na ezalela ya kozanga bomoi kati na nkunda, ezali mpenza likambo na mpasi. Kasi na nsé na Bokonzi na Nzambe, oyo ekoyangelama na Klisto, elaká oyo na Jéhovah ekokokana: “Kufa ekozala lisusu te, na mawa, na kolela, na mpasi, lisusu mpe te; mpo ete makambo na liboso masili koleka.”​—Emoniseli 21:4.

Na eleko wana, likabo ya bomoi likopesama na motindo moleki kitoko. Na nsuka ya bolózi monene awa na mabelé, babiki bakozwa likoki ya kozala na bomoi ya kokoka. Na nsima, Jéhovah Nzambe akopesa lisusu likabo wana kitoko epai na baoyo balali kati na kufa na kosekwisáká bango, elingi koloba na kozongisaka bango na bomoi. (Yoane 5:24, 28, 29) Yango ekolimbola bozongi ya bato oyo tolingi bango mpe bato na kala oyo bazalaki kobanga Nzambe!

Nyonso oyo ezali bobele ndoto mpamba? Te, “mpo ete epai na Nzambe, makambo manso makoki kosalema.”​—Luka 1:37, MN; tala Yobo 42:2.

Lisusu, Jéhovah Nzambe ye moko asili kopesa bato ndanga ete makambo nyonso wana makosalema. Ndenge nini? Na kopesáká moto oyo ye alingaki mingi lokola mbeka, Mwana na ye, Yesu Klisto, mpo na kosikola biso na masumu mpe na liwa. Baloma 8:32 (MN) epesi biso endimiseli oyo ete: “Ye [Jéhovah Nzambe] oyo abómbaki Mwana na ye te, kasi akabi ye mpo na biso nyonso, akoboya nde kopesa biso biloko nyonso mosusu elongo na ye?” Kati na makambo mosusu, Biblia eyebisi biso ete, Nzambe akopetola bato longwa na bizaleli mabe mpe akolongola lolenge nyonso na bokesene mabe mpe mobulu. (Yisaya 11:9) Bomoi ekotalelama lisusu te lokola eloko mpamba.

Lelo oyo, atako ezaleli ya kozanga kokoka, bomoi ekoki kozala kitoko mingi. Tosepelaka te na nsolo kitoko na bilei, mwa mopepe moke na mokolo na molungé makasi, ngomba molai, kokita na moi, mokɔlɔ oyo mozali kotiyola na kimya, nsolo kitoko na fololo, miziki ebɛtami na mongongo ya nsé to koyemba na ndeke? Tokanisa naino mwa moke: bomoi ekozala ndenge nini soki tokoumela na makambo wana libela na libela?

Uta sikawa, ezali te likambo na kozanga mayele na koboya libaku kitoko ya kozala na bomoi ya seko na ntina na bisengo ya ntango mokuse oyo euti na bozwi, na bomoi bozangi ntina? (Tala Baebele 11:25.) Na mayele nyonso, Biblia epesi biso toli mpo na ‘kobika na mikolo mitikali na biso kati na nzoto mpo na bamposa na bato te, kasi mpo na mokano na Nzambe.’ (1 Petelo 4:2, MN) Tolendisi yo na motema na biso mobimba, ee, tosɛngi yo ete osala bongo na koyekoláká Biblia, Liloba na Nzambe, mpe na kosaleláká makambo oyo ozali koyekola. (Yoane 13:17) Na bongo, okozala na boyokani malamu elongo na Jéhovah, Nzambe aleki na malamu mpe na motema mawa, oyo akoki kopesa yo mbano ya bomoi ya seko!

[Maloba na nse ya lokasa]

[Elilingi na lokasa 5]

Lolenge na bomoi na yo emonisi ete ozali kotalela bomoi lokola eloko na motuya?

[Elilingi na lokasa 7]

Mokili ya sika elakami na Nzambe ekopesa biso nzela na kosepela na bisengo ya bomoi ya libela na libela!