Batatoli ya Yehova kati na mokili—Colombie
COLOMBIE ezali mboka moko oyo ekeseni na bamboka mosusu ya Amerika ya Súdi. Mai monene Atlantique mpe mai monene Pacifique esuki na bandelo ya mokili wana oyo mozali likoló na mabelé ya bangomba-mɔ́tɔ. Molungé ya mikili ya molungé oyo ezali na bitando penepene na mai monene mpe na bisika patátálu elɛmbisami na malili likoló na bangomba molai ya Andes, oyo nsɔ́ngɛ́ na yango ezipami na mbula mpɛmbɛ.a
Atako Colombie eyebani malamu mpo na wolo mpe émeraude, bato nde bazali bozwi na yango oyo eleki ntina. Lelo oyo, Yehova azali kotondisa ndako na ye ya elimo na nkembo. Basambeli ya malamu, mpe ya motuya mingi bazali kokende na ndako yango na biteni nyonso ya mabelé, ezala mpe na Colombie.—Hagai 2:7.
Bakambi ya bakompanyi bakamwaki
Mokolo ya Eyenga, Novɛ́mbɛ 1, 1992, ebandisaki bofungoli ya biro mpe ya binyateli ya sika ya filiale ya la Société Watch Tower na Facatativá, na ntáká ya bakilomɛtɛlɛ 42 na nɔ́rdi-wɛ́sti ya Bogotá. Botamboli mpo na kotala filiale ekamwisaki bapaya mingi. Nsima na bozongi na ye na kompanyi epai azalaki kosala, moto moko alendisaki bakambi na yango na mɔ́tɔ nyonso ete bakende kotala ebongiseli moko ‘ya kokamwa mpo na mosala malamu, molɔngɔ́ mpe bizaleli malamu ya basáli.’ Na nsima ntango bakambi kompanyi bayaki, bamonisaki bosepeli mingi mpenza mpe batunaki mituna ebele.
Bakambi kompanyi wana balingaki ete batambwisi ya misala na bango, bakapita-bakambi mpe bakapita—ee, basáli na bango banso—bakende kotala. Poso nyonso, bazalaki kosala manáka mpo na basáli 15 kino 25 mpo na kokende kotala kino ntango oyo basáli nyonso 1 300 ya kompanyi bakokaki komona mosala malamu ya ebongiseli wana.
Basáli na bango mingi batambolaki na bisika ya mosala ya filiale mpe bamonaki video Les Témoins de Jéhovah:un nom, une organisation (Batatoli ya Yehova—Ezali nkombo, ezali mpe Lisangá. Wana bakamwaki na bonene ya ebongiseli mpe na mosala ya kosakola Bokonzi kati na mokili mobimba, bakamwaki lisusu mingi na komona nivo etombwami ya zébi na makambo na tekiniki oyo la Société azali kosalela kati na misala na ye. Na bozongi na bango, mingi kati na bango balobaki ete bazalaki kooka lokola ete ‘bazali kobima na Paladiso mpo na kozonga kati na mokili ya mobulu.’
Solo ekómeli bato ya mitindo nyonso
Bato na mitindo nyonso bazali kokutana na nsango malamu. (1 Timoté 2:3, 4) Na ndakisa, alángá nzembo mpe mokambi moko ya babɛti miziki heavy-metal rock andimaki solo ya Biblia, asalaki mbongwana kati na bomoi na ye, mpe mwa moke na nsima akómaki mobongisi-nzela ya sanza na sanza. Na nsima aponamaki mosaleli ya misala. Bato mingi oyo bazalaki kati na bituluku ya batomboki bayekolaki kotya motema mpe elikya kati na Bokonzi ya Yehova. Bazali lelo oyo kosangana na molende nyonso na kosakola nsango ya mokili ya sika mpe ya kimya.
Baombo ya bilangwiseli mpe batekisi na yango basili mpe kobongwana na solo. Elenge mobali moko oyo azali sikawa Motatoli atambwisaki mosala ya kolóna bilangwiseli mpe laboratware ya cocaïne kati na zámba na boumeli ya mibu mitano liboso ete atika lolenge ya bomoi wana. Asili kozwa bolamu na koyekoláká mpe na kosaleláká mitindá ya Biblia. Na bolɔ́kɔ moko, babomi-bato oyo bakangami bapusamaki mpenza na boyekoli ya mozindo ya Biblia mpe bazali kobondela na molende nyonso ete Yehova alimbisa masumu na bango mpe ete andima bango lokola basaleli
na ye.
Boye bato ya mitindo nyonso bazali koyanola na nsango ya Bokonzi. Na Colombie, mpe bipai mosusu nyonso, Yehova azali kotondisa ndako na ye na nkembo.
[Maloba na nse ya lokasa]
a Mpo na koyeba makambo mosusu, talá Annuaire des Témoins de Jéhovah 1994.
[Etanda na lokasa 8]
MAKAMBO MATALI EKÓLO WANA
Mobu ya mosala 1993
MOTUYA NYONSO YA BASAKOLI: 60 854
BOKOKANISI: Motatoli 1 mpo na bato 558
MOTUYA YA BAYANGANI NA EKANISELI: 249 271
MWAYENE YA BABONGISI-NZELA: 8 487
MWAYENE YA BOYEKOLI YA BIBLIA: 100 927
MOTUYA YA BABATISAMI: 5 183
MOTUYA YA MASANGÁ: 751
FILIALE: FACATATIVÁ
[Elilingi na lokasa 9]
Basáli na filiale mpe bamisionere na 1956
[Elilingi na lokasa 9]
Fɔtɔ́ ya filiale ekangami longwa na mpepo