“Bópusana Penepene na Nzambe, mpe ye akopusana penepene na bino”
Bato bazali kobongwana nsima ya koyekola Liloba ya Nzambe
SOKI omonaki Tony ntango azalaki kokola, olingaki komona elenge mobali moko ya matata mpe ya mobulu, oyo alingaki ntango nyonso kotambola na bakartye ya mabe ya engumba Sydney, na Australie. Baninga na ye mingi bazalaki babandí. Mbala mingi bazalaki koyiba na bandako ya bato, kobunda na babandí mosusu mpe kobɛtana masasi na balabala.
Tony abandaki komɛla likaya ntango azalaki na mbula libwa. Ntango akómaki na mbula 14, azalaki ntango nyonso komɛla marijuana mpe kosala pite. Ntango akómaki na mbula 16, akómaki moombo ya bangi oyo babengi héroïne, mpe nsukansuka akómaki komɛla bangi ya makasi oyo babengi cocaïne, na LSD, to mpe, lokola Tony ye moko alobaka yango: “Eloko nyonso oyo ekoki kopesa ngai kwiti.” Na nsima, ayokanaki na bituluku mibale ya babandí mpo atɛkiselaka bango bangi. Mosika te Tony ayebanaki na ɛsti mobimba ya Australie ete azali moko ya batɛkisi bangi oyo, epai na ye makambo elekaka malamu.
Héroïne na marijuana ezalaki kolya Tony mbongo kobanda dolare 160 tii koleka ata dolare 320 na mokolo moko. Kasi libota na ye ezalaki komona lisusu mpasi koleka. Tony alobi boye: “Mbala mingi babandí bazalaki kolakisa ngai na mwasi na ngai mondoki to mpe mbɛli na elongi ntango bazali koluka bangi mpe mbongo na ndako na biso.” Nsima ya kokɔta bolɔkɔ mbala misato, Tony amonaki ete asengeli kotalela malamumalamu bomoi na ye.
Atako azalaki kokende ndako-nzambe, Tony azalaki komimona ete azali mosika na Nzambe, oyo bazalaki koloba ete atumbaka bato ya masumu na lifelo ya mɔtɔ libela na libela. Kasi ntango Batatoli ya Yehova mibale bakómelaki ye na ndako, Tony akamwaki mpenza na koyoka ete Nzambe asalaka likambo wana te. Tony asepelaki ntango ayokaki ete akoki kobongisa bomoi na ye mpe kozwa mapamboli ya Nzambe. Tony asepelaki mingi na maloba ya Yesu Klisto ete: “Makambo nyonso ekoki kosalema epai ya Nzambe.” (Malako 10:27) Tony asepelaki mingi mpenza na maloba ya kolendisa oyo: “Bópusana penepene na Nzambe, mpe ye akopusana penepene na bino.”—Yakobo 4:8.
Tony asengelaki sikoyo kobunda mpo na kotosa mibeko ya Biblia na bomoi na ye. Alobi boye: “Eloko ya liboso oyo natikaki ezalaki likaya, likambo oyo ekokaki kosalema ata moke te liboso, atako namekaki kosala yango mbala na mbala. Na nguya ya Yehova, natikaki komɛla héroïne na marijuana, oyo nazalaki moombo na yango mbula 15 mobimba. Nakanisaki ata mokolo moko te ete nakotika yango.”
Esika bábanga Nzambe oyo anyokolaka bato libela na libela na lifelo ya mɔtɔ, liteya oyo ezali ata na esika moko te na kati ya Biblia, Tony na mwasi na ye bakómaki na elikya ya bomoi ya libela na libela na paladiso awa na mabele. (Nzembo 37:10, 11; Masese 2:21) Tony alobi boye: “Esɛngaki ngai ntango molai mpe milende mingi mpo na kotosa mibeko ya Nzambe, kasi na lisalisi ya Yehova, nalongaki.”
Ya solo, momɛli bangi yango ya kala akómaki moklisto. Ye na mwasi na ye basaleli ntango na bango mpe biloko na bango mingi na mosala ya koteya bato Biblia. Bazali mpe kobɔkɔla bana na bango mibale oyo babangaka Nzambe. Mbongwana monene yango esalemaki na lisalisi ya nguya monene ya Biblia, Liloba ya Nzambe. Ya solo mpenza, lokola ntoma Paulo alobaki yango, “liloba ya Nzambe ezali na bomoi mpe ezali na nguya.”—Baebele 4:12.
Atako bandakisa malamu ndenge wana ezali komonana, bato mosusu bazali koloba makambo ezangá ntina ete mosala ya Batatoli ya Yehova ya koteya bato Biblia ezali kokabola mabota mpe kobebisa bilenge. Na ntembe te, ndakisa ya Tony ezali komonisa polele ete bazali koloba solo te.
Lokola Tony, bato mingi bayebi sikoyo ete bakoki kolonga mimeseno wana ya mabe. Na ndenge nini? Na ntango moto azali na kondima epai ya Nzambe mpe azali kotyela ye mpe Liloba na ye motema, mpe na lisalisi ya baklisto, oyo bazali baninga ya motema mpe ya bolingo. Tony asukisi na maloba ya esengo oyo: “Namoni na miso na ngai moko ndenge mitinda ya Biblia ebateli bana na ngai. Mateya ya Biblia ebateli libala na ngai. Mpe baninga na ngai ya kartye bakómi kolala na kimya sikoyo mpo bayebi ete nakoki lisusu kosala bango mabe te.”
[Likanisi ya paragrafe na lokasa 9]
‘Na nguya ya Yehova, natikaki momeseno ya komɛla bangi, oyo nazalaki moombo na yango mbula 15 mobimba’
[Etanda na lokasa 9]
Mitinda ya Biblia ezali kobongola bato ▸
Mitinda ndenge na ndenge ya Biblia esalisi bato mingi oyo bazalaki baombo ya bangi ete bátika momeseno yango oyo ebebisaka bato. Talá mwa ndambo ya mitinda yango:
“Tiká tómipɛtola na mbindo nyonso ya mosuni mpe ya elimo, tókokisa bosantu malamumalamu na kati ya kobanga Nzambe.” (2 Bakolinti 7:1) Mibeko ya Nzambe epekisi komɛla bangi.
“Kobanga Yehova ezali ebandeli ya bwanya, mpe boyebi ya ye Oyo-Aleki-Bosantu ezali mayele.” (Masese 9:10, NW) Komemya Yehova nsima ya koyeba ye mpe banzela na ye malamumalamu esalisi bato mingi bálongwa na boombo ya bangi.
“Talelá [Yehova] na motema na yo mobimba mpe ndimá bososoli na yo moko te. Na nzela nyonso na yo, ndimá ye mpe ye [akosembola banzela na yo, “NW”].” (Masese 3:5, 6) Tokoki kolonga mimeseno ya mabe soki tondimeli Nzambe mpe soki tozali kotyela ye motema.