Mituna ya batángi

Maloba kozala na “bomoi na kati na ye moko” elimboli nini?

Biblia elobaka ete Yesu Klisto azali na “bomoi na kati na ye moko” mpe ete bayekoli na ye bazali na ‘bomoi na kati na bango moko.’ (Yoane 5:26; 6:53) Kasi, maloba ya bavɛrsɛ yango mibale ezali na ndimbola moko te.

Yesu alobaki ete “kaka ndenge Tata azali na bomoi na kati na ye moko, ndenge moko mpe apesi mwana nzela ya kozala na bomoi na kati na ye moko.” Liboso aloba maloba wana, Yesu alobaki boye: “Ya solo mpenza nazali koloba na bino ete, Moto oyo azali koyoka liloba na ngai mpe azali kondima ye oyo atindaki ngai azali na bomoi ya seko . . . Ngonga ezali koya, mpe yango oyo sikoyo, wana bakufi bakoyoka mongongo ya Mwana ya Nzambe mpe baoyo bakotya likebi bakozala na bomoi.” Na maloba wana, Yesu azalaki kolobela nguya ya kokamwa oyo Tata na ye apesaki ye: likoki ya kosala ete bato bándimama na miso ya Nzambe. Lisusu, Yesu azali na nguya ya kosekwisa bato oyo bakufá mpe ya kopesa bango bomoi. Mpo na Yesu, kozala na “bomoi na kati na ye moko” elimboli ete azali na nguya ya kosala makambo wana. Ndenge moko na Tata, Mwana azali mpe na “likabo ya bomoi na kati na ye moko”​—ndenge vɛrsɛ yango ekoki mpe kobongolama. (Yoane 5:24-26) Tokoloba boni mpo na bayekoli na ye?

Pene na mbula moko na nsima, Yesu alobaki na bato oyo bazalaki koyoka ye ete: “Ya solo mpenza nazali koloba na bino ete, Soki bolei mosuni ya Mwana ya moto te mpe bomɛli makila na ye te, bozali na bomoi na kati na bino te. Moto oyo azali kolya mosuni na ngai mpe komɛla makila na ngai azali na bomoi ya seko, mpe ngai nakosekwisa ye na mokolo ya nsuka.” (Yoane 6:53, 54) Na maloba wana, Yesu amonisaki ete kozala na “bomoi na kati na bino” ezali na ndimbola moko na kozwa “bomoi ya seko.” Maloba mosusu oyo ekokani na liloba kozala na “bomoi na kati na bino” ezali na bisika mosusu na Makomami ya Grɛki. Ndakisa mibale ya maloba yango ezali maloba “Bózala na mungwa na kati na bino” mpe “komizweláká mbano mobimba.” (Malako 9:50; Baloma 1:27) Na bisika wana, maloba yango elimboli te nguya ya kopesa basusu mungwa to kopesa moto mbano. Kasi ezali nde kotonda mpenza to kozanga ata eloko moko te. Na bongo, maloba “bomoi na kati na bino” oyo ezali na Yoane 6:53 elimboli kotonda mpenza na bomoi.

Ntango Yesu alobaki ete bayekoli na ye bazali na bomoi na kati na bango moko, alobelaki mpe mosuni ná makila na ye. Na nsima, ntango abandisaki Bolei ya Mpokwa ya Nkolo, alobelaki lisusu mosuni mpe makila na ye mpe ayebisaki bayekoli na ye oyo basengelaki kokɔta na kondimana ya sika ete bálya limpa ezangi levire mpe bámɛla vinyo. Yango elingi nde koloba ete kaka baklisto bapakolami, oyo Yehova Nzambe asali na bango kondimana ya sika nde bakotonda na bomoi? Te. Mbula mobimba elekaki banda Yesu alobaki likambo ya kozala na ‘bomoi na kati na bango moko’ tii ntango abandisaki Bolei ya Mpokwa ya Nkolo. Bato oyo Yesu ayebisaki maloba oyo ezali na Yoane 6:53, 54 bayebaki naino te likambo ya kokanisaka liwa ya Klisto mbula na mbula mpe kosalela limpa oyo ezali komonisa nzoto na ye mpe vinyo oyo ezali komonisa makila na ye.

Yoane mokapo 6 eyebisi ete liboso Yesu akokanisaki mosuni na ye na mana, mpe alobaki boye: “Bankɔkɔ na bino balyaki mana na esobe kasi bakufaki. Oyo ezali limpa oyo ekiti uta na likoló, mpo ete moto nyonso alya yango mpe akufa te. Ngai nazali limpa ya bomoi oyo ekitaki uta na likoló; soki moto azali kolya limpa yango akozala na bomoi libela.” Mosuni ya Yesu ná makila na ye elekaki mana. Na ndenge nini? Mpo mosuni na ye epesamaki mpo na “bomoi ya mokili” mpo na kopesa nzela na bomoi ya seko.a Na yango, maloba “kozala na bomoi na kati na bino” oyo ezali na Yoane 6:53 esalelami mpo na bato nyonso oyo bakozwa bomoi ya seko, ezala na likoló to awa na mabelé.​—Yoane 6:48-51.

Ntango nini bayekoli ya Klisto bazwaka bomoi na kati na bango to batondaka na bomoi? Mpo na bapakolami, baoyo bakosangola Bokonzi, likambo yango esalemaka na lisekwa na bango mpo na kokóma bikelamo ya elimo oyo ekoki kokufa te. (1 Bakolinti 15:52, 53; 1 Yoane 3:2) “Bampate mosusu” ya Yesu bakotonda na bomoi na nsuka ya Boyangeli ya Mbula Nkóto. Na ntango wana, bakosila komekama, komonana ete bazali sembo mpe bakotángama ete babongi kozwa bomoi ya seko na Paladiso awa na mabelé.​—Yoane 10:16; Emoniseli 20:5, 7-10.

[Maloba na nse ya lokasa]

[Bililingi na lokasa 31]

Baklisto nyonso ya solo bakoki kozala na ‘bomoi na kati na bango moko’