Koyeba bilembo ezali likambo ya ntina mingi!

“Liboso nakanisaki ete mwana na biso Andreas azalaki koyoka kaka mpasi na motó. Kasi azalaki kolya lisusu te mpe azalaki na fɛfɛlɛ makasi. Motó ekómaki kosala ye mpasi makasi, mpe nakómaki komitungisa. Ntango mobali na ngai azongaki na ndako, tomemaki Andreas epai ya monganga. Monganga atalaki Andreas mpe atindaki ye mbala moko na lopitalo. Nzokande ezalaki maladi mosusu ya monene. Andreas azalaki kobɛla méningite. Basalisaki ye mpe eumelaki te ayokaki malamu.”​—Gertrud, mama moko na Allemagne.

EKOKI kozala ete baboti mingi bakutanaka na likambo oyo ekómelaki Gertrud. Bamonaka bilembo oyo elakisaka ete mwana na bango azali na maladi. Atako maladi nyonso ezalaka makasi te, ezali mpenza likama soki baboti bazali kokipe te bilembo oyo ezali komonisa ete bana na bango bazali kobɛla. Koyeba bilembo mpe kozwa mbala moko mikano oyo esengeli ekoki mpenza kosalisa. Ezali likambo ya ntina mingi.

Ezali na ntina ata na makambo mosusu. Tozali na ndakisa ya tsunami oyo esalemaki na sanza ya Desɛmbɛ 2004 na bamboka oyo ezali na zingazinga ya Océan Indien. Bibongiseli ya mikili lokola Australie mpe Hawaii oyo ekebisaka na makama emonaki ndenge mabelé eninganaki makasi na nɔrdi ya esanga Sumatra mpe emonaki ete yango ekoki kobimisa makama mosusu na nsima. Nzokande, ebongiseli moko ezalaki te na bisika oyo makama yango elingaki kosalema mpo na kokebisa bato. Nsukansuka, bato koleka 220 000 bakufaki.

Bilembo oyo ezali na ntina mingi

Ntango Yesu Klisto azalaki awa na mabelé, apesaki bayoki na ye liteya ete báyebaka kotala bilembo mpe bázwaka bikateli oyo esengeli. Azalaki kolobela likambo moko ya ntina mingi. Biblia elobi boye: “Bafalisai mpe Basadukai bapusanaki epai na ye mpe, mpo na komeka ye, batunaki ye alakisa bango elembo moko oyo euti na likoló. Ye azongiselaki bango ete: “Ntango mpokwa ekómaka bozalaka na momeseno ya koloba ete, ‘Lelo mokolo ekozala malamu, mpo likoló ezali motane lokola mɔtɔ’; mpe na ntɔngɔ ete, ‘Lelo ekozala mokolo ya malili makasi, mokolo ya mbula, mpo likoló ezali motane lokola mɔtɔ, kasi molilimolili.’ Boyebi kolimbola motindo oyo likoló ezali komonana, kasi bilembo ya bantango bokoki kolimbola yango te.”​—Matai 16:1-3.

Lokola Yesu alobelaki “bilembo ya bantango,” alingaki komonisa ete Bayuda ya ekeke ya liboso oyo bazalaki koyoka ye basengelaki kokeba na ntango oyo bazalaki na yango. Etikalaki moke likama moko monene ekómela ebongiseli ya makambo ya Bayuda, mpe likambo yango esengelaki kokómela bango nyonso. Mwa mikolo liboso akufa, Yesu ayebisaki bayekoli elembo mosusu, elembo ya kozala na ye. Makambo oyo alobaki mokolo wana ezali na ntina mingi mpo na biso nyonso lelo oyo.