Bazali kosakola nsango malamu na Bangomba ya Andes

TOZALAKI bato 18 na esika wana ya salite. Tozalaki kolɛnga na malili na kati ya basaki na biso ya kolala mpe tozalaki koyoka lokito makasi ya mbula likoló ya manzanza. Na kotalela ndenge ndako yango ezalaki, tomitunaki soki tozalaki bato ya liboso ya kokɔta wana.

Nini esalaki ete biso bato 18 tókóma na esika wana? Ezalaki mpo na mposa na biso ya kotosa etinda oyo Yesu apesaki bayekoli na ye ya kosakola nsango malamu “tii na esika eleki mpenza mosika na mabelé.” (Mis. 1:8; Mat. 24:14) Tokendeki kosakola nsango malamu na teritware moke ya mosika, na bangomba ya Andes na ekólo Bolivie.

Mpo na kokóma kuna

Mokakatano ya liboso oyo tokutanaki na yango ezalaki naino ya kokóma kuna. Bayebisaki biso ete ezali mpenza na ngonga moko te eyebani, oyo mituka ekendaka na bamboka wana ya mosika. Ntango bisi oyo esengelaki komema biso ekómaki, tomonaki yango moke, yango wana, bamosusu kati na biso bazwaki bisika ya kofanda te. Kasi, nsukansuka biso nyonso tokómaki na esika tozalaki kokende.

Mposa na biso ezalaki ya kosakola nsango malamu na bamboka oyo ezali na bangomba ya Andes na Bolivie. Ntango tokitaki na bisi, tomemaki mikumba na biso, totandanaki molɔngɔ moko mpe tobandaki komata na bangomba.

Atako bamboka yango ezalaki komonana mike, bandako ezalaki mosikamosika, yango wana ezalaki kozwa biso ntango mingi mpo na kosakola na mboka mokomoko. Ata soki totamboli mingi ndenge nini, tozalaki koyeba ete nsukansuka tokomona ndako moko. Tozalaki mbala mingi kobungabunga na kati ya bilanga mpo banzela yango ezalaki nyokanyoka.

“Mpo na nini boyaki liboso te?”

Mwasi moko akamwaki na ndenge toutaki mosika mpe tokendaki tii na mboka na bango mpe apesaki biso kuku na ye ná koni mpo tólamba. Ntango mobali moko ayokaki oyo Biblia elobi mpo na bakufi, atunaki biso boye: “Mpo na nini boyaki liboso te?” Lokola asepelaki makasi na mateya yango, ntango totikaki mboka na bango akendaki kotika biso mpo na kotuna biso mituna nzelanzela. Mobali mosusu, oyo ayokaki nsango ya Batatoli ya Yehova liboso te, asepelaki mpenza na mikanda na biso. Atɔndaki biso mingi ndenge toyaki mpe apesaki biso fungola ya ndako moko mpo na kolala.

Na butu moko ya molili makasi, kozanga koyeba, totyaki bahema na biso na kati ya nyonyo (fourmi) ya mwindo mpe ya minene. Mosika te, babandaki koswaswa biso. Lokola tolɛmbaki mingi, tozalaki na makasi ya kolongwa wana te. Likambo ya esengo, mosika te nyonyo yango ezalaki koswa biso lisusu te.

Lokola tolalaki kaka na mabelé, na ebandeli mikɔngɔ mpe mipanzi na biso ezalaki koswa, kasi ntango butu epusanaki, tomesanaki na mpasi yango. Na ntɔngɔ, tobosanaki mpasi nyonso wana ntango tomonaki mabwaku kitoko mpe mapata ezali kotambola malɛmbɛmalɛmbɛ na nsuka na yango, mpe bangomba kitoko oyo nsɔngɛ na yango ezipamá na ngalasi kuna mosika. Ata makelele moke ezalaki te, kaka lokito ya mai mpe mingongo ya bandɛkɛ.

Nsima ya kosukola, totángaki mokapo moko ya mokolo, tolyaki mpe tobandaki komata malɛmbɛmalɛmbɛ mpo na kokende na bamboka mosusu. Totambolaki mpamba te. Tokutanaki na mobange moko ya mwasi oyo alelaki ntango ayokaki ete nkombo ya Nzambe, Yehova, ezali na kati ya Biblia. Akamwaki makasi! Akokaki sikoyo kobondela Nzambe na nkombo na ye!

Mobange moko ya mobali alobaki ete Nzambe akanisi ye, mpe abandaki koyemba nzembo moko oyo elobaki ete baanzelu batindaki biso. Mobali mosusu, oyo maladi ekangaki ye na ndako, ayebisaki biso ete ata moto moko te ya mboka na bango azwaki likanisi ya kokende kotala ye. Akamwaki mpenza koyoka ete toutaki tii na engumba La Paz. Mobali mosusu mpe akamwaki mpenza komona ete Batatoli ya Yehova bazali kokende kotala bato na bandako na bango, nzokande bato ya mangomba mosusu babɛtaka nde bangonga mpo na kobenga bato na bandako-nzambe na bango.

Ata ndako moko te na bamboka yango ezalaki na kura, yango wana bato bazalaki kolala soki kaka molili ekɔti mpe kolamuka na ntɔngɔ ntango moi ebimi. Yango wana, mpo na kokuta bato na bandako na bango, tosengelaki kobanda kosakola na ngonga ya motoba ya ntɔngɔ. Soki bongo te, tokokuta bato nyonso bakei bilanga. Soki mwa ngonga epusani, bato mosusu oyo basilaki kobanda mosala bazalaki kokata mpo na koyoka nsango malamu oyo tomemeli bango, ntango mosusu yango ezalaki kopesa bangɔmbɛ na bango nzela ya kopema. Bato mingi oyo tozalaki kokuta na ndako bazalaki kotandela biso mposo ya mɛmɛ mpo tófanda mpe bazalaki kosangisa mabota na bango mpo báyoka nsango malamu. Basali mosusu ya bilanga bazalaki kokabela biso masango mpo na komonisa botɔndi na bango mpo na mikanda oyo tozalaki kotikela bango.

“Bobosani ngai te”

Mpo bato bákola na boyebi ya Biblia, esɛngaka kozongelaka bango. Bato mingi basɛngaki biso tózonga lisusu mpo na koteya bango. Mpo na yango, tozongaki na bamboka wana ya Bolivie mbala na mbala.

Na mobembo moko oyo tosalaki na nsima, mobange moko ya mwasi asepelaki makasi ndenge tozongelaki ye mpe alobaki boye: “Bozali mpenza lokola bana na ngai. Bobosani ngai te.” Mobali moko atɔndaki biso mpo na mosala na biso mpe na mbala ya nsima oyo toyaki, asɛngaki biso tófanda epai na ye. Ekoki kozala ete mbano eleki monene ya milende na biso ezalaki ya koyoka ete mwasi moko oyo tosakwelaki nsango malamu na mbala oyo tokendaki kuna akendá kofanda na engumba mpe akóma kosakola nsango malamu.

Pene na nsuka ya mobembo ya liboso oyo tosalaki kuna, petrole oyo tozalaki kosalela mpo na resho esilaki mpe tozalaki lisusu mpenza na biloko ya kolya te. Tolukaki nkoni mpo na kopelisa mɔtɔ, tolambaki biloko oyo totikalaki na yango mpe tobandaki kozonga na makolo. Tozalaki mpenza mosika na engumba oyo tosengelaki kozwa bisi. Nsukansuka, tokómaki na butu mpenza.

Tozongi epai na biso

Mobembo yango ezalaki pɛtɛɛ te, mpo bisi na biso ekufaki. Na nsima, tomataki na motuka moko ya monene oyo etondaki na bato. Mobembo yango epesaki biso libaku ya koteya bato mosusu oyo tozalaki na bango na motuka, oyo balukaki koyeba mpo na nini tokendaki kuna. Atako balobaka mingi te, bato yango bazali boboto mingi mpe bayebi koyamba bapaya.

Nsima ya kotambola ngonga libwa na motuka yango, tokomaki na mboka; topolaki mpe tozalaki kolɛnga na malili. Kasi, tosalaki mobembo ya mpamba te. Na nzela, tozwaki ebongiseli mpo na kobanda koyekola Biblia na mwasi moko oyo afandaka na engumba.

Ezalaki mpenza libaku malamu kosakola nsango malamu na bamboka wana ya mosika. Tosakolaki nsango malamu na bamboka minei ya minene mpe na ebele ya mwa bamboka ya mikemike. Yango etindaki biso tókanisa maloba oyo: “Kitoko boni likoló ya ngomba ezali makolo na ye oyo akoyeisa nsango malamu, ye oyo akosakola kimya mpe akoyeisa nsango malamu ya kosepela, ye oyo akosakola kobikisama.”​—Yis. 52:7; Lom. 10:15.

[Elilingi na lokasa 17]

Tomibongisi mpo na kosakola nsango malamu