Eyano nini Yesu alingaki kopesa?

Bato mingi oyo basambelaka bamonaka ete lingomba esengeli komikɔtisa na politiki. Bakanisaka ete lingomba ekoki kosunga mpo na kosilisa mikakatano ya bato. Kasi, bandimi ya solosolo bamonaka ete lingomba esengeli te komikɔtisa na politiki. Mpo na yo, mokumba ya lingomba ezali nini na makambo ya politiki? Lingomba mpe politiki esengeli kopesana mabɔkɔ?

YESU KRISTO alobelami lokola “moto oyo bato mingi balandaka mateya na ye koleka moto mosusu nyonso na mokili.” Sikoyo, kanisá eyano oyo Yesu alingaki kopesa soki batunaki ye motuna oyo: Lingomba esengeli nde komikɔtisa na politiki? Ntango Yesu azalaki awa na mabele, maloba mpe misala na ye epesaki eyano na motuna yango. Na ndakisa, na Lisolo Likoló ya Ngomba, Yesu apesaki bayekoli na ye malako oyo esalisaki bango báyeba mokumba oyo bazali na yango epai ya bato oyo bafandi na bango esika moko. Tótalela naino makambo mosusu ya lisolo yango oyo ekendá nsango.

Kobongola bomoi ya bato mosusu

Yesu alobelaki ndenge oyo bayekoli na ye basengeli kotalela mokili. Alobaki boye: “Bino bozali mungwa ya mabele; kasi soki mungwa esili elɛngi, ndenge nini elɛngi na yango ekozonga? Ezali lisusu na ntina moko te, kasi bakobwaka yango kaka libándá mpo bato bányata yango. Bino bozali pole ya mokili. . . . Tiká pole na bino engɛnga liboso ya bato, mpo bámona misala na bino ya malamu mpe bápesa Tata na bino oyo azali na likoló nkembo.” (Matai 5:13-16) Mpo na nini Yesu akokanisaki bayekoli na ye na mungwa mpe pole?

Maloba ya Yesu emonisi ete bayekoli na ye bazali lokola mungwa, kaka epai ya bato moke te, kasi mpo na bato nyonso. Bazali lokola pole, kaka epai ya bato moke te, kasi mpo na bato nyonso oyo balingaka komona polele. Ndenge Yesu asalelaki ndakisa wana emonisi polele ete alingaki te ete bayekoli na ye bámilongola na kati ya bato mpe bákende kofanda esika mosusu. Mpo na nini?

Simbá likambo oyo: Mungwa ekoki te kobatela bilei soki basangisi yango na bilei te. Mwinda ekoki te kolongola molili na ndako soki batye yango na ndako te. Na yango, tokoki kokamwa te soki Yesu ayebisaki bayekoli na ye bámilongola te na kati ya bato mpo na kokende kofanda esika moko oyo bato mosusu bazalaka te, mpo báfanda kaka bango na bango. Alobaki mpe te ete bayekoli na ye bákabwana na bato nyonso ya mokili oyo. Kutu, lokola esɛngaka ete mungwa esangana na bilei mpe mwinda elongola molili, esengeli ete ndakisa ya bakristo ebongola bomoi ya bato mosusu.

“Bato ya mokili te”

Kasi, malako oyo Yesu apesaki bayekoli na ye ya kozala esika moko na bato mosusu ebimisi motuna moko ya ntina mingi mpo na ndenge oyo bakristo basengeli kotalela politiki. Mpo na nini? Mwa moke liboso akufa, Yesu abondelaki Nzambe mpo na bayekoli na ye boye: “Nazali kosɛnga yo, olongola bango na mokili te, kasi okɛngɛla nde bango mpo na moto mabe. Bazali bato ya mokili te, ndenge ngai mpe nazali moto ya mokili te.” (Yoane 17:15, 16) Soki ezali bongo, ndenge nini bakristo basengeli te kozala bato ya mokili oyo mpe lisusu kofanda esika moko na bato ya mokili yango? Mpo na kozwa eyano, tótalela mituna mosusu misato:

• Ndenge nini Yesu azalaki kotalela politiki?

• Bakristo basengeli kosala nini lelo oyo?

• Ndenge nini mateya ya bokristo esalisaka bato?

[Likanisi ya paragrafe na lokasa 4]

Yesu amonisaki polele ete alingaki te ete bayekoli na ye bámilongola na kati ya bato mpe bákende kofanda esika mosusu