Nani andimami na Nzambe?

BISO nyonso tozalaka na mposa ya kolingama na bato bazingi biso. Mpo na moklisto, mposa na ye ya makasi koleka ezali ya kondimama na Nzambe. Na Nzembo 84:11 elobami na ntina na Jéhovah Nzambe ete: “Azali kopesa ngɔlu mpe nkembo. Jéhovah akoboya te kopesa eloko malamu na baoyo bazali kotambola na sembo.” Ntango Yesu abotamaki, baanzelu bangangaki na esengo ete: “Kimya na mabelé kati na bato oyo [Nzambe] asepeli na bango.”​—Luka 2:14, MN.

Kasi nani andimami na Nzambe? Masengami na Nzambe makokani na oyo ya bato? Na solo nyonso, ezali bongo te lokola tomonaki yango na lisolo ya liboso. Lokola baklisto balendisami ete “bakóma bamekoli na Nzambe,” moko na moko kati na biso asengeli komituna soki alingaka bato oyo bandimami na Nzambe, to soki alandaka masengami ya mokili mpo na kotalela bato. (Baefese 5:1) Mpo ete tondimama na Jéhovah, tosengeli kotalela makambo lokola ye azali kotalela yango.

Masengami matombwami ya Nzambe

Ntomá Petelo alobaki ete: “Nzambe azali na koponapona te, kasi kati na mabota nyonso, oyo akobangaka ye mpe akosalaka boyɛngɛbɛnɛ andimami na ye.” Lisusu, ntoma Paulo alobaki ete “na nkɔkɔ mɔkɔ [Nzambe] asalaki mabota nyonso na bato.” (Misala 10:34, 35; 17:26) Ezali likambo ya mayele na kosukisa koloba ete atako nzoto na bango ekeseni na makambo mingi, bato nyonso bazali ndenge moko na miso ya Nzambe. Lokola ezali bongo, ekozala malamu te ete moklisto apona moto bobele mpo ete auti na ekólo boye, to na ntina na mposo na ye, to na ntina ya libota oyo ye auti. Kasi asengeli kolanda Yesu Klisto, Ndakisa na ye, oyo ata banguna na ye bandimaki ete azalaki koponapona bato te.​—Matai 22:16.

Mposo ya nzoto ezali mpamba, ezali na ntina mingi te, ezali komonisa te bomoto to bizaleli ya kati ya moto. Kozanga ntembe soki tosengeli kopona baninga na biso, bato tokoki kolya na bango, to nani tokoki kopesa mbote, mposo ya nzoto esengeli te kozala likambo oyo tokotalela mingi. Tobosana te oyo elenge mwasi oyo bakomaki mpo na ye loyembo moko ya kitoko mpe etondi na maloba ya bolingo, alobaki na ntina na ye moko ete: “Ngai nazali moindo mpe na kitoko, . . . nazali moindo, mpo ete moi esili kozikisa ngai.” (Loyembo na Salomo 1:5, 6) Ekólo to mposo ezali te moboko mobongi mpo na koyeba soki tokoki to te kolinga moto. Oyo eleki ntina mpenza ezali ya koyeba soki moto yango abangaka Nzambe mpe asalelaka boyɛngɛbɛnɛ.

Lolenge nini Nzambe atalelaka bozwi ya mosuni? Kati na bato nyonso oyo Nzambe alingaka mpe asepelaka na bango, Yesu Klisto, Mwana na ye, azali oyo ye alingi mpe asepeli na ye mingi koleka. Kasi wana ezalaki ye na mabelé, Yesu azalaki na “esika ya kolalisa motó na ye te.” (Matai 8:20) Azalaki na lopango moko te, azalaki na bandako te, azalaki na bilanga te, to na banzeté ya mbuma te, to na bibwele te. Kasi yango epekisaki Jéhovah te na kokumisa ye mpe kotombola ye likoló ya bato nyonso kati na molongo, longola bobele Nzambe ye moko.​—Bafilipi 2:9.

Yesu Klisto andimamaki epai na Nzambe mpo na bozwi ya mosuni te, kasi mpo ete azalaki mozwi na misala malamu. (Tala 1 Timoté 6:17, 18.) Tala toli oyo apesaki na bayekoli na ye: “Bomibombela biloko na motuya na mabelé te, epai lopomboli mpe mbombo ekobebisa, mpe miyibi bakokɔtaka mpe bakoyibaka. Bomibombela biloko na motuya na likoló, epai lopomboli mpe mbombo akobebisaka te mpe miyibi bakokɔtaka te mpe bakoyibaka te.” (Matai 6:19, 20) Na bongo, na esika ya kopona bobele baoyo bazali na bozwi ya mokili, baklisto basengeli te kokabola bato na kotalelaka bozwi na bango. Bakoluka baoyo bandimami na Nzambe mpo na misala na bango ya malamu kozanga kotala soki bazali bazwi to soki bazali babola na mosuni. Tobosana te ete “Nzambe aponi babola na mokili . . . ete bazala bazwi kati na kondima mpe basangoli na libula na Bokonzi.” (Yakobo 2:5) Soki tobateli likanisi ya Nzambe, tokomitika te kozimbisama na ezaleli oyo ezali komonana lelo ya kosepela bobele na bazwi to ya koluka kondimama na bango.

Mpo na oyo etali koyekola, Biblia emonisi polele ete Nzambe azali kosenga na biso ete toluka boyebi mpe mayele, mpe ete Yesu Klisto azalaki Moteyi oyo alekaki monene awa na mabelé. (Masese 4:7; Matai 7:29; Yoane 7:46) Kasi ezali mayele to boyebi ya mokili te nde esali ete tondimama epai na Nzambe. Na kokesana, Paulo ayebisi biso ete “bato na mayele na mosuni babyangami mingi te, . . . kasi Nzambe aponi biloko na bolema na mokili ete ayokisa bato na mayele nsoni.”​—1 Bakolinti 1:26, 27.

Nzambe akondimaka baoyo bazali na boyebi mingi, kati na makambo mateyami na université te, kasi kati na “monoko na peto,” ya solo oyo ezwami kati na Liloba na ye, Biblia. (Sofoni 3:9) Ya solo, Jéhovah ye moko azali koteya libota na ye lelo na nzela ya bibongiseli ya kolakisama, oyo bipalangani kino nsuka ya mokili. Lokola Yisaya asakolaki yango, bato ya mabota nyonso bazali koyanola na libyangi yango, kolobaka ete: “Yakani, tobuta na ngomba na Jéhovah, epai na ndako na Nzambe ya Yakobo, ete alakisa biso banzela na ye mpe ete totambola na bilekelo na ye.” Na bongo, na esika ya kokumisa kolakisama ya mokili oyo, baklisto bakoluka baoyo bazali komonisa na maloba na bango mpe na misala na bango ete bazali mpenza “bato balakisami na Jéhovah.” Na kosalaka bongo, bakosepela na ‘kimya mingi’ oyo Nzambe azali kopesa.​—Yisaya 2:3; 54:13, MN.

Tokoki kondimama na Nzambe

Ɛɛ, masengami mpo na yango Nzambe andimaka basusu ekeseni na oyo ya bato. Atako bongo, tosengeli kosala milende na komitika ete banzela na ye etambwisa biso soki tolingi komonana bato malamu na miso na ye. Elingi koloba ete tosengeli koyekola kotalela bato mosusu lokola ye azali kotalela bango, kasi te engebene makanisi ya bato oyo epusami mbala mosusu na moimi mpe na makanisi mabe. Ndenge nini tokoki kolonga kosala yango?

Jéhovah Nzambe atalelaka motema ya moto mpe andimaka baoyo bazali komonisa bizaleli lokola bolingo, malamu, boboto mpe motema molai. Tosengeli komonisa bizaleli yango. (1 Samwele 16:7; Bagalatia 5:22, 23) Na boyokani na makoki mapesameli bato, tosengeli kotalela bomoto ya kati, kasi mposo ya nzoto mpe bikólo te. Na esika ya kosepela bobele na baoyo bazali na bozwi ya mosuni, tokotya nde likebi mingi na likanisi na Nzambe na ntina na bozwi mpe tosala milende ete ‘tozala bazwi na misala malamu, bakabi, basungi na bato mosusu.’ (1 Timoté 6:18) Mpo ete tondimama na Nzambe, tosengeli ntango nyonso koluka boyebi ya Nzambe mpe ya Mwana na ye, Yesu Klisto, komonisaka na lolenge yango ete tozali bato balakisami malamu mpenza kati na monoko na peto oyo ezali bongo solo. (Yoane 17:3, 17) Kosalaka bongo, biso mpe tokozala kati na baoyo Nzambe azali kondima.